عنلت التحليه ودخلتها التلاجه وعملت اصناف كتيرة في الغداء لحدي ما ابوي جا قلت لي سبأ رصي الغداء ومشيت غرفتنا في المسافة دي وفتحت دولابها كنت عارفة انو ما صاح امس خصوصيتها بس لمن الموضوع يكون ماشي في خطر انا لازم لازم اتدخل واعرف شي عشان احل المشكلة فتشت وبقيت اقلب بي نظام عشان سبأ ما تشك في حاجه ولمن سمعت صوتهم وهم بنادوني للغداء قفلت الدولاب وطلعت ليهم...
للمساء بعد ما صلينا العشاء وقفلنا البيت انا رقدت وتعبانه والنعاس غالبني وقلت لي سبأ اطفي معاك النور انا مرهقة وما قادرة اجر يد ولا رجل ، اتنهدت بي غضب وقالت لي قفلتي البيت كلو ، وقفلت النور وتابعت وهسي غلبك دا؟، سفهتها ونمت نوم عميييق،،،
زي الساعة واحدة صباحا صحيت بي سبب العطش اتقلبت ولقيت سبأ بتتكلم بي صوت واطي ومدياني ضهرهادخلت يدي تحت المخدة واتحسست تلفوني الكان قاعد في مكانو؟، سبأ ما عندها تلفون طيب د تلفون ابوي؟، قمت بي سرعة ومشيت سريرها وهي هنا اتقلبت ولمن شافتني صاحية بقت تتم تم وملامح وشها ما بتتفسر حتى في الظلام قلعت منها التلفون وختيتو في اضاني وكان ولد بقول 'الو الو؟'، زحيت التلفون من اضاني وقفلت الخط في وشو وفتحت النور وقعدت قصاد سبأ ، قلت ليها بي هدوء دا منو يا سبأ؟، قالت لي بي تردد دا.. دا ..دا عمار، قلت ليها بي نفس الهدوء عمار منو؟ ، قالت لي واحد بعرفو ، قلت ليها بي زهج ما عارفاك بتعرفيهو بس هو منو حبيبك؟؟!، هنا سبأ غلبها ترد ووشها حمر والدموع ملت عيونها شلت التلفون وبقيت اهز فيهو وقلت ليها التلفون دا جابو ليك هو؟ هزت راسها بي خوف وتردد، قلت ليها امم تمام ، فتحتو وحفظت رقمو وطلعت الشريحة وكسرتها وفرمطت التلفون ، واديتو ليها قلت ليها عايني بدون كلام كتير بكرا تديهو تلفونو دا وتقطعيها معاهو والا الموضوع ح يصل لي ابوي وانتي عارفة العواقب جدا؟، الخلاك تعملي كدا شنو يا سبأ؟ انتي لسها وحدة صغيرة امسكي مشاعرك دي واخجلي على نفسك كدا فقدتي حيائك يا شاطرة!، الحاجة دي طبيعية في الفترة دي بس ما تنداحي ليها في الفترة دي قوي شخصيتك ..
حبي نفسك اعرفي اهدافك خططك طموحاتك كوني شخصيتك ارضي نفسك وخليك من الباقين
ركزي مع قرايتك وشوفي عايزة تكوني شنو بعدين عايزة تقدمي شنو للمجتمع ، اتعلمي من اخطائك انتي مميزة في عين نفسك اثبتي دا للاخرين قربي من ربناااا قربي منو شديييد عارفة ليه؟؟ هاا عارفة؟؟
*عشان المتعلق بغيرالله مخزووول*
ما تخشي في علاقات محرمة مهما كان اعقلي شوية حبيبك دا لو عايزك ما كان جااااك في البيت امس ومعاهو صحبو فهمتي؟؟، هنا رفعت راسها وعاينت لي بي زعر وخوف وقالت لي والله ما عملنا شي اتونسنا بس !!، قلت ليها وكمان بتقولي اتونسنا بس كانكم ما عملتو شي كبير؟؟ سبأ انتي عويرة ولا عويرة؟ في شي اكبر من انو يجو ولدين اجنبيين عنك وواحد بتقولي ليهو حبيبك والتاني احتمال متخزاهو ال boy Friend حقك وحقو ومجهزة ليهم عصير ومضيفاهم في بيتكم الفاضي بدون محارم وبتتونسو وقد يكون اتبادلو البحبك وانا كمان انتي ما بتخافي من ربنا؟؟؟؟ من عذابو وعقابو وعدم رضاهو؟ ما بتخافي انك تنتهكي حرمتو وهو منعم عليك بي نعم كتيييرة ماكلة وشاربة ومعافية وبتجازيهو بي كدا؟؟ طيب وابوي؟ ابوي التعبان وشقيان وبجر رجلو الواحدة ومتكل على عكاز عامل ليهو اثااار في يدو والسكري لسه سارح في جسمو وبعد دا بطلع من الصبااااح وبشتغل في بقالة عايزة حركة سريعة وكتيرة لتلبية اغراض الناس وبجي البيت هلكان بتغدى وبنوم، بحاول بي كل طاقتو يوفر ليك اكلك وشرابك ورسوم مدرستك وملابسك ومصاريفك ومتطلبات المدرسة من كتب وكراسات وقرطاسية ومتطلباتك الكتيرة كبت في فترة المراهقة وبتجازينو بي كد؟ تلفي مع اولاد ؟ بي مسمى الحب والليل كلو مقضياهو كلام معاهو؟ *خافي من الحراااام قبل العيب فهمتي؟؟*
الارتباط وتبادل البحبك والهيهيهي الخجولة القليلة الحياء دي وما معروف يحصل شنو اذا انتي الليله دخلتيهم هنا بكرا تعملو شنو وبعدين تجيني وتقولي لي خذلني وتقعدي تبكي؟!
