طوبى "جنة طوبى"

الجزء السابع والستين4

من عينها..
اميمه بضيق:نقولك حاجه هو بيجي اليوم تمام انتي فكري كويس والقرار اللي توصليله قوليهوله بعدين..
شبحتله وقالت:بالشويه اميمه خيرك!؟ قرار شني ونفكر شنو..عركة ومشكله عاديه تصير..تنهدت وقالت..خلتني نعرفه كويس ونتأكد اني حبيته بجديات..
اميمه مررت نظرها القدام بعدين شبحتله وقالت..
ان شاء الله خير..وراهو حسين قلبه طيب وتقدري تكسبيه بس اعرفي كيف تتعاملي معاه بس..
حسناء:إن شاء الله..
🍃🍃🍃🍃🍃
"ماشاء الله عليك جديات شغل متكم"
نجاة بإبتسامه؛يعني استقريت خلاص..
: باش مهندسه اني مستقر من اول ماشفتك..
هي نزلت عيونها للمخطط وع وجهها ابتسامه جانبيه..
:جديات عجبتيني هلبه ومعششه في عقلي تعشيش ياريت معرفتنا تفوت الشغل..
شبحتله..
؛ردي بالك تفهميني غلط نبي الحلال راهو بس قبلها نبي نتعرف عليك وانتي تتعرفي عليا شن رايك؟
نجاة ابتسمت وقالت:okمافيش مشكله..
بإبتسامه قال؛تمام بكل..توا اني مشغول بعدين نتصل بيك ونزيدوا نهدرزوا..
هي قالت؛تمام..
:سلام يابريوشه بالعسل..
ضحكت..
وهو ضحك ومشي طلع من المكتب..
بعد ماطلع تلاشت ضحكة نجاة وحلت محلها ملامح الحزن..
حركت راسها بالرفض وقالت..
تو تنسيه تو تنسيه يانجاة وكأنك ماعرفتيه..
وقعدت تلف في المخطط وايديها يرجفوا وتحاول تمنع نفسها عن البكاء بكل قوة..
🍃🍃🍃🍃🍃
"دكتورة شوفي"
خدت صابرين ورقه جابتهالها فنيه تخدم عندها بعدين قالت..
ايوه هكي نتيجه مزبوطه بالله ركزوا مرة تانيه ماترفعوناش لداهيه..راهوا في الجديد مش مفوته لحد..
؛حاضر دكتورة ..
صابرين مدتلها الورقه وقالت؛خوديها..
خدتها ومشت طلعت من حداها..
شويه ويجيها اتصال...
رفعت تليفونها لما شافت المتصل ابتسمت وردت طول..
صابرين؛واخيرا..
"صابرينه استاحشتك"
صابرين بإبتسامه فرح:واني اكثر حبيبي..
"اطلعيلي برا"
هي بلهفه؛هيا هي..
وسكرت..وحطت التليفون ع الطاوله...
بعدين خدت شنطتها وطلعت منها المكياج...
زادت الزينه متاعها..وخدت عطرها حطت منها وثقلت..
بعدين ناضت حولت البالطو وعلقاته..وخدت شنطتها وطلعت بسرعه...
🍃🍃🍃🍃🍃
مقعمزة في مكانهم المفضل..
شاده تليفونه وتتفرج ع فيديوهات الرحله...
نضال؛تعرفي اريح يومين عشتهم في حياتي..
بعيد عن الدوشه بعيد عن النت بعيد عن كل شي.
طبيعه حلوة وهوا نظيف وجو مش عادي..
اريج شبحتله وقالت؛قداش خاطري فيها رحلة زي هادي خاطري نبعد عن كل شي نريح راسي ونصفي ذهني وترتاح نفسيتي..
رفع حاجبه وقال:معاي مش من غيري!
هي قالت؛وااك..حتى في هادي لاحقني..ياودي باهي اهو نحصل حد يديرلي عصبان..
نضال؛قتلك قرضت الخضرة بس راهو!
اريج؛قصدك ياخايب روحت من غير ماتتعلمه!؟
نضال برفعة حاجب:علميهولي انتي بعدين يافالحه..
قلبت عيونها ورمشتهم بعدين رجعت تشوف للتليفون..
هو ابتسم بخبث بعدين قال؛شوفي الفيديو اللي بعده شوفي للطريق اللي مشينا منها..
