Kristine Series 06: Kapirasong Papel

Chapter Eight

Papaitaas na ang private elevator na humihinto lamang sa 24th at 25th floor nang kabahan siya. Isang kabang hindi niya mawari.

Atubili siya nang bumukas ang elevator sa 24th floor dahil sa kabang nararamdaman.

Strange, sa sarili ay bulong niya.

Kinuha ni Aura ang plastic card sa bag at isinubo sa security lock. Nang bumukas ang pinto ay pumasok siya.

Inilapag niya ang bag sa ibabaw ng bar at naglabas ng isang bote ng alak, nagsalin sa kopita.

Sumimsim siya ng alak bago pumasok sa kuwarto. Agad ay sinalubong siya ng pabangong panlalake. Tumindi ang kaba sa dibdib niya.

Ang alam niya'y walang tao roon kaya saan galing ang pabango?

Sinundan ng ilong niya ang pinang-gagalingan ng amoy at huminto siya sa tapat ng pinto ng banyo.

Nang pihitin niya ang doorknob ay hindi iyon naka-lock. Binuksan niya ang pinto at nanggilalas siya sa nakita.

"A-anong ginagawa mo rito?"

Naroroon si Miguel, wearing only his birth suit, nakatapat sa shower. Ito man ay hindi nakahuma nang makita si Aura.

Nang makabawi sa pagkabigla'y di-sinasadyang nagbaba ng tingin ang dalaga.

"Oh!" bulalas niya nang makita ang tanda ng pagiging lalaki nito. Nag-init ang mukha niya't hiyang-hiya sa sarili.

Bagkus na maalarma'y nagtawa pa si Miguel. "Wanna join me, sweetheart?" nanunuksong tanong nito.

"Que bruto!" Iyon lang at mabilis siyang lumabas ng banyo.

Nakaupo si Aura sa isa sa mga stool sa bar nang lumabas ng kuwarto si Miguel na nakatapis lamang ng tuwalya. Tumutulo ang basang buhok nito.

Iniiwas ng dalaga ang tingin dito.

Kumuha ng kopita si Miguel at nagsalin ng alak. Bottom's up nang uminom.

"Hindi mo pa sinasagot ang tanong ko. Ano ang ginagawa mo rito?" Upang maikubli ang pagkailang ay naggalit-galitan siya.

"Mayroon akong permiso mula sa mag-asawa. Maaari akong magpunta rito kung kailan ko gusto."

Walang nasabi sa kanya si Krizelda, at hindi niya alam kung sinadya ng kapatid upang magkita sila ni Miguel.

"Well, wala akong magagawa kung gayon. I'd better go."

Akmang tatayo sa kinauupuang stool si Aura nang hawakan ni Miguel ang braso niya. "Please stay. I'll cook dinner for us at gusto kong magkakuwentuhan tayo."

Tumitig siya sa nakikiusap na mga mata ni Miguel. Nagtatalo ang isip kung pagbibigyan ito.

"Promise, I'm not going to touch you. Gusto lang kitang makausap, please."

Sa bandang huli'y napahinuhod din siya nito.

Nagbihis si Miguel ng boxer shorts at sando. Sisipol-sipol ito habang naghahanda ng pagkain.

Unti-unting nare-relax si Aura habang pinagmamasdan si Miguel.

"So, you can cook," komento niya, wala lang masabi.

"Yeah. Sanay na ako nang walang ibang nag-aasikaso sa akin."

Makalipas ang kulang isang oras ay magkaharap na silang nakaupo sa bilog na mesa sa dining room.

"Hmn, it's delicious," puri niya matapos tikman ang soup na niluto nito.

"Puwede na ba akong mag-asawa?" nakangiting biro ni Miguel.