طوبى "جنة طوبى"

الجزء71\2

#طوبى "جنة طوبى"
#جمان_فريد
#الجزء_الحادي_والسبعين"روزناما"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#دعاء_ذي_النون
ْدعاء ذي النون وهو في بطن الحوت،
قال النبي ﷺ:
دعوة ذي النون وهو في بطن الحوت:
لا إله إلا أنت سبحانك إني كنت من الظالمين، فإنه لم يدع بها رجل مسلم في شيء قط إلا استجاب الله له.
الالباني في صحيح الترغيب والترهيب
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لكنها الخَيبة يا سَيدي ، إذا أصابت قلباً هدمت مشارقُه ومغاربُه ..🍃
___________________________________________
خش عليها الدار..
كانت مقعمزة ع السرير شاده كتاب وتقرة فيه..
وين خش عليها قالت..
/روحوا؟
هز راسه وهو ماشي يطلع حوايج من الدولاب..
نبيله:الموضوع اللي جاك ع خاطره لطفي يخص طوبى؟
قعد واقف لحظات بعدين سكر الدولاب ومشي بيطلع من الدار وهو يقول..
/بالله نبيله ماتسأليني عن شي ماعنديش رغبه نحكي في شي..
وطلع من حداها وخلاها تفكر بقلق...
🍃🍃🍃🍃🍃
وتعدي ساعات الليل لين يوصل لنصه...
وعيون طوبى ماجاهم النوم..
النوم...شبه نساته...كان قدرت ترقد نومها يكون متقطع...
ترقد وتنوض مفزوعه..من الكوابيس اللي تشوف فيها لين كرهت النوم بكل وبدت تخاف منه..
ويفوت ليلها ..مرة تقرا قرآن..مرة تذكر في الله عزوجل..
ومرات تسرح في همها لين يغافلها النوم ساعه او ساعتين قبل الفجر..
بس الليله لعند اذان الفجر وطوبى مش قادره ترقد..
الخوف كبير داخلها..الحركه اللي دارها الجالي خلاها تتأكد انها مش حتخلص منه بسهوله وممكن تدفع ثمن هالخلاص غالي جدا...
برقبة منحنيه لخالقها بنية السجود..ودموعها ينزلوا منها ويطيحوا ع السجاده...
كانت تهمس بخوف وتناجي في المؤمن...
"ياربي...اني خايفه خايفه هلبه.. قلبي خايف...ياربي"
وغمضت عيونها بشده وهي تبكي بألم وبكتمان...
معاش قدرت تكمل وكأن اللي في قلبها كله وين بطلعه جثم ع صدرها وماباش يطلع..
لكنها كملت تقول وهي متعبه من البكي المكتوم...
"انت عارف كل شي ياربي عارف اللي في قلبي ياربي ياربي الأمان ياربي الأمان"
🍃مرات تخونا الكلمات ومعاش نعرفوا كيف نعبروا من قوة المشاعر اللي نحسوا بيها بالذات لو كانت خوف كبير مع حزن اكبر...يثلعتم اللسان ومعاش يعرف يقول شي...
لو هالشي يصيرلنا قدام بشر زينا لو كان حبيب ممكن يواسينا بدون مايفهم..ولو كان بعيد حيتذمر...
بس خالقنا اللي يشوف لقلوبنا..
عارف كل شي..ومع هذا يسمعك ويواسيك ويهديك ويرفع معنوياتك...
زي ماصار مع سيدنا موسى لما امره الله سبحانه وتعالى يمشي لفرعون بش يدعوه للتوحيد وياخد بني إسرائيل..
فرعون اطغى حكام الأرض وقتها واكثرهم قوه وجبروت وفي بينه وبين موسى عليه السلام ثار..
كيف بيقدر يواجهه برغم هدا كله؟!
خاف موسى لأنه قبل ليكون نبي مرسل هو انسان خاف ع نفسه من بطش فرعون..
خاف لكن ماقالش لربي وقتها انه خايف..
(فأوجس في نفسه خيفة موسى)
لكن ربي اللي يشوف لقلبه كان عارف رد عليه وقاله..
(لاتخف)
ومش بس امن خوف ورفعله معنوياته بقوة لما قاله..
(إنك انت الأعلى)
يعني فرعون ع قوته وجبروته وملكه اللي مخوفينك انت أعلى منه..
وكيف مايكونش اعلى منه ومعا ربه الأعلى...!؟
🍃طوبى كانت في اضعف حالاتها وفوقها مراة حامل ومعروف حزن المراة الحامل كيف يكون مضاعف ع اتفه الامور..
فمابالك باللي عايشاته مراة زي طوبى..!؟
لو مالجئتلاش كان حيهون عليها لأنه ارحم الراحمين..
فكيف وهي واقفه ع بابه تشكيله وتناجي فيه..!؟
طوبى لما كملت الصلاه قعدت مقعمزة في مصلاها وبدت تردد بهمس..
"استغفر الله واتوب إليه...استغفر الله واتوب اليه"
وملامح الحزن مسيطرات ع وجهها ودموعها سيل ولابو يوقفوا...
فجأه...
حست بنسمه بارده حلوة..حلوة هلبه...خشتلها من الروشن اللي كانت تصلي مقابلاته في الصاله..
خشت منه لقلبها طول...
حست وقتها ان الثقل اللي كان ع صدرها كله راح...
وحلت محله راحه عجيبه...
خلت ملامح الحزن ع وجهها تتبدل تلقائيا لإبتسامه خفيفه طالعه من وسط قلبه..ابتسامه راحه...محلاها هالابتسامه وسط الدموع..
غمضت عيونها..وقعدت تستشعر في طبطبة ربي ومواساته اللي مافيش زيها...
وبدت تردد بهمس تلقائيا...
لاإله إلا الله وحده لاشريك له له الملك وله الحمد وهو كل شي قدير..
وقعدت تردد فيها...لين سمعت آذان الفجر...
"الله أكبر"
فتحت عيونها وشافت للروشن وهي مبتسمه بإمتنان ودموعها قاعدين ينزلوا وقالت بصوت هامس..
"الحمد لله"
☘ع كل شي..الحمد لله..ع كل لحظه حسينا فيها بالأمان مهما كان قصيره..الحمد لله..يبلي ويعين...وهو اللي قال...
"وبشر الصابرين"....
🍃🍃🍃🍃🍃🍃
تاني يوم...
الأحد..13مايو سنة 2018...
الساعه 9:30صباحا..
في الفيلا متاعه مقعمزين هو وخوه في الجنان يفطروا..
عمر: في الاول استاكيت ومعاش فهمت شي بس بعدين لما قعمزت مع روحي وفكرت كويس فهمت لشني تبي توصل..
الجالي يسمع فيه وهو ياكل وماباش يعلق
تنهد عمر وقال:باهي قولي كيف بدير توا بعد قرار بوك..
رفع يده شويه وحركها فوق ولوطا وهو ياكل..
فهمه عمر قصده بإنه قاعد هني.
عمر:بنجيب شلاتيتي وبنقعد هني..
بلع الجالي اللي ياكل فيه بعدين قال..
