طوبى "جنة طوبى"

الجزء الثالث والخمسين2

 #طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا2"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
يوم الأحد..
الساعه 1:15ظهرا..
كان الجو بين غيم وشمس..
لامصقع هلبه ولادافي هلبه..
نزلت من التاكسي..وقعدت تمشي ووتتخطى في برك المية الصغيره ببوتها الجلد بو كعب عالي..
وصلت لمطعم يبان غالي وراقي..
وقفت قدامه وهي تشوفله..
بعدين خدت نفس وزفرت..
ومشت خشت للمطعم..
🍃داخل..
هو كان مقعمز ورا وحده من الطاولات..
حاط ايديه الزوز ع الطاوله ويدربك بصوابعه عليها..
وهو يستنى فيها..
عيونه ع المدخل..
شافها..
وهي لابسه بالطو اسود للركبه رابطه حزامه..
تحت سروال جينز ازرق غامق وضابط..
ووشاح لونه بني هافت..
وع كتفها شنطه صغيرة سودا سيرها ع هيئة سلسال لونه ذهبي..
مرر نظره ع لبسها بعدين شبحلها هي كيف دور..
ابتسم..
لما جو عيونها عليه..
رفع يده اليمين وحياها بحركة الاصابع..
هي ابتسمت ومشتله..
وصلت في الطاوله قالت..
صابرين بابتسامه:سلام..
مختار حط رجل ع رجل وقال:اهلا..اشرلها ع الكرسي..
هي وخراته وقعمزت..
حطت شنطتها ع الطاوله وقالت:اسفه عطلت عليك طلعت متأخر من الخدمه وزحمة الطريق زادت عطلتني..
مختار هز راسه وهو:عارف عارف..مش مشكله..المهم امورك تمام..
صابرين بإبتسامه:ايه تمام..
مختار:باهي..بما إن توا وقت غدي نبيك تغديني ع ذوقك..
صابرين بإبتسامة؛مرات اللي نحب ناكله ماتحباش..
حرك راسه بالنفي وقال؛لالا..ناكل كل شي..انتي اطلبي ومادوريش..
صابرين؛اني نعشق المكرونه بأنواعها..
مختار ابتسم برفعة حواجب وقال؛اني لو جعت في وقت مانقدرش نطلب فيه او نطلع ناكل برا ندير الفريدو ع السريع.
ضحكت وقالت؛اني نحب نديرها في الليل..
مختار:واضح تاكلي هلبه..
هي انحرجت وقالت؛-قصدك سمينه؟
قعد يضحك..
وهي تشوفله بإحراج ووجها احمر لونه..
هدا ضحك وقال؛مش هلبه..هكي مناسب..
ابتسمت..
مختار؛هيا خودي المنيو واختاري جعان..
ضحكت وقالت؛باهي..وخدت قائمة الأكل..
وقعدت تشبحلها انصدمت..
اللي فيها كله مكتوب بلغة ماتعرفهاش مافهمتش منه الا كلمة
(Pasta)..
هو قعد يشوفلها وع وجهها ابتسامه جانبيه..
بعدين خدي منها القائمه وهي زادت انحرجت..
شافها..وبعدها غير عيونه وشاف للنادل واشرله يجيه..
قاله ع كم نوع..
وهي تشوفله بإحراج..
بعد مامشي النادل شبحلها وابتسم بعدين قال:المطعم ايطالي..
صابرين بإحراج؛ماركزتش..
مختار:مافيها شي لو قلتي مانعرفش..عادي يعني مش كل الناس تفهم ايطالي ولاكلهم يعرفوا ان في مطعم ايطالي في طرابلس..
ابتسمت مجامله وقالت؛صح.
ضحك نص ضحكه وقال:خلاص فوتي وخلينا في المهم..الشغل..
شبحتله بتركيز..
مختار:زي ماقلت قبل اني ناوي نفتح معمل تحاليل وع مستوى وعرضت عليك الاداره من اللي سمعته عنك وعن تفانيك في شغلك وانك ديما واخدتيه جديات وهدا اللي نبيه..
ابتسمت..
مختار:الناس اللي اخترتهم يخدموا فيه كفاءات وحيكونوا تحت ادارتك انتي..
صابرين وهي تحاول تخفي فرحتها وتبان عاديه قالت:ان شاء الله نكون حسن ظنك..
مختار:اكيد حتكوني عند حسن ظني مااخترتكش اعتباطا مش لاقي فلوسي في الشارع..
ابتسمت مجامله وهي ساكته ومن داخل كانت متوترة..
