~عن نفسي~

chapitre sans titre

17/12/2023

قررت اليوم بش نكتب بالدارجة التونسية

كي ما تلقى شي يريحك تولي تكتب بأي لغة كانت و تجرب لعلى وعسى توصل لحاجة باهية..

ماعنديش موضوع معين في مخي، كثرت المواضيع و حار فكري بيناتهم
لكن قلت خليني نعمل حاجة نحبها و الي بعدت عليها توا مدة طويلة..

هزتنا الدنيا و شغلتنا على كل الي يعجبنا و نساتنا في رواحنا!
الجملة هاذي كل نهار نزيد نؤمن بيها أكثر و أكثر
الدنيا نساتني في روحي و في كل حاجة تخصني
خلاتني سارحة و هايمة فيها، عقلي موش مركز و موش منجم يخمم
نعيش أيامي كيما هي من غير حتى نكهة و من غير حتى معنى..
في الحقيقة...
نحب نعيش!

21 سنة و نحس في ثقل في قلبي و أكتافي على عكس الي كان لازمني نكون عليه
21 سنة و نحس في روحي كي الشمعة الطافية
21 سنة و نحس في روحي كي الوردة الذابلة

نار شاعلة في قلبي موش عارفة نطفيها و أفكار مشتتة في عقلي موش عارفة ننظمها
نحس في فوضى في كل تفاصيل حياتي..

وصلت لمرحلة انو معاد يفرحني شي و حتى كان فرحت ديما فما حاجة منغصة عليا مانعرفهاش شنيا
لا احساس لا مشاعر باهية كان التعب و الاختناق

وصلت لمرحلة نرى في كل شي بالأسود وقتلي الدنيا من حولي تنجم تكون ملونة
اي نعرف، المشكل فيا موش فالدنيا.

ماعنديش طاقة لحتى حاجة
لا بش نسمع لا بش نتكلم لا بش نتحرك..

على ذكر الكلام...
معادش لاقيتو و كي نجي بش نفسر انا فاش نحس نتعب مالجملة الأولى...هذا كان وصلت قلت جملة
تعبت و أنا كل مرة نقول تعبت
تعبت و أنا نحكي على حاجات موش مفهومة
تعبت و أنا نتشكى
تعبت مالوجيعة!

الأمر خرج عن سيطرتي و معادش نعرف شنعمل
نحاول نكون لاباس، لكني نكذب على روحي و قاعدة نغطي في عيش الشمس بالغربال و ننزل على قلبي

معادش نعرف شنوا الي يستحق و شنوا الي لا...
الي نعرفو هو انو اعصابي معادش تتحمل و قلبي تعبى لين جمد.
معادش نحب نسمع كلام و محاضرات و مواعض
تعبت منها من كثر ماسمعتها
تعبت من كلمة "عادي" وقتلي هو موش عادي و عمرو لا بش يكون عادي.

لولا ايماني بربي لصارت برشا حاجات خايبة
الحمدلله على نعمة الاسلام.

على ذكر النعم..
السواد الي في حياتي موش مخليني نرى مليح النعم الي عندي
اي نعترف الي عندي برشا نعم و الي كان تراها الناس من برا يقولو ماتنجمش تحكي عالمشاكل و انتي عندك هذا الكل...
لكن مشاكلي تتجاوز هذا الكل!

"شبيك وليت هكا راو مايواتيكش"
جملة وليت نسمعها تتكرر من طرف الناس الي تعرفني
الناس الي تلاحظ في التغير الي صاير فيا و موش فاهمة
الناس الي تقلقت منو ممكن زادا
انا بنفسي نحس بالتقصير معاهم، نحس في روحي موش العبد الي عرفوه و موش العبد الي كان معاهم
تقصيري معاهم يوجعني برشا و تصرفاتي معاهم توجعني أكثر..
موش بيدي..

كي نجي نخمم نقول بالك انا هكا من قبل، بالك هاذي حقيقتي و انا مانيش عارفة
بالك الي عشتو كانت فترة باهية و انتهت و رجعت كيما انا...لكن جزء مني موش مقتنع
و كي نسمع ملاحظاتهم نزيد نتأكد انو الفترة الخايبة هي الي موش أنا، هي الي موش متاعي و هي الي ماتواتينيش!

عندي برشا محبة في قلبي و برشا حاجات مزيانة
عندي طاقة و أفكار
عندي أحلام و طموحات
عندي قدرات
هاذم الكل مسلمة فيهم و موش عارفة نستغلهم
نخمم فيهم كل يوم، كل دقيقة ولكن من غير فايدة.

على ذكر المحبة..
دخل لحياتي عبد العام هذا حبيتو حب الدنيا و مافيها
وقتاش و كيفاش صار هذا الكل مانعرش، كل شي صار بسرعة لكنو كان أعمق ملي كنت نتصور..

نحب نقلو يا حبيب روحي تمنيتك عرفت الروح الحية الي فيا و جيت في وقت خير
انتي تقلي الي انا عملت برشا حاجات باهية في حياتك اما صدقني كنت نجم نعمل أكثر، الله غالب جيتني في وقت كل حاجة فيا مريضة و مكسرة
نحاول نعطيك قد مانجم و ساعات نحس روحي مقصرة
ساعات نحس روحي زادا كلي موجات سلبية و مافيا ما يتقرب
تمنيت راني نحكيلك فالحاجات الباهية أكثر من الخايبة تمنيت راني نجيك بأخبار باهية و نجيك فرحانة من قلبي..
لكن الدنيا خلاتني نتعب و نزيد نتعبك معايا

نحب نولي لاباس على خاطري و على خاطرك، نحب نرجع نحيا ماللول و جديد و نحبك تلقى فيا بلاصة مزيانة و زاهية، لكني موش لاقية طريق للحكاية هاذي
نتمنى نلقاها في أقرب وقت.

خايبة برشا كي تلقى الي بنيتو الكل يطيح فالماء و تتفرج فيه و ماتنجم تعمل شي..
خايبة برشا كي تحس روحك بدون حيلة.

.
.
.