/ماتعباش..رمضان جاي وطوبى بتروح..
عمر عقد حواجبه وقال..
/شن اللي مخليك واثق لهالدرجه انها توليلك!؟
رجع ياكل بدون يرد..
وعمر يشوفله يريبه..
فجأه..
سمعوا جرس الفيلا يرن والباب يدق..
شبحوا الزوز للباب.
بعدين الجالي رجع يشوف للفطور وهو ياخد منه وياكل ويقول..
/نوض شوف مني؟
عمر بتهكم:نخدم عندك ..
الجالي شافله بإمتعاض بعدين خدي منديل وناض وهو يمسح في ايديه ومشي للباب..
وعمر خدي مق الكابتشينو وهو يحرك في راسه يمين ويسار وقعد يشرب..
🍃وصل الجالي في الباب وفتحه لقي قدامه منيه بنت جميله..
منيه بإبتسامه احراج؛صباح الخير...
الجالي:صباح النور..
منيه؛اسفه ع الازعاج..بس قطوستي طلعت من حوشنا وخشت حوشكم معليشي تجيبهالي!؟
الجالي وهو يشوفلها جت بين عيونه طوبى..
وتفكر حالتها لما راحت بينكا مرة وجتهم.لحوشهم دور عليها تفكر هداكا الموقف بتفاصيله وحس بشعور مؤلم....
منيه استغربت نظراته وقالت..
/خوي جالي؟
هو استاقظ وقال:متأكده انها خشت هني!؟ من بكري مقعمز في الجنان ماشفتش قطاطيس بكل..
منيه بضحكه بإحراج؛متأكده شفتها في تسجيلات الكاميرا متاعنا وهي طالعه من حوشنا وخاشه لحوشك ورا واحد نزل من السياره المدرسه هني..
واشرتله ع سيارة عمر..
هو هز راسه وقال:لحظه..
والتفت شاف لعمر وقال بصوت عالي..
/بالله عمر دور ع الجنان وشوف كان في قطوسه هني ولاهني!؟..
عمر ناض وهو يتململ ومشي يدور ع القطوسه..
شويه الجالي شاف لمنيه وقال..
/شن حال الوالد..
هي هزت راسها وقالت:الحمد لله..
هو غير عيونه عنها وقعد يراجي في عمر...
شويه شافه جاي وفي يده قطوسه بيضا..
الجالي:شن لونها..
منيه:بيضا..
الجالي هز راسه وقال:صح خشتلنا..
وصل فيهم وطلع بيها وقال بإبتسامه..
/صباح الخير..
منيه لما شافاته حس وكأن في تيار كهربائي سري في جسمها...
وعمر مكمل يقول..
/لقيتها لابده ورا صندوق لوح..
ومدهالها..
خدتها وهي تسرقله في النظر وقالت؛شكرا..نستأذن..
ولفت ومشت طول لحوشهم وقلبها يدق بقوة..
خشت للحوش وسكرت الباب..
عمر بضحكه؛تقول رايح منها ولدها..
الجالي وهو يتفكر في طوبى..
/اللي زيها عندهم حن عجيب لكل شي..
عمر شبحله بإستغراب وقاله..
/ان شاء الله خير ياغالي شن في!؟
شبحله الجالي بملل وقال..
/خش داخل خش..
ضحك عمر ومشي خش...
وهو قعد يحرك في راسه يمين ويسار ووين جي بيسكر الباب شاف لحوش جيرانهم بنظره عابره..
وكان خلاص حيسكر الباب..
بس...!
《 متأكده شفتها في تسجيلات الكاميرا متاعنا وهي طالعه من حوشنا وخاشه لحوشك 》
الجمله هادي اللي رجع تفكرها وركز فيها كويس خلاته يفتح الباب مرة تانيه وقعد يشوف للباب...
مرر نظره حواليه وهو يفكر...وشويه ارتسمت ع وجهه ابتسامة مكر جانبيه خفيفه..
طلعت منه تنهيده تشبه فحيح الثعبان..بعدين سكر الباب...
🍃🍃🍃🍃🍃
الساعه 11:00صباحا..
في جنان حوش الواعر اللي كانت تسيق فيه مطيره..
وفردوس مقعمزه خداها تفرط في الفول والزوز يهدرزوا..
/مايبيش يحكي شن قاله..
مطيره وهي تجبد في الميه بالسياقه قالت بغيظ..
/اه كان نحصل عليه هالسفتول البصطاردي..
وخبطت السياقه ع الأرض وجبدت الميه..
فردوس بقرف؛سحيقه...ولى عندي زي الشيطان وين تجي سيرته نتعوذ منه..
مطيره وقفت وهي تقول بتعجب.
/اني ياربي نبي نعرف وين كان مدرق هدا كله وين!؟ كيف بنادم يقدر يمثل وينافق هكي بس!؟
فردوس؛تعرفي اول ماحكتلي طوبى عقلي مااستوعبش بسرعه ماصدقتش..هدا الجالي الرزين العاقل اللي وين نشوفه نتحشم منه معقول يطلع حق.ير هكي!؟
مطيره؛قالوا يامزوق من برا شن حالك من داخل..ااه ياقهرتي قداش كانت سدرة تعزه وفرحانه بطير اللي خداها الجالي.وكل شويه تقول..مهنيها ومدللها ودايرلها ماتبي..اااه يانويرتي عليها بنيتي كبرها قبل وقتها شيبلها راسها..
فردوس بضيق:قصدك حتى انتي لاحظتيه الشيب اللي فشعرها!؟
مطيره بقهر:ايه ريته ريته..ورجعت تجبد في الميه بغيظ وقهر ودموعها نزلوا..
وفردوس قعدت تفرط في الفول وهي تدعي..
/جعنه مقهور ومعتور
🍃واللي يحكوا عنها راقده في دار المعيشه والمكيف شغال فيها..
راقد بعمق...ليها هلبه مارقدتش هكي...
🍃استراحه محارب ماطولش🍃
🍃🍃🍃🍃🍃
"ياحنه اني قصتي حزينه هلبه هلبه...حني تلاته بنات وعندي 5اولاد كبار اني اخر العنقود طبعا.."
مروة:باين عليك..
مناسك بضحكه:صح مطيورة شويه..
ضحكت مروة..
مناسك تنهدت وقالت:المهم بابا وماما منفصلين من بعد ماجابتني امي بسنه..امي تنازلت علينا ومشت عاشت حياتها..وبوي تزوج حتى هو طبعا مرت بوي هادي مراة حرفه صرفه مدايره فينا الويل معذبتنا حني البنات ومهججه خوتي الاولاد ويوميا ناكلوا في طريحه من بابا بسبها
دمعوا عيون مروة وقالت بوجع..
/لاحول ولاقوة الا بالله..
وتنفجر مناسك ضحك..
ومروة تشوفلها بإستغراب..
مناسك بضحكه؛نبصر عليك..
مروة بأنزعاج؛بصارة مالغه..معقوله تفاولي عليكم بالسو وتضحكي!.