هي حطت عليه وقالت:هدا؟
هو قال:ايه افتحيه..
فتحاته وقعدت تتفرج؛من وين صورته هدا!؟
نضال:تفرجي وبعدين نقولك..
وسكتت وتبان منسجمه..
وفجأه اخر الفيديو يطلع واحد مقنع وهو يعيط..
عيطت اريج..بعدين حطت يدها ع صدرها ..
ونضال يضحك بدموعه ع ردة فعلها..
شويه وتلاشت ضحكته لما لاحظها بتفقد الوعي..
نضال بخوف: اريج اريج..خيرك..
وحاوطها وهو يقول بخوف:حبيبتي خيرك!..
وطاح راسها ع صدره..
هو بخوف قعد يضرب في خدودها ويقول:اريج..بالله عليك فيقي..وبغضب قال..تفي عليا اني وع البصارة اللي نعرفها..
بعدين خدي شنطتها ووقعد يفتح فيها وهو يقول..
اريج..نوضي ياقلبي والله حاجه عاديه..
وقعد يفتش في شنطتها وطلع منها شيشه عطر.
فتحها وحط منها ع يدها..وخدي يدها وقربها لأنفها..
نضال برعب:تي نوضي يااريج..نوضي..
ولاتحرك رمشها حتى..
خبط راسه وهو يقول..حمار..حمار..
وخدي تليفونه بيكلم حد يجي يساعده..
نضال؛ايوه ياباسط بالله عليك ابعتلي استاذه سالمه..قوللها تجي حدا الكافتيريا وتعالى معاها حتى انت..بسرعه ياراجل..
وسكر..وشاف لأريج..
لقاها فاتحه عين وحده وهي تشوفله..
لما شبحلها عضت ع شاربها وهي تضحك..
هو قال بشي من الغضب:نخنقك!؟ نقتلك!؟شن ندير فيك قولي!؟
بعدت عنه وهي تضحك وتقول..
تفي عليا اني..حمار..
وقعدت تضحك من قلبها وهي تقول..
ووه عليا منظرك كيف كان وانت تكلم في استاذ باسط حي..
ضحك ساخرا وهو يقلد فيها بعدين قال..
تضحكي ياقردة! بتحطيني في موقف زي وجهك معاهم..
واريج تضحك بدموعها..
نضال بنرفزة؛خلاص عاد رقتيهالي..
هدت ضحك ومسحت دموعها وهي تقول:تستاهل..من قالك العب معاي؟!
نضال:نستاهل اني مانشعفش..
طلعت لسانها وهي ترقص في حواجبها بش تغيظه..
وهو قال:تعرفي والله نوريك عليها باهي..
اريج:ماتقدرش ياروحي والله ماتقدر..
"نضال"
نضال وهو مرتبك ومحرج؛شن بنقوللهم الزفت!.
اريج؛ولايهمك حبيبي..
ودارت روحها مغمى عليها مرة تانيه..
هو فتح عيونه ع وسعهم بدهشه..
"استاذ نضال"..
جاها بسرعه شدها بين ايديه وهو يقول..
هني ياباسط هني..
وجوهم يجروا..
الاستاذه قالت؛خيرها!؟
نضال بإرتباك؛مش عارف فجأة قالت قلبي وقعدت تتنفس بالسيف بعدين اغمى عليها..
قعمزت جنبها الاستاذة وقعدت تحاول بش تفيقها وهي كأنها ميته..
ونضال شاد ضحكته بكل قوة..
لين خدت العطر وحطت منه ع يدها وخلتها تشمه..
دارت روحها بدت تفيق..
؛اريج تسمعي فيا..
اريج بتعب مصطنع؛ايه..
نضال؛خيرك شن جاك!؟
اريج بتصنع التعب؛مانعرفش..
؛جيبولها عصير ولاحاجه حلوة..
صديقه اللي كان واقف بعيد قال؛هي شويه وجاي..
ومشي بسرعه للكافتيريا..
🍃وشربوا اريج عصير ووكلوها شكولاته..
ودارت روحها بدت تفيق وتصحصح..
شكر راجلها صديقه والأستاذة...
وبعدين خدي مرته ورفعها لسيارتها..
نضال بضحكه؛اوسكار شويه عليك انتي..