مختار:بالنسبه للأمور الماليه..مبدئيا..تاخدي 2000كل شهر يزيدوا او ينقصوا حسب شغلك..
هي صدمها مبلغ بس مازال قاعده تتصنع انها عاديه ومش فارقه معاها قالت؛حندير جهدي بش نخلي للمعمل اسم معروف في فترة قصيرة..
مختار:يهموني هلبه النظام والدقه..جو الخدمه متاع ليبين نكرهه يعني لو شفته نجيب غيرك..
صابرين:مش حتشوف الااللي يسرك..
ابتسم وقال:حلو حلو..وتوا خلي الشغل ع تركينه..وهدرزيلي عنك اكثر..
يعني مثلا شن اللي خلاك تخدمي ممرضه وانتي تقري وكيف كان شكل حياتك وقتها..وهكي يعني يهمني نعرف ماضيك..
صابرين؛علاش؟
ابتسم بعدين قال؛هكي..حب فضول..
~~~~~~~~~
صابرين بشي من الانفعال:حاجه غريبه عجيبه يانوجه مش زي الرجاله اللي عرفتهم في حياتي..هكي تحسيه مش ليبي طريقة تفكيره..طريقة كلامه..اسلوبه..فيه شي مش ليبي..
نجاة:مرات كان عايش برا..
صابرين وهي تفكر:مرات..
نجاة:المهم ع شن تفاهمتوا..
ابتسمت بحماس وهي تقول:بنبدا خدمه في المعمل الاسبوع الجاي وقال بيديرله حفلة افتتاح..
نجاة؛كويس..باهي وغيره..
صابرين:سألني عن حياتي كان يبي يعرف تفاصيل التفاصيل..
نجاة:ردي بالك النوعيه هادي في مواضيع الارتباط مايكونوش جديين..انتي خليك فالحه واعرفي كيف طيحيه..
صابرين:الحاجه هادي عندي اهم من الخدمه اللي عرضها عليا من كثر ماعاجبني يانجاة..اني مضايقني شي واحد الاختلاف بينا..هو تحسيه من عالم تاني عالم مانشوفش فيه الا في المسلسلات..
نجاة:وهني نقولك ردي بالك تتصنعي وديري روحك من هالعالم بالسيف..خليك ع طبيعتك..
حاجه ماتعرفيهاش قولي مانعرفهاش..أسأليه بينيله انك تبي تتعلمي منه كل شي ماتعرفيشي حسسيه انك عجينه وقاعدة تتشكل ع ايديه..نوعية الرجاله اللي في عمره لما يجروا في جرة بنات الصغار ديما هكي تفكيرهم..
وصابرين تسمع في كلام اختها وتفكر فيه...
🍃فهالوقت
الجالي كان واقف في جنان حوش لطفي..
ومرته قدامه تقول..
طوبى بضيق:خليني ليوم الخميس مانبيش نقعد بروحي ولانقعد في مكان يفكرني بيها ع الأقل توا..
الجالي بضيق:قلبي اني مقدر اللي انتي تمري بيه..بس حتى انتي قدري اللي قاعد نحس بيه وانتي بعيده عني..
طوبى برجاء:الاسبوع هدا بس لين يخف حزني شويه..اني اصلا مانبيش نكون معاك بش مانكدش عليك..
تنهد وقال:تمام..بس الاسبوع هدا بس طوبى..الخميس بعد البيان بنروح بيك طول لحوشنا..
ابتسمت مجامله وقالت؛خلاص
هو قرب منها باس راسها بعدين قال؛ماتبي شي..
طوبى:سلامتك بس..
الجالي تنهد وقال:كان تبي سلامتك تروحي معاي..
شدت يده وقالت برجاء:جولي..
ابتسم بتنهيده وقال:امري لله..خلاص خشي داخل صقع..
طوبى بإبتسامه؛باهي برا انت قبل.
الجالي بإبتسامه:حاضر..سلام..
طوبى؛في امان الله..
ولف ومشي وهي معاه بعيونها لين فتح الباب وطلع وسكره وراه..
وهي تنهدت بضيق بعدين مشت خشت للحوش..
🍃🍃🍃
"بناخد هدا شن رايك"
صابرين وهي تشوف لصورة في تليفون اختها؛نازك وحلو..
فجأة جت لنجاة رساله..
شافتها بروحها..
(بري للشقة)
بدت تضحك من قلبها..
وصابرين تشبحلها بإستغراب وهي تقول؛من مني؟
هدت ضحك وقالت؛راجلي حبيبي..
