طوبى "جنة طوبى"

الجزء التاسع والخمسين 3

 #طوبى "جنة طوبى"
#جمان_فريد
#الجزء_التاسع_والخمسين"اسرار 3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕
الساعه10:00صباحا..
في إحدى المستشفيات..
فتح باب الحجره وخش عليها..
لقاها وهي راقده ع السرير..
وتشبح في الفراغ بعيونها المرهقه الذبلانه اللي فقدت هدوبها...
قرب منها وهو يشوف لوجهها الباهت اللي انسحبت منه الحياة...
قعمز مقابلها ع السرير..
هي شبحتله وقالت بصوت متعب:تسقد نضال؟
شد يدها وقعد يمسح ع ظهرها بإبهامه وهو يقول؛ايه..
عائشه؛زدت وصيته ولا؟
هز راسه وقال؛ايه زدت كلمته..ماتخافيش نضال مايطلعش منه سر..
غمضت عيونها بعدين فتحتهم وقعدت تشبحله وهي ساكته..
هو بحركة الراس سألها "خيرك!؟'
هي ردت عليه تقول؛امتى بنطلعوا من هني؟
المهدي؛العشيه بإذن الله من هني للمطار..
تنفست بشي من الصعوبه وقالت؛غير كان خليتني هني..وماصرفتش فلوسك ع الفاضي..من الاول عارفه اني خلاص..
حط يده التانيه ع يدها وقال؛معاش تقوليه الكلام هدا..معاش تفكري هكي..تفكيرك هدا هو اللي مخلي جسمك مش متجاوب مع العلاج ياعايشه
قعدت تشوف لعيونه وهو يتكلم كان باين فيهم الخوف عليها..
حست بشعورحلو هلبه..شدت ع يده بقوة
وارتسمت ع وجهها ابتسامه خفيفه وسط الملامح المتعبه..
المهدي؛عايشه حاولي تقاومي وتكوني قويه المانيا من احسن دول العالم في علاج المرض هدا لكن العلاج يبي منك قوة يبي مقاومه ياعايشه..ع خاطر صغارك قاومي..
نزلوا دموعها وغمضت عيونها ومعاش فتحتهم .
المهدي بتوتر؛عايشه..عايشه..!
هي ردت؛مافيا شي نبي نرقد بس..
هو تنهد بضيق..
بعدين ناض وجي متكي جنبها وخداها في حضنه .
وهي تمسكت بيه..كانت برغم كل الألم والتعب اللي فيها..
وين يحتويها يهون عليها كل شي..
لكن هو كان يتعذب..كان متمني لو يقدر يفديها بعمره كله...
ايه يفديها بعمره كله ويخليها هي تكمل حياتها مع صغارهم لأنهم محتاجينها اكثر ما يحتاجوه هو...
☘ولله الامر من قبل ومن بعد..وحكمته بالغه في كل المقادير اللي كتبها لخلقه☘
☘☘☘☘☘
"متغير ياما عن زمان..
قافل ع قلبك البيبان..
حبيت وفارقت كم مكان..
عايش جواك.."
كلمات الأغنيه كانت تسمع فيها طوبى طالعه من الراديو المفتوح في الحوش ع اذاعة جايبه برنامج صباحي..
هي كانت في الصاله..
مشغوله بالكارتوني اللي ترسم فيه لمروة بنت فايزة..
وهي تحط في لمساتها الأخيره ع رسمة القلب..
وين سمعت الأغنيه وقفت للحظات تتأمل في كلماتها اللي أثروا فيها وحست معاهم بشعور حزين...حزن عميق جدا..
وصل لروحها التانيه...اللي وكأنها في هديكا اللحظه كانت تبي تبدد هالحزن...
طوبى:ريحة سفنز!..ياربي قداش خاطري فيه!..
"السلام عليكم"
التفتت شافت فايزة واقفه فم الصاله وفي كيس ورقي كبير مزيت..
ابتسمت بفرح وقالت؛سفنز!
ضحكت فايزة وقالت؛ايه سفنز..قبلها شن جو..
ناضت طوبى وهي تقول؛تمام..ترا هاتي..
وخدت منها السفنز وفايزة تشوفلها بإستغراب..
ع جية مطيره وهي تقول؛خشي قعمزي..
وشبحت لطوبى لقتها تاكل من السفنز وهو في الكيسه..
مطيره؛طوبى ديرلنا شاهي وحطيلنا منه..
طوبى وهي تاكل؛امم..حاضر..
مطيره؛ونادي ع فردوس والبنات..
طوبى مشت طلعت وهي تقول؛باهي..
ومطيره معاها بعيونها بعدين شبحت لفايزة وقالت؛خشي بنتي..
خشت فايزة وقعمزت حدا الكارتوني شافاته وقالت؛الله يبارك..شبحت لمطيره وقالت..طوبى حامل؟
حركت راسها بالنفي وقالت؛لا..
فايزة؛مش عارفه بس هكي حسيتها لما شافت السفنز وكيف كلت منه قبل مادورش فيه هلبه..
مطيره؛سدرة كان عيونها .
فايزة بحزن:ايه صح..شن قاللكم خالي محجوب عن حالتها امس..
تنهدت مطيره بحزن وقالت؛نفس الكلام الاول مافيش جديد..
ع خشة فردوس وهي تقول:السلام عليكم..
🍃وفي الكوجينه..
طوبى حطت الشاهي ع النار والتفتت للسفنز شافتله بعدين قالت؛خلاص طوبى ياسرك تو يصيرلك زي امس..
ع خشة اريج وهي تتأفف بضيق..
شبحتلها وقالت؛خيرك؟
اريج بنرفزة:نضال ياطوبى مش عارفه شن معناها حركاته اللي يدير فيها..امس اتصلت بيه سكر عليا بعدين سكر تليفونه واليوم تليفونه مقفل..شن معناها الحركات هادي ياطوبى قوليلي..يعني نندم اني امنت فيه ووافقت عليه..
طوبى:اريج حطي للراجل اعذار يا اريج
ربعت ايديها وقالت بإنفعال؛باهي يافالحه عطيني عذر واحد من هالأعذار..
طوبى:امس قتلك اهم عذر..
وهي منفعله قالت؛باهي علاش مايحكليش مش اني مرته؟
طوبى؛اهو الجالي اني مرته ومايحكليش في خصوصيات خوته..
اريج؛في فرق بينا وبينكم..
عقدت طوبى حواجبها وقالت؛كيف في فرق مافهمتش؟
تنهدت اريج بضيق وقالت:خلاص فوتي....
طوبى شبحتلها شويه بعدين قالت؛قعمزي قعمزي..خل نصبلك طاسة ليموناضا بكري دارتها امك تهديك شويه..
