روح في بحر الظلام

الحلقة السابعة

شافني اجا عليه حضني كال

عماد::اني اسف. يابه اعذريني جنت معصب بسبب عمج الگ.....بنيتي الجبيرة شعندي غيرج.. والله يابوية بعز روحي انتن

حضني وباس راسي بجيت مهضومه بجيت من الظلم من كلشي

رانيا::لا بابا عادي ماصار شي لا تعتذر..

بعدين راح اعتذر من زياد ومشمش فرحانه تضحك لان رجع بابا يضحك. روحهه من الدنيا بابا وهو كذالك ابد مايضربهه ولا يزعلهه

عماد: امكم وين.. كالها وهو يتفحص البيت بعيونه

سولفنالة كلشي وحيل ضاج على خالة جميلة امراة طيبه ومحترمة بكل معنى الكلمة

حطينا العشة
هسة بلشنا وفاتت ماما. طفرت اريد اسألهه شصاير

عماد:: اكعدو تعشو ممنوع ينفتح اي موضوع ل بعد العشة

كعدنة نتعشة واني بالكوة ابلع الاكل بس منتضرة اسمع اخبار سرى.. بس خلصنا شلت الاكل.. وكعدت استفسر منهه شصاير ماما سولفيلي

ليلى:: خطية البنية منهارة. انوب واكعة اديهه ورجليهه مجرحة ومخيطة. وجميلة خطية بالمستشفى ساعدتهه نضفتلهم البيت وجهزت حاجاتهم واجيت

رانيا:: سودة بوجهي . عمري على عمرها هاي ماتتحمل هسة تتخبل  ياربي ماعدهه غير امها

العبرة خنكتني صرت بالكوة اتنفس.. كمت دخلت جوة منهم ضليت ادعيلهه واقرالهه قرأن

ثاني يوم اجيت من المدرسة لكيت  صوت ضحكة  زياد يرن واصله للشارع يمه احس كلبي طفر فدوة لفرحتك دخلت مبتسمة فرحت الفرحته قبل لا اعرف السبب حتى

لاكتني مشمش بالباب وجهه احمر منتضرتني حضنتني ومدت ايدهه بجيب الجنطة تعرف مكان حلوياتها

:تررة كااففي صرتي عجووز وبعدج تدوورين سووالف اطفال

:عززاا رانيا بس لا مجبتي

ضحكت وانطيته ورحت لزياد لكيته كاعد يم ماما ويسولف بحماس.. بس شافني صاح

زياد:: هلااا هلاا يوجهه الخير لج بس صبحت بوجهج عرفت يومي خير. مدلي ايدة لزمتهه وگعدت

ليلى:: فلك طرك زويد قصدك يومية ماتشوف الخير لان تصبح بوجهي

زياد::كلبي ودكاته امي شعندي غيرج اقشمرهه شبيج جاي اتلوك عندي سالفة يمهه

يحجي بصوت ناصي عود اني ما اسمع

ليلى::سالفتيش زياد لاتورط البت بخبالك البت كوة خلصت من ضيم عماد لا تتخبل وبطل سوالفك

رانيا:: شكو زياد شصاير ليش هيج فرحان. فرحني وياك، ترا كلش ضايجة وروحي طالعة

زياد:: شلووون لكيت شغل يشك شك ادللكم دلال بعلي بس من باجر راح ابدي ويوميتي 50 الف لااا وبعد يجوز حتى طبخ ما اخليكم تطبخون