رفعت حاجبها وقالت؛شن يبي؟
نجاة:بتباتي الليله مع الصغار بروحك..
صابرين؛تراضيتو يعني..
نجاة بغرور:قتلك مايقدرش ع بعدي ياعمري.
ضيقت عيونها وقالت؛نجوته لأخر مرة نسألك انتي اللي قتلتي القطوسه صح!
نجاة؛ووااك ياصابرين كم مرة بنقولك لا..مش لهالدرجه عاد ..
وناضت من حداها ومشت لدار النوم..
صابرين بصوت مسموع ليها هي بس:والله انتي ياوخيتي نعرفك اني وكان يستاهل مانلومك لكن هالجالي مايستاهل ع خاطره تقتلي  حتى ناموسه..
☘☘☘☘☘
الساعه 5:30مساءا..
في قهوة الزعيم..
عبد القيوم؛فقدناك والله خليت مكانك..
ربيع بضحكه؛ماتفقد غالي حبيبي..
المهدي؛ايه شن تخبرنا عن السويد..
ربيع بضحكه؛كان مظلمه لما روحتلها نورت وتوا خليتها مظلمه..
ضحك عبد القيوم..
المهدي:ووين خشيت الشارع الضي هرب..
ربيع؛بلاد منحوسه ماعندي مانديرلها..
عبد القيوم بإبتسامه؛شن اخبارك رزقك غادي..
ربيع:ميه ميه..كله ماشي زي الساعه..وحتى هني الحمد لله الوضع كويس..مرر نظره عليهم وقال..انتم خبروني ماصار شي في غيابي..
المهدي؛كل شي حاله..
ربيع هز راسه وهو يقول؛باهي المهم الامور كلها تمام..
تنهد عبد القيوم وقال:الحمد لله...
شويه وفاتت سيارة نبيله من قدام القهوة..
شبحت لربيع بعدين غيرت عيونها عنه للطريق لين وصلت للحوش..
خشت بالسيارة..
بعدين درستها..
ونزلت منها وهي مطلعه تليفونها دور ع رقم معين..
لما لقاته كتبت رساله وبعتتها بعدين خشت داخل..
☘☘☘☘
في حجرة العمليات..
كانت مركزة مع الدكتور وهو يشرح عن العمليه..
وتسجل في ملاحظاتها في عقلها..
حفظتها لين تمت العمليه..
🍃بعد العمليه..
اميمه:الحالة هادي استثناء لهالسبب.
قصي بإبتسامه؛ايه..نهنيك اميمه ركزتي ع حاجات زملائك مادورهاش بكل رغم انها مهمه ويلقوها بعدين تعرفي لو قعدتي هكي نتنبئلك بمستقبل باهر..غير تجيك فرصه تطلعي برا..اللي زيك مايخلوهاش تروح..
اميمه بإبتسامه؛شكرا..وان شاء الله تجينا الفرصه..
قصي:يعني لو جت مايوقفلك فيها حد..
تلاشت ابتسامة اميمه وقعدت ساكته..
قصي؛نصيحه من استاذك اللي تهمه مصلحتك ماتخلي حد يدفن طموحك ويفرض عليك شي مش ليك..كافحي وقاتلي بش توصلي لأميمه..
اميمه هزت راسها وهي تحاول تخفي ضيقها وقالت؛إن شاء الله..
🍃وطول الطريق..
وهي مروحه لشارع القهوة كانت تفكر في كلام قصي..
وشكل حياتها مع عمر..
الخلافات اللي ديما قائمة بيناتهم بسبب خدمتها..
ووتيرتها اللي قاعد تتصاعد مرة بعد مرة لدرجة انه اخر مرة سافر من غير مايسلم عليها..
وهي تفكر..
مااستاقظتش تماما  وهي تسوق الا لما لقت روحها قدام حوش جدها..
وباهي اللي خدت إذن من مغليه المرة هادي بش تزور ماليها..
نزلت من السيارة وخشت للحوش..
شافت سيارة حسين مدرسه في الجنان..ابتسمت..
ومشت خشت داخل..
قعدت تسمع في اصوات هدرزتهم وهي ترمي في كندرتها..
بعدين خشت عليهم..
لقت امها وحسين وجدها مع بعض وسط الحوش..
ركزت ع سجادة الصلاة المطروحه قدام جدها..
قالت بإبتسامه؛السلام عليكم..
كلهم ردوا عليها؛وعليكم السلام..
مشت سلمت عليهم كلهم..
بعدين قعمزت حدا جدها وهي تقول؛شكلك كنت في بني وليد..