مناسك بضحكه؛لاما فاولتش حقه بوي وامي مطلقين وامي تنازلت علينا لكن بوي خدي بعدها مراة تحطيها ع الجرح يبرا..حنونه وعسوله ونحس فيها مرات صاحبتي..خوتي الولاد يموتوا عليها وخواتي المتزوجات تقول اختهم كيف قريبه عليهم..سبحان ربي خدي شي وعطي شي..
مروة وهي متأثره؛اول مرة نسمع بمرت بو كويسه؟
مناسك بضحكه:تو يجي يوم ونعرفك عليها...
مروة ابتسمت وهي ساكته..
مناسك:المهم خوتي الولاد كلهم متزوجين ماعدا زوز واحد خاطب وعرسه قريب والتاني عزابي..وخواتي كلهم متزوجات...
مروة؛بصراحه حاسداتك ع خوتك خمسه الله يبارك..
مناسك؛ع شني ياحسره ياريتني زيك..
مروة بإنزعاج؛قولي استغفر الله خيرك تدوي هكي انتي!؟
قعدت تضحك مناسك بعدين قالت..
/عندك حق مش مجربه الخوت وشقا الخوت ودراه كبد الخوت..خانقيني خنق..ممنوع نطلع لأي مكان اخطا حياش الاقارب؛وصاحباتي كان يبوني يجوني ممنوع نمشي لحد والسوق هدا مستحيل نعفسه نشري اون لاين بس ولا مرت بوي تاخدلي؛باهي اللي جينا مرتاحين ماديا كان هدا راحت عليا ليل..
مروة ودمعتها في عينها..
/من خوفهم عليك مايبوا حد يطق فيك حتى بنظره احمدي ربك هادي نعمه كبيره كان جاك يوم وحد وصل فيك تلقيهم زي الجيش قدامك ياخدوا حقك تالت ومتلت...
نزلت دمعه من عينها مسحتها..
مناسك بضيق؛باهي خلاص نغيروا.السيرة..احكيلي عليكم..
مروة؛ماعندي مانحكي غير ان حني تلاته بنات لأمي وبوي متوفي من واني صغيره هلبه مانذكرش منه الا حاجات بسيطه هلبه..تنهدت وهي تقول..ومن بعده ياما رينا لكن ربي ماخلناش الحمد لله على كل حال..
مناسك بحزن؛كلامك كلام كبار..
مروة بإبتسامه ألم..
/الحزن يكبر فيسع..
مناسك بضيق:خلاص كآبتيني غيري الموضوع غيري..
مروة ضحكت ضحكه خفيفه وقالت..
/باهي نحكوا ع القرايه..
مناسك؛ليسانس نكد يافرخه انتي..
ومروة قعدت تضحك عليها ...
🍃🍃🍃🍃🍃
الساعه 3:30..
بعد الغدي في حوش لطفي الواعر...
طلب لطفي يجوه بناته فردوس وغرفه للمربوعه الخارجيه...
وفردوس مشت مع غرفه وهي تساعد فيها للمربوعه الخارجيه والزوز كانوا في حالة توتر..
🍃وطوبى في الحوش في حالة قلق..
/زعمه شن يبي منهم!؟.
مطيره بقلق؛والله مانعرف يابنتي..
طوبى تنهدت بخوف وقعدت ساكته...
🍃وفي دار البنات...
اريج وهي توتي في روحها بش تمشي للعياده..
/محاضرته ماخشتيهاش وكان نلقى امتحان الماده نفوته حتى هو..
آلاء؛مستغربه فيك كيف كرهتيه هكي بسرعه..
اريج بتعجب: بعد اللي صار هدا كله مستغربه!؟
آلاء:ايه صح حتى اني كرهتهم كلهم..لكن اني من الاصل مايهمني فيهم حد لكن انتي..
سكتتها وهي تقول:خلاص اسكتي آلاء ويالله عليك معاش تجيبلي سيرته..
وخدت شنطتها ومشت طلعت من الدار..
آلاء بأسف؛مكابره كذابه...
🍃وطلعت أريج من الحوش..
لقاته قدام القهوة بسيارته يراجي فيها..
تجاهلاته وركبت سيارتها..شغلتها وتحركت طول..
وهو وراها...
🍃🍃🍃🍃🍃
الساعه 6:25مساءا...
في سوق كبير ومشهور...
كانوا يدهوروا نجاه وخديجه وهما يبضعوا لرمضان..
وبالأحرى مجتمعات لأمر مهم...
خديجه:ردي بالك تقولي باهي من الاول خليه يصر عليك وانتي ارفضي واكيد حيسألك عن السبب قوليله مايجيش ياعمي والناس شن بيقولوا..وبعدين جيبي سيرة الجالي وقولي انكم متعاركين ع خاطر الخدمه والمسلسل اللي ألفتيه يومها..
نجاة:ok فهمت عليك..باهي كان قال مثلا نخليه يعتذر منك!؟
خديجه:ياريت...
نجاه ابتسمت تهكما لأنها فهمت مقصدها..
خديجه:اهم شي ماتبالغيش في ردة فعلك تمام..
نجاة:تمام تمام..باهي قوليلي عمر فضاها الشقه ولامازال؟
خديجه بإزدراء:اممم...مبرد دمك..
ومشت..
ونجاه مشت وراها وهي مبتسمه بإستفزاز..
🍃🍃🍃🍃🍃
وتعدي الساعات...
ويجي وقت جية محمد شنيبه لشقة نجاة...
بعد ماسلموا الصغار ع جدهم وقعمزوا حداه شويه..
خدتهم خالتهم صابرين ومشت معاهم لدارهم..
وقعدوا نجاه وشيبانها ع انفراد وفتح معاها محمد شنيبه الموضوع..
نجاه بضيق مصطنع؛شن بنقولك ياعمي..خديجه فتحت معاي موضوع المهدي واني قبلت الموضوع  ع خاطر صغاري وفي النهايه اسمي قدام الناس كنتكم..لكن هكي ياعمي صعب بصراحه..
محمد؛صعب في شني!؟ ياما منهم اللي عايشات مع صغارهم حدا جدودهم انتي مش اول ولااخر وحده..
نجاه وهي مكمله تمثيل دورها بإتقان..
/صعب عمي صعب هلبه..
هو قال:مش اصعب من وضعك هدا..مش ع خاطر الناس وشن بيقولوا نخلي صغار ولدي الله يرحمه يتربوا بعيد عليا..
نجاة؛عادي ياعمي زي مافاتوا هالسنه والنص يفوت غيرهم..
محمد بحزم؛واني قلت لا
نجاة؛ياعمي مانبيش ندير مشاكل..
هو بآستغراب؛مشاكل شني!؟
خلت عيونها دمعوا وهي تقول..
/الجالي لاطايقني ولاطايق صغاري..
هو بصدمه؛الجالي!
نجاه:ايه..المده اللي فاتت صارت بيني وبينه مشاكل ومرتين لزني من الحوش..
هو قال:لزك!؟ كيف وعلاش!؟
نجاة؛هو من قبل مش متحملني من ايام طاهر الله يرحمه..وتوا صارا بينا مشاكل في الخدمه عقدت الوضع..