قعمزت اريج وقالت؛اسفه بيبو..
طوبى وهي تصب في طاسة العصير؛مش مهم..فوتي..
وجتها بالطاسه وقالت؛هاك اشربي..
خدتها اريج وبدت تشرب وهي مضايقه..
ع خشة آلاء بتليفون طوبى وهو يرن..
آلاء؛جلاجل..
خدت طوبى التليفون وقالت؛الشاهي ع النار...ومشت طلعت من حداهم..
شافت آلاء لأختها وقالت؛قاعد مسكر تليفونه؟.
هزت اريج راسها وهي معصبه..
تنهدت الاء ومشت طلعت وخلتها مع افكارها..فكرة ترفعها وفكرة تجيبها..
🍃وفي دار خالاتها..
طوبى؛الحمد لله..شن حالك انت..
"مش كويس بكل والحمد لله"
فركت جبهتها بصوابعها وقالت؛جالي اسفه
"بس"
طوبى تنهدت وقعدت ساكته
"مافيش اسفه حبيبي حتى اني استاحشتك ماقدرتش نرقد امس لاني مزعلاتك مني"
طوبى:ايه باهي..حتى اني استاحشتك..بس انت عارف الظروف والوضع..واللي سمعته زاد ضغط ع اعصابي..
"انتي جايبه وجع القلب لروحك ماتقدريش ديري ستين الف حاجه مع بعض..حبيبتي انتي توا مفروض تفكيرك يكون محصور في حاجتين..الصغار..وقرايتك..والاولى اهم طبعا..ومن توا نقولك بإذن الله لما تحملي فكرة الخدمه في المدرسه هادي تنسيها بكل"
ضمت شواربها لداخل وشدت ع قبضة يدها بأسف وشي من العصبيه..
"سمعتيني"
غمضت عيونها وقالت؛ايه..فتحتهم وقالت..سمعتك..اكيد من غير ماتقول..
"باهي سموحتي نقدر نشوفك اليوم..نطلعوا نتغدوا مع بعض في اي مكان انتي تختاريه"
وهي تفرك في صوابعها بباطن كفها؛لامعليشي اليوم جالي مانقدرش وراي حاجات لازم نديرهم..
"طبعا..توقعت اصلا تقولي هكي..لاحظي طوبى اني وليت محطوط ع الرف معاش ليا لاوقت ولااهميه عندك واني راجلك والاحق بوقتك كله ومع هدا.مخليك ع راحتك ديري ماتبي..وانتي نستيني مرة وحده.."
طوبى وهي تحاول تتفادى الوقوع بمشكله؛خلاص خلاص..تمام..نطلعوا نتغدوا مع بعض..
"لاخلاص اني اللي معاش نبي توا..سلام"
وسكر عليها..
غمضت عيونها بأسف ونزلت التليفون بعدين فتحت عيونها وشافت للشاشه..
وقعدت تفكر...تعاود تتصل بيه؟!
باهي كان كلماته ورضاته وطلعت معاه وتغدوا برا مرات يصير معاها شي..وتبان عليها الأعراض..مهما دير وقتها مش حتقدر درق..خصوصا ان الجالي مولي راغب الانجاب بقوة وفأقرب وقت..
بعد مافكرت فهدا كله اختارت انها ماتكلماش وتخليه اليوم وغدوة يدبرها الله..
خدت نفس وزفرت..بعدين فتحت الباب ومشت طلعت من الدار..
🍃🍃🍃🍃🍃
مع الساعه 12:15 قبل الظهر..
درس نضال بسيارته اللي كان حاطها في المطار طول فترة سفره قدام قراج حوش بوه..
شافوه ولاد خوه اللي كانوا برا ومعاهم معتز ولد فردوس..
استغرب فيه محمد كيف لاسلم..ولاناشب مش عوايده..
وصى واحد من اللي يخدموا في القهوة عليها..
ومشي روح للحوش...
🍃ونضال وهو ماشي بشنطته بيخش لداخل الحوش..
لحق عليه محمد وقال؛عم..شن جو المفاجآت هدا!
رسم ع وجهه ابتسامه مصطنعه والتفت وقاله:اووو حمود..
وسلموا ع بعض بالخد..
محمد؛حمد لله ع سلامتك..خيرك ماقلتش انك مروح اليوم؟
نضال؛جت فجأة..
محمد بقلق؛علاش شن صار؟! بوي شن حاله؟
ضربه ع قفاه وقال؛يادنقه كان بوك فيه حاجه نروح ونخليه! الموضوع ومافيه الحاج والحاجه يبوا يجددوا شهر عسلهم تريحت توا يللي ماتحشم..
ضحك محمد وهو محرج وقال:باهي خش خش..
نضال:خاش من غير قولك..
🍃وين وصل في الصاله وعطي علم بوجوده..
خشلها..
كانوا فيها امه وخواته ومعاهم نجاه والبنات الصغار..
وهو سلم ع جوري وسدره..
بعدين خدي سدرة قعمزها في حجره وقال:حمزة ومعاذ وين؟
مغليه؛طلعوا مع الجالي..
نضال؛ياحبه للفترش..
ابتسمت نجاه..
خديجه؛ايه خبرنا كيف خليت المهدي؟
سدرة؛ايه شن حال بابا عمو؟
قرص انفها وقال:الحمد لله..حاله باهي وعال العال يابندقه..
نسرين؛علاش روحت وخليتهم..
نضال؛خوك هكي يبي..
مغليه:ياودي ماعلينا المهم هو حاله باهي..
ابتسم وهز راسه وهو يقول؛-باهي وتمام التمام ماتخمميش فيه..
محمد؛باهي امتى يروحوا؟
عقد حواجبه وقال؛تقريبا بيزيدوا اسبوعين..
مطت خديجه شواربها بتهكم..
محمد ابتسم وقال؛تمام...
ع خشة عمر اللي سمع صوت هدرزة نضال؛ابو النضل..
نزل سدرة ووقف وهو يقول؛كابتن..
وسلموا ع بعض بالخد بعدين حضنوا بعض..
تباعد عمر عنه وهو يقول؛الحمد لله ع السلامه..
نضال؛الله يسلمك..حمد لله ع سلامتك حتى انت..وربي يتمم ع خير..
ابتسم عمر ابتسامه تخفي الالم والحسرة وهو يقول من ورا قلبه؛آمين...
🍃🍃🍃🍃🍃🍃
الساعه 4:25 قبل العصر..
درست سيارة اميمه قدام حوش عمها لطفي..
نزلت منها....
في الوقت اللي طلعوا فيه عمر والجالي ومعاهم نضال لرجاله العيله اللي يراجو فيهم برا بش يمشوا للجامع لعقد القران بعد صلاة العصر..