حسين؛ع طريقي كانت شدني صاحب ورفلي بتت عنده ولما روحت سقدني بفرشه والصلايه من سجادهم..
اميمه بإبتسامه:حاجه فخمه..
حسين:عندك علم يجي بعد الايراني؟
اميمه بإبتسامه:ايه نعرف..
علي:اعزمه نهار وشده يبات خل يروح من هني بقهوة التراهنه اللي مافيش اختها..
ضحكوا..
فجأة..
سمعوا صوت حاجه ارتطمت ع الارض..
علي:هدا شنو!؟
هما كانوا ساكتين يفكروا الصوت من وين جي..
علي:من دار بوك..نوض تحرك شوفه..
ناض حسين ومشالها بسرعه..
وعلي وقف بمساعده عكوزه ومشي لحقه..
واميمه ناضت ومشت وراهم..
اما صفيه اللي قعدت مقعمزة قالت بكره؛ان شاء الله معاد ينوض..
🍃خش حسين ع بوه الدار اللي طايح جنب السرير..
بسرعه جاه وقعد ينهض فيه وعبد المطلب يرعش ويبكي.
بوه قدمله و شده مع حسين مش بجهده لأن حسين كان رفع..
بس عاطفة الأبوه اللي عند علي وحنيته غلبوه وخلوه يحاول يساعده..
قعمزه حسين ع الكرسي وهو يقول:كيف طحت؟
عبدالمطلب وهو يبكي:بننزل..بروحي..بروحي..
بوه مسحله دموعه بيد وحدع وهو يقول بدون مايحط عيونه في عيون ولده:وانت تقدر تنزل بروحك يامغفل..
عبد المطلب نزل وهو يبكي..
رفعله راسه وقال:خليك راجل..وقعد يخبط بيده تحت ذقنه وهو يقول..خليك راجل..مع العلاج تولي زي ماكنت..
عبد المطلب:وفلوسي..شن يردهم..
شبح حسين لأميمه بأسف..
واميمه تشوف لبوها بنظرات كره وعيونها معبيات دموع..
اما علي رد عليه وهو يقول:ربي يهديك ياولدي ربي يهديك..
دعيت عليك هلبه..خل نجرب ندعيلك توا بالك..ربي يستجيب ويصلحك..
ولف ومشي بيطلع..
علي:تعالي قيسيلي الضغط..
هزت راسها..وخلاته يطلع ويمشي لداره بعدين لحقاته..
حسين شبح لبوه وقال:تبي نديرلك حاجه نجيبلك حاجه؟
عبد المطلب:يوسف وينه؟...خيره معاش جي.
حسين:مشغول يابوي اول مايفضى تو يجيك..
عبد المطلب:كلمه..كلمه..يجي..توا..
حسين بإستسلام:-حاضر..
☘واتصل حسين بيوسف وخلاه يجي للحوش..
وهو جاهم..وحامل معاه اخبار سيئة بس كانت متوقعه..
صفيه بضيق:عارفه بيصير هكي من الاول..
اميمه؛لكن هكي احسن ليك وليها..كويس اللي مادرتوش صغار..
صفيه:هي ماكانتش تبيهم وين نجيبولها سيرتهم ووجهها ينقلب..
يوسف وهو شاد دموعه بقوة:ع قولت اميمه هكي احسن ليها وليا..ناض وهو يقول..خل نمشي نشوف بوي..
ومشي من حداهم لدار بوه..
صفيه بضيق:عليك حظ حظ خوتك...
شبحتلها اميمه بحزن وهي تقول في نفسها"مش بس حظهم هما يام"
تنهدت امها وقالت؛شن صار في هديكا الدكتورة لخوك حسين؟
اميمه؛شافها مرتين يام..وماكلمنيش عليها..
صفيه:كلميه انتي افتحيله عيونه عليها..
اميمه رفعت حواجبها ونزلتهم وهي تقول:تو نحاول.
🍃وهو فهالوقت..
كان واقف فوق السطح سرحان في نجوم السمي..
وفي حياته اللي وقفت من بعدها...
اللي توا سمع صوت بكاها وكذب وذانه...
تبع الصوت لين شافها مقعمزة ورا حوشهم بروحها في عز الصقع حواليها صغار بينكا.
متلحفه بشال صوف مغطي راسها ونص جسمها.