محمد:هدا علاش سيبتي الخدمه غادي..
نجاة:هو في الخدمه ماتحملنيش كيف بيتحملني لما نقعد حداكم !؟ لالا عمي سامحني خليني في شقتي احسن..
محمد بإنفعال وغضب:لما يبدا الحوش حوشه يلزك منه هدا حوشي اني الكلمه كلمتي اني هو يمشي يحكم في حوشه..
سكتت نجاه وهي تمسح في دموع التماسيح..
وهو يقوللها؛سلم بنتي تعوذي من الشيطان واذكري الله..انتي بصغارك بتجي تقعدي في الشقه اللي فوق وتم الكلام..
نجاة هزت راسها وهي تقول بنبرة صوت مبحوحه بتصنع..
/حاضر
ابتسم وقال؛ايوه سلم بنتي فكري في مصلحة صغارك وفوتي كلامي الناس..ومادامني حي مانخلي حد يوصل فيكم..
نجاة بإبتسامة امتنان زائفه؛ربي يطول في عمرك ويحفظك.
وهو رد يقول:آمين..وفي حاجه تانيه نبيها منك..
نجاة؛اللي تبيه اني فيه عمي قول..
محمد؛بارك الله فيك بنتي..اللي نبيه منك تخلي صغارك يمشوا لحناهم مرة مرة ويقعدوا عندنا..
بان ع وجه نجاة الضيق وعدم الرضا..
هو قال؛مهما كان يابنتي هادم صغار ولدها الوحيد اللي ربك خداه بكري اللهم اعتراض ماتحرميهاش تشم عليهم ريحته يابنتي..
تنهدت نجاه وقالت؛ع خاطرك بس ياعمي..
محمد شنيبه؛كبر مقدارك يابنتي وربي يكملك بعقلك..
نجاه بإبتسامه مزيفه؛تسلم عمي...
🍃وفي الوقت اللي كان عايش فيه محمد شنيبه خدعة كبيره مش واعيلها...
كان لطفي الواعر مقعمز في مربوعه الحوش الدخلانيه..
وقدامه الجالي بعد ماناداه يجي.يتفاهم مع مرته زي مااتفق معاه..وكان في غرض للطفي من ورا هالشي..
🍃الجالي:المطحن اموره ماشيه تمام الله يبارك..
لطفي:الحمد لله..
عقد الجالي حواجبه وقال:سمعت ان في تاجر كبير شاركك في المطحن..
لطفي:ايه واحد معرفه..
الجالي:كويس..فكرة الشراكه كويسه..
هز لطفي راسه وهو ساكت..
والجالي سكت وهو يمرر في نظره ع بساط المربوعه ويهز في رجله اليمين ولطفي مركز ع حركة رجله..
شويه دق باب المربوعه..
زاد سرعة هز الرجل عند الجالي..
لطفي؛طوبى بابا خشي..
ماباش يشوف للباب نهائي ع اساس زعلان وواخد موقف..
وهي اللي كانت قبل لتخش عليهم خايفه وهي تردد في الحوقله..
وين خشت تلاشي هالخوف تماما...
☘بس مواجهة فرعون ماكانتش ساهله ع موسى رغم المعجزات اللي عنده☘
قعمزت طوبى جنب بوها بمسافه وهي تتجنب النظر للجالي مش خوف بل قرف..
الزوز كانوا ساكتين الزوز كانوا يراجو كل واحد فيهم يبدا بالكلام..
لطفي وهو يشوف في وضع كل واحد منهم بدي بالكلام وهو يقول..
/جالي..
شبحله الجالي..
لطفي:يوما هدرزت عليا او بمعنى اصح جيت تشكي من بنتي واني قتلك نسمع منها بعدين ناديك تجي وتتفاهموا مع بعض..
نبيك توا اللي قلته في السيارة تعاود تقوله مرة تانيه..
هز راسه وحرك نظره لطوبى وهو يقول..
/شهاده من دينك..عمري قصرت في حقك ولانقصت عليك شي نسألك بالله تقولي الحق..
لطفي شاف لطوبى..
وطوبى تفاجئت بالسؤال اربكها هلبه بس مابينتش وجاوبت بثقه وبصدق..
/ماديا لاماقصرتش..
هو قال؛ولامعنويا ياطوبى..قرايه مخليك تقري..مدرسة اختك وخليتك تخدمي فيها عملتك تسوقي سيارة ومخليك تمشي وين ماتبي.وحاط فيك كل الثقه..واقف في معاك في كل ازمه تمري بيها ع قد مانقدر خليتك تبيعي ذهبك كله ع خاطر اختك خليتك تقعدي اغلب ايام الاسبوع في حوش ماليك ومافتحتش فمي بكلمه..رغم ان جي عليا وع واجباتك معاي لكن تغاضيت ومشيت وقلت مش ساهل اللي تمر ربي يفرج ع الجميع..نسألك بالله بعد هدا كله اني فاش قصرت تقعدي تنبشيلي ع الغلط تنبيش بش تطلقي قوليلي فاش قصرت معاك..حط يده ع صدره وهو يقول بنبره حرقه مصطنعه وملامح الم اجاد ثمثيلها...شن قالولك عليا بش قلبوك هكي وخلوك توصل بيك لدرجة انك تفتري عليا قولي..
طوبى كانت تسمعله وهي في حالة ذهول وصدمه..
مش بس في كلامه..في الطريقه اللي يحكي بيها..كيف رتب الكلام بطريقه خلاها عاجزه عن نفيه...
كان يتكلم وكأنه صاحب حق فعلا..اقنعها هي نفسها ان الغلط منها مش منه..خلاها تحس روحها هي اللي ماتنفعش مش هو..من قوة أدائه التمثيلي...لعند ماسمعت اخر كلام قاله هني استاقظت وقالت..
/شن تقول انت افتراء شني!؟كل شي عند قلته عندي عليه دليل..
هو قال..
/طلعيه الدليل وينه نبي نشوفه..
طوبى..
/ادله مش دليل اولهم رسايل جوني ينبهوا ع خيانتك اخرهم وحده جتني ع تليفوني من حد شافك وانت جايب معاك وحده للفيلا..
قاطعها وهو يقول بضحكه ساخره..
/تمااام..تمام..تمام..قلت جاتك رساله فيها اني اني جايب وحده للفيلا.. Ok..اشر عليها بسبابته وقال..انتي انتي..شفتيني بعينك!؟ خشيتي علينا يعني..
وشبح للطفي وقال..اهو فقش الواحد يدوي...ورجع يشوفلها..
هي بقوة مصطنعه..
/لا..لكن شفتك وانت طالع بيها من الحوش في سيارتك..
ضحك وهو يخبط كفوفه ع بعض وهو يقول..
/لاحول ولاقوة الا بالله..
هي بشي من الانفعال..
/عندي ليكم تسجيل فيديو وانت خاش وانت مطلعها من الفيلا والكاميرا مبينه كويس من هي..
وقعدت تهز في راسها وهي تشوفله بتحدي..
هو ابتسم بثقه وقال..
