خلينا من الموضوع هدا وقوليلي..ماتعرفيش اخبار عن حوش الواعر..
ضحكت وقالت..
/نعرف نعرف..قالوا طوبى خطبها واحد من عيلة الفاندي..
رفع حاجبه وبانت ع وجهه ملامح الامتعاض ممزوجه بالغيره..
راما:لكن قالوا ردتهم...
الجالي برفعة حاجب..
/باهي..نبي منك ديري لخالك خدمه تقعد بيناتنا سر..سر رموشه واللي تبيه اني فيه..
راما بضحكه؛ياسلام..سرك مدفون في بير غريق..
ابتسم وهو مضيق عيونه وقال..
/باهي يابير غريق قوليلي قاعدات عند امك البومات صور العرس..عرسي اني وخالك عمر..
راما؛تقريبا ايه..البوم وسيديات..
بضحكه قال..
/حلو...دوري عليهم تمام وجيبي اللي يخصني اني ومرت خالك تمام وليك مني هديه تهبلي لما تشوفيها..
راما بإبتسامه فيها شي من المكر..
/حاضر..
الجالي:اهم شي السر في بير تمام..
راما؛ولايهمك..
تنهد وقال:بري خشي..
ناضت وهي تضحك ومشت من حداه وقالت بتعجب همسا..
/مرت خالك! ..
ضحكت تاني وقالت..يللا ماعلينا المهم الهديه...
خشت للكوجينه..وهو فات من حداها وعقله مابطلش تفكير في طوبى..
☘☘☘☘☘
وفي صالة افراح معروفه موجوده في منطقه من المناطق الآمنه..
كانوا المعازيم يستنوا في خشة العروسه..
وفي من معازيم يراجو امتى يزفوا لولدهم المراة اللي يتمناها..
اهل اسامه مانزلوش العين عن اميمه اللي كانت لابسه فستان سهرة طويل باللون البنفسجي الخافت ربع كم ورقبته مربعه..ضابط ع جسمها مبين جمال قدها..
وشعرها الاشقر القصير مرفوع بطريقه حلوة ومكياجها كان ناعم ابرز عيونها اللي بلون السمي الصافيه..
خوات اسامه كانوا يبوا يحصلوا معاها فرصه بش يهدرزوا معاها وهي كانت حاسه روحها متحاصرة بنظراتهم اللي وترتها لكن ظاهريا كانت تبان عاديه ومش مهتمه...
🌸وفي هالأثناء خشت جهينه ع انغام اغنيه من اغاني الزفة المشهورة وقتها..
كانت طلتها راقيه..فستان الزفاف والتسريحه والمكياج كله راقي وجدا جميل..
اميمه وهي تشوفلها لمعوا عيونها بالدموع كانت فرحانه لخوها فرحة لاتوصف..
وفرحة اختها الكبيره لاتقل عن فرحتها لدرجة دموعها نزلوا ..هي هي الفرحة بالدموع اللي حست بيهم مطيره..
فاتن وهاديه عجبتهم جهينه هلبه..وغرفه كانت مركزه ع تفاصيل طلتها...
🌸اندار الروتين المعروف لكل حفله بعد ماتخش العروسه والفرقه اللي جايه تحي الحفله اشعلت الاجواء..
هيجوا معاها صاحبات جهينه وقريباتها ومنهم خوات اسامه بعدين نزلوها ترقص معاهم..
هي دورت ع طاولة اهل زوجها لما شافتهم حييتهم ونادتهم يجوا..
ناضوا بعد الحاح من سدرة فاتن واميمه ومشوا للمسرح..
انضمولهم ..سلموا ع جهينه وهي خدتهم وقعدت ترقص فيهم..
وعيون خوات اسامه على اميمه بس..
شويه وداروا حواليهم دائرة قعدوا جهينه واميمه في وسطها يرقصوا مع بعض..
ماطولتش اميمه خلت العروسه بروحها وخشت الدائرة بدون ماتركز وتجي جنب خوات اسامه..
ابتسموا وهما يشوفولها ووحده فيهم قالت..
/اميمه..
شافت جنبها تفاجئت..رسمت ع وجهها ابتسامه وهي تقول..
/اهلا..
ابتسمولها وهي ردتها..وكملوا رقيص لين ولت العروسه للكوشة..