صدمه اللي شافه
وولع في قلبه النار..وطول مشي نزل لأميمه
🍃اميمه بحزن؛بينكا ماتت
حسين وهو عاقد حواجبه بألم:امتى وكيف؟
اميمه:يوم الجمعه..كيف مش عارفه لقوها ميته في بالكونة جناحهم وخلاص
حسين:وعلاش قاعده في حوش عمي علاش مش في حوشها مع راجلها!؟
اميمه:هي ماتبيش تروح
حسين بغضب:وهو خلاها عادي وهي في فهالحاله..بدل مايقعد جنبها يحاول يطلعها من هالحاله اللي هي فيها لوحها ومشي!؟
اميمه:تعرف طوبى كويس ياحسين لما تخش في حالة زي هادي تحب نقعد بروحها!؟
حسين:هدا قبل ماتتزوج..لكن بعد الزواج مفروض الوضع هدا يتغير..يغيره اللي ينقاله راجلها..لكن...اااخ..شن بنقول توا بس..شن بنقول..استغفر الله العظيم وخلاص
ومشي وخلاها
وهي تبع فيه بنظرات اسف بعدين قالت: نطلع الموضوع من  راسي وننساه...علاش تنظلم بنت الناس معاه...!
🍃وفي حوش شيابينها
علقت حماتها الفستان اللي شرتهولها في الدولاب
القت عليه نظره وقالت:حتى في الحلم ماتشوفاش..
سكرت الدولاب..
بعدين مشت طلعت من الدار وسكرتها..
توجهت لدار المعيشه..
ع جية نضال قال:امي وين..
خديجه؛اهي داخل..
خش..وخشت بعدها..
لقي امه تاكل في الرمان وهي تتفرج ع مسلسل ع مسلسل بدوي..
شافه بعدين شبح لأمه وقال:شلونش ياشيخه مغليه..
مغليه:مليحه..
قعمز وقال:دوم مليحه..المهم بنقوللكم راهو البيان ماصارش منه في حوش عيت التاجوري..بيديروه في صاله.
خديجه:الحمد لله..هم وانزاح عن قلبي..
مغليه:وخيرهم مااتصلوا وقالوا..
ضيق نضال عيونه وقال:لحظه شويه يام..شن هو الهم اللي كان ع قلبك وانزاح ياخديجه!؟
خديجه:انهم يستقبلونا في حوش جدها..حياشهم قديمه وجنان حوش جدهم كله تراب ومش مزلز ولامكرسن عار قدام العيله..
نضال بجديه؛شوفي خديجه انتي وخيتي الكبيره وع عيني وع راسي..لكن الجو هدا فكينا منه..اريج بتولي مرتي ماليها بيولوا نساباتي اللي يوصل فيهم معناها وصل فيا اني..واني كان نفوت للي يوصل فيا حنوقف بالمرصاد للي يفكر يوجع مرتي بشبحه
خديجه رفعت حواجبها بصدمه وقالت؛ريتي يام!
مغليه وهي مصدومه:غير خل يصير منها قبل!
نضال؛اني عطيتكم علم من قبل مايصير منه..ايه اني نضحك ونبصروجوي مليح ومانحبش المشاكل لكن اللي بيوصل في حاجه تخصني نقلبله ع الوجه التاني..
خديجه:ريح روحك ماحد واصل فيها كان دارت قدر لعيلتك نحطوها في عيونها..
نضال:وهي تحبكم وتعزكم..وبنت ناس واصل وجدعه عاملوها ع هالأساس مش ع شن عندهم وشن ماعندهمش..
رن تليفون مغليه..
نضال:هادي اكيد امها..
مغليه شافت المتصل قالت:ايه هي..
وردت عليها وقعد نضال مقعمز بش يشهد ع المكالمه كامله..
بعد مانهت امه المكالمه..
مغليه:في تاجوراء الصاله بيبدوا بكري السته قالت بعد الفاتحه طول..
خديجه وهي تشوف لنضال:كويس..
نضال:خلاص خبروا الباقي..
خديجه؛ان شاء الله..
ناض نضال وقال؛مولي للقهوة ماتبوا شي!؟
مغليه:شي..
خديجه؛محمد وين نضال..
نضال؛مع جماعة الشارع حدا القهوة..لكن بنقولك حاجه شدي لولدك متعرف ع جماعة من الشارع اللي ورانا مش مزبوطين هزبته اكثر من مرة وهو يعاند..
خديجه:تو يتفاهم معاه عمه اشرف..
نضال؛مايقدرش عليه الا اشرف..المهم ماتهمليش الوضع..
خديجه ؛اكيد لا..
هز نضال راسه ومشي طلع..
مغليه؛ردي بالك ع ولدك يامراة الوقت يخوف..