هي شافت الزحمه وسمعت اصوات الهدرزة والدوشه في الشارع..بس ماشافتش جيهتهم بكل..
اما هو وكأنه يراجي امتى يشوفها عيونه قعدوا عليها لين خشت لحوش عمها..
وقلبه غاص في احشائه من ثقل الوجع اللي كان يحس بيه..
اكثر شي قاهره انه مش فارق معاها..او هو هكي شاف وهي هكي بينت..
هو كان يحساب روحه بيقهرها باللي يدير فيه ويأثر لكرامته..
وفي الحقيقه كان يقهر في روحه وينتقم من نفسه..
🍃اما هي.
فكانت عايشه دور اللي مش فارق معاها ولا كأنه الامر يعنيها..
خشت سلمت عادي..بدلت حوايجها وطلعت تغدت غداها وهي تهدرز ومنطلقه معاهم عادي
وحاولت تشغل تفكيرها بموضوع حمل غرفه وبس..
🍃حطت الكاشيك وقالت بصوت هامس:الحمد لله..
بعدين مررت نظرها عليهم ولاحظت ان اريج مش ع بعضها مادققتش غيرت عيونها عنها وقالت؛عندي ليكم خبر؟!..
كلهم شبحولها
وآلاء قالت؛ياربي يكون حاجه تفرح!..
ابتسمت وقالت؛الصبح نبيله خبرتني ان غرفه حامل..
فزوا قلوب فردوس وطوبى..
والباقي فرحوا...
مطيره؛وعلاش مااتصلت بينا وقالتلنا هالحلوفه!
اميمه؛عارفه ليش عمتي..
فردوس ودموعها في عيونها؛مهما كان لازم هي اللي تتصل وتخبرنا...
اميمه؛اكيد تحشمت وخافت من ردة فعلكم مرات ماتردوش عليها ولاتهزبوها..
طوبى نزلوا دموعها ومسحتهم وهي تقول؛قداش ليها؟
اميمه؛نبيله قالتلي امس بس عرفوا..
رشفت وقالت؛نبي نمشيلها..مررت نظرها عليهم وقالت..تمشوا معاي؟!...
☘☘☘☘☘
"خشي نبيله"
فتحت نبيله الباب وقالت؛-نحسابك راقده..التفتت وقالت..تفضلوا..
تسارعت نبضات قلب غرفه..
وطار بين ضلوعها وين شافتهم كلهم خاشين عليها...
دموعها عبوا عيونها وفاضوا..
جتها فردوس وقعمزت مقابلتها وضمتها وهي تقول:مبروك..ان شاء الله من قسمك..
شدت فيها بقوة وقعدت تبكي..
وكلهم تأثروا بيهم..ونبيله حتى وهي تمسح في دموعها حافظت ع ابتسامة الفرح اللي ع وجهها..
مطيره بدموع؛خلاص فكوا بعض..مش باهي ليك..
وفكتهم عن بعض..وضمت غرفه وهي تقول:تحلي عويناتك ع خير..
غرفه بنبرة باكيه؛آمين..
مسحت مطيره دموعها وقالت؛ياسر بكي..
جت من وراها اريج طبست وسلمت عليها بالخد وهي تقول؛-مبروك خويله
غرفه؛الله يبارك فيك حبيبتي..
وخرت عنها وجتها آلاء وضمتها وهي تقول؛روفي عمري..الف مبروك ياقلبي..
غرفه؛الله يبارك فيك للوش قلبي..
وسلمت عليها بالخد بعدين بعدت عنها وقالت:شن دار روفا لما عرف!؟
غرفه وهي تسمح في دموعها قالت بضحكه؛هادي تقعميزتي من لما عرف..
ضحكوا..
جتها اميمه وهي تقول بإبتسامه؛ربي يقر عيونكم بشوفته..
غرفه بإبتسامه؛آمين..
وسلمت عليها بالخد..
وبعد ماسلمت ع اميمه شبحت ايسارها لطوبى اللي كانت واقفه تشوفلها وهي مربعه ايديها ومبتسمه..
طوبى؛مبارك..تحلي عويناتك ع خير..
كلهم قعدوا يشبحوا لطوبى..
وغرفه ردت عليها تقول:الله يبارك فيك..وعقبالك..
طوبى:شكرا..قداش ليك حامل؟
غرفه؛خمسه اسابيع..
طوبى؛وقداش بتقعدي راقده ع السرير؟
غرفه رشفت وقالت؛تلاته شهور تانيات..
هزت طوبى راسها وهي تقول؛تمام..المهم تردي بالك وتهتمي بروحك..
نبيله؛حني معاها ومهتمين بيها كويس..
شبحتلها وقالت؛اكيد ابله نبيله عارفه..بس هي مرات تنسى ولاتغفل تصير الحاجات هادي..
غرفه؛ماتوصيش حريص عارفتيني انتي في الموضوع هدا بالذات..
هزت طوبى راسها وقالت؛كويس..باهي..توا اني بنروح وراي حاجه ندير فيها..ماتبي شي..
غرفه ودموعها في عيونها؛مبروشه..
هزت طوبى راسها بالموافقه وقالت؛حاضر...السلام عليكم..
ومشت طلعت..ووراها نبيله..
واللي حوالين غرفه قعدوا يشبحولها وحسوها ضايقت هلبه..
فردوس؛ترسم في كارتوني لبنت فايزة لازم تكمله اليوم هدا علاش مستعجله..
هزت غرفه راسها وهي ساكته وابتسمت مجامله..
🍃فم باب الحوش..
نبيله؛ماتوقعتكش تعامليها بجفاف هكي..انتي بالذات توقعت لما تعرفي تكون احن من الكل عليها..
طوبى ابتسمت وقالت؛تعرفي..فرحانه هلبه اللي ربي طيح غرفه في عيله زيكم انتم..ماينخافش عليها وهي معاكم..
تنهدت نبيله وقالت:بارك الله فيك..
طوبى؛السلام عليكم..
نبيله هزت راسها وقالت؛وعليكم السلام..
فتحت طوبى الباب وطلعت..
ونبيله قعدت واقفه ع الباب لين طلعت برا الحوش..
بعدين خشت وسكراته...
🍃فم باب حوش لطفي الواعر..
لطفي؛المشكله صايره في الخط اللي ورانا...من امس ماعندهمش ضي..
عبد القيوم:ياريتكم قلتوا من امس..حاضر تو نكلم الجماعه  ونشوف الوضع..
وطلع تليفونه من جيب السروال وقال:عن اذنك شويه..
ومشي بيتباعد شويه عن لطفي اللي قاله؛خود راحتك..