وين جوا فاتن واميمه بيولوا للطاوله شدت وحده من خوات اسامه يد اميمه وقالت..
/معليشي تعطينا من وقتك شويه..
هي بإبتسامه قالت؛تفضلوا.
:عرفتينا حني خوات اسامه اني الكبيره وهادي اصغر وحده تزوجت الاسبوع اللي فات..
اميمه بإبتسامه؛مبروك..
بإبتسامه ردت؛الله يبارك فيك...وتوا دور وسيمه ولا..
ضحكت اميمة وهربت بعيونها خجلا عنهم ..
وهما يشوفولها بإبتسامة إعجاب..
🍃وفي طاولة اهلها..
مطيره:نظني كان خليناهم يروحوا بيها..
سدرة؛حتى هي اميمه الله يبارك عليها مايفوتها كان المحروم..
غرفه؛عندي فضول نشوفه..
مطيرة بضحكه:حتى اني..
هاديه؛امه وعيلته قنينين..
سدرة وهي تشوفلهم..
/ايه..يللا مش مهم الشكل المهم يكون راجل مقوم يستاهلها..
مطيره:ايه والله..
هاديه بضحكه؛والاهم يرضى عليه عمي..
مطيره:ياكبدي هييه هو قال بنديرها مسير...
ضحكوا..
🍃🍃🍃🍃
وفي خيمة اهل العريس اللي كان كل شي فيها ع مستوى عالي من النظام والذوق..
كانوا الجارات من بنات المعمل دايرات شوط دربوكه ناشط..
صفيه دور ع المعازيم وهي تصفق تنشط فيهم معاها..
واريج قالبتها زغاريد وشتاوات زادت ولعت الأجواء وبنات فايزة معاها..
وجنة مع البنات الصغار ترقص وتتفرج ع الاجواء الممتعه بالنسبه ليها..
🍃نبيله بإبتسامه؛جنه شواشه..
طوبى بضحكه:تحب الهياجه..
فايزة:بتطلع فرفوشه بنتك هادي..
ابتسمت طوبى وهي تشوفلها..
ع جية سميرة اللي كانت واقفه حدا اريج تصفق وترد وراها في الشتاوات طبست عليهم وقالت..
/كان يخليني عمك الحاج نبات حداكم الليله..
ضحكوا وطوبى قالت..
/علاش!؟
سميرة:عيت بني قريضة كلهم غادي ماتلقي وين تعفسي..
نبيله:لاعاد سميرة انتي تقديهم كلهم..
سميرة سكتت وهي تمرر في نظرها ع الخيمه..
طوبى بإبتسامه:خايفه من الجالي..
وكأنها ماصدقت طوبى تقول هالكلام شافتلها وقالت..
/ياوخيتي ايه مخوفني..هو لتوا ماجاش بيني وبينه كلام لكن شبحاته وهو كله ع بعضه يخوف..
طوبى:اني نقولك خليك عاديه زي قبل وماتبينيش انك خايفه منه..الجالي اكثر واحد في خونه ضعيف شخصية قدام بوه ويخاف منه مايقدر يديرلك شي..
تنهدت سميرة وهي تفكر في كلامها..
ونبيله كانت تراقب في ملامح طوبى وهي تحكي عن الجالي حست في شي من الخوف في عيونها تحاول تخفيه..
فايزة:خلاص سكروا ع المواضيع المغمه ونوضوا هيجوا..
ناضت فايزة ووقفت في نص الخيمه وبدت ترقص..
صاحوا بناتها وصفاء زغردت..
واريج تغني...
اشيه مايرتع هالغزال..الصحرا خلاها ميال..
وتنوض صفاء لأمها وهي ترقص..شدتها امها من ايديها وقعدت ترقص هي وياها وصفاء تغني..
يانجي امي ني..ياسلم امي ني..
جيابة البنات غزله...
ردوا وراها..ياسلم امي ني..
هي كملت...إن شاء الله ماتمرضش بعله..
يانجي امي ني..
ضمت فايزة بنتها وقعدوا يرقصوا مع بعض وهي تغني..
يانجي بنتي الكبيره..يانجي بنتي ني
هي الراي وهي الشيرة..يانجي بنتي ني..
