في اليوم الوراني فيهو حذيفة انو جاي فرحت شديد وبقيت ماشة وجاية وعلى قدر فرحي دا كنت زعلانه لانو اتشاكل مع كفيلو ودق ليهو نهائي.. بس قلت كلو لي خير وربنا ح يرزقو الاحسن انشاء الله ، بعد العشاء حذيفة كان جاء اول ما شفتو قلت ليهو بي فرح وعدم تصديق حذييييفه! ماشاء الله تبارك الرحمن يا ولد بقيت سمح سمممح انت لي بقيت اخوي انا عايزة افهم بس؟ ضحك وقال لي ربنا يرزقك واحد زي وجا علي حضني شديييد وانا برضو فضلت حاضناهو وعيوني دمعت وقلت ليهو اشتقت ليك شدييييد تاني اوعك تبعد ! ، قال لي حاضر يا عائشتي♡ ، فكاني وسلم على امي وابوي وانا قاعدة جنبو وتاكلة راسي في كتفو قلت ليهو والله ماشاءالله الجيم نتايجو رهيبه قال لي وهو بشد في يدو وبوريني عضلاتو عشان تاني لو قليتي ادبك معاي تاكلي ليك بوكس من اليد دي قلت ليها لالا ياخ ح تأدبني بجد وضحكنا ، عدينا الليل كلو ضحك وونسة وهظار ونمنا متأخرين وبرضو صحينا متأخرين تمينا باقي ونستنا مع شاي الصباح بس المرة دي مع حذيفة♡ امي قالت ليهو اها يا ولد ح تعرس متين؟، قلت ليهو اي واخبار مشروعك شنو؟، قال لينا اولا المشروعي فكرتو اني ح اشتري ١٠ فدان مزروع بي ٢٣ مليار في القضارف وااجرها لي زول لي نهاية السنة يعني بعد ٤ شهور كدا ح يتم الحصاد والعائد كويس شديد وبعدها اختاري لي العروس ، امي قالت ليهو ماشاء الله ربنا يوفقك ان شاءالله مرشحه لي كم وحدة في راسي لحدي ما مشروعك ينتهي تعال اسئلني تاني ، انا كنت ساكته وبعدها قلت لي حذيفة انت ما دام عندك ال ٢٣ مليار عرس هسي واكسر حنك الفدانات دي انا ما مرتاحة ليها! قال لي لا انا عندي ١٣ مليار والباقي ح اسددو بعد الحصاد قلت ليهو لا يا حذيفة انا ما مرتاحه الارض دي ح يمقلبوك فيها عرس بي ال٣ الفوقانية دي والباقي شوف ليك بيهو مشروع مضمون هنا الناس بقت ما مضمونه وبيزورو اوراق الارض ويدخلوك بعدين في ديون ، عاين لي بي تفحص كدا وقال لي طيب تمام ح افكر واستخير ، امي قالت لي هوي يا عشة ما تخوفي الولد وتحطميهو المشروع دا كويس وح يجيب ليهو قروش سمحه تغير من وضعنا دا!، قلت ليها لا احسن يستخير بس ، وقمت منهم على كدا..