خديجه؛ت اطمني تو نتصرف..لكن ريتي شتويك ياحنه!..
مغليه:اسمعي فكينا منه راهو يدور في سبله بش يسافر كان كترنا عليه يتزوجها ويهاجر بيها..
خديجه:لوي ذراع هو!؟
مغليه؛اني البنيه عاجبتني وخاشه خاطري وجوها راكب ع جو خوك وبنيه ناشطه ماشاء الله تهنيني عليه الشي تاني يجي بعدين..
خديجه:خلاص لساني بنحطه في فمي..
وخدت كاشيك وقعدت تاكل في الرمان بغيظ..
وامها ولت تاكل حتى هي وتتفرج ع التلفزيون..
☘☘☘☘☘
الساعه 2:00بعد منتصف الليل..
نجاة؛حبيبي اني كل شي درته وقاعده ندير فيه من حبي ليك اني نحبك بجنون جالي نهبل كان تخليني..
الجالي؛اللي يحب حق مايديرش اللي انتي درتيه..
نجاة:غصب عني جالي مش بيدي..
تنهد وقال:قاعد مش صافي من ناحيتك..
نجاة؛تو تصفى مع الوقت لما تعرف ان مافيش مراة في الدنيا حتحبك زي مااني نحبك..
🍃فاتت هديكا الليله ع الجالي وهو مجبور فيها يساير نجاة خوفا منها..
قبل الفجر بشويه كانت رايحه في النوم..
وهو مشي طلع من حداها يشوف في تليفونه اللي كان حاطه صامت..
مالقاش ولامكالمه من طوبى..
خش ع الماسنجر..
لقاها مسكرة من الصبح..
اتصل بيها...نادى لين فصل..
عاود..وكذلك ماردتش..
زاد ضايق اكثر من اهمالها ليه..
تعود عليها ديما مهتمه بيه وهو اولى اولوياتها وتوا ليها يومين هاملاته تماما..
ولى مرة تانيه لدار النوم..
خش السرير وعطي نجاة بالظهر وهو يفكر في طوبى
لين غلبه النوم ورقد...
🍀🍀🍀🍀🍀
بعد مرور يومين...
الإربعاء..
الساعه 11:30صباحا..
في مكتب المحاميه نبيله بن موسى...
كانت مستضيفه عندها شخص في استدعاته للحضور بنفسها..
نبيله:اني نبي منك الفيديوهات بس بش يكونوا قرائن أدله في القضيه..
ربيع والفرحه باينه في وجهه:نعطيك اللي تبيه ولو اضطر الأمر مستعد نشهد..
نبيله؛ان شاء الله مانضطروش لأن الوضع ممكن يولي اصعب بعدين..ع العموم مشكور جدا لتعاونك ياربيع..
ربيع؛حاجه بسيطه استاذه..وان شاء الله ع يدك تخلص المسكينه..
نبيله بإبتسامه؛إن شاء الله..
☘وروح ربيع منها وهو فرحان مش قادر يتجاهل فرحته وهدا اللي خلاه يسأل نفسه..
تو انت علاش فرحان هكي تقول انت  مرته مش هي!؟
فرحتلها اللي خدت القرار الصح..
لالا انت في شي تاني فرحك غير هكي..
تكلم وقال وهو عاقد حواجبه؛مافي شي تاني مافي شي..
وخبط بيده ع الدومان..بعدين لف وخش طريق تانيه..
☘☘☘☘☘
الساعه 2:00بعد الظهر.
في أحد مطاعم العاصمه..
ع الغدي..
ربيع:سنة بس بعدين طلقت..
مختار:اكيد مش مفكر تعاودها صح..
ربيع وهو ياكل حرك راسه بالنفي.
مختار:احسن مادير..الزواج قيد وحبس يقيد حريتك بخليك ماتعرفش تمشي وتجي ع راحتك وين ماتبي ويخلي بالك ديما مشغول..
ربيع:صح يقيد بس لابد منه..لازم الواحد يستقر..
مختار وقف ماكله وقال:والاستقرار مايكونش الا بالزواج!؟..
الاستقرار الحقاني ياصاحبي هو الاستقرار المادي وبس..
ورجع ياكل..
ربيع شبحله شويه بعدين قال:ماتتمناش يكونوا عندك صغار؟
ضيق عيونه وهو ياكل قال:امم..بلع بعدين قال..هادي بالذات مانتمنهاش ولاحنتمناها..
ابتسم ربيع تهكما ورجع ياكل..
مختار؛ربيع..