/تمام جيبيه الفيديو هدا جيبيه خليني نشوفه وخلي بوك يشوفه حتى هو..
طوبى بتحدي برغم الخوف والتوتر اللي قاعده تخفي.فيهم..
/ولبوك ولأمك وعيلتك كلها خليهم يعرفوك ع حقيقتك زي مااني عرفتك خليهم يعرفوا ولدهم اللي يغشوا بيه في بنات الناسشن شكل تربيته واخلاقه..
الجالي بحده..
/طوبى احترمي نفسك احسنلك..
طوبى بغل..
/اني محترمه نفسي هلبه لكن انت مستحيل مازال نحترمك..
هو شبح للطفي.وقال..
/احضرنا ياعمي لطفي.تسمع في بنتك ولا.شفت كيف قاعده تتهم هكي وخلاص ولاعندها حجه ولا دليل..وفوق تقلل في ادبها ع راجلها في حضور بوها..
طوبى بحده وانفعال..
/كلامك معاي اني مش مع بوي..
الجالي وهو يشوفلها..
/هو حكم بيني وبينك وشهد عليا وعليك ولازم يحكم بالحق..
طوبى بنرفزة..
/ع اساس تعرف تفرق بين الحق والباطل وانت..! اسمع جاي هي كلمه وحده مش متنازله عنها...
طلقني..
الجالي قعد يشوفلها وفي داخله..
خوف كبير..غضب كبير..توتر كبير..
مخليينه يدير في حركه بيده لفتت نظر لطفي..
يفتح فيده يحرك صوابعه بعدين يسكرها ويرجع يدير في نفس الحركه ويعاود..
لاحظ حتى لون وجهه تغير..ونظرة عينه كانت مخيفه..
شويه شاف الدموع.تجمعوا فيهم وبدي يتكلم بنبرة مرتعشه بعض الشي وهو يحرك في ايديه بإنفعال...
/مش مطلقك..مانبيش نشرد بنتي ولانبي نفرط فيك..ايه رغم اللي درتيه فيا كله مش مفرط فيك..برغم هلبه حاجات قاعد ساكت عليهم وماحكيتهم قاعد شاريك ومستعد ننسى كل شي بش نربوا البنت بيناتنا..
طوبى قعدت تشبحله بإستغراب شديد..
وبوها تدخل لأول مرة من بدايه النقاش وقال..
/حاجات شني اللي قاعد ساكت عليهم..انتم حطيتوا كل شي ع الطاوله مافي شي ينسكت عليه..
هو قعد يشوف لطوبى بنظرات تحذير وهو يقول..
/نقول...تبيني نقول..
وطوبى تشوفله بصدمه وعدم فهم وقالت..
/شن هو اللي بتقوله غير الكذب!..
هز راسه وقال..
/كذب..تمااام..تمام...شبح للطفي وقال..بنتك ياعمي حامل ليها 6شهر تعرف من امتى تعرف من لما كانت في الشهر التاني تعرف امتى قالتلي في الشهر الخامس..
شبح لطفي لطوبى بصدمه..
وطوبى تشوف للجالي بحقد وعيونها معبيات دموع..
ناض وقف وطلع من جيبه ورقه وقال..
/هادي.ورقه من المعاينه معاها لقيتها داستها عليا دسان.
ومشاله مدله الورقه..
خداها لطفي وهو مصدوم..
والجالي يقول؛شوف للتاريخ ياعمي شوف...شوف وقولي مراة درق ع رجلها الحمل الفتره هادي كلها شن تقصد بيها!؟
فسرهالي ترا..
وومشي ولى قعمز مكانه وهو يشوف لطوبى بمكر..
وطوبى تشوفله بحقد شديد..
لطفي رفع عيونه في طوبى وقال..
/حق اللي قاله؟
طوبى نزلت عيونها ودموعها نزلوا..
لطفي؛علاش!!!؟
الجالي:اني نقولك علاش..
شبحوله الزوز..
الجالي:هدا الوقت هي قررت تشد المدرسه في مكان اختها وفكرت لو قالتلي وقتها اني نمنعها..بس بعدين..حط سبابته ع صدغ راسه وقال..سألت روحي علاش ماقالتش بعدين..النتيجه اللي وصلتها ان بنتك بدت تخطط للطلاق من وقتها وفي من يحرض فيها ويقري.فيها شن دير..
طوبى وهي مصدومه..
/انت شني انت قولي..خاف ربي يابني آدم شويه شن هدا!؟
اشر ع نفسه وقال..
/اني اللي مفروض نخاف ربي ولاانتي اللي ماشيه بودانك ومخليه وحده حاسدتك ع حياتك اللي عاشيتيها معاي دمرهالك تدمير..
بوها قاله..
/انت من تقصد بالزبط؟
الجالي؛اعتقد واضح هلبه ياعمي..بنت خوك اللي خربت علي روحها وتبي تخرب ع بنتك..خل نعطيك معلومه الدكتورة اللي راجعت عندها بنتك في البدايه بكل صاحبة اميمه ووصتها ماطلعش معلومات بكل..شن معناه هدا..
طوبى بذهول..
/انت يابني آدم انت مش مخلوق قولي..! لااميمه ولاغيرها ليهم علاقه..اني درقت الحمل المده هادي كلها لسبب انت عارفه كويس..
لطفي ركز في نظرات بنته وحسها شاده شي ع الجالي وماتبيش تقوله..
اما الجالي اللي فهم تلميحها قال..
/ايه عارفه كويس وبروحي تو نقوله لبوك السكات مايديرش حل معاك انتي..
شبح للطفي وقال..
/بنتك ياعمي من بعد اقل من شهر من زواجي منها طلعت عليها اعراض لاعرفتهم سحر ولامرض نفسي..
شهقت طوبى بقوة من صدمتها وحطت يدها ع صدرها..
حست قلبها وقف هديكا اللحظه...
اللي تشوف فيه وتسمع فيه شي لايصدق..
كيف يكذب بأريحيه هكي..يتكلم بقوة وثقه مصدقه فيها نفسه..اي حد يحضر الموقف هدا ويسمع منه مستحيل يكذبه...يصدقه طول ويجي في صفه بدون تردد...
وهو متابع يقول..
/تنوض تعيط في الليل الشارع اللي ساكن فيه كلهم يسمعوا فيها..تقعد تجري في الحوش زي المهبوله واكثر من مره تخش تسكر ع روحها دار المرسم..
طوبى بصدمه..
/الله اكبر عليك..الله أكبر عليك..
غمض عيونه وسكتها بصوت عالي..
/خليني ندوي..خليني ندوي..فتح عيونه وشبحلها وهو يقول..
/ماتحاوليش تسكتيني وتغلبيني بالصوت..ورجع شاف لبوها وقال..شوفتها شن دارت تبي تسكتني لكن والله ماني ساكت..مرة ياعمي يالطفي جايه بتطلع للشارع وهي سامحني فيها بلبس النوم يعني..مش بوعيها كانت..
طوبى ناضت وهي تقول بإنفعال شديد.
/سكر فمك يامريض..يامريض يامختل..