اريج بضحكه؛حصلت عصير وشكولاته بلوشي من استاذ باسط..
نضال:تقول عمري ماجبتلك ياشمطاء..
اريج وهي تضحك؛ياغبو قصدي الاستاذ جابهالي بلاش..
نضال:تحشمي خير مانعطيك طياري..
قعدت تضحك..
نضال:بري روحي بري..
اريج؛حتى اني مروحه..
نضال؛عندك خدمه اليوم!؟
اريج:اكيد..
هز راسه وهو ساكت..
اريج؛هي نشوفك بعدين حبيبي..
نضال بعد عن السيارة وقال:ردي بالك.
اريج بإبتسامه؛حاضر..
وشغلت سيارتها وتحركت..
وهو واقف يشوفلها..
قبل لتطلع حياته بحركة اليد..وهو رد عليها...
وبعد ماطلعت من الجامعه قال..
قداش نحبها هالدعوة.
بعدين لف ومشي بإتجاه الكليه...
🍃🍃🍃🍃🍃
الساعه 3:30بعد الظهر..
في الكوجينه الخارجيه لحوش لطفي الواعر..
مطيره:واهو زوز كياس كملناهم غدوة نقول للطفي يرفعهم..
فردوس؛نبوا زياده على هادي..
مطيره؛ خل نشوفوا هادي الأول قداش نبيعوا منها..
صفيه؛الهريسه امتى تبدوا فيها؟
مطيره؛غدوة الراجل قالي يبي منها توا بنقعدوا نخدموا فيها من هني لين يخش رمضان..
فردوس؛وطعميه؟
مطيره؛تبي من يسوقلها ع قولت آلاء..
صفيه؛كيف؟
قعدت ساكته وهي تفكر..
شويه فردوس قالت:حوش شيابيني يشروا فيها مايديروش فيها..شن رايكم ندير كميه ونرفعهالهم يجربوا وحماتي بعدين تشوقلها..
صفيه:زعما عادي يافردوس ماتصيرلكش مشاكل بعدين..
مطيره:ايه صح..
فردوس:علاش بتصيرلي مشاكل مافيها شي..ماتنسوش راني خدمت نطيب للمناسبات قبل وهما مادوروش.
مطيره؛باهي مادام هكي خلاص ديري اللي قلتي عليه..
فردوس؛تمام غدوة انتم الهوا بالهريسه واني خلوا عليا الطعميه..
🍃ومنهم لداخل الحوش...
كانت الاء في الكوجينه مشغوله بطلبيات الكيكات والتورتات....
وحداها اريج تتغدا ع السريع بش بتمشي لعملها..
وفي دار المعيشه..
غرفه راقده بالنوم..
وطوبى حداها متكيه وهي مغمضه عيونها وحاطه السماعات في وذانها وتسمع في القرآن...
🍃كلهم مش عارفين باللي قاعد يدور بين بوهم وجدهم..
لطفي؛خلاص بوي اخر كلام..
علي وهو يحاول يخفي ضيقه؛خلاص ياولدي اخر كلام..
هز لطفي راسه وقال؛اليوم بنسكره..والايام الجايه بنطلعوا منه كل شي ويقعد مخزن لبضاعة المحل...
علي:وامتى بتفحتوه المحل؟
لطفي؛ليلة اول يوم من رمضان..
علي:ع خير ان شاء الله..ع خير..
لطفي هز راسه وقال..ان شاء الله.
وفي قلوبهم حسرة كبيره كل واحد فيهم قاعد يخفي فيهاع التاني وكل واحد فيهم محسس التاني انه ع قناعة تامه بالخطوه اللي خدوها...
🍃🍃🍃🍃
"خلاص تشاركوا هما والراجل اللي قتلك عليه بش بيفتحوا محل مواد غذائيه واللي عرفته من الراجل ان مكان المطحن بيديروه مخزن لبضاعة المحل"
مختار وهو مركز بنظرة لرقعة الشطرنج المحطوطه قدامه...
صار زي مانبي واحسن..زيد اسبوع تاني حنفتتحوا المطحن متاعنا نبيه يكون افتتاح كبير يا شكري..
" مرتب لحفل افتتاح مش عادي...كيف عاد حتى هي قهوة الامبراطور.."
