الدب
بقلم يحيى إدريس
البارت 13
فتحيه . فتحت عيونها
لقت قصي يبخلها في عطر ع خشمها امي كويسه انتي
فتحيه . تجلطني وتصحصحني اخرى
قصي . شن درت ياامي بس
فتحيه . ترقص يافاشل ياصايع ترقص ع نت قدام ناس
قصي . الله غالب هذ الحكم
فتحية . ماحكمش هذ طياح سعدي نا طياح سعدي نا
قصي . لا حول ولا قوة الا بالله بفضلي غيرتي صالتك ولا تو مش عاجبك شغلي
فتحية ارقد خلاص مش عاجبني فكني من تك توك هذ والا والله نعطبها ع خشمك ياقصي نحمل 9 شعور ونذبحو حوليين ونديرو عشاء وطهور وناس
ماشيه وناس جايه وفرحانه جبت 3 رجاله اخرتها ترقصلي ع تك توك قدام العرب
قصي . ماتغلطيش ياامي مش عرب بس اللي يتفرجو حتى اجانب
فتحية . يافرحتي فيك والله
قصي . افرحي وزغرتي ولدك قعد مشهور
فتحيه . كان ماتصبي من قدام وجهي نعجنك ياقصي
قصي . صبا يجري وطلع من حذاها ..
حطيت تليفوني ع شحن اوووه توا الواحد يرقد متريح بعد ما ابنخييني روحو لهلهم الحمدلله تمددت هااه وغمضت عيوني ورحت ف نوم عميق
وعيت ثاني يوم صباح الجمعة ..
فتحت عيوني نثاوب حطيت يدي ع فمي ونلمس حذاي مافيش حاجه فتحت عيوني وقعمزت نشوف
تليفوني وين لقيت شحن بس وتليفوني مش قاعد
بعدين نسمع صوت موسيقى واغنية دجاجتي الكبيرة تعيش في الحظيرة تبيض كل يوما
خبطت يدي ع وجهييي وطلعت قارن حواجبي لقيت ريا وسكينه قصدي خواتي يبتسمن وبنخيتي لصغيره
ماسكه تليفوني ع اليوتيوب اخرى شوفو البقاحه .
ميه الف مره نقولكم امسكو ضناكم امسكو ضناكم
اختي الكبيرة . حرام امليكه ياقصي
قصي . جوج وماجوج امليكه تي هذول شياطين
اختي الوسطيه . نزعلو ياقصي را
قصي . انفلقو بعدين اول امس غير خذيتن عويلتكن عليش تجونا كل يوم عندنا كل يوم عندنا ماعندكمش حواشين تاكلو فيهن قطعتونا لا زيت لا طماطم لا حليب لا دجاج يسد
فتحيه اسكت ياولد نساباتاك جايبنلك شغل يطلع ذهب
قصي . اللي هو
فتحيه . شغل في مطعم
قصي . احلفي يمي
فتحيه . والله واخرى بنات فيه
قصي . وين نساباتي
فتحيه . مربوعه لضيوف
طلعت شفتهم قاعد معاهم عادل
خشيت نبتسم ياربي مرحبا ياربي مرحبا مرحبتين ومرحبا ب نساباتي العين قابله وين معش نشوف
فيكم
انت مش فاضي ع تيك توك
هههه عيب نا نتكبر ع ناس كلها انتو تعالو ديما باهي
باهي باهي شنو حالك
قصي . تمام الحمدلله جيبو عيالكم يغيرو جو مساكين ديما محبوسين ..
ان شاء الله ان شاء الله قصي
قصي ، تربعت وابتسمت انعم
تشتغل ف خدمة توصيل
قصي . فنصت عيوني شنوووو
اسمع بسسس
قصي . لالااه نا نا قصي اشهر واحد ع تيك توك نشتغل دليفري هذي نهايتي
فتحية . مالا نهايتك شنو تذل نفسك الي يسوى واللي مايسوى اللي ماعندش كرامه يدير خبر هذ
تخيل ف منظرك لو تزوجت ودرت عويل شافو
منظرك وانت تحجل ع نت شيكون موقف تبي نقوللهم كنت نلعب ونبصر ..
قصي .طبس راسه ومشيت سيبتهم بعد خذيت تليفوني من بنخييني وقعدت نبي نفتح بث بس
مزلت متحشم تغدينا وبعد الغداء جت عمتي نجوى
نجوى . تعزيق العلل بين بنات القطعاني وبنت السعيطي ع الواتس
فتحية . مزالت المشكلة والعه
نجوى . بنت لسعيطي اطلقت وعزقت العويل على راجلها
ردت اختي الكبيرة طيح سعدها الهبله
نجوى . صبايا توا يجيبن ويعزقن
وريت عيت شعيب طالعين زرده توا شفتهم حطو
كوانين والقزاقيز ف سيارة وركبو كلهم ..