لما حط التليفون ع وذنه شاف للطريق جو عيونه عليها وهي جايه..
طول غير عيونه عنها وزاد تباعد..
اما هي فكانت تقص في الطريق وتشبح لبوها مره مره..
وهو كان واقف يشبحلها..
وصلت فيه..
هو اشرلها تخش الحوش..
مشت خشت طول وهو خش بعدها..
وعبد القيوم قاعد واقف يكلم في زميل ليه في الخدمه..
🍃في الحوش..
لطفي؛شن حالها..
طوبى وهي محرجه؛الحمد لله كويسه..
لطفي؛خيرك ماقعدتيش غادي..
طوبى؛قاعده ماكملتش كارتوني مروة..
هز راسه بعدين مشي طلع..
وهي قعدت معاه بعيونها اللي يشوفوله بضيق لين طلع وسكر الباب ..
 تبدلت ملامح وجهها للحزن..ومشت خشت داخل..
🍃كمل عبد القيوم مكالمته وجي للطفي وقال..
لطفي:كلمناهم ياحاج بعد شوي يكونوا غادي ويحلوا المشكله..
لطفي؛بارك الله فيك..
ابتسم وقال؛واجبنا..شبح لباب حوش علي وقال:الحاج علي وينه لتوا؟
لطفي ضحك ضحكه بسيطه وقال:مش مصلي في الجامع هدا رفعه حسين لجامع ولاد العجيلي بيصلي غادي اول مرة من لما جينا سكنا هني يصلي في جامع غير جامعنا اللي هني..
ابتسم عبد القيوم بأسف ..
لطفي؛هي خلاص العصر ع وشك..
حط عبد القيوم يده ع ذراع لطفي:وقال هي..
ومشوا مع بعض..
لطفي:عبد القيوم قولي؟
عبد القيوم؛شنو؟
لطفي؛علاش ماتعزمش عرب الكفرة يجوا هني نكسبوا معرفتهم..
ابتسم وقال:والله شن بنقولك هما مايحبوش يطلعوا من غادي..لكن نحاول نلح عليهم وان شاء الله يقتنعوا ويجوا..
☘وكملوا طريقهم للجامع وهما يهدرزوا..
لما وصلوا آذن العصر..
خشوا للجامع لقوا فيه عيلة شنيبه واقاربهم..
طلقوا السلام عادي..
ولطفي طول خش في صلاة تحية المسجد..
محمد شنيبه لاحظه بس ماباش يدقق علي تصرفه الراجل ليه عذره..
بس الجالي لما شافه جاي مع التارقي بدت ع وجهه ملامح الامتعاض..
وعيونه قعدوا ع التارقي لين وقف في مكان اختاره وبدي يصلي في تحية المسجد حتى هو...
🍃وطوبى..
وهي لابسه ملاية الصلاة..
كانت مقعمزة ع الكارتوني تحط علي الرسمه في لمساتها الاخيره..
وهي تردد ورا المؤذن لين كمل...
سيبت اللي في يدها وناضت للصلاة..
بعد ماصلت...
حولت الملايه..ومشت للكاتوني لفاته وشداته بإستيك وحطاته جنب الدولاب..
ومشت طلعت من الدار للكوجينه..
وبدت توتي في حاجات المبروشه بش ديرهم لأختها غرفه..
وهي توتي فيهم خطرت ع بالها حاجه خلتها تبتسم...
🍃فهالوقت..
خشوا اميمه واريج للحوش وهما يهدرزوا..
اريج وهي متنرفزة ودموعها في عيونها؛مش فاهمه شن معناها الحركه اللي دارها..
قسما بالله يااميمه خلاني نادمه ع الساعه اللي حبيته فيها..
وحطت ايديها الزوز ع انفها وفمها ودموعها نزلوا..
حطت اميمه يدها ع كتفها وقالت؛اهدي اريج خلاص..
حاولت تهدي روحها..وقفت بكي ومسحت دموعها..
اميمه؛حاولي تتجاهلي معاش تفكري فيه..
خدت نفس وقالت؛نحاول..
سمعوا الزوز اصوات جايه من الكوجينه..
ابتسمت اميمه وقالت؛دير في المبروشه..
ومشت ووراها للكوجينه..
خشوا عليها لقوها لاهيه...
اميمه؛علاش طلعتي بسرعه؟
قعدت تشتغل ع المبروشه بدون ماترد..
اريج مشت قعمزت وهي تقول؛قاعده مش صافيه من ناحيتها..
تنهدت وقعدت ساكته..
اميمه:لكن هي كان باين عليها انها نادمه.
وقفت اللي دير فيه والتفتت لأميمه وقالت:وفي شن ينفع ندمها؟..يجبر خاطر سدرة اللي كسراته ولايحول الوجيعه اللي دارتهالها؟!..
سكتوا الزوز وع وجوههم كانت باديه ملامح الاسف والضيق..
لفت وجهها عنهم وقعدت تشبح للعجينه وهي تقول:اختي صح ونحبها ووالله لو طقت فيا اني ننسى فيسع ونفوت ونسامح وماندورش..لكن في سدره..خنقتها العبره وهي تقول..مانقدرش..
شبحوا لبعض بحزن..
وهي شدت روحها بقوة مابتش تبكي..
ورجعت تعجن في العجينه..
اميمه وهي تشوفلها مشت قعمزت ورا الطاوله وقعدت تفكر تهدرز في أي شي بش تغير جو طوبى..
وماخطرش في بالها الا شي واحد ومش عارفه علاش خطرلها..
اميمه؛بنات بناخد رايكم في حاجه..
اريج؛شني؟
اميمه؛في بنوته تخدم معاي عاجبتني ونبيها لحسين .
التفتت طوبى وشبحتلها بإبتسامه وقالت؛العسوله اللي شفتها عندك يومها ولا؟
ابتسمت وقالت؛ايه..
طوبى لفت وهي تقول؛الله يبارك عليها..جميله ولطيفه وراقيه..
اميمه؛وطيوبه هلبه..
اريج؛شوقتوني نشوفها..
اميمه؛جت بعد اللي صار لسدره.يومها كانت لابسه بالطو لونه وردي..
اريج؛اها زبطها..وسروال جينز لونه سماوي هافت لين قريب مولي ابيض..محلاها تجنن..
اميمه؛ان شاء الله بعد ماتنزاح هالغمه نفتح معاه موضوعها ونحاول نقنعه..