مختار؛كويس ياشكري كويس..بس بنزيد نبه عليك اسمي ماينذكرش بكل سيرتي ماتجيهاش..
"اكيد يااستاذ المطحن متاعي اتي درته بفلوسي اللي لميتهم قرش ع قرش طول عمري..."
مختار؛حلو...
ونزل التليفون وسكر الخط..بعدين قدن لرقعه..
وخدي جندي وقدم بيه خطوتين وحطه...
🍃🍃🍃🍃🍃
"بوي فاضي"
حط المهدي الساعه اللي كان يصلح فيها وقاله:تعالى..
خش محمد للدار وقعمز ع الكرسي وهو يشوف للساعه قاله..
خيرها؟
المهدي؛وقفت شكلها تبي بتاريات..
محمد هز راسه وهو ساكت..
المهدي؛شن عندك؟
محمد شبح لبوه شويه بعدين قال؛مش امس كنت عند ولد التايب..
المهدي؛ايه..
وحكاله محمد الكلام اللي دار بينه وبين صاحبه..
المهدي بإستغراب؛تلاقيت اني وبوه اكثر من مرة مش باين عليه هم الدين بكل..
محمد؛عنده عزة نفس انكسرت قدام الديانه مايبيهاش تنكسر قدام الناس..
سكت المهدي شويه وهو يفكر بعدين قال؛ربي يفرج عليه..
محمد:آمين..المهم بوي الموضوع هدا خلاني فكرت في حاجه ونبي نديرها..
المهدي:اللي هي؟
محمد:نبي نخدم..
المهدي:وهاك تخدم في قهوةعمك!؟
محمد؛لايابوي هادي مش خدمه نساعد لما نكون مكسد وخلاص وبعدين مافيهاش تعب..القهوة قهوة عمي وفي من يخدم تحتي اني نراقب ونقول ارفعوا وجيبوا..
المهدي:شن تبي بالزبط..
محمد؛بوي نبي نعتمد ع نفسي بعيد عليكم..
عقد المهدي حواجبه بعدم فهم..
محمد:نبي نخدم بش نصرف ع روحي نبي نبني نفسي بعيد عليكم..نبي نحس بقيمة القرش ونقوي شخصيتي بش نتأقلم مع كل الظروف..قصدي بوي مافي حد ضامن شي في هالدنيا الحال ينقلب في لحظة...
المهدي حك تحت وذنه وهو يفكر بعدين قال..
باهي وقرايتك؟
محمد؛اهم شي عندي قرايتي وانت عارف..
المهدي:تبي تصرف ع روحك قلت..
محمد؛ايه..
المهدي؛شن تبي تخدم؟
محمد؛اليوم تفاهمت مع عم حيدر اللي شاد الكوشه متاع السنبله من غدوة بنبدا نخدم عشيه..
المهدي؛انت مرادع امورك كلها من قبل ماتكلمني..
محمد؛عارفك مش حتعارض..
المهدي؛وكان قلت لا..
محمد؛عارفك تحترم في كلمتي واني عطيت الراجل كلمه..
المهدي ابتسم بعدين قال..
مرة تانيه قبل لدير اي شي كلمني قبل..
محمد ؛معناها ماعندكش مشكله؟
حرك المهدي راسه بالنفي..
محمد ابتسم وقال:شكرا..وناض طبس عليه وباس راسه..
ومشي بيطلع بسرعه..
المهدي وقفه وهو يقول؛وين ماشي بسرعه هكي!؟
ضحك محمد وقال؛قتله كان تيسرت الامور بنبدا من اليوم..
رفع المهدي حواجبه..
ومحمد بضحكه؛مشيها يازعيم..وغمزله بعدين طلع بسرعه..
ضحك المهدي ضحكه خفيفه..بعدين رجع لهي بالساعه..
🍃🍃🍃🍃🍃
"لااني ولاانتي صغار الطروح هادم للمراهقين ياحسنا"
حسناء بشي من الضيق:عندك حق..اسفه..
هو تنهد وقال؛حتى اني اسف..وردي بالك يتكرر الغلط نفسه يابنت الناس مانبيش نفرك مني اكثر من هكي..
حسناء:بالعكس والله ماهكي مانقدرش ننفر منك..اني توا فهمتك كويس وان شاء الله معاش يتكرر الغلط مرة تانيه..
