Daomu Biji (Myanmar Translation)

9

ငါတို့တွေအကုန်လုံး နေရောင်စတင်မှိန်ဖျော့လာတဲ့အချိန်အထိ လမ်းလျှောက်နေခဲ့ရပြီး ညနေလေးနာရီမထိုးခင်မှာ ငါတို့သွားချင်တဲ့ ပန်းတိုင်ကို ရောက်လာခဲ့ကြတယ်။

ငါတို့တွေ စစ်တပ်သုံးရွက်ဖျင်တဲတွေ တစ်ဒါဇင်လောက်ကိုတွေ့လိုက်ရပြီး အများစုက အသစ်ကျပ်ချွတ်တွေလိုဖြစ်နေတယ်။ ဒီရွက်ဖျင်တဲတွေရဲ့ အရေအသွေးကအရမ်းကောင်းပြီး ဧရိယာတစ်ခုလုံးက သစ်ရွက်ဆွေးတွေနဲ့ ပြည့်နေပေမဲ့ အထဲမှာက အရမ်းကိုခြောက်သွေ့သန့်ရှင်းနေပြီး နေ့စဉ်သုံးပစ္စည်းတွေအများကြီး ပါဝင်နေတယ်။ ရွက်ဖျင်တဲတွေကို လှန်လှောရှာဖွေပြီးတဲ့နောက်မှာ ပြန့်ကျဲနေတဲ့ ပစ္စည်းကိရိယာတွေအများကြီးကို တွေ့ရပေမဲ့ အလောင်းတစ်လောင်းမှ မတွေ့ကြရဘူး။ ကြည့်ရတာ အဘိုးကြီးက ငါတို့ကို မလိမ်တဲ့ပုံပဲ။

မီးစက်တစ်ခုနဲ့ ဓာတ်ဆီဘူးနည်းနည်းတောင် ရှာတွေ့လိုက်သေးတယ်။ အင်ဂျင်ကို မိုးကာနဲ့ပတ်ထားပေမဲ့ ကျန်တဲ့အစိတ်အပိုင်းအများစုက အခြေအနေမကောင်းလှဘူး။ တကွေ့က မီးစက်ကို နှိုးကြည့်ဖို့ ကြိုးစားပေမဲ့ စက်မနိုးလာဘူး။ ဒါပေမဲ့ ဓာတ်ဆီတွေကတော့ အကောင်းအတိုင်းပဲ။

ငါအကုန်လုံးကို လှန်လှောကြည့်ပေမဲ့ ရှိရှိသမျှသော နာမည်တံဆိပ်ပြားတွေအားလုံးက ဆွဲဖြုတ်ခံထားရတာကို တွေ့လိုက်ရယ်။ ရွက်ဖျင်တဲတွေနဲ့ ကျောပိုးအိတ်တွေမှာ အမှတ်တဆိတ်လိုဂိုတွေ တစ်ခုမှရှိမနေဘူး။ ထူးဆန်းလိုက်တာလို့ ငါ့ဘာသာတွေးမိလိုက်တယ်။ ကြည့်ရတာ ဒီလူတွေက သူတို့ဘယ်ကလာလဲဆိုတာ မသိစေချင်တဲ့ပုံပဲ။

ငါတို့တွေ တဲနားမှာ မီးဖိုလိုက်ပြီး ညစာကို ရိုးရိုးရှင်းရှင်းလေးစားလိုက်ကြတယ်။ အဘိုးကြီးက မကောင်းဆိုးရွားက ရုတ်တရက်ကြီး ပြေးထွက်လာပြီး သူ့ကိုဆွဲသွားမှာကို ကြောက်နေတဲ့ပုံနဲ့ စားနေရင်း ပတ်ဝန်းကျင်ကို စိုးရိမ်တကြီးပတ်ကြည့်နေတယ်။ လေလုံပိတ်ထားတဲ့ အစားအသောက်တွေက အရသာအရမ်းဆိုးလွန်းတာကြောင့် စားတယ်ဆိုရုံလေးစားလိုက်ပြီး ရေပဲမော့သောက်နေလိုက်တယ်။

မျက်နှာသေကတော့ စားသောက်ရင်း မြေပုံကိုကြည့်နေတယ်။ သူက ထူးဆန်းတဲ့ မြေခွေးမျက်နှာပုံဆွဲထားတဲ့ မြေပုံပေါ်က နေရာကို လက်ညှိုးထိုးပြလိုက်တယ်။
"အခု ကျွန်တော်တို့ရောက်နေတာ ဒီနေရာဖြစ်လောက်တယ်..."