صفاء تسمع فيها وتضحك..
ومروة تزغرد وتاله تصفق وهي تشوفلهم بحبهم..
نظرات الحب نفسها كانت من طوبى ونجمه وعواطف وكنتهم سميره لكن ابتسام يدوب تصفق...
☘☘☘☘☘
وجت اللحظه المنتظرة في حفله العروسه..زفتها هي وعريسها...
طلعوا جهينه من القاعه ورفعوها لدار العروسه وبعد لحظات جابت اميمه خوها يوسف دخلاته عليها وسكرت الباب..
وين جو عيون يوسف عليها ابتسم من قلبه وقال..
/تعرفي..من اول مرة شفتك فيها في المستشفى حسيت انك مش حتمري في حياتي مرور الكرام..
ضحكت وقالت..
/الحاجه هادي حسيتها بعد ماعرفتك اكثر قلت في نفسي شكلك لقيتيه ياجهجهانه..
ضحك وقدملها..شد راسها وطبع ع جبينها قبله بعدين بعد وقال..
/ربي يباركلي فيك ومايحرمني منك..
جهينه بإبتسامه؛ولامنك سوفتي..
ضحك بعدي مسح ع لحيته وقال..
/هاه كيف بيصير توا..
هي بإبتسامه قالت..
/راجي شويه لين تجي المصورة..قدمتله وقعدت تساوي في الياقه متاع القميص وهو يتأمل فيها بإبتسامة حب وراحه..
فعلا هدا وين ارتاح يوسف🌸
☘☘☘☘☘
ويطلوا العرسان ع المعازيم ويبدوا يدرجوا ع انغام اغنية الزفه..
سدرة ماقدرتش تتمالك نفسها لما شافت يوسف بالبدله..
درقت روحها ورا فاتن وقعدت تبكي بصمت..
ومطيره دموعها ينزلوا وهي مبتسمه بفرح وتردد في دعاء..
"الله يبارك عليكم الله يهنيكم"
وهاديه تتفرج وهي متأثرة...
🌸وصلوا العرسان للكوشه..وبدت الفرقه تغني عليهم..
واميمه قربتلهم وقعدت تهدرز عليهم وتناشب في خوها خلتهم يضحكوا...
🌸وبعدين خدوا الصور..ورفعوهم قصوا التورته...ورقصوا مع بعض شويه...
وفي الختام طلع يوسف بعروسته واهله معاهم..
☘☘☘☘☘
وفي خيمة اهل العريس..
مجرد ماوصلهم خبر انهم مروحين بدوا يجروا ع الضيافه للي بيجوا مع العروسه....
☘في كوجينة حوش علي الواعر..
خشت مروة للكوجينه وهي تقول..
/خالتي تبرة وابله سعاد جو..
طوبى:خلاص حوا وتي ضيافه عيلة ابلة زينب والفاندي مع بعض وطلعوا طول..
حواء:ان شاء ان شاء الله..
وجهزت حواء الضيافه وطلعتها بمساعدة مروة..
وقعدوا طوبى واريج وصفاء يعولوا ع ضيافة اهل العروسة...
☘☘☘
وتعدي ربع الساعه..
ويوصل الموكب اللي جايب العروسه..وينقلب شارع القهوة بأصوات منبهات السيارات والألعاب الناريه...
نزلوا العروسه ودخلوها للحوش ومعاهم خالتها وعمتها ووحده من نساوين خوتها..
حولوا الكاب قبل لتخش الخيمه..واول ماخشت يستقبلوا بأغنية ترحبييه مشهورة...
"مرحبا يالافيه"
☘مرحبا يالافية .. مرحبا يالافية
مرحبا يالافية .. قدومك خير وعافية
مرحبا بلي لفي .. مرحبا بلي لفي
مرحبا بلي لفي .. جابها الغالي وجي
مرحبا يامرت خوي .. مرحبا يامرت خوي
مرحبا يامرت خوي .. يامعمرة حوش بوي☘
فرحوا جهينه بإستقبالهم الحلو وخلوها تحس معاهم بالراحه هي نفسها الراحه اللي لقتها معاهم فاتن...
🌸درجوها للكوشه وساعدوها بش تقعمز..
وبدت صفاء دربك..وهما يغنوا عليها وعلى عريسها...