حسين؛حسنا..عيلتي اهم عندي من كل شي..امي خوتي جدي بوي عمتي وعمي وبناويته مهما ندير معاهم نقعد مقصر اني باللي عندي تحت امرهم الحاجه هادي لازم تحطيها قدامك ديما..
حسناء بضيق:باهي نقدر نسأل اني شن مكانتي عندك؟
حسين رفع سبابته وقعد يحرك فيه حركه دائريه وهو يقول..
لو درتي لعيلتي كلها نفس القيمه اللي اني دايرهالهم..حط سبابته ع راسه وقال..هذا مكانك..
ابتسمت حسناء من قلبها وهزت راسها موافقه ع كلامه..
وهو عقد حواجبه وابتسم وهو يقول:امتى مروحه؟
حسناء:بعد المغرب..
حسين؛تمام..خشي توا..
هي بإبتسامه قالت؛باهي..رد بالك ع روحك..
هز راسه وهو ساكت..
وهي مشت من قدامه وهو قعد يتبع فيها بعيونه من ورا النظرات لين خشت للمبنى...
تنهد..بعدين توجه لسيارته...
🍃🍃🍃🍃🍃
الساعه 7:00مساءا..
في وحده من مراكز التسوق"مول"...
كانت اسماء جايه مع قريباتها تدهور وفي نفس الوقت مدايرة موعد...
اسماء:بنات جاني ماشيه نشوفه نتلاقوا هني بعدين باهي..
:بيناتنا الو...
هزت راسها ومشت متوجهه للمكان اللي بتلاقى فيه هي وصاحبها..
لين وصلت فيه رسمت ع وجهها ابتسامه.
وسلمت عليه بالمصافحه:شن جو..
:صقع ياصقع شن الطرحات هادم اطلع طول..
ضحكت وقالت:اسمع نبيك في حاجه..
:قصدك ع هديكا البنت اللي مرة حكتيلي عليها؟
اسماء:ايه..
؛موضوعها تم كلمت الولد وقالي من غدوة بيبدا..
اسماء؛في حاجه بنزيدها..
:حاجه شنو قلبي..
شبحتله شويه بعدين بدت تحكيله ع اللي ناويه ديره لمروة بش تعلمها درس حياتها....
🍃🍃🍃🍃🍃
الساعه 9:00ليلا..
مغليه خشت للكوجينه اللي كانت نسرين تحط في العشي..
قالتلها:طلعتي حوايج خوك وولاده من الغساله؟
نسرين؛ حتى قريب يجفوا..
تنهدت مغليه بضيق وقالت؛واجعني حاله وقلبي واكلني عليه..
نسرين:بالعكس ولى خير من قبل..
مغليه:ماتشوفيش في اللي اني نشوف فيه..خوك وتعرفي وضعه يبي مراة ترد بالها عليه..
نسرين فتحت عيونها ع وسهم ورفعت ايديها لمتسوى صدرها وهي لافه لسبات الماعين وتقول..
وااك يام وااك...
مغليه؛ماقلتش غلط خوك يبي مراة..
تنهدت نسرين وخدت زوز صواني والتفت تقول.
امي كان تبي المهدي يقعد يخش عليك ويطلع ماتفتحيش السيرة..
بدت ع وجه مغليه ملامح الانزعاج ومن سكات مشت طلعت من الكوجينه..
نسرين حركت راسها يمين ويسار وهي تقول..
راك تركحي يام...
🍃وفي الحوش اللي جنب حوشهم..
تحديدا شقة خديجه..
كانوا مقعمزين يتعشوا مع بعضهم..
ولاول من فترة يقعمز معاهم محمد..
وبوه لما شافه استغل الفرصه وبدي بتلقيح الكلام..
محي الدين؛تعرفي واني مروح وقفت ع الكوشه متاع السنبله بنجيب منها الخبزة قولي من لقيته يخدم فيها؟
خديجه؛مني؟
محي الدين؛محمد ولد خوك المهدي..
رفعت راما عيونها في بوها وهي متفاجئه
وخوها ياكل عادي وكأنه مايسمع في شي..
اما امها بصدمه قالت:كيف!؟
محي الدين:والله زي مانحكيلك قداش احترمته راجل من صغره..
ابتسم ولده تهكما..