فتحية . تغير جو باهي
وردت اختي الوسطيه شن رايكم بعد طاسه ه شاهي نمشو لمحل سجى داير تخفيضات ..
نجوى . غالي عليكن الحاجه رخيصه انتن
فتحيه . ماتمشيش معانا مالا
نجوى . في عينك تمشي خطرها نا عليش جيت اها لميه جت ريت عيت منصور يسيقن ل اميه طالعه
من فم بابهم
فتحية عطهم دعوة هما ديما يسيقو لين كملو علينا ف اميه
نجوى . فرح بنتهم حددوه شكله كل يومين طالعه هي وامها لسوق ياخذن ف كهربائيات
ردت بنتنا لصغيرة . غير يلمن الخبزة اليابسه ديما طالع عندهم قناطش مالهم ومال تسيق
نجوى . والله صدقتي وتعالت ضحكات مش عارف سبب مهم يضحكن وخلاص
قصي . سادكم قرمه ع ناس عيب عيب تحشمن
نجوى . اسكت انت يابو 5 مواد امشي اقرا مالك ومال خبر صبايا
فتحية . والله صدقت فيك
قصي . عمتي نجوى ماعندكش حوش تقعدي فيه يوميا عندنا ولا عند وحده من جارات وكان ف حوشك تراقبي ف ناس من راقب ناس مات هما
نجوى . لا والله لا متت هما لا شي فرحانه وعندي اخبار ومانيش مكسده كل يوم عندي جديد وحصري
هيا يافتحية هيا يابنات نلحقو ع محل سجى لتخيضات قبل م زينوبه وبناتها يكملن علينا لبضاعه
فتحية . هيا هي
ثاني يوم
فتحيه . ها شن صار
قصي . اصبري شوي يمي
فتحيه . شن نصبر لك ساعه ماسك تليفوني
قصي . شن تبي اسمك
فتحيه . سميني على اسمي فتحيه البخيتي
قصي . نسميك ام قصي احلى وارقى
فتحيه . في عينك اصبر عادي نختار اي اسم
قصي . عادي
فتحيه . سميني موتو ياحسادي
قصي . ضحك من يبي يحسدك يمي بس
فتحيه . دير وانت ساكت
قصي . باه مواليد الكم اكيد 55
فتحيه . 55 في عينك مواليد 89
قصي . احم احم
فتحيه .79
قصي . احم
فتحيه . خلاص 69
قصي . تمام 🤣
فتحيه . كنك تضحك مش مصدق
قصي . مصدقك مصدقك بس عطيتك اصغر
فتحيه . هي مزال
قصي . الجنس ذكر ولا انثى ولا مخصص نديرلك مخصص مشكوك فيك انك ذكر من عياطك و
فتحية. صكر فمك ياعجل را نهبكك
قصي . هذا اسلوب انثى
فتحيه . قصييي
قصي . هاك فيسك وتليفونك
فتحيه . تعال هنا ضيفلي جاراتي وبنات
قصي . دوريهم بروحك
فتحيه . خزي عنبوك ماركه بدت تضيف
قصي . فتحت تيك توك لقيت روميساء فاتحه بث
ريدر . اكتبي ع جبينك انا حماره
روميساء . تمام وكتبت ع جبينها
قصي . هذي شن ادير
روميساء . كتبت وبدو يضحكو عليها
وهي تضحك معاهم
عرفت حاجه ان اللي بيخش العالم هذ يتنازل ع مبادئه ويبدا بدون قيمه ومضحكه فتحت بث
قصي. اولا السلام عليكم ثانيا هذي اخر مره نطلع فيها ف بث بس قبل مانصكر نحب نقول كلمتين نحنا بدينا تافهين لدرجة حد عشان لايكات وفلوس
وتكبيس يتنازل عن مبادئه يفقدهن بالتمام يبدا لعبه عشان ناس او شوية مرضى يتفاعلو ويضحكو شي قمة ف تفاهةه الله كرم الانسان وقال لَقَدْ خَلَقْنَا الإنْسَانَ فِي أَحْسَنِ تَقْوِيمٍ تجو انتو تذلو روحكم
ع خاطر شوية قروش تذلو نفسكم وتخلي اللي
يسوى واللي مايسوى يطق فيكم سامحوني خوتي وان شاء الله معرفة خير وهذ صفحة بنصكرها نهائيا ...