طوبى سيبت اللي في يدها وشبحتلها وهي تقول؛سمعتي خالي امس شن قال..قال مرات تقعد ع هالحال شهور ولاسنه..عبوا دموعها محجر العين وهي تقول...مش حتوقف الدنيا سنه كامله!..كل حد لازم يعيش حياته عادي اللي بيتزوج اللي بيخطب اللي يبي يفرح يفرح ويدير كل شي خاطره فيه..هي قاعده حية ترزق ربي يطول في عمرها مانبوش نفاولوا عليها فال مش باهي لاقدر الله..
اريج؛صح..هي بروحها بعدين بتلوم علينا لوعرفت ان فغيابها كملناها حزن وبكي..هي كانت تحارب بش تشوفنا نضحكوا وعايشين حياة حلوة...حني،انتم،جدي..ماكانتش تحب تشوف حد متكدر وضايقه بيه..
اميمه مسحت دموعها وقالت؛صح...قالتلي قبل ماتخلي شي يكسرك انتي بنت الواعر..حتى لو كنتي في اضعف حالاتك لازم تباني ديما قويه..
رشفت طوبى ودموعها تنزل وهي تشوف لاميمه..
قلبها واجعها ع اختها..وع حال اميمه اللي مش قادرة تخفي ألم جرح الفراق والغدر...
واريج كانت تشوف لأميمه بعيون مدمعه وقلبها خايف ليصير معاها نفس الشي...
☘وبعد صلاة العصر..
تم عقد قران عمر ع بنت خاله..
عمر كان جثه بلاروح..ملامح وجهه غالبه عليهم الكآبه رغم الابتسامة المصطنعه اللي كانت مرسومه..
يسلموا عليه ويهنوا فيه..وهو قاعد يجامل فيهم ومش حاس الا بشعور واحد...الحسرة..
شتان بين امس واليوم..
بين عقد قرانه ع حبيبة قلبه..
وبين عقد قرانه ع بنت خاله اللي مايعرف عنها شي كان اسمها ومش حاس اتجاهها بولا شعور..
بين فرحته يومها..وبين تعاسته اليوم..
وطبعا الندم قاعد ياكل فيه ماكله ع حب عمره اللي ضيعه من ايديه..ع مراة عارف ومتأكد انه مش حيلقى زيها مهما لف ودار وشاف...
اللي زي اميمه نادرات..والنادر والغالي مش لأي حد..
🍃وخوه..
نضال..بعد ماسلم ع خوه طول انسحب ومشي روح من غير مايلاحظه حد..
بس بعدين حسوا بغيابه واستغربوه واولهم محمد ولد خوه..
🍃ومن جهه تانيه..
عبد القيوم طلع مع لطفي من الجامع بعد صلاة العصر مباشرة ومشوا يشوفوا مشكلة الضي وفي الشارع اللي وراهم..
لقوا جماعة الصيانه كيف واصلين وباديين بشغلهم ع القابينه...
وهما قعدوا معاهم...
🍃وللحوش وصلوا حسين وعلي الواعر..
نزلوا من السيارة وخشوا للحوش..ومشوا طول بش يطمنوا ع عبد المطلب..
وين خشوا عليه للدار...
☘اميمه؛هي دخل يدك بالشويه..بالشويه..
قعدوا واقفين يشبحولها كيف تلبس في بوها الفانليا متاعه وهو يبان شارد الذهن..بس في الحقيقه مش قادر يشبح لوجهها..
بعد كملت..مسحت ع شعره بإيديها بش تساويه وقالت؛كيف طلعت من غير ماتغيرله حسين صدره كله مبلول..
حسين؛استعجلني جدي
علي؛قتلي بنغير لبوي!؟
حسين؛ماقلتش..لما قعدت تكشخ طلعت طول..
علي:في الجديد ان شاء الله ننفلق ماتخليش بوك هكي يضربه الصقع ع صدره..
حسين وهو يشبح لجده بنظرة خوف هز راسه وقال:حاضر..
ابتسمت اميمه وقالت؛شن تبوا العشي؟
علي:لالا ماديري شي..توا بري وتي روحك..
اميمه بإستغراب؛علاش؟
علي؛بنطلعوا اني وياك نديروا دورة..
حسين قعد يشبح لأميمه ومركز ع ملامح وجهها حسها فرحت بطلب جدها..
اميمه بضحكه؛باهي شويه بس..
ومشت بسرعه طلعت من الدار..وعيون بوها معاها...
التفت علي لحسين وقاله؛ماتتحركش من جنب بوك لين نروحوا وكان اضطريت تطلع خبر عمك ولاعمتك يجوا يقعدوا حداه..
حسين؛حاضر..
تنحنح علي ومشي وهو يضرب بعكوزه في الأرض وطلع من حداهم..
تنهد حسين ومشي قعمز..
عبد المطلب؛وين..صليتوا..؟
حسين؛في جامع ولاد العجيلي..
شبحله شويه..بعدين غير عيونه وشبح في الفراغ وهو يفكر...
☘☘☘☘☘
"هاك خودي"
خدت اريج حافظه فيها المبروشه وقالت؛نبيله شدتهم ع العشي راهو..
طوبى هزت راسها بدون ماتتكلم..
اريج فهمت انها مش حتولي قالت؛تمام..سلام توا..
طوبى؛سلام..لفت وخشت داخل..
واريج مشت طلعت من الحوش..
🍃وهي طالعه..
عيونها جو ع نضال وهو واقف قدام المطحن يكلم في محمود..
شدت دموعها بالسيف ومشت قصت الطريق..
🍃نضال؛بيقعد فترة..وقالي نعبا عليك في المطحن..
:كونوا هانيين..
نضال:مرة مرة بتجي نشوف الوضع..
:تمام..
نضال؛باهي ربي يعاون..
؛تسلم..
وجي بيلف ويمشي للقهوة..
عيونه جو ع اريج وهي واقفه قدام باب حوش عبد الرؤوف دق في الباب..
من شوقه ليها..قعد واقف يشوفلها ونسي نفسه..
اما هي لما شبحتله..عطاته نظره حاده من فوق لتحت بعدين قلبت وجهها عنه..
تنهد وقال..
"حرجانه يانضال..ااه لو تعرفي اللي فيا يافستق"
انفتح الباب ومشت خشت طول..
وهو بضيق لف ومشي للقهوة...
☘☘☘☘☘
وقبل المغرب..
كانوا نساوين حوش شنيبه يوتوا في ارواحهم بش بيمشوا للصاله اللي دايرينها اهل العروس لبنتهم..
ونجاة حطت كل ماعندها من ابداع بش طلعت بطلة حلوة هلبه..
صورت روحها..وبعتت الصور للجالي طول..
وهو لما شافهم طار عقله بيها...
🍃"هيا نجاة"
كانت واقفه ع المرايه تقرا في رساله بعتهالها الجالي وهي تضحك..لما سمعت مغليه تنادي قالت:هيا هي..
