سداد وبنت العرب

البارت السابع

الق / عمه مو بكيفچ لا تصرفين من يمچ اني موافقه وبلغي عمو نزار اني موافقه ازوجه

نضال/ يمه يمه يمه شلون عرامه بس  تريد رجال آني متأكده هذا صاحبچ واني اگول لنزار اني شعليه يطبكم عرج

وراحت عمه نضال لغرفتها واني هم دخلت لغرفتي ورحت طلعت الموبايل من مكانه السري ولگيت أكثر من إتصال من هيثم بس رديت عليه ظل يحچي ويصيح على شلون هيچ مسوين بأمي المفروض تحترموها  اني اجيت من الباب مو من شباچ شنو قابل جايه تجدي منكم
وظليت اهدئ بي لما سكت وغلقت الخط ويا الفجر ونمت وحسيت على عمي نزار يسب ويغلط گبل طفرت من فراشي وبس وصلت يم باب الغرفة أنفتح الباب بقوه بحيث وگعت بالگاع من قوة ضربة الباب بيه وهو شافني بالگاع سوها عليه وليه كل دفره تجيني  منه ولا ثانيه بحيث الدفر مالته فر بيه الغرفة چنت وره الباب صرت بأخر الغرفة وأبويه وأخويه يعيطون من الخوف وعمي نزار/ يصيح  عليه على جايبه صاحبها اي وآني أخلي أيدي بيد واحد  مطيرچي ولچ نضال تگليله ما عدنه بنيه للزواج ومخطوبة اني نطيتها  وهاي تخلين عينچ عليها واني اعرف المن انطيها

وعافنه وطلع وان شاء الله تطلع روحه نعنع اعظامي أريد اگوم من مكاني  ما اگدر اگوم انوب اعظام القفص الصدري اذا احرك روحي احس بسچاچين وتنغز بيه بصدري  ودخلت نضال يمي وبدت تتفلسف براسي

نضال/ يمعوده إنتي شلون توافقين عليهم ترى شكلهم مو راحة على شنو مستعجله هستوچ دخلتي ب 15 سنه

ألق/ كل البلاوي من جوه راسچ واخاف عبالچ حرضتي عمي عليه لا متوهمه  هذا الشي لا يخوفني ولا يهمني

نضال/ حبيبتي ترى انتي على نيتچ عمچ نزار يعرفهم همه شنو لهذا رفض هو مو مثلچ معمي على عيونه

وراحت لغرفتها ودزوا خبر لاهل هيثم أنه احنه رافضين وأتصل عليه وهو يشجع بيه ويگلي / لا تهتمين ألق هسه ادز الهم ناس موجهه وعمچ ما يگدر يرفض

والايام الي بعدها بقينه بتوتر واهل هيثم حتى مختار المنطقه دزه على عمي نزار بس بقى جواب عمي واحد انه ما عدنه بنات للزواج وهيثم موقفه واحد انه يريد يقنع عمي نزار بزواجنه وطبعًا اي بنيه غيري شوف حبيبها يرفضوا وهو يبقه متمسك بيها تفكر حبيبها ما يگدر يعيش بدونها وهي اكيد على موقفه هذا ضحي بالغالي والرخيص على موده وطبعًا اي بنيه سوي هيچ هذا يعتبر قمة الغباء

وطبعًا بقى رفض عمي نزار لهيثم وبعدها بشهر إجى عمي نزار من المغرب والعجيب انه هو ما يجي ابد بهيچ وقت بس شنو وجهه أصفر وشلون وحده عدها ولاده متعسره هو نفس الوضع بس يفتر بالبيت الى ما حدود ساعه 1 بالليل هجموا جماعه على البيت وكلهم لابسين أسود وملثمين ومن دخلوا چان باب المطبخ مقفول والباب من فوگ جام ومن جوه حديد وهمه آول ما بلشوا كسروا الجام وسوه صوت الي نايم بسابع نومه يگعد كلها نرعبت بحيث صوت التكسر مال الجام ويه العياط مالتنه يثول أكثر وعمي نزار نزل من الدرج وهو يتوسل بيمن ما ينعرف بس الباب ما قاوم هواي ونفتح ودخلوا وهمه ما سووا النه شي لان هدفهم چان عمي نزار واجوي 3 أشخاص عليه واحد منهم جر الموبايل مال عمي نزار وطلع السيم كارت وكسره وضرب الموبايل حيل بالحايط وفلشه وخلوا ايد عمي نزار وره ظهره وكلبچوا وبعدها خلوا چيس اسود براسه وأخذوا وطلعوا وبعدها سمعنه شخطة السيارة الي اخذت عمي نزار