گالولي طبعه صلف
رديت لا مو صدگ
گالولي ناره موجره
ومن تقترب تحترگ
گلتلهم آنه منو
ماي وأطفي المحترگ
آنه الملسلي رفگته
وآنه المضحك المختنگ
وبكل درب ليه أثر
الرافگني ميخاف الزلگ
لو كثروا الوجهين اظل
آنه المعاشر صدگ
گالولي جرب واقترب
ولتلوم لو جاسك شتم
گلتلهم لساني عسل
ومنظومة چلماتي نظم
وما يمحي افعالي الدهر
تذكار مدگوگه بوشم
اتركتهم وامشيله لن
گام وتلگاني ويظم
جسمي وحظني بعجب
حسيت بگليبه ظلم
ولاعب بحاله لعب
خيرك سألته وشني
جاوبني والدمعة تصب
چنت آنه ألهم يخي
بالگيظ نسمة وتهب
ولو جاسهم برد الشته
صرت آنه ألهم حطب
وما خلي واحدهم يزل
چي حافظ اخطار الدرب
لو شفت واحد مختنگ
عليه المسامر وجب
تالي عرفتهم دغش
وما غزر وياهم ملح
هاي آنه قصتي بمختصر
ولجيتك گلبي انفتح
وما أدري ويايه علي
عكاز أنت لو رمح
بجيتك رايد دوه
تزيد جروحي جرح
وضحلي جيتك شني
معتاز كلش فرح
تگدر تگول الوكت
جمعنا أنته وانه
ثنيناتنه نجسد شخص
هد الزمان ابدنه
والخلگ لو تنذر عمر
ما ويوفولك سنه