حطت غطا عبايه الكاب ع راسها ونزلاته بش يدرق وجهها ورفعت بيدها العبايه ومشت طلعت من الجناح..
🍃برا..
السيارات اللي ماشيه..
الجالي ومعاهم زوز من ولاد خالاته..
وقبل مايطلعولهم النساوين..
نجاه وهي مطبسه ع بنتها جوري تساوي في سلسالها قالت؛بري جري اركبي سيارة عمو جالي..
جوري:باهي..
ووقفت ع حيلها والبنت مشت بسرعه وامها وراها..
وكانوا نساوين العيله قدامها..
وين طلعوا برا للسياره..
جوري من روشن سيارة الجالي؛ماما تعالي..
الجالي التفتلها وقال بحده؛جوري اسكتي..
البنت قعمزت وهي منحرجه..
نجاة؛ايااه شن ركبها غادي..
شبحتلها خديجه من فوق لتحت وقالت؛تعالي نركبوا معاهم..
غيرت نسرين عيونها عنهم وهي مبتسمه ع جنب ومشت ركبت في سيارة تانيه..
اخت مغليه؛تعالي مغليه اركبي معاي..
مغليه؛هيا هي..
ومشوا هما الزوز..
قربت خديجه من سيارة الجالي وهي تقول؛هيا ماما..
الجالي دار كلاكس..
شبحتله نجاه..اشرلها بعيون تركب وهو يفنص فيها لأنها قعدت واقفه في الشارع تتفرج ع خديجه اللي تتفنن في قهرها..
خافت ومشت طول ركبت من الخلف جنب بنتها..
وخديجه ركبت جنب الجالي...وراما ركبت من الخلف مع نجاة وجوري..
الجالي بعصبيه؛واقفات والدنيا تتفرج عليكم !؟
خديجه؛خلاص هانا ركبنا تحرك هي...
جوري:عمو دير كلاكس..
خديجه ابتسمت بمكر وشبحت لحياش عيت الواعر ايه كلكس جالي..
تنهد وقال؛باهي..
وحط يده ع الكلاكس...
طلع الصوت..والسيارات اللي قدامه قلدوه...
🍃نضال وهو في القهوة سمع الكلاكس..
انتابه شعور بالغضب..سيب اللي عنده ومشي طلع بسرعه  ووقف قدام السيارات وقال بصوت عالي وبعصبيه وهو يحرك في يده؛شن هدا انت وياه!..وقفوا الزفت وقفوا..
اللي في القهوة استغربوا ردة فعله واكثرهم محمد المهدي..
وبوه اللي كان واقف حدا الباب استغرب ردة فعله..
نزل الجالي من السيارة وقاله؛خيرك!..
محمد شنيبه؛شن جاك!؟
نضال بلع ريقه وقال؛كيف شن جاني يابوي..اشر بيده ع حوش الواعر وقال..عيب ولا.؟
شبح الجالي لحوش الواعر وفكر في طوبى وهي تسمع في الكلاكس شن حتكون ردة فعلها..
ونجاة تشبحله وهي حامقه..
خديجه بنرفزة؛شن بنقعدوا حازنين عليها لين تنوض!؟
محمد شنيبه هز راسه وقال؛عندك حق..شبح للسيارات وقال وهو يأشر بيده...معاش ديروا كلاكس..
كلهم هزوا روسهم بالموافقه وفي من اشرله بإبهامه..
الجالي رجع ركب وهو يقول؛راحوا عن بالي بكل..
وسكر الباب..
☘وفي السيارة اللي راكبين فيها مغليه ونسرين..
نسرين بحمق؛كان نعرف من داره الكلاكس بس..
خالتها؛نسوا يانسرين..
مغليه؛خلاص ماصار شي..هي وليدي تحرك..
:حاضر خالتي..
وتحرك..
والسيارات لحقوه...
ومشوا كلهم ورا بعض وطلعوا من شارع القهوة...
محمد جي لعمه وقاله؛عم خيرك جوك مش عاجبني بكل..
شبحله نضال بعدين قال؛مافي شي مهم حاجه صايره في الخدمه بس..
محمد؛غير قول الحق متعارك انت والمدام؟
ضربه ع راسه من الخلف ضربه خفيفه ومشي خش القهوة ومحمد ضحك ولحقه..
وجده بعدين ماكان يشوفلهم وهما يهدرزوا..
غير عيونه لسيارة مرسيدس سودا جايه لحوش لطفي..
درست قدامه ونزل منها المحجوب..
ومشي لحوش نسيبه..دق الباب..وطول انفتح وخش داخل..
بعد ماتسكر الباب..
انفتح باب حوش عبد الرؤوف وطلعت منه نبيله..
شبحها وهي طالعه..ماقدرتش يتحكم في ابتسامته اللي بانت ع وجهه غصب عنه..لحقها بعيونه لين قصت الطريق وتوجهت لحوش لطفي حتى هي...
🍃في جنان حوش لطفي..
المحجوب؛شكلك قاعده بروحك؟
طوبى بإبتسامه؛ايه كلهم في حوش غرفه اني عندي شغل قعدت ع خاطره..
ابتسم وهو مضيق عيونه وقال:نبي نسألك ع حاجه..
طوبى:داخل اسألني خالي جميدي هني..
ضحك وقال:تمام..
ابتسمت وقالت؛هي تفضل..
ولما جو بيخشوا دق باب الحوش..
وقفوا وطوبى قالت:مني زعمه..؟
بعدين مشت بتفتح..
والمحجوب واقف في مكانه وهو يشوفلها..
وقفت ع الباب وقالت:مني؟
"افتحي طوبى"
هو حط ايديه ورا ظهره وعقد حواجبه بإبتسامه..
وطوبى ضايقت لانها عرفت نبيله علاش جايه..
فتحتلها الباب وقال؛تفضلي ابله نبيله..
ابتسمت نبيله وخشت وهي تقول؛يزيد فضلك..
سكرت طوبى الباب ونبيله تقول؛شن ماتبيش تتعشي من ايديا!؟
ضحكت طوبى بإحراج وقالت؛لامش هكي بس والله مربوطه بحاجه لازم نكملها الليله..
نبيله؛عارفتها شن هي قالولي تقدري تكمليها الليله ساهله هي تعالي معاي طوبى ماتسكريش راسك نزعل منك راهو..
طوبى تنهدت وكيف جت بتتكلم تفكرت خالها فنصت عيونها وشبحت جيهته وقالت؛خالي قاعد ماخشيتش!
شبحتله نبيله وانصدمت !..
هو وعيونه عليها قال بإبتسامه؛بري انتي اني طالع هكي ولاهكي ماكنتش مطول..
