قارورة الـ مُخلد

الحلقة |19|

مسح وجهه وگام..
- لبسي خلي اخذج للمستشفى

- ما بيه شي

- ميخالف

- فصخ مو كسر ما يحتاج مستشفى

- زين

گالها وطلع شوي ورجع بيده عصاره حطها قريب مني وگال..

- هاي دهني مكان الوجع بيها لو.. يعني تقبلين انه احطلج؟

هزيت راسي برفض اله ما گال شي وطلع عايفني وحدي تنهدت بتعب وبديت ادهن مكان الوجع ورجعت لفتيتها وبقيت بمكاني صافنه فززني دخوله كالعادة بس بمنشفة ؏ خصره..

غضيت بصري عنه وتمددت مطيته ظهري استمع لصوت حركاته لحد ما لبس وخلص اجه سحب الكرسي وكعد گدامي مكتف ايدي لصدره..

- شلون تأذت ايدج؟

احتاريت شلون اصيغله الجواب، اي لحد الان اخاف اجرحه بجوابي..

- مـ من ذبيت نفسي من السرير

- بسببي يعني؟

عيوني دمعت بس هزيت راسي بـ اي بچيت ما تحملت اصمد گدامه اكثر اسمع حسراته ولاول مره يسويها ويدخن بالغرفة..

لا سكتني ولا وگف تدخين لحد ما بندت من البچي اباوعله عيونه حمر والغرفة صارت عبارة عن دخان..

هز راسه وگال متحسف..
- ابچي حيل ابچي لچمي گلبي بدموعج

- لا دخن

- جاي اصبر روحي بيها عليج الوحيده الي لازمتني ما اگوم واحطج بين ضلوعي

جر نفس من الجگاره وكمل..
- ما جاي اتقربلج لان ما اريد اشوف الخوف بعيونج

- مو بيدي ايدي ترجف شوف

مديت ايدي اراوي شلون يرجفن هز راسه وگال..
- جسمج هم يرجف

- اي

- بردانه لو بس خوف؟

- خايفة

- مني؟

هزيت راسي بـ اي ورجعت ابچي بهاي اللحظة ندك الباب راح هو يشوف منو شوي ورجع كلشي ما حجه ولا باوعلي اخذ تلفونه وگعد بعيد عني ؏ القنفه المحطوطه بصف البلكونه..

صفنت عليه وما حسيت بنفسي من غفيت
فتحت عيوني من حسيت ؏ لمسات خفيفة ؏ خدي صفنت بوجهه بس لحظات وفزيت مرعوبه..

- اسم الله ؏ كيفج ويه روحج

- شـ شـ شتريدد؟

- اششش اهدي ردت اكعدج تاكلين اية گالت ما ماكله شي

- ما اشتهي وخر

خزرني ونتر..
- تگومين تاكلين لو اوكلج غصب عنج

- ماااااااا اريددددد

- صوتججججج لججج بلااا صلافةة ويلهه گوميي