ငါ လူသားမဟုတ်တော့ဘူး

Chapter 32

ကုဟွိုက်က ၎င်းကို အံ့အားသင့်နေသောအမူအရာဖြင့်ကြည့်သည်။ ဘာလို့ပုန်းရမှာလဲ...ကုဟွိုက် ထိုအကြောင်းကိုတွေးနေစဉ်မှာပင် အလ်ဗ်နှင့်ဇက်တို့က အနားရောက်လာကြသည်။

ကုဟွိုက်က ထိုအပင်ကိုကြည့်နေ၍ တက်ခ်ဇက်တို့ကအလိုအလျောက်ပင် ကုဟွိုက်တစ်ယောက် ၎င်းသစ်ပင်အပေါ် မှအရာကိုစိတ်ဝင်စားနေသည်ဟု ထင်လိုက်ကြသည်။ ထို့ကြောင့် တက်ခ်ဇက်တစ်ယောက်က ကုဟွိုက်အရှေ့သို့ရောက်လာကာ ကျွမ်းကျင်စွာဖြင့် ကုဟွိုက်အား မချီကာပုခုံးပေါ်တင်လိုက်သည်။

ပိုပိုးလ်စ်ငယ်လေး: "....??"

ကုဟွိုက်က ကောင်လေး၏မျက်နှာကိုကြည့်ပြီး အကြောင်းအရင်းအားနားလည်သွားကာ ကြင်ကြင်နာနာဖြင့်ရှင်းပြလိုက်သည်။

"ငါကလူမဟုတ်ဘူး.."

ပိုပိုးလ်စ်လေးမှာ ကုဟွိုက်တစ်ယောက် အပင်ပေါ်မှပန်းကိုခူးနေသည်အထိ စိတ်နှင့်ကိုယ်မှာမကပ်နိုင်သေးချေ။ တက်ခ်ဇက်ပုခုံးပေါ်တွင်ထိုင်နေသည်ဖြစ်ရာ ကုဟွိုက်အတွက် အပင်ပေါ်မှပန်းများကိုလက်လှမ်းမီနိုင်သည်။ ကုဟွိုက် ပန်းအများအပြားကိုခူးလိုက်ပြီး ခေါင်းငုံ့ကာဟိုရွှေ့သည်ရွှေ့စတင်လုပ်လေ၏။

အချိန်အတန်ကြာမှ ကုဟွိုက်ခမျာ ပန်းကုံးလေးတစ်ခုကို ခက်ခက်ခဲခဲလုပ်လိုက်နိုင်သည်။ ထို့နောက် သူသည်ပန်းခွေအဝါလေးအား သူ့ကိုချီထားသောတက်ခ်ဇက်၏ခေါင်းပေါ်တွင် ပန်ပေးလိုက်သည်။ တက်ခ်ဇက်က ပန်းခွေကိုပန်ထားရင်း ၎င်း၏မျက်လုံးများက တဖျတ်ဖျတ်လက်နေ၏။ ၎င်းက ခေါင်းပင်မယမ်းချေ။ ခေါင်းပေါ်မှပန်းခွေ ပြုတ်ကျသွားမည်စိုးရိမ်၍ ကျောက်ရုပ်ကြီးပမာနေ နေလေသည်။

တက်ခ်ဇက်ခမျာ ရှူးကနဲ အသံတိုးတိုးထုတ်လိုက်မိသည်။ ထိုအပြုအမူအရ တက်ခ်ဇက်မှာ ကုဟွိုက်ပေးထားသောပန်းကုံးအပေါ် အရေးတယူရှိကြောင်း ရှင်းလင်းနေ၏။ ပိုပိုးလ်စ်ကလေးတစ်ယောက်က ပန်းကုံးလေးပေးသည်ကိုမြင်လိုက်သည့်အခိုက် ကုဟွိုက်မှာလည်း သူ့အားဂရုစိုက်ပေးသောသူများကို ပန်းကုံးလေးများလုပ်ပေးရန်အကြံကောင်းရလာပြီး ချက်ချင်းလုပ်ပေးလိုက်မိသည်။