وهو متابع يقول..
لحقت عليها في اخر لحظه ودخلتها الحوش..
وهي بإنفعال قوي..
حسبي الله ونعم الوكيل فيك..الله ينتقم منك شر انتقام يامريض يافاجر..
لطفي بصوت عالي..
/طوبى اطلعي برا..
طوبى ببكي..
/كذاب اقسم بالله.العلي العظيم كذاب..
هو غمض عيونه بشده وقال..
/صبر جميل والله المستعان..
هي بإنفعال وغضب ودموعها ينزلوا..
/وين تعرفه الله انت وين تعرفه..
وتسمع صوت بوها الغاضب العالي عليها لأول مرة وهو يقول..
/قتلك اطلعي برا..برا..
الجالي نزل راسه ودار روحه متأثر من اللي صاير..
اما هي بعد ماشافت لبوها بنظرات كلها ألم وعجز...
لفت ومشت طلعت من المربوعه..
🍃وين طلعت لقتهم كلهم واقفات قرب الباب..سمعوا كل شي وكانوا يشوفولها بألم ووجع عليها..
اما هي غيرت عيونها عنهم ومشت وهي تبكي وتقول بقهر..
/ياربي قدرني ناخد حقي منه..ياربي قدرني ناخد حقي منه..
وخشت لدار المعيشه وهي تقول..
يارب قدرني ناخد حقي منه..
هما خشوا وراها..
ومطيره تقول بغضب؛علاش شديتوني انتم علاش شكالاته مايبوا الا طريحه باهيه تمسح بيهم الأرض..
فردوس وهي مصدومه؛انا حليت فمي!! قصدي الكذب يستف فيه من غير مايغلط ولايخاف..
طوبى بقهر:اني هدا اللي دارني..قعدت مصدومه عقلي وقف معاش عرفت ندافع ع روحي معاش عرفت شن نقول..خفت من بابا يصدقه..اذا اني قريب صدقته!.
اريج بذهول:اني اللي قاهرني الاحترام اللي كنت نحترمله فيه زمان هالوسخ..
غرفه:مايبي الا طبة وطريحه باهيه هالواطي..
وطوبى تسمع فيهم وهي تمشي وتجي من النار اللي والعه فيها...
فردوس بقلق:خلاص اوقفي.
وقفت طوبى وطلعت منها آهة قهر وجعت قلوبهم بعدين قالت..
/ياربي مقهورة بنموت ياربي..ياربي ماتخليش بابا يصدقه..
مطيره؛مستحيل يصدق فيك هالتبلعيط مش عارف بنته هو..
فردوس بضيق:ايه مايصدقش بس لقطه تدريقة الحمل هادي غلطة كبيره ياطوبى..
اريج قعدت تشوفلها بحزن..
وهي قالت بشي من الهدوء:من جهة غلط ومن جهة تانيه صح..
غرفه؛ايه كان عرف انك حامل من قبل احتمال يحبسك حتى الحبس..
مطيره بخوف:اللطف!
غرفه؛واحد زي هدا توقعي منه كل شي..
وطوبى تشوفلها بقلق وهي تسمع فيها...
🍃وفي المربوعه..
بعد ماطلعت طوبى..
هز الجالي راسه وهو يقول..
/معليشي عمي معليشي وسع بالك معاها..وبالنسبه مسامح في كل شي والله مستعد ننساه كله؛ وراهوهي جبرتني ندير هكي من لما جت قعدت هني ونساير ونمشي في الامور ونحاول نراضيها رغم الغلط مش مني..بس شن ندير حسبي الله في اللي خببها عليا ياويله من ربي..سامحني عمي بالله قلت قدامك دوة مفروض ماتسمعهاش..
تنهد لطفي وقال..
/ولايهمك ولايهمك ولدي..نبي منك حاجه وحده اصبر عليها.وخليها تعدي فترة الحمل بالك عقلها يرجع لراسها وتروح لحوشها..وبالنسبه للي حكيتلي عنه متاع نفسيتها هدا اظني سحر ولاعين  اللي صايرلها صاير لأختها بالزبط تو نشوف الموضوع بروحي..
الجالي؛بارك الله فيك ياعمي..وبنقولك كون هني ماليا ماعندهم علم بشي حتى المشكله اللي.بيني وبينها بوي وامي ماعندهمش علم بيها ومش حيطلع مني شي مهما صار..
لطفي هز راسه وقال؛ربي يكملك بعقلك ياولدي...
ناض الجالي وقال؛سامحني مرة تانيه..
ناض معاه لطفي وقال:صار خير صار خير...
هز الجالي ومشي بيطلع وهو يقول..
/ربي يهديها ويصلح رايها..
ولطفي لحقه وهو يقول..
/إن شاء الله...
ومشي معاه سقده للباب..
الجالي:السلام عليكم..
لطفي:وعليكم السلام...وسكر الباب..
بعد ماسكر الباب بدت ع وجه الجالي ابتسامة نصر خفيفه ومشي بإتجاه حوشهم بخيلاء كعادته...
وحسين اللي كان.مقعمز في سيارته قدام حوش جده..
قعد معاه بعيونه لين شاف خش لحوش اهله..
بدت ع وجهه ملامح الازدراء بعدين رجع يشوف لتليفونه..
انتبه للساعه..كان موعد مرواح اميمه من المستشفى شغل السيارة طول ومشي..
🍃وعمه...
بعد ما سقد الجالي مشي طول خش داخل بسرعه..
وصل في دار المعيشه وخشلها..
لماشافاته طوبى قعدت تحلف بنبرة مرتجفه ودموعها ينزلوا..
/اقسم بالله العظيم كذب والله يابابا كذاب والله اني..
قاطعها لما خداها ف حضنه وباس ع راسها وهو يقول..
/عارفه يابنتي عارفه...
طوبى وهي تبكي..
/مانبيش نوليله بابا بالله عليك..
لطفي:شن توليله هادي ع جثتي تصير..
طوبى شدت فيه وهي تقول؛بعيد السو..
فردوس:البني ادم هدا مايخافش ربي..
لطفي هز راسه وقال:خلاص بنتي هدي روحك ومعاش تبكي وبري توضي وصلي ركعتين توا..
بعدت عنه وهي تشوفله وقالت؛حاضر..
هو ابتسملها وقعد يمسح في دموعها..
وهي ردتله نفس الابتسامه من وسط دموعها..
الابتسامه اللي احتلت بملامحها وجوهم وهما يشوفوا في حن الراجل اللي ياما حملهم في قلبه وعطاهم سنين عمر كلها...
🍃وسمعت طوبى نصيحته وصلت الركعتين وارتاحت نفسيتها شويه..
رعب المواجهه بينها وبين الجالي قاعد بين عيونها قاعده مقهورة ومتحسرة..
فجأه..
حست بشي غريب..
حطت يدها ع بطنها وقالت:هدا شني!؟
حست بيه من جديد وكان اقوى من قبل احساسها بيه..
بدت ع وجهها ملامح ابتسامة دهشه بعدين ناضت ومشت طلعت من الدار وهي تضحك بفرح..