شبحله ربيع لقاه يشبح لصونيه وهو ياكل قاله:نعم..
مختار:علاش طلقت..
ربيع قعد يشبحله وهو ساكت..
قام مختار عيونه فيه بعدين قال..
عقيم صح.؟
وخدي طاسة الميه وشرب منها..
ربيع بضحكه تخفي الألم؛من يومك دفش واسلوبك دج..
حط الطاسه وقال:صح..
تنهد ربيع وقال؛صح واني اللي طلقت بعد عرفت رغم انها تمسكت بيا هلبه..مابيتش نظلمها معاي ونحرمها تتمتع بالنعمه هادي..اصلا لو كنت مكانها طلقتها وخديت غيرها لأني نبي الصغار..
مختار:والله انت في نعمة ماك مقدرها..تصاحب من تبي تتزوج ع كيفك وتخلي من غير ماتفكر في حكاية الصغار هادي..
ربيع ابتسم وهو مضيق عيونه قال؛خديت طباع الغرب طبع طبع
مختار؛هما بس اللي عارفين يعيشوا في الدنيا هادي دماغات متفتحه متنورة مش زي حني ظلاميين متخلفين عقولنا ع قدها
ربيع خدي طاسة الميه وشرب منها بعدين قال:صح هما عندهم ابجابيات بس سلبياتهم اكثر ومجتمعاتهم تعاني اكثر منا حني
مختار:ياراجل فوت الدوة الوهميه متاع الوهميين..العبيتر اللي سمعت بيهم يديروا فيه هني الغرب الكافر بين قوسين..ودار حركة القوسين بصوابع ايديه بعدين قال.. ماداروش ربعه
ربيع رفع حواجبه وقال؛في هادي عندك حق ماعندي مانقول..
مختار:خل نغيروا الموضوع اللي يعكر المزاج..
ربيع:ايه حقه شن رايك نديروا الزرده غدوة بعد العصر نطلعوا كلنا ل**** ونقعدوا غادي للسبت العشيه..
مختار بإبتسامه؛غدوة مشغول اليوم كله خليها الاسبوع الجاي..
ربيع ضيق عيونه وقال:فكرتني حتى اني غدوة مشغول فاتحه خو المهدي غدوة ماعزمكش!
قعد يضحك مختار..
ربيع بضحكة:شن يضحك!؟
هدا ضحك وقال؛ياقفل فاتحة نضال ع بنت اختي!
ابتسم ربيع وقال:مش ناسي لكن ماتوقعتش اختك تعزمك.
خفت ابتسامة مختار شويه بعدين هز راسه وقال؛مزبوط..هدا علاش المهدي مايديرهاش ويعزمني فهمت؟
ابتسم ربيع وهز راسه ورجع ياكل.
شبحله مختار شويه..بعدين رجع ياكل حتى هو..
☘☘☘☘☘
الساعه 5:00مساءا..
كانوا نجاح وعواطف مقعمزات يستنوا في دورهم في عيادة الدكتورة اللي دلتهم عليها خديجه..
كانت عواطف دور بعيونها بين المراجعات..
اغلبهم حوامل البطن عندهم بارز في مراحل مختلفه..
ثبتوا عيونها ع وحده صغيره في السن واقف عليها راجلها بعيد عنهم..
كانت تبان تعبانه شويه وهو يطبطب عليها بش يخفف عنها..
تعبوا عيونها بالدموع..
غيرتهم لنجاح..
لقتها تمتم وفيدها خاتم التسبيح كل شويه تضغط عليه..
كعادتها تردد في #تاج_الذكر
تنهدت بعدين قعدت تشبح في الفراغ وسرحت بتفكيرها..
ومرت ربع ساعه..
بعد ربع ساعه..
"نجاح الصيد الجعفري"
فزت نجاح وقفت ووقفت معاها عواطف وقالت للممرضه؛عادي نخش معاها؟
:عادي..
 ☘ومشوا الزوز خشوا لحجرة الدكتورة..
~~~~~~~~~
عيون نجاح ع الدكتوره اللي كانت تشوف في شاشة جهاز
4D..
والدكتورة قالت:قتيلي شن قالتلك الدكتورة اللي عاينتي عندها..
نجاح: قالت عندك ورم ليفي في الرحم..
شبحتلها الدكتورة بإبتسامه وقالت؛كل اللي عندك يانجاح كيس ع المبيض..