نجوى ادق ع باب
فتحتلها مبروكه خير يانجوى شن حالك
نجوى . الحمدلله شن حالك انتي
مبروكه . خشي تفضلي
نجوى . وباه وخشت قعمزت
مبروكه . اييه شخبارك
نجوى . يانعلي اخبار عدوك مكسده لا نطلع لا نخش
مبروكه . حتى نا فات يجني البنات خاطيها مانطلعش
نجوى . اها امس كنت عند فتحية بناتها كلهن عندها
مبروكه . ماشاء الله
نجوى . لكن لكن شكله ف حسس بينهم وبين البنت الوسطيه نازلين ف عيالها هزايب
مبروكه . فتحيةغالي عليها عيال الكبيرة والصغيره
نجوى . دايرات عرم موالح لكن ماعليهن شي طعمه
موالح مخجمات لين جتني ليه واسهال ..
مبروكه . بايرات مافيهن بركه
نجوى . يالله شن دخلنا بيهم نسيت نقولك ولدهم قصي ريته توا ع تيك توك قال بيصكر صفحه وقال
انه ربي كرم الانسان وماني عارف ايش كلام مثقفين
مبروكه . احسن ما دار
نجوى . بنت عيت شعيب بعد روحو امس من الزردة سمعت عياط مشيت نطمن عاد جيراني نحساب موت ولا شي حاجه نسمع ف ولدهم يقول ع البنت دايره تليفون سكرت ايش دعوته سكرت هذ
مبروكه . اصبري ننشد بنتي عصرانه وخذت تليفونها واتصلت ببنتها ها ياعصرانه شن حالك وحال ضنا
عصرانه . الحمدلله يام انتي شنو حالك وحال صحتك
مبروكه . تمام تمام ماعنديش رصيد قتلك
عصرانه . ها يام
مبروكه . شمعناها تليفون سكرت
عصرانه . معناها تليفون سري دايرته من ورا راجلها ولا هلها
مبروكه . يييييه يييه طاح سعدها وعليش سري
عصرانه . والعياذ بالله تحكي مع شباب ولا مع شي راجل من هذي اللي دايره تليفون
مبروكه . بنت عيت شعيب صكري خلاص رصيدي
عصرانه . مع سلامه
مبروكه . تقول عصرانه معناها دايره عيلاقه
نجوى . حطت يديها ع خدودها هييه اقصف شبابها
مبروكه . اي والله بنات اخر زمان فضحبهن
نجوى . ربي يستر ع بنات ناس يالله شن دخلنا فيهن
مبروكه . والله العظيم
نجوى . فتحيه دارت فيس اسمها موتو باحسادي
مبروكه ب ازدراء حسادها على شن بنحسدوها ع طياح سعدها
نجوى . ضحكتني وماعندي نيه لضحك
مبروكه . هبله ه الفتحيه ه وضنوتها
...
ثاني يوم ف الجامعة
روميساء . انت كيف ادير هك
قصي . شن درت
روميساء . تصكر تيك توك ناس دير مستحيل عشان توصل لربع اللي انت وصلتله ادمر كل شي ببساطه
قصي . مانبيش نعيش العيشه هذ
روميساء . بتعيش ف الفقر وجهل
قصي . الكرامه وعزة النفس تمت جهل لو هك نبقى جاهل طول عمري ماعنديش مشكلة
روميساء ب ازدراء . فوتك منه جو هذا مش لك
قصي . لي نا اخترت نعيش بقدري ومحد يطق فيا
روميساء . اخر كلام
قصي . هذ قراري نهائي
روميساء . وعلاقتنا لعند هنا وتنتهي
قصي . شن دخل علاقتنا هتشتغل شغل اخرى
روميساء ضحكت . انت شتحساب روحك حبيتك صح
قصي . كيف يعني
روميساء . فيق يابابا شوف نا من وانت من شوف شكلي وشكلك
قصي . ليش ارتبطتي بيا مالا
روميساء . ضحكت يصير منك محتوى قلت يطلع منك ترند ونكسب من وراك لكن دام خلاص ننهو كل شي
قصي . دايرتني محتوى انا..
روميساء . بلاش حركات مصدوم وجو متوقع اني نحبك يعني
قصي . لو لفيتي دنيا كلها مش هتلقي حد يحبك كيفي لكن نا خسارة فيك ربي يعيشك نفس شعور
اللي عيشتيه لي توا ومشا وسيبها
روميساء . ضحكت وشقلبت عيونها
صهيب . حبي هي تعالي افطري
روميساء . هي جاية
للحديث بقية