نبيله ارتبكت هلبه ومعاش عرفت تتكلم..
مشي طول وين جي فايت ورا طوبى طبطب ع ذراعها وقال؛سلمي ع العيله..السلام عليكم..
طوبى وهي تشوفله بشي من الضيق:وعليكم السلام..
هني نبيله تكلمت وقالت؛تفضل حتى انت..
وقف ع الباب وشبحلها بعدين ابتسم وقال؛لازم يعزمني صاحب الحوش..
نبيله وهي تحاول دير روحها عاديه؛هو في الحوش تو نكلمه..
شافت لطوبى وقالت؛هي خشي وتي روحك وتعالي..
طوبى شبحت لخالها..
هو تنحنح بإحراج بعدين ابتسم وقال:اني برا..
ومشي فتح الباب وطلع..
شافت طوبى لنبيله وقالت؛خشي راجيني داخل صقع هني؟
نبيله؛لامش صقع هلبه بعدين اني لابسه كويس غير انتي سقدي روحك..وضحكت..
ابتسمت طوبى مجامله ومشت خشت للحوش وهي مضايقه..
بعدما خشت..نبيله خدت نفس وزفرت..بعدين قالت..ياربي..
"نبيله"
فنصت عيونها لما حست قلبها بيطلع من مكانه..
تمالكت نفسها..والتفتت شافتله..
لقاته يشوفلها بنظرات مختلفه عن النظرات البارده اللي كان يشوفلها بيهم قبل شويه وع وجهه ابتسامة نفسها ابتسامته القديمه..ايام الجامعه..ع قد ماتعجبها ع قد ماكانت تستفز فيها..
هو رد الباب وقال؛تعرفي..ولا مرة تخيلت اني نرجع نشوفك مرة تانيه..لا..وتكوني قريبه مني للدرجه هادي..بنت اختي مرت خوك..تخيلتيها انتي!؟
ضحكت ودرقت بيدها فمها وانفها بعدين نزلتها وقالت:لا..
هو بضحكه؛شن حالك يانبيله وشن دارت فيك الدنيا وشن اللي جابكم هني وكيف عرفتوا بنات اختي وكيف
قاطعاته وهي تقول؛شويه شويه شن هدا!؟ تبيني نحكيلك هدا كله في الشارع!؟
🍃وطوبى داخل دور ع الحوش وتشوف كان في حاجه في الضي..ولافي ميه مفتوحه ولاتقطر..
بعد ماتاكدت ان كل شي تمام..مشت بتطلع لبست في رجليها
وطلعت..وفجأة وقفت لما سمعت خالها يقول
"بصراحه وعارفتيني ديما صريح..نبي نهدرز معاك وخلاص"
ابتسمت بخجل
المحجوب؛والله من هداكا اليوم لليوم واني مش عارف وين نلقاك بش نهدرز عليك ونعرف كل شي عنك
شبحتله وقالت؛مافي شي مهم..كملت في المجال لين درت مكتب وشغلي ماشي والحمد لله..
هز راسه وقال؛واضح لاتزوجتي ولافكرتي فيه بعدي صح!؟
رفعت حواجبها وهي تشوفله وكأنه تقول
"شن هالثقه!"
هو قعد يضحك بعدين قال:نفس الشبحه نفسها تتفكري لما وقفت عليك اول مرة وقتلك خيرك تشبحيلي..
ضحكت..
بعدين ابتسمت وبشي من الخجل قالت وهي كاذبه لغاية ما:سمعت بيك تزوجت ودرت صغار..ماخطرش في بالي انك سافرت نهائي
هو غنى بضحكه:كيفك قال عم بيقولوا صار عندك ولاد
انا والله كنت مفكرتك برات البلاد..ضحك بعدين قال..لاياستي كنت برات البلاد ومادرتش ولاد..يعني ماتزوجتش..وبطلي تزلفيت..
نزلت راسها وحطت يدها ع جبهتها وقعدت
تضحك بإحراج...
وهو يشوفلها بإبتسامه حلوة ومازال مش مستوعب ان رجع شافها تاني بعد سنين فراق دامت لعقدين...
🍃وطوبى تسمع فيهم وهي متفاجأة هلبه..
بينت راسها شويه بش تشوفهم..
لقت نبيله منزله راسها وتبان مرتبكه وخجوله وكأنها بنوته في سن المراهقه..
وخالها في وقفته يبان جريء وهو حاط ايديه في جيوبه ويشوفلها بنظرات باينه فيهم مشاعره..
ابتسمت وقالت؛هيا ياطوبى  فرقي الجماعات قبل ليخش عليهم بوك
تنحنحت ومشتلهم
وقالت؛خالي خيرك وليت تبي حاجه؟
الزوز ارتبكوا
وهو قال بإبتسامه؛لاغير..قلت نمشوا مع بعض بس..
هزت راسها وهي تمرر في نظرها عليهم وقالت؛باهي..هيا..
هو شبح لنبيله اللي كانت تتجنب تشوفله وقال:هيا.
فتح الباب وطلع..
وطلعوا وراه وطوبى سكرت الباب..
هو مشي قدامهم وهما وراه..
وطوبى تسرق في النظر لنبيله اللي تغير حالها تماما في وجود المحجوب..
غيرت عيونها عنها وهي تقول في نفسها..
"الحب وشن يدير في البنادم.."
سكت حديث نفسها وقعدت تفكر في سؤال خطر ع بالها..
هي مرت بالحالات هادي مع الجالي ولالا؟
ماحستش انها تتغير لما تكون معاه..ولاتحس بشعور الربكه في وجوده..
هالحاله شافت كل اللي حواليها عاشوها ماعداها هي ولا مرة حست ان الجالي بالنسبه ليها يختلف عن كل الناس..
التفكير في الحاجه هادي ضايقها..
وخافت انه يكون مدخل للشيطان يبي يخشلها منه ويرفعها لمتاهات تانيه..
تعوذت منه في نفسها..وتجاهلت هالأفكار..
🍃وصلوا في حوش عبد الرؤوف..
فتحت نبيله الباب وقالت؛تفضلوا..
المحجوب:لا اني ناديلي عبد الرؤوف..
هزت راسها وقالت؛باهي..خشي طوبى..
خشت طوبى وهي تقول؛ماتخليش خالي يراجي هلبه بش مايجمدش..
نبيله حست ان طوبى زي اللي تلمح بكلامها..
قعدت تشبحلها لين فاتت من قدامها وخشت داخل وهي مشت وراها وقاعده تفكر في كلامها..
☘اما المحجوب وهو واقف برا..
كان يضحك بصمت لان زبط ان طوبى فهمت او عرفت اللي فيها..