تاني يوم الساعه ٩ حذيفة جا وهو شايل بنوتة صغيرة حلاتها ، مشيت عليهو وشلتها منو وقلت ليهو قول لي انك متزوج من ورانا ودي بتك بلييز بلييييز عاين ليها حلوة كيف وبقيت ابوس فيها وهي تضحك ، ضحك وقال لي لالا البت دي ضايعة !، قلت ليهو جد؟ لقيتها وين ؟ وقلت وانا بعاين ليها يا سكره ماما قلبها بكون مقطوع عليك!، قال لي مشيت الاقى صحبي في السوق وبعد ما لاقيتو وافترقنا جات مارة جنبي بت وهي شايلة الف كيس وشكلها امها زاتها والبت دي وراها يعني شوفي درجة الاهمال الفيها! في ام بتعمل كدا؟ قلت ليهو بتكون اتلخمت لكن كيف زول ينسى ولدو من دمو ولحمو؟، قال لي الله يكون في العون بس، اها سقت البت الكانت مرعوبة وبتتلفت وبتفتش على امها ووديتها اقرب بقالة اشتريت ليها شوكولاتات وبقيت اسألها بس ابت تتكلم لي ، قلت ليهو طيب احاول اتكلم معاها انا قبلت عليها وقلت ليها يا حلوة اسمك منو؟ ما ردت لي قلت ليها طيب عايني انا خالتو عائشة قالت لي خالتو اإشه ، ضحكت وقلت ليها دا خالو حذيفة قالت لي خالو ايفة، ضحكنا انا وحذيفة على نطقها لي اسمائنا وقلت ليها طيب انتي اسمك منو عشان نوديك لي ماما وبابا!، قالت لي انا لوح ابوبكل عبدالله مستفى ، حذيفة عاين لي بي استغراب قلت ليهو اسمها روح أبوبكر عبدالله مصطفى ، حذيفة قال لي دي بت ابوبكر ود عمتي زينب! ، قلت ليهو اهاا صاح عاين الشبه! كمان دي اول مرة اشوفها عشان ما بمرقو لي زول ، قلت ليها ماما اسمها سارة مش ؟ هزت لي راسها ، قلت ليهو هسي وديها ليهم بكونو خايفين عليها شديد امي جات خاشة وقالت لينا لينا في شنو ودي منو؟، قلت ليها دي بت ولدها لي عمتو زينب ضاعت وحذيفة لقاها وهسي موديها ليهم ، قالت لينا اهاا اي وديها ليها سرعة يحليلهم بكونو قايلنها اتخطفت ، اها حذيفة شالها ومشى ليهم ، امي كانت قااعدة وبقت سرحانه وزي البتفكر ليها في حاجه قالت لي مرت ولدها لي عمتك زينب اسمها سارة وحلوة وعندها اخوات حلوات بس كان لقيت وحدة منهن لي حذيفة!، قلت ليها امم مش بنات عمو الجزولي؟ ، قالت لي ااي ، وعرس وحده فيهم بعد اسبوعين ماجدة خالتهم بتعزمني ارح نمشي وشوفيهم سميحات كيف قلت ليها هم كم ٣ ولا ٤ ؟ قالت لي ما عارفة والله ، بس اوعك توري اخوك دا اقتراح ساي ، قلت ليها سمح وعلى كدا قفلنا الموضوع...
_______________________________
*سارة: -*
لحظة سحر قالت لي ما عارفة روح وين انا خلاص انتهيت ونطت الف فكرة في راسي البت بكونو خطفوها وما معروف يعملو فيها شنو؟ انا كان ما لقيت بتي اقبل وين واعمل شنو؟، انا وابوبكر ح نموت لانها روحنا بي جد كنت خايفة وقلب الام كعب والشيطان شاطر بس لحدي ما شفتها قدامي حسيت بي ارتياح وفرح رهيب وقلت تاني مستحيل اديها لي سحر لانها وحدة مهملة وسبهللية كيف تنسى لي بتي وشاطرة في حاجاتها وما بتنساهم بس بتي تروح في داهية وما عندها شغلة بيها!،..
عدت ايام والعرس قرب ابوبكر اتصل علي وقال لي سارة انتي لسه زعلانه؟، قلت ليهو ما زعلانه بس انا لسه عند كلامي يا ابوبكر وما برجع معاك الا في بيتي ، قال لي ما تستعجلي انا اشتريت قطعة ارض وهسي بديت ابني فيها ، قلت ليهو بي عدم تصديق اااحلف!؟ ، قال لي والله♡، بس ح ياخد فترة زي شهرين عشان ابني حاجه كويسه والشهرين دي كتيرة تقعديها في بيتكم فتعالي بيتنا وخلاص بتهون ، قلت ليهو بي فرح كويس لكن بعد سحر تمشي ابوي وسبأ ح يتبشتنو بشتنه شديدة!، ابوي حركتو صعبة وسبأ خوافة وما بتعرف تعمل شي !، قال لي لي بعدين ح تفرج ما تشيلي هم واتكلمنا في كم موضوع تاني ....
-------------------------
••
*تُبهرنا المُراعاة ، تُعجبُنا الرَّحمة ، توسِّع علينا الأُلفة ، تؤنسَنا الرحابَة ، تُدهشنِا المسَافات التي تقطعها كلِمَة ، تُغيِّرنا المحبَة ، وتنتشُر في أيامنا البهجَة التي تُخلِّفها التصرُّفات الليِّنة ❤🌻*
