Fatima_Al-juboory
• باچر الأيام تحلى، و الفَرَح يترس حَچينة .
..... ♡♡.....
جمان: ياسر خويه اريد اكلفك بشغله
ياسر: أمري خيتي
جمان: خويه اريدك تروح لبغداد للـ** اذا تكدر
ياسر: دللي اروحلج بس ليش
جمان: اريدك تروح للعنوان الي انطيكيا اريد اخبار ابو منتضر اجه من السفر او لا
ياسر: منو هذا ابو منتضر وليش تردين اخباره
جمان: هو الوحيد يكدر يساعدنه
ياسر: اكدر اعرف اكثر
سحبت حسره واسترسلت بالكلام واني صافنه بالفراغ الكدامي
جمان: ابو منتضر رجال فقير ولكمه لولده ماعنده اشتغل يم بابا فد فتره قليله وبطل بسبب جان مريض بعد مابابا الله يرحمه عرف حالته وعرف حاله اطفاله بابا ساعده من دون اي مقابل ساعده هواي وتكفل بعلاجه والتكاليف مال علاجه
بعد ماطاب من مرضه طلب من بابا يشتغل عنده بابا قرر يشغله بحديقتنه رغم بيها ثنين يشتغلون بس خلا وياهم لان كال رجال جبير بالعمر مايكدر وعلمود لا يحس بهانه لنفسه من بابا تفضل عليه رغم هذا مو طبع بابا يحسس المقابل انو هو متفضل عليه
بعد ماشغله بابا ساعده هواي وساعد ولده ودخلهم احسن المدارس واحسن الكليات الاهليه وكله ع حساب بابا لان جان ابو منتظر الاقرب لقلب بابا ويحبه كلش ويحب ولده
ف رادهم يوصلون نفسنه وبمستوانه وفعلا صارو ولده دكاتره من احسن دكاتره بغداد حالياً وملك ابو منتظر حاليا عماره
ياسر: اسف ع المقاطعه بس ابوج شنو جان
جمان: تاجر من اكبر التجار قحطان الـ **
ياسر: ها ماعرفه بس سؤال
جمان: جواب
ياسر: اذ عرفت اخبار ابو منتظر شسوين
جمان: اذا رجع للعراق اروح يمه واذ مارجع اريدك تعرفلي وقت جيته لان قبل فتره خابرت عليه رد عليه ماعرف منو كال مسافر وماعرف يمته يرجع هو وعائلته كلهم وره فتره نغلق الرقم شكد حاولت اتصل بس للاسف مغلق ف ماعندي غيرك ولو راح اتعبك
ياسر: تدللين ماكو تعب إن شاءلله باجر من الصبح طالع لبغداد
جمان: تسلم خيي
ياسر: ولو
حجاها وطلع رجعت لغرفتي والتعب ماليني واني شايله هموم الدنيا كلها ع ظهري ماعرف منين الكاها
من صعب الي ببالي وروحي وكلي يمه مشاعري مخربطه اتجاها خوف متملكني من قربه اخاف اتقرب اكثر ويحركني بناره نفس الي قبله اخاف ابقه هيج وأذي نفسي،بالزايد
لو من تعبي وهمومي من بان الي شايله مسؤليتها لو منين الكاها يالاهي هم يجي يوم وارتاح واكعد من النوم براحه هم يجي هذا اليوم وارجع مثل حياتي القديمه ولو ماترجع بس لو نص منها اقلها ارتاح
هم يجي يوم واكعد من النوم من دون قلق وتفكير من دون ارق وارهاق هم اخلي راسي ع المخده من دون تعبت وسهر وتفكير
تعبت كلش الاهي ريح گلبي الاهي ماتحمل بعد نهدمت جمان القويه مابيها قوه بعد للتحمل اكثر من هيج
طبت بان بيدها لفه وكوب جاي قدمتهن ناحيتي وحجت
بان: جمان بداعتي اكلي اكيد من الصبح لسه كلشي ماماكله
سحبت كوب الجاي بس
جمان: بان عوفيني ماشتهي انطيني بس الجاي
بان: تردين الجاي تاكلين الفه ويا ماتردين لفه ماكو جاي
جمان: بان راسي موتني ومالي خلك انطيني كوب الجاي واطلعي عني اريد ارتاح
خلتهن ع الميز وتقربت عليه كعدت مقابيلي وكمشت اديه بثنين اديها وعيونها بعيوني
بان: جمان والله اخاف عليج جمان ماعندي غيرج لاعبالج اني راضيه ع عيشتنه اوراضيه عليج تشتغلين وتدورين شغل والله ودي اني اشتغل وانتي تكعدين لا عبالج اني بلا احساس جمانه تره ماعندي غيرج انتي امي وانتي اختي وانتي صديقتي من بعدج مااسوه شي صدكيني وين اروح من بعدج اتيه والله اتيه لخاطري اكلي علمود شويه تتقوين تقوي لخاطري رجعي جمان القويه الي واجهت داعش بصلابه وقوه والي خاطرت بحياتها علمود حيا حاتم وجبتيله الدوه فدوه لخاطرنه تره اموت من بعدج والله اموت اذ صار بيج شي
خليت ايدي ع شعرها وحجيت
جمان: اششش اسم الله عليج اني بظهرج واني امج وابوج واختج واخوج اني سندج كلشي جاي اسوي علمودج جاي اتحمل الذل والتعب في سبيل احميج
بان: لعد اكلي علمودي لاتطيحين جمان انتي لا تتغدين ولا تتعشين وحته ريوك ماتتريكين تطلعين بلا اكل ومن الصبح لليل تدورين ع شغل جمانه لاتطيحين تره اخاف عليج والله فدوه لخاطري اكلي مو اني اختج وحبيبتج اكلي علمودي
ابتسمت وحجيت
جمان: امممم لعد دام هيج يله اكل بس تاكلين وياي
بان: مو تدلبين اكل وياج هسه ثواني اجيب الاكل واجي حته الفه لاتاكليها واصيح خاله ام ياسر كاعده وحدها خطيه
جمان: هههه تمام انتضرج
طلعت رجعت راسي لوره والحزن غيم ع گلبي بعد ماذكرت حاتم ماعرفوينهم وشصار بيهم هو وكوثر وريناس اخخخخ ياريناس ماعرف شلون بيج بعدج ع ضعفج لو قويتي طلعتي لو بقيتي