وخديجه قالت؛شن تقول انت!؟ معقوله ولد خوي المهدي شنيبه يخدم عامل في كوشه؟!
محي الدين؛وين المشكله يبي يعتمد ع نفسه ويدير شخصيه لروحه..
ولده تهكما قال:الخدمه في الكوشه دير هدا كله!؟
شبحله بوه وقال؛وانت شن عرفك ياولد امك!
قعد ياكل بصمت وهومعصب..
خديجه؛خليك من ولدك توا واشبحلي هني متأكد انه يخدم غادي!؟ بالك ماشي يعاون فيهم.
محي :لا يخدم غادي.
خديجه؛ياعليك عار!!..معقوله بوه رضاله بهالخدمه!!
محي الدين:تو انتي هدا ماشفتي في الموضوع كله..ماشفتيش ربايه الصح اللي متربيها ولد خوك الله يرحم من رباه...
عكرشت وجهها بإنزعاج وناضت خلت العشي..
وهو قعد معاها بعيونه ويقول؛ياريتك عرفتي تربي زيها..
ويلحق محمد امه وينوض ويخلي العشي..
محي الدين؛احسن..
وقعد ياكل ومعاه راما تاكل وهي سرحانه تفكر في ولد خالها...
~~~~~~~
مغليه بصدمه؛عامل في كوشه نهاره احرف وسط راسه!؟
"شوفي بوه قبل لتكلميه مرات مايندريش عليه"
مغليه وهي معصبه؛سكري سكري..
وسكرت عليها..وناضت طلعت من الصاله بش تهد ع المربوعه اللي كانوا مقعمزين يتعشوا فيها..
خشت عليهم..
راجلها..وولادها كلهم..ومعاهم يزن..
مغليه؛مهدي وين محمد؟
كلهم استغربوا السؤال.
والمهدي رد بهدوء؛في الخدمه..
شبحوله..
والجالي قال؛خدمة شني!؟
مغليه؛في كوشه عامل في كوشه يافرحتي ومبرك يومي!
المهدي:امي بالله عليك اهدي ووطي صوتك..
مغليه؛ماتقوليش وطي صوتك..
محمد شنيبه؛تي غير صلي ع النبي يامراة خل نفهموا.
شبح لولده وقال...علاش يخدم في كوشه علاش مايخدمش في رزقنا.يختار المحل اللي يبيه واني نخليه يشده..
تنهد المهدي وقال؛بوي محمد يبي يعتمد ع روحه ويستقل بنفسه بعيد عليا وعليك..
عمر ابتسم وقال:عجبني..
الجالي؛تمام..لكن يقدر يختار مكان خير من هكي..
نضال؛في عنده قصد لما اختار الكوشه نعرفه زين..
مغليه وهي بتنفجر؛تكلم ياحاج!..
محمد شنيبه بإبتسامه:حاجه تفرح..صحه ليه.
ابتسم يزن وهو يشوف لجده..
ومغليه مررت نظرها عليهم بعصبيه بعدين طلعت وخلتهم..
المهدي؛ربي يهديها وخلاص..
الجالي:وقرايته شن بيصير فيها؟
المهدي؛محمد مستحيل يهمل قرايته.
يزن؛امي وصاته عليها زي ماوصتني اني.
كلهم قعدوا يشبحوله وهما متأثرين..
ماعدا بوه اللي سرح بتفكيره وهو يذكر في عائشه..
محمد شنيبه:الله يرحمها عرفت تربي..
كلهم بأصوات متقطعه قالوا؛الله يرحمها..رحمة الله عليها..
🍃🍃🍃🍃🍃🍃
وخدم محمد هداكا اليوم وقعد للساعة 11في الليل..
وروح للحوش وهو حاس بشعور حلو بعد مااستلم اليوميه متاعها اللي كسبها بتعبه..
محمد حس بذاته فعلا بعد هاليوم....حس ان قيمته في عين نفسه زادت اكثر من قبل..
وين وصل للحوش وجي بيخش..
🍃كانت عيون مروة تشوف فيه من روشن وهي مبتسمه بإعجاب وفخر..
سمعت من امها انه ولى يخدم في الكوشه وياقداش شكرت فيه قدامها..
ضحكت ضحكه خفيفه لما شافته وهو خاش شبح للروشن شقتهم بعدين خش..
