အခန်း ၁၉၀
သူတို့က ခြေလှမ်းအနည်းငယ်သာလှမ်းရသေးသည်။ လုချုံးချုံက ရုတ်တရက်အော်လိုက်ပြီး ယဲ့ကျန်း၏လက်ကို စိတ်လှုပ်ရှားစွာ ဖမ်းကိုင်လိုက်ပြီး အခြားတစ်ဖက်သို့ လက်ညှိုးထိုးသည်။ ထိုနေရာတွင် ပြတင်းပေါက် အများအပြားပါသော အိမ်ငယ်လေးကဲ့သို့ အရာမျိုး ရှိနေသည်။
ယဲ့ကျန်းက လုချုံးချုံ လက်ညှိုးထိုးသောနေရာသို့ ကြည့်လိုက်သည်။ ထိုနေရာတွင် ဖောက်ထွင်းမြင်ရမတတ်ကြည်လင်နေသော အိမ်သဏ္ဍာန် အဆောင်လေးနှစ်ဆောင် ရှိနေသည်။ အရွယ်အစားက သိပ်မကြီးသော်လည်း အလွန်အမင်း ကြည့်၍ ကောင်းလှသည်။ သာမန်အိမ်မျိုးနှင့်မတူညီစွာပင် ဘေးပတ်လည်တွင် နံရံများရှိရမည့်အစား ဖန်သားပြတင်းများကသာ ပြည့်နှက်နေလေသည်။
ဆိုတော့ ဒါက ဖန်လုံအိမ်ပေါ့။
"ငါ ကြားထားတဲ့အတိုင်းဆိုရင် ဟွမ်ဖူမိသားစုကပဲ ဖန်လုံအိမ် ဘယ်လိုဆောက်ရသလဲဆိုတာကိုသိတာတဲ့၊ ကံဆိုးစွာနဲ့ဟွမ်ဖူမိသားစုကို ဘယ်နေရာကမှ ရှာလို့မတွေ့တော့ဘူး၊ ဟုတ်သားပဲ၊ ဒီလောကမှာ ဘယ်သူကမှ ဖန်လုံအိမ်ဆောက်တာကို မသိလောက်တော့ဘူး"
လုချုံးချုံက ပြောသည်။
"ဒီဖန်လုံအိမ်ကို လွန်ခဲ့တဲ့ဆယ်နှစ်ကျော်က ချီကလန်က ပြန်ပြင်ဖို့ ကြိုးစားခဲ့သေးတယ်၊ သူတို့က ဟွမ်ဖူမိသားစုက ဆက်ခံသူတွေကို ရှာနေတာ၊ ဟွမ်ဖူမိသားစုက လူတွေကိုရှာဖို့က မဖြစ်နိုင်သလောက် ရှားပါးနေတာလေ"
ယဲ့ကျန်းကလည်း ခေါင်းကိုညင်သာစွာဖိလိုက်သည်။ သူမကလည်း ဆေးဝါးကျောင်းတော်နှင့် ပတ်သက်ပြီး ဖန်လုံအိမ်များ၏ အရေးပါမှုကို သိထားသည်။ သူတို့က အထွတ်အမြတ် ဆန်သလို မြင့်မြတ်နေသည့်အပြင် သူတို့၏ အသုံးဝင်မှုကလည်း များပြားသေးလေသည်။ အချို့သော အဖိုးတန် ဆေးပင်များအတွက် အသင့်တော်ဆုံး နေထိုင်မှုဝန်းကျင်ရရှိရန် အချက်များနှင့် အပြည့်အဝ ကိုက်ညီမှု ရှိလေသည်။
ဖြစ်နိုင်တာက တစ်ရက်မှာ ငါလည်း အထဲကို ဝင်ကြည့်ခွင့်ရလောက်တယ်။