عواطف اللي كانت واقفه حداهم قالت:كيس!؟
الدكتورة:ايه كيس غير كبير شويه هذا علاش تسببلها في الاعراض اللي حست بيهم..والموضوع لامحتاج تحولي الرحم ولامحتاج عمليه جراحيه..كلها عمليه منظار نحولوا بيها الكيس وصلى الله وبارك..
نجاح وعواطف شبحوا لبعض وهما مندهشات..
بعدين شبحت نجاح للدكتورة وقالت ودموعها بينزلوا:متأكده دكتورة بالله عليك متأكده؟.
الدكتورة:زي مانشوف فيه وكان تبي تتأكدي اكثر نبعتك لمصحه حتجيهم دكتورة مصريه زائرة متخصصه تأكدلك تشخيصي..
طاحوا دموع نجاح وهي تقول:الحمد لله ياربي..
وغمضت عيونها وهي تضحك من فرحتها وتقول..الحمد لله..الحمد لله..
وعواطف تشوفلها وهي مبتسمه بفرح ودموعها ينزلوا..
الدكتورة بإبتسامه:لو وثقتي في تشخيصي نحددلك يوم نديرلك فيه العمليه بش تحوليه وتفتكي..
فتحت عيونها وقالت؛واثقه يادكتورة واثقه مرت خوي شكرت فيك هلبه واني واثقه منها ماتبعتنيش لأي حد..
الدكتورة بإبتسامه:خلاص تجيني ان شاء الله يوم السبت نديروها تمام!؟
نجاح هزت راسها وهي في قمة الفرح تقول:إن شاء الله..
عواطف؛حسبي الله ونعم الوكيل فيها اللي رعشتنا وعيشتنا ع اعصابنا الايام اللي فاتوا..
الدكتورة:يللا الحمد لله ربي لطف..
نجاح حست بشعور من جماله يصعب وصفه..
حست بمعية الله وقربه...
حست بمعنى آية(أقرب إليكم من حبل الوريد)..
شعور يخش للقلب ويعبيه طمأنينه وإيمان..
عطتها الدكتورة المناديل وقالت:تفضلي نجاح..
خدت نجاح منها المناديل وقالت من قلبها؛الحمد لله.
ومازالوا دموعها ينزلوا..
دموع فرح...
☘في الطريق..
عواطف:باهي اللي طلعت من وحده من نساوين خوتك ثمرة..
نجاح بإبتسامه راحه:تساخير ربك ياعواطف..
عواطف:ونعم بالله..
نجاح؛بالله عليك عواطف وقفينا ع مكتب الزكاة اللي تخدم فيه نجوي السعداوي..
عواطف:باهي..
☘ومشوا لمكتب الزكاة الفرع النسائي منه وتلاقوا هما وبنت الجيران..
عطتها نجاح مبلغ صدقه شكر لله...
واللي ماتعرفاش نجاح ان شكر الله ليها حيكون اضعاف مضاعفه..
☘وفي ناس ..
صبرهم ع الابتلاءات يشكرهم عليه ربي دنيا وآخره..
وناس خلا حياتهم الدنيا كلها ابتلاءات صبرهم عليها واحتسابهم لأخر نفس حيحلي حجم الشكر في الآخره..
مالا عين رأت ولاأذن سمعت ولاخطر ع قلب بشر☘
☘☘☘☘☘
الساعه 7:00مساءا..
في شقة عمر وأميمه..
كانت اميمه واقفه تشوف للبوكس اللي هيئة قلب المحطوط قدامها وهي تسمع في حماتها تقول..
نسرين بإبتسامتها:حب يديرهالك مفاجأة قالي خوديلها احلى شي تحضر بيه البيان هي مش لاقية وقت تطلع تاخد فيه حاجه..
ابتسمت اميمه وهي مستغربه بعدين شبحتلها وقالت:تعبتك معاي..
نسرين؛انتم بالذات تعبكم راحه تعرفي مكانتكم عندي..
اميمه بإبتسامه؛تسلمي يارب..
نسرين:شوفيه ترا..ان شاء الله يعجبك..
هزت راسها وطبست حولت الغطا..
لقت الفستان ومعاه حذاء وشنطة صغيره..
طبست نسرين خدت الفستان وفرداته وقالت لأميمه؛شن رايك؟
اميمه وهي تشوفله كانت منبهره موديل الفستان حلو ومميز طلته راقيه وغير هكي لونه اللي تفضله اميمه..
احمر عنابي..
ابتسمت وقالت:يجنن..
نسرين؛جديات ماتجامليش؟
اميمه بضحكه:لاوالله جديات حلو هلبه..
نسرين تنفست براحه وقال:الحمدلله..باهي الكندره و