🍃وهو بعد ماخش الحوش مشي ركب لشقتهم..
وين خشلها...
لقي بوه يستنى فيه فالصاله..
المهدي؛شني!؟
رفع محمد يده اللي فيها الفلوس وهو مبتسم بفخر..
وكأن قايم كاس اوميداليه ربحها في دوري شارك فيه..
والمهدي كان فخور بيه لأبعد حد...
🍃في ضنوه ترفع الراس وفي ضنوة تنزله لسابع ارض🍃
ضنوة تنزله سابع أرض...
وهدا كان نصيب لطفي الواعر من الذريه الذكور..
ولد يهده ويتسببله في جرح كبير لليوم ماوقفش نزفه..
وياريته اكتفي باللي داره زمان مازال يبي يكمل اللي بدي فيه قبل عشرين عام...
🍃🍃🍃🍃
تاني يوم...
مع ساعات الصبح الاولى..
حط لطفي كياس البسيسه في سيارة بوه اللي بدي يستعمل فيها بعد باع سيارته..
كان متألم هلبه وقتها وهو يشوف في نساوين العيله كيف قاعدات يخدموا بش يحسنوا من وضعهم المعيشي..
بعد ماسكر الكوفني شاف الاء وهي طالعه بعلب الحلو اللي بتمشي تحطهم في المحل تتعامل معاه..
زادت ضاقت بيه اكثر..
ركب السيارة..وطول طلع من الحوش وهو متكدر..
ومن بعده طلعت آلاء...
🍃🍃🍃🍃
حطت الطلبيات عند صاحب المحل...بعدين توجهت للجامعه..
حضرت المحاضرتين اللي عندها..
وبعدهم مشت تزور خالها..
~~~~~
مختار بإبتسامه وهو فاتح ايديه؛اهلا بالبرنسس اهلا..
ضحكت وسلمت عليه بالاحضان وهي تقول..
حمد لله ع سلامتك..
بعدها وقال:الله يسلمك بنتي..قعمزي..
قعمزت الاء وهو قعمز جنبها وقال..
مختار؛شن اخبار الدراسه؟
الاء:ماشيه الحمد لله..
مختار؛واخر اخبار العيله؟
الاء بحزن:مافيش جديد الحال كما هو عليه..
هو هز راسه وقال؛تفرج..تفرج..
الاء:خالو ماتقدرش تساعد راجل خالتي غرفه؟
مختار:ياريت يابنتي ياريت يطلع بإيدي بس موضوعه كبير هلبه..
الاء؛هو مش ع اساس في مشكله بينه وبين حد دار فيه هكي.
مختار:No..مش هكي ابدا..راجل خالتك متهمنيه في قضيه اختلاس من وزارة الداخليه..
الاء بصدمه:كيف!؟
مختار:ومبلغ كبير جدا اللي مختلسه..
الاء قعدت ساكته وهي مصدومه..
مختار:من قاللكم ان في عنده عدواة مع حد وهو اللي تسبب في اعتقاله؟.
الاء؛جدو وخالي حسين..
ابتسم تهكما وقال؛اااه منه جدك هدا ااه..البراني قاعد يدس عليه ويحافظ ع سمعته وولده اللي من لحمه ودمه قاعد لعند اليوم يعاير فيه قدام الناس..
آلاء؛بصراحه خالو اني مصدومه..مايبانش عليه ديما نشوف فيه راجل مستقيم..
مختار:هادوا بالذات خافي منهم خالو اللي يتصنعوا في الاخلاق واللي يدعوا في الاستقامه ديما حطي تحتهم الف خط...
الاء قعدت ساكته وهي تفكر في حال خالتها لو عرفت..
مختار:يللا نقولوا ان شاء الله يطلع منها وخلاص..
آلاء:ع الاقل ع خاطر خالتي وصغارهم
مختار؛باهي شن حال خالتك التانيه
الاء؛اليومين اللي فاتوا رقدت في المصحه..
هو بخوف قال؛خيرها؟
الاء:مش عارفه فجأه اشبح كيف صار فيها دارت زوبعه في الحوش بسببها قريب اجهضت..
هو بصدمه؛قصدك حامل!؟.
آلاء وهي محرجه:ايه..
سكت مختار وهو يفكر بصدمه..
ماكانش يبي شي يقعد رابط طوبى بالجالي..