خشت لدار المعيشه وهي تقول لغرفه..
/جنه تحركت..
غرفه بضحكه:الله..
طوبى مشتلها وقعمزت قدامها وقالت..
/حطي يدك ترا..
حطت غرفه يدها وهي تقول..
/كنينتي واخيرا تحركتي ياخميره..
ضحكت طوبى من وسط دموعها..
غرفه:ردي ع عزوزتك يابنت..
طوبى وهي تضحك؛تحركت تحركت..
غرفه؛وخيتي سلمها من توا تسمع في الكلام..
☘وخشوا الاء واريج وسمعوهم ع شن يحكوا..
وقعمزوا حداها وحطوا ايديهم ع بطنها وقعدوا يهدرزوا ع جنه لين تحركت..
وعبوا الحوش بأصوات ضحكاتهم...
وقعدت اريج تنكت وضحك فيهم...كانت تبي تشوف طوبى تضحك وبس..كان تبي تهدي خوف قلبها اللي كان باين في عيونها وتخفف الصدمه اللي قاعدات ملامحها ع وجهها..
صدمة عمر..وخيبة امل كبيرة...
☘تخشي لحياة جديده وانتي تحسابي روحك بتعيشي فيها احلا ايامك..
البدايات كانت حلوة علت سقف طموحاتك وخلاتك تتوقعي الاجمل يكون القدام...
وللأسف ماكان القدام الا البشع ثم الأبشع...
ومش معروف كيف ممكن تطلعي من هالتجربه المريرة وكم حجم الأثر اللي تخليه فيك...
🍃 آغرتنآ لهفة آلبدآيآت نحن ضـحآيآ آلنهايات.🍃
🍃🍃🍃🍃🍃🍃🍃🍃
ويوصل حسين للمستشفى..
يدرس السياره في الموقف..
ويمشي يخش للمبنى...
وصل في الصنصير خشه وركب بيه للدور اللي فيه اخته وخطيبته..
كانت عند رغبه يشوف حسناء...
طلع من الاصنصير ومشي لقسمهم...
ويشوف حسناء..
لكن ماكانتش بروحها كانت واقفه ع الدكتور قصي تهدرز هي وياه..
وسام:هكي رأيك؟
حسناء:هكي رايي وان شاء الله خير..
فجأه سمعت نغمة رساله.جت لتليفونها..
قالت:لحظه شويه..
وطلعاته من جيب البالطو..
لقتها من حسين تفاجئت..
ولما فتحتها وقرتها انصدمت..
(استمري خليك هكي)
التفتت طول..
شافاته واقف بعيد شويه وهو يشوفلها بنظرات قسمتها نصين..
بعدين مشي طول..
وسام شافه وقال؛شكلي درتلك مشكله..
حسناء بخوف:حي عليا ياربي..!
ومشت..
وسام لحقها وقال؛نمشي معاك نكلمه..
حسناء:لالا اقعد في.مكانك...ومشت تجري..
وهو وقف في مكانه وقال..
/ياعليك قصه...
🍃وهي تجري وراه لين وصلت فيه وهي تقول..
/حسين افهم قبل بالله عليك..
حسين وقف وهي وقفت وعيونها يشوفوله بخوف..
قاللها بحده..
/كم منبه ع الموضوع هدا كم مرة تكلمي..لكن انتي هكي لازم تكسري كلمتي..
حسناء بخوف؛خيرك حسين هدا زميل راهو..
حسين بغضب؛هدا في مجموعة اميمه اختي ويخدم في قسم تاني شن يجيبه لقسمك انتي قولي.!!؟ اصلا وقفتكم مش وقفة زملاء..
هي قالت..
/باهي ايه هو جاني بش يكلمني ..
قاطعها وقال..
/ولاحرف ماتزيديش حرف..واني هالمرة نقولهالك ومش مولي فيها انتي من طريق واني من طريق..
ومشي طول بعض ماكسر قلبها للمرة المش معروفه كم عددها..
علاقته بيها غالبه عليها الجديه وهو غالبا جاف وقاسي معاها ومش محسسها انها مهمه عنده بس هي حباته هلبه وماتقدرش ع فراقه..
طول اتصلت بأميمه وكلمتها تجيها بسرعه ..
واميمه لما سمعت صوتها الباكي مشتلها طول...
🍃اميمه بخوف؛خيرك شن في!؟
حسناء ببكي:تعاركت اني وخوك وسيبني يااميمه..
اميمه وهي متفاجئه:كيف!؟..قصدك دويتو في السياسه مرة تانيه!؟
حسناء بنبرة باكيه؛ياريت يااميمه ياريت..
وحكت اللي صار بالتفصيل ماعدا سبب وقفتها ع وسام..
اميمه بيأس؛ااه منك ياحسنا يعني ماتعرفيش ان وسام عينه زايعه ونظره لأي حاجه مؤنثه نظرة حقيره وهما رجاله ويعرفوا بعض اكيد ركز ع نظراته وهو ويدوي معاي..
حسناء ودموعها ينزلوا؛-باهي كيف ندير توا عطيني حل ماتقعديش تلومي فيا..
تنهدت اميمه وقالت..
/خليني تو بعد  نروح نراجيه لين يهدا ونكلمه..
رشفت وهي تمسح في دموعها وتقول..
/وتحكيلي شن يصير معاك طول..
اميمه؛حاضر..سلام..
حسناء:راجي اميمه..
اميمه قعدت واقفه تشوفلها وتراجي فيها شن بتقول..
حسناء؛تو انتي هدا رايك في وسام حق..
اميمه بتعجب؛مش جديد عليك..
هزت راسها وقالت:امم..
اميمه بشك؛شن في؟
حسناء:مافي شي..سلام توا ..
ومشت طول..
اميمه بضيق:غير شن درت اني بس..
بعدين مشت في طريقها....
🍃🍃🍃🍃🍃
خشت عليها وهي تبخر في الصالون قالت..
منيه:ماما..
جميله وهي دور بالبخارة وملامح العصبيه باديه ع وجهها..
/اممم..
منيه:متعاركين انتي وبابا..
جميله:ايه..
منيه؛علاش؟
جميله بإنفعال:وانتي شن دخلك؟
منيه بضيق:اسفه خلاص..
ومشت وخلتها..
نأففت جميله بضيق بعدين قالت..
/أستغفر الله العظيم..
ومشت بتبخر باقي الحوش...
🍃وفي الفيلا المقابله..
كان الجالي مقعمز في دار جنه وهو يتكلم بالتليفون..
/كشخ عليها ولزها بكل..
"تستاهل فرخه متفرعنه"
الجالي:خلاص اسكتي
"ياكبدي اني وخلاص..المهم توا قولي شن تتوقع يصير بعدين"
الجالي وهو يشوف لسرير جنه..
/بنروح بيها ماتبيش سؤال..
"كان صار وروحت بيها رد بالك تجيبها لحوشنا الا لما نتفاهموا مع المصيبه هديكا"
الجالي في نفسه .."مش جايبها بكل":تمام تمام..بنسكر توا عندي خدمه..