سبأ انا راسي ضاااارب وجايط شديييد يااخ اخص عليك وعلى عدم احترامك لي نفسك ياااخ تصدقي انا ياداب جربت احساسكم لمن تقرفو من وحمتي بس للاسف انا هسي قرفانه منك كلك على بعضك حسيتي بي الاحساس مش؟ يلا انا حاسه بي ضِعفو ..
وقمت منها شربت موية وقفلت النور وخليتها قاعدة في نص سريرها وبتبكي ،،،
تاني يوم الصباح صحت وعيونها مورمة من البكاء وما شربت معانا الشاي واتخذت مع نفسي قرار صعب ليها انو تاني ما ح اتعامل معاها ولا اتكلم معاها مهما حصل الا تجي وتعترف بي غلطها تاني قدامي..
اتصلت علي سارة واصرت اني اجيها فاطريت امشي ليها ووريت ابوي القال انو ما مارق الليلة ، لبست لي عباية وطرحة واقرب ركشة وكنت في باب ناس سارة لمن خشيت لقيت ابوبكر معاهو روح الاول ما شافتني جاتني جارية وقالت لي بي فرح سررررح! قلت ليها روحي الحلوة♡ وحضنتها وسلمت على ابوبكر مشت قدامي لي امها وهي بتنطط وفرحانه لحدي ما لقيت سارة في الطبخ وقدامها اكياس كتيرة وما عارفة تعمل شنو، قلت ليها اها عايزة تعملي شنووو؟ ، قالت لي ما عارفة والله راسي ضارب، قلت ليها انتي كويسة؟ قالت لي اي اي كويسة، قلت ليها سمح عندك شنو كدي وريني! ، قالت لي ابوبكر جاب لي ااي شي خضار وجبنة ودجاج ولحمة بي انواعها بس راسي فاضي قلت ليها طيب عايني ح نعمل ملاح روب او تقليه، لحمه شيه ،كباب ، سجوك ، سلطه خضراء ، فول و طعميه ، جبنه وزيتون، بيض مسلوق،سلطه جزر ، الحلا شعريه او مهلبيه اوسكسكانيه بالجوز هند والمكسرات انا خلي لي الكباب والتحلية والسلطات وانتي عليك الباقي ارح ارح الفطور دا هسي ح يجو ، وانا طوالي شلت الحاجات وبديت اطبخ وهي كذلك بس لاحظت ليها بتسرح كتييير وبتشتغل شوية وتاني بتواصل وهكذا لحدي ما انتهبنا وضيوفهم جو.. الرجال مشو بي هناك والنسوان بي جاي،،
كانت مرة بشوشة كدا اسمها نعمات ومعاها بتها عائشة،،بعد ضيفناهم جاتنا عائشة ساعدتنا ورصت معانا الصواني وفطرنا ،، سارة كانت مستلمة الونسة وخالتو نعمات وبتها بتناقلو النظرات بينهم وبعاينو لي بي طريقة كا بتاعت تفحص واختبار لمن عقدوني عدييل وخلي ليهم الاكل ، ومشيت المطبخ جهزت الشاي والقهوة والمكسرات والفواكهه جا داخل زول وخت صينية جنبي قلت ليهو ابوبكرا هاك شيل معاك دي بي هناك والتفت اديهو ليها كان نفس الشاب داك؟!، اتخلعت وبقيت بعاين ليهو وانا متفاجأة شال مني الصينية وقال لي تمام ومشى كأنو ما حصل شي ولا انو بعرفني ، مششم يا سحر هو اصلا ما بعرفك؟ بس قلبي وجعني والله! ..
جات سارة داخلة وقلت ليها عايني انا ماشة بيت ابوي ، قالت لي هيي دقايق عايزاك تغسلي لي العدة الوسخانه يا ماما؟ ، قلت ليها هيي هيي الاكل دا كلو طبختو ليك انا وبي صوت واطي قلت ليها وضيوفك ديل ما ارتحت ليهم عيونهم كعبة ، قالت لي حرام علييك!، ناس خالتو نعمات ديل اظرف ناس من نسابتي ديل؟ قلت ليها لالا كويس وشلت شنطاي وانا طالعة قالت لي ما ظريفة منك يا سحر كدا ح يتحسسو! ، قلت ليها وانا ماشة ما على حساب نفسي انا ما مرتاحه..
-------------------------------------
*أُندهش مِنِّي-دائمًا-، فأنا إمرأة بقلبِ طفلة.. أحتاجَ لبعض الحلوىٰ فقط وتارةٍ أُخرىٰ لَا أحتاج سِوىٰ لكتفٍ ما لأرمِي بِثُقل رأسي عليهِ، أكرهُ الضوضاء ولَكِن أرىٰ بها الدفء أحيانًا.. أشُعر بخفتي على قلوب الجميع ولكن في بعض الأوقات أشعر بثقلي حتىٰ على نفسي.. لَم أفهمنِي بعد ولكنِّي حقًا مُدهشة.❤🌻*
