سداد وبنت العرب

البارت الثالث والثلاثين

هلات/ نعم تردين شي

الق/ أريد شي أمسح بي الأرضية لإن تقيأت
وهي ما قصرت  انطتني رول مال كلينس مطبخ وگالتلي مسحي بسرعه قبل ما خالتي مومه تعرف ترى هسه تگلب الدنيا لان هي من النوع كلش نظيفه الى حد الهوس

صعدت فوگ ومسحته وخليت الكلينس الي ستعملته بعلاگه ونزلته للحاويه إلي بالگراج ومن رجعت دخلت للمطبخ ظلت حسره بگلبي أريد أعرف هلات شبيها وهي واگفه تنظف بالمطبخ الي ما اعرف شنو ينظفون منه والله مطبخهم أنظف من وجهي گلت خلي أسألها أسئلة عامه وأخذ وانطي وياها بالحچي وبعدين اسألها شبيچ

الق/ انتوا أقارب انتي وسردار

هلات/ اي سردار آبن خالتي وسداد آبن خالتي

الق/ اكيد انتي وسردار زوجتوا عن حب

هلات / مو بالضروره ألي يزوج يكون مزوج عن حب
اكو زواج أقارب أكو زواج المصلحه آخر شي تفكر بي الناس هو الحب

الق/ وأنتي إي نوع زواجچ

هلات/ شگد أكو نساء مدفونات بالحياة تحت زواج فاشل وأنتي تگدرين تگولين زواجي مصلحة على زواج أقارب ومن هذا كله الزوجه هي الخسرانه

الق/ انتي شبيچ چنتي تبچين لكون سردار ما موجود
وهي عبالك تعجبت لكون ما فهمت عليها لإن رفعت حواجبها  بعدها درت بلا مبالاة

هلات / لا اذا موجود واذا ما موجود مو مهم عندي

ألق/ وبعدني أريد احچي ودخلت مومه وطبعًا مومه عبالك شرطي بس تفتر وتراقب وتنطي أوامرها

مومه/ هلات أكثر من مره ماكو كلام مع الغرباء بشي يخص البيت

ألق/ وهلات اكتفت بس بالاعتذار ورجعت تكمل تنظيف ومومه رجعت عليه وطلبت مني أصعد للغرفه وما أنزل منها الا للضروره القصوى
صعدت وأني مشغول تفكيري اكثر بهلات وما يقارب المغرب سمعت صوت مومه وهي صيح عليه نزلت وچان اكو بيدها علاگه مرسوم عليها كأس وثعبان ومكتوب عليها اسم الصيدلية

مومه/ هذا العلاج إلي كتبته الدكتوره الچ بعد يبقى لما يجي سداد وهو يصرف

الق/ واجتي هلات وظلت تباوع على العلاگه الي بيدي
وسألت/ اذا هي مريضه شنو دخل سداد بيها
واني جاوبتها اني مو مريضه اني حامل
بس شنو من صدمه بينت على وجهه تخبلت وهاي أول مره أسمع صوت هلات عالي

هلات/ حامل شنو حامل منين لا تگولين

الق/ وبعدها هلات ما مكمله كلامها قاطعتها مومه بصوت عالي وحاسم هلات الموضوع ما يخصچ صعدي فوگ لغرفتچ
وهي ما حچت شي بس هزت راسها بالموافقه وصعدت فوگ  وظلت مومه تعلم بيه شلون اخذ العلاج
گتلها/ خاله اني أعرف أقره وراح اعرف كم مره اخذه

مومه/ لا انتي حماره خاف يصير بيچ شي وابتلي انوب بدل ما سردار يحير بسداد يصير يحير بمومه وسداد