"باهي..رد بالك ع روحك سلام"
الجاليok..سلام..
وسكر الخط..بعدين مرر نظره الدار وهو مبتسم بشوق...
🍃🍃🍃🍃🍃🍃
خشوا للحوش الزوز وهي ماشيه وراه تقوله..
اميمه؛حسين..
هو وقف وقال:ماتدويش معاي عن صاحبتك بكل ماتدويش معاي اصلا..
ومشي طول لداره..
اميمه بإنزعاج وبصوت منخفض..
/سبلة ودور فيها..
ع جية بوها وهو يمشي بعكازه قال..
/خيره خوك؟
اميمه؛يعني مش عارفه يتعارك مع ذبان وجهه..
تنهد وقال:جدك برا؟
اميمه؛لالا..
هو قال:اشبح شن في بينه وبين عمك لطفي يديروا في حاجه ومايبوش يقولوا عليها..
اميمه:مرات مافي شي وانت يتهيألك.
عبد المطلب:مش عارف..بعدين مشي بيطلع..
اميمه:وين ماشي؟
عبد المطلب:بنقعمز في البروده..
ومشي طلع برا..
وهي غيرت نظرها ومشت خشت وهي تنادي..
"ماما"
🍃🍃🍃🍃🍃
" سيأتي على قلبك فترة أثقل من الجبال، ليست لِتكتئب، بل"لتسجُد وتقترِب"
منشور نزلاته طوبى ع الفيس بوك بعد منتصف..
وكان اول منشور ينزل بعد فترة طويله..
اول من تفاعل عليه صفيه بنت عمة عبد القيوم..
ابتسمت طوبى وهي تقرا في تعليقها اللطيف..
«وهَممْتُ أنْ أشْكو الهُمومَ لصَاحبِي
  فذكرتُ أنَّك مِن وَريدِي أقربُ
  عَبدٌ أنا والحُزن يَعصِرُ خَافقِي
  ضمِّد جِراحِي إنَّني لكَ أهربُ.»
تفاعلت معاه طوبى ورجعت قراته اكثر من مرة..
شويه جي بين عيونها الجالي نظراته وكلامه اليوم حست بخنقه مرة تانيه خدت نفس عميق وزفرت بعدين قالت..
/ياربي خلصني منه عاجلا غير آجل يارب...
🍃🍃🍃🍃🍃
تاني يوم..
الاثنين14 مايو سنة 2018...📅
مازال ع رمضان يوم او يومين...والناس فهالأيام دايرة زحمه ع اسواق المواد الغذائيه وحتى محلات الماعين..
بس في من فاقد الرغبه ان يوتي لرمضان اللي حيكون الاول بدون احباب كانوا ماليين الحياة عليهم ...
عائشه...سدرة...
كل وحده فيهم مخليه فراغ كبير في حياة احبابها اللي مش عارفين كيف بيعدوا اول رمضان وهما مش معاهم فيه...
🍃"كانت تموت في عصير اللوز "
فردوس بحزن؛السفنز لازم يكون في ع الفطور هو الاول..
مطيره:ام راس مسكر تقهقر في روحها وتخلط فيهم سفنز ع بسيسه..
فردوس:ووين يجي العشي فنجان الشربه وبس وبعد التروايح دير سفرة لروحها وتاكل..
مطيره بضحكه:طويبه تساير فيها تعرفها ماتحبش تاكل بروحها..
تنهدت فردوس بألم..
ومطيره قالت من وسط قلبها..
/حسبنا الله ونعم الوكيل...
"طوبى"
سمعوا لطفي ينادي طلعت لباب الكوجينه..
لقوا طوبى طالعه من الدار  وهي تقول..
/واتيه بابا...
ومشت بتطلع..
مطيره وهي تشوفلها:كان نعرف وين بيرفعها؟ زعمه لنبيله؟
فردوس وهي تشوف في طوبى كيف طلعت وسكرت قالت..
"الله أعلم"
🍃ومرت الساعات🍃
وروح لطفي بطوبى..
اللي خشت للحوش وهي تبكي..
فجعت الكل...
ماعدا خواتها اللي كانوا عارفات وين ماشيه وعلاش روحت تبكي...
خشت للدار وهي تقول بنبرة باكيه..
/بالله خلوني بروحي مايجيني حد..
وسكرت الباب..
مطيره بقلق:خيرها العفو ياربي..
غرفه:خلوها..
إلاء؛تعرفي وين كان رافعها روفي..
غرفه حركت راسها بالنفي
فردوس:كان قدرت تقوللنا تعرفوا منها هي وكان لا ماتسألوها عن شي..
قعدوا البنات ساكتات وهما مستغربات..
ومطيره توزع في نظرها بين فردوس وغرفه وهي تفكر بشك...
🍃🍃🍃🍃🍃🍃🍃
الساعه 9:00ليلا..
في صالة حوش شنيبه..
كانت مغليه وسط ولادها واحفادها وبنت خديجه يهدرزوا ع رمضان واستعدادهم ليه..
الجالي وهو شاد في حضنه يحيى ولد نسرين..
/والله احسن حاجه دارتها سافرت تمرضن برا بعيد ع رقعة النكد..
خديجه؛والله صدقت لا ورمضان في مصر حاسدتها بجديات..
مغليه؛الله يبارك معاش تنقوا عليها..
عمر:وخيره محيي مايرفعك تمرضني في مصر!؟
خديجه:يبي يمرضن مع ماليه..
عمر: صار يبي رمضان مع ماليه اقعدي يامسكسكه سايريه هو وماليه لين يتم عمرك..
راما شبحت لخالها بتعجب..
خديجه؛مامسكسك الا انت..بابا اني لما حطيت فكرة السفر في راسي خليته يرفعني للمالديف..
الجالي بضحكه؛قاعد لليوم يهدرز عليها..
عمر:في كل مناسبه  وميعاد بكري يهدرز ع ولد سويدان عليها حدا المطحن نشبح في الراجل يهز في راسه وخلاص..
قعدوا يضحكوا..
راما ضايقت..
شافها محمد المعدي اللي كان يسمع بصمت بعدين قال..
/خلاص غيروا الشريط..
عمر؛عارفه يعز عليك ومش راضي فيه..
محمد اشر بحواجبه لراما..
عمر:ايييه..نسيتها البطه بكل..
خديجه بإبتسامه؛سلم وليد خالها ياربي اللي مايبيش فيها..
راما ابتسمت بخجل..
ومحمد ابتسم مجامله لعمته..
وسدرة تمرر في نظرها بيناتهم..
عمر:حتى اني مانرضاش فيها البطه..
ضحكت راما..
ناض الجالي ومشي لأمه مدلها يحيى وقال..
/خودي..
مغليه؛بتروح مازال بكري؟
الجالي:لا هداكا هو بنروح نخدم ونرقد..
مغليه؛. باهي براحتك ولدي..
الجالي مرر نظره عليهم وقال..
/تصبحوا على..
سكت قبا ليكملها لما صوت بوه ينادي فيه بصوت غاضب زي الرعد...
"جالي"

#روزناما
#طوبى

....يتبع...