شويه وجت صفيه اللي كانوا دموعها في عيونها..وقفتلها جهينه سلمت عليها وباست راسها وصفيه تدعيلها بالهني والبركه..
☘☘☘☘
بعد ماكملوا الشوط الترحيبي بالعروسه رفعوا اهلها لطاولتهم..
واميمه قعدت واقفه تهدرز معاها..
جهينه:طوبى وين؟!
دورت عليها اميمه بعيونها لين شافتها واقفه تسلم ع اهل الفاندي قالت..شفتيها اللي لابسه قفطان رمادي في الابيض هديكا..
شافتها جهينه عاطية بالظهر:ايه..الله يبارك ع الشعر..
ابتسمت اميمه...
قعدوا معاها بعيونهم لين خلت أهل الفاندي ولفت بتمشي للعروسه..شافتهم لقتهم يشبحولها بإبتسامه ردتها..
وصلت في العروسه مدت يدها وقالت..
/مرحبا بكنتنا الدكتورة..
ضحكوا وصافحتها جهينه...
طوبى بإبتسامه:الله يبارك عليك يابخت وسيفه بس..
هي بضحكه قالت:تسلمي حبيبتي..واخيرا شفتك..
ضحكت طوبى بعدين قالت..
/عن اذنك شويه..
جهينه؛خودي راحتك..
مشت طوبى بسرعه خشت داخل..
اميمه:شبه الحفله كلها ع راسها..
جهينه:ربي يبارك عليها..لكن تبان صغيره..
اميمه بإبتسامه:ايه..
جهينه:ايه حقه شن قصة ابله وسيله وبناتها معاك؟
ضحكت اميمه وبدت تحكيلها...
☘ومن الاجواء عند النساوين للأجواء عند الرجاله اللي قعمزوا في مربوعة حوش طوبى..
فرحة يوسف كانت باينه في عيونه تتناثر منهم وقداش عزابي حاضر معاهم تمنى يكون معاها واولهم اللي قلبه قاعد يعاني من عذاب شوق ماله حد يراجي في لحظة الوصل الحلال المبارك من رب العالمين بفارغ الصبر..
ومن غيره..عبد القيوم..اللي كان معاهم ومش معاهم لما يكون في مكان يخصها قلبه يتلهف لهفه كبيره ع شوفتها..
ليه شهر مالمحهاش حتى لمحة..ليه شهر يحس وكأنه في مكان الغيوم حجبت عنه الشمس والجو فيه بارد من غير روح...
والعيون الزرقا بنظراتها الماكرة مركزة معاه لكن قطع عليه تركيزه صوت عبد الرؤوف وهو يقول...
"هيا ياافندي تلحلح"
ربيع:اقرصه اقرصه يايوسف بش يلحقك..
ضحكوا..
حسين:انتم هكي تحاسبوا رواحكم تشجعوا فيا ع الزواج!راكم كرهتوني فيه..
علي:انت تتسبل وخلاص..
عبد الرؤوف:اهو حتى الحاج علي قالها..
لاحظ مختار ان جده ماتفاعلش مع عبد الرؤوف وقبلها لاحظ انه موطي عليه العين زي مانقولوا..
حس ان في شي صاير ولازم يعرفه..
عبد المطلب:خلوه يعيش حر نفسه علاش يجيب لراسه الصداع..
علي الواعر تهكما..
/قالها اللي تزوج زوز..
وتعالت اصوات الضحك في المربوعه..كلهم كانوا يضحكوا ماعدا التارقي يدوب يجامل بإبتسامه...
☘فهالليله محمد شنيبه وولاده ماحضروش لأن المناسبه في حوش طوبى..
لكن قعد المهدي سهران في المطحن بروحه استفردت بيه ذكرياته الحلوة وخلاته عايش فيها...
☘والحلوة اللي رافقاته في هالذكريات كانت ترقص مع اختها الصغيره ع شوط دربوكه اخير في هالليله المميزة..
كانت سدرة ترقص بإيديها كتافها وطوبى ترقص قدامها..
والغني عليها...
"بو سالف عالظهر رماته
ماهي كيف اللي قصاته
الجزء 104 ( اوراق متساقطة / ورقة وداع )
Начните с самого начала
