Slowly Falling For Changkong ( ဘာသာပြန် )

Chapter-20

"ဟုတ်ပြီ ကျွန်မပန်းကန်သွားယူလိုက်မယ်"

ရွှီလျန် မီးဖိုချောင်ထဲသွားပြီး ပန်းကန်တစ်ချပ်၊ပန်းကန်လုံးနှစ်လုံးနှင့်တူနှစ်စုံယူလာခဲ့သည်။ စားပွဲပေါ်နေရာချနေရင်းဖြင့် သူမကဆို၏။

"ရှင်လဲစားလေ"

"မစားတော့ပါဘူး ကိုယ်ဟင်းချက်လိုက်ဦးမယ်"

ရှန့်ချန်ခုန်းပြန်ဖြေ၏။ ထို့နောက် သူက သူ့အိတ်ထဲမှအိတ်သေးသေးလေးကို ဖြည်းဖြည်းချင်းထုတ်လျက် ရွှီလျန်ကိုပေးလိုက်သည်။

"ဒါ...ဒါကမင်းအတွက်"

ရွှီလျန်မှာ ယခုလေးတင် ဖက်ထုပ်ကိုတစ်ကိုက်စားလိုက်ခြင်းဖြစ်သည်။ ရှန့်ချန်ခုန်းစကားကိုကြားတော့ သူမ သူ့ကိုမော့ကြည့်၏။ သူ့လက်ထဲ၌ အိတ်ပေါ်တွင်ယုန်နားရွက်လေးတစ်စုံရိုက်နှိပ်ထားသော ပန်းရောင်စက္ကူအိတ်သေးသေးလေးတစ်အိတ်ရှိနေသည်။ ဒါက BUNNY logo ပဲ...

"နှုတ်ခမ်းနီ?"

"အင်း"

ရှန်ချန်ခုန်းက အခြားဘာမှထပ်မပြော ၊ ထို့ကြောင့် ရွှီလျန်က အိတ်ကိုယူပြီး နှုတ်ခမ်းနီကိုထုတ်ကြည့်လိုက်သည်။

"အာ ဒီဟာလေးပဲ.. ကျွန်မ ဒါကိုဝယ်ချင်နေခဲ့တာ ဒါပေမဲ့ နောက်ဆုံးတစ်ခေါက် ကျွန်မသွားမေးတုန်းကပစ္စည်းပြတ်နေခဲ့တာ"

ရွှီလျန် ခေါင်းမော့၍ ရှန့်ချန်ခုန်းကိုပြုံးပြလျက်

"ကျေးဇူးပဲနော်"

"ရ..ရပါတယ် ဘာမှမဟုတ်ပါဘူး"

ရွှီလျန်နှုတ်ခမ်းပါးတွေ နည်းနည်းလေးကော့တက်သွား၏။ သူမ ဧည့်ခန်းထဲကပြေးထွက်သွားပြီး မှန်အသေးလေးတစ်ချပ်သွားယူလာခဲ့သည်။

"ကျွန်မစမ်းကြည့်လိုက်မယ်"

ရွှီလျန်မှာ နှုတ်ခမ်းနီဖျော့ဖျော့လေးဆိုးထားသည့်အတွက် အများကြီးထပ်ဆိုးစရာမလိုတော့ ၊ နှုတ်ခမ်းနီဆိုးပြီးနောက် သူမက နှုတ်ခမ်းကိုနည်းနည်းပွတ်လိုက်သည်။ အရောင်က မက်မွန်ရောင်သန်းနေသောအနီရောင်ဖြစ်၏။ သူမကဝိုင်နည်းနည်းသောက်ထားပြီး ဝိုင်ကသူမနှုတ်ခမ်းကို မတော်တဆ စွန်းထင်းသွားသလိုမျိုး....