أنا الما بعت خله ولا خان
وعلي دارت سوالف كان ما كان
حچه عني الكلف وصاحب الوگفه
وحچه عني اليضدني وطول لسان
هاك اسمع أكلك وخلها تذكار
وفتح عين عقلك ولا تصم آذان
صگر طبعي واطيرن فوگ الغيوم
أبد ما چان طبعي اطباع غربان
گلت عني دني حسبالك أنت الفوگ
ولك مو چنت أشوفك دوم تنهان
واصرف ناظري واتناسى ما صار
واسكت واگولن هذا هم انسان
لا طاريك ذكرته بشين فد يوم
واذا رادوا كلف أگولن وينك فلان
حسافة نكرت زيني وياك والزاد
عيب على الزلم تنكر ملح خلان
وسفه على الزمن دگ دگته ويا الخوش
والأرول ذاع صيته وبعالي شان