🍃ومن بعيد شويه كان محمد شنيبه اللي داير كرسي ومقعمز قدام المطحن يشوفله بعدم تقبل...
شويه وطلع عبد الرؤوف وسلم عليه بعدين دخله للحوش..
☘وهو خش من هني..
وعبد القيوم ولطفي خشوا لشارع القهوة من هني..
لطفي؛ بندير طلة ع المطحن قبل..
عبد القيوم؛باهي ربي يساعدك..السلام عليكم..
لطفي: وعليكم السلام..
ومشي عبد القيوم للحوش..
ولطفي للمطحن..
لما خشله وقعد يهدرز مع الشباب اللي فيه..
جاه محمد شنيبه...
وقف في باب المطحن وقال:السلام عليكم..
التفت وشافله لطفي بنظرة عدم رضا واضحه بس رد عليه وقال:وعليكم السلام..
محمد؛فاضي شويه نبيك في موضوع..
شبحله شويه بعدين هز راسه وقال:فاضي..
محمد شنيبه بآبتسامه؛ مالا تفضل لمربوعتي نشربوا قهوة ..
لطفي:ماشي..التفتت للشباب اللي يخدموا عنده وقال؛جيبلي الحسابات بعدين للحوش..
:حاضر..
التفت لمحمد وقال؛تفضل..
ومشي طلع معاه وتوجهوا مع بعض لحوش شنيبه وعيون فراس اللي كان مقعمز قدام محل الحلاق متاعه معاهم...
🍃🍃🍃🍃
وفي ميدان الشهداء..
كانوا الجد والحفيده عايشين احلى الاجواء مع بعض..
تمشوا..ووكلوا الحمام...
وشروا تسالي وقعمزوا كلوها مع بعض وهما يهدرزوا..
علي؛جدك ديما راد باله من روحه بالذات سنوني..سنوني هادم ديما شادلهم المسواك وندعك فيهم..الحليب هدا مانخليش فيه بكل..حتى لما وقفت ع ماكلة الدهان قعدت نشرب في خالي دسم..
اميمه وهي تاكل في السبول"الفشار" قالت بضحكه:الله يبارك الله يبارك ..
علي:ايوه.حتى انتي ردي بالك واهتمي بصحتك وروحك بش ماتكبريش فيسع وتقعدي قايمه روحك..تنهد وقال..تعرفي يابنتي ديما ندعي الله سبحانه وتعالى مايخليني ثقيل ع حد ..
اميمه؛حبيبي في عيوننا انت شن ماكان وضعك وحالتك..ربي يحفظك ويعطيك صحتك ويطول في عمرك..
ابتسم نص ابتسامه وقعد ياكل حتى هو ويهز في راسه..
شويه شافت اميمه واحد يصور قالت؛شن رايك جدي ناخدوا صورة...
علي؛عادي..صوري..
ضحكت وقالت؛مش اني هداكا يصورنا..واشرت عليه..
علي؛باهي..باهي..علا صوته شويه وقال..ياهوو..
ضحكت اميمه..
شبحله الشاب اللي يصور..
علي؛انت اللي تصور تعال..تعال..
قدملهم وقال؛تفضل ياحاج..
علي:صورنا..
ابتسم وقال:حاضر..
وبعد عنهم واستخدم الكاميرا متاعه..
وهي تعنقت ذراع جدها وحطت كتفها عليه وابتسمت..
هو طول خدالهم الصور..
طلعت وقتي جاهم بيها..
المصور:تفضلي..
جبدها منه الحاج علي وهو يشبحله بحده..
الشاب انحرج واميمه شدت ضحكتها..
غير عيونه عنه وشاف للصورة وقال:كويسه..شوفي..
وراها لاميمه ابتسمت وقالت؛حلوه
المصور بإبتسامه؛تبي غيرها؟
علي:كلمني اني اني..
ارتبك الشاب وشبحله..
واميمه حاولت تبان جديه وهي شاده الضحكه..
علي ؛ريت هداكا اللي يبيع الورد..جيب منه ورده..جيبهالي اني..
الشاب؛حاضر..
ومشي..
اميمه؛علاش ماعطيتاش فلوس؟!
علي؛ياخدهم مع حق الصورة..
شويه جاهم..ومد الورده للحاج علي وقال:تفضل..
خداها علي منه ومدها لحفيدته..
خدتها وهي مبتسمه وقالت؛شكرا جدي..
علي شبح للمصور وقاله؛هي صورنا..
ابتسم الشاب وتباعد..
واميمه شدت في يد جدهاوابتسمت..
وخدالهم  صورة...
حتى هي طلعت وقتي جابها للحاج علي طول..
خداها وشافها وقال:كويسه..وراها لأميمه..
هي بإبتسامه قالت:حلوة..
قاللها؛خوديها..
خدتها اميمه..وهو طلع تزدانه..وفتحه وطلع منه فلوس ومدهم للشاب..
خداهم وقال؛ربي يحفظكم..ومشي وخلاهم..
اميمه حطت الصور في شنطتها وقالت؛نتصلوا بحسين نشوفوه وينه؟
فهم انها تبي تطمن ع بوها؛اتصلي اتصلي..
هي قالت؛تمام..
🍃وكلماته وقعدت تسأل فيه عن بوها وعن وضعه بطريقه غير مباشرة بش تطمن..وجدها يشوفلها بنظرات فخر..
ايه فخر بحفيدته اللي برغم كل شي عاشاته في حياتها..طلعت انسانه سويه قلبها نظيف..وفي داخله كان يقول وهو يشوفلها...
"مانكش ليه هدا ليش ربك صرفه عنك بعد ما خلاك تعرفي ان خيرتك مش فيه يعوضك ربي باللي يستاهلك يابنتي"
☘☘☘☘☘
حولت وشاحها وهي تقول..
سمعت امك شن قالت اليوم؟
تنهد بضيق وهو يقول:ايه ومش عارف شن بندير مادام خشوا فيها بوي وامي بنحصل..
ثريا؛ماهو كان سمعت كلامي من الاول ماصارش هكي
قعمز ع الكنبه وقال؛حطيت في بالي اني بندير شغل كبير مع مختار الواعر لكن اللي فكرت فيه ماصارش
قعدت ثريا تفكر وهي تشوفله بعدين قالت؛في بالي حاجه كان درناها تريحك من موال عيلة خوك بالمرة وماتخلي حد يلومك ع اللي بديره معاهم..
؛باهي طلعي اللي عندك قولي شن تراجي..
خدت نفس بعدين قعمزت وهي تقول؛هدا ياسيدي آلاء بنت خوك.....

#اسرار
#طوبى

....يتبع....