كان مخطط انه يرهقها ويتعبها من الشك في علاقة الجالي بنجاة..ويخليها تلجأله مرغمه ووقتها مش بس يطلقها منه ويمسح حياة نجاه والجالي تماما..
بس مادام حيكون في طفل في النص الوضع تعقد بعض الشي في نظره..
الاء؛خالو..
استاقظ وشافلها بعدين قال..
قصدك تقولي انها قاعده في حوش جدك توا؟
الاء بحرج:من قبل ماترقد في المصحه جت ع خاطر تعبانه شويه..قصدي يعني مش طايقه حوشها وهكي..
مختار هز راسه وهو يفكر بعدين قال..تمام تمام.
خلينا توا من المواضيع المنكده ونخشوا ع المهم..
وقعد ينادي..
فوزيه..فوزيه..
شويه وخشت الشغاله وفي ايديها اكياس حطتهم ع الطاوله..
مختار؛بري..
مشت طلعت..وهو شاف لآلاء وقال..
حاجات بسيطه مش من قيمتك..
الاء وهي متفاجئة؛علاش هدا كله خالو؟
مختار بضحكه؛ولا حاجه بنتي قدام اللي تستاهليه..
الاء بإبتسامه؛شكرا هلبه خالو..بس نبيك تعذرني مانقدر ناخد منهم شي..
هو قال؛علاش!؟
الاء:عارف الوضع انت..
تنهد بعدين هز راسه وقال:ok ok..بس بتاخدي منهم كم حاجه بسيطه مايلاحظها عليك حد..
الاء بآبتسامه؛ok..
مختار ابتسم بعدين قال؛قصدك مافي حد يعرف انك تواصلي فيا؟
الاء؛لافي اريج وطوبى..
هو بمفاجأة؛طوبى؟
الاء:ايه..
قال؛لاعاركت لادارت شي؟
الاء:نهائي بالعكس قالتلي لما تمشي تشوفيه قوليلي..هي الوحيده اللي تعرف اني جاياتك اليوم..
قعد مختار ساكت وسرح بتفكيره..
والاء قالت وهي تشوفله؛في حاجه خالي؟
شبحلها بعدين ابتسم وقال..لاحبيبتي مافي شي..خل نوريك شن تاخدي من اللي جبتهولك...
🍃🍃🍃🍃🍃
وطوبى في هالوقت..
كانت مقعمزه في الجنان..حاطه تليفونها ع الطاوله وهي تشوفله وغارقه في التفكير..
كان صاير في عقله زي صوت الماكينه اللي قاعده ترحي بيها فردوس الطعميه..
فجأه..
خدت التليفون وقعدت دير بيه فشي..
بعدين حطاته ع وذنها وهي مغمضه عيونها بقرف..
🍃اللي اتصلت بيه كان واقف في غرفة الاجتماعات مع واحد من الموظفين عنده..
الجالي:غدوة بإذن الله بنمشي للموقع نشوف شن صار معاهم..
فجأة رن تليفونه...
طلع من جيب الجاكيت وهو يقول..نبيك تمشي معاي..
؛إن شاء الله..
هز الجالي راسه وشاف للتليفون تفاجئ..
وبدي قلبه يدق بقوة..قال للراجل اللي قدامه بدون مايشوفله تقدر تمشي..
مشي الموظف وطلع من غرفه الاجتماعات..
وهو خدي نفس عميق..وطلعه..
بعدين فتح الخط ورد..
الجالي وهو يحاول يخفي توتره:ايوه..
"فاضي؟"
الجالي بلع ريقه وقال؛ايه..
"باهي اسمع تعرف من دفع مصاريف المصحه"
الجالي؛ولد عمك ومش عارف بأي حق..
"انت اللي مالكش حق تقول بأي حق ولاتقول اي حاجه تانيه..مصاريف العياده نبيهم بنردهومله"
الجالي:تو نردهم اني..
"مش حياخدهم منك اني ياخدهم مني"
الجالي رفع حاجبه وقال؛ع اساس؟
🍃غزت طوبى ع سنونها وقالت..
اسمع ماتخلنيش نزيد نحقد عليك..
"باهي..تو نجيبهملك"
طوبى:لامانبيش نشوفك ابعتهم مع واحد من صغار خوتك..
"طوبى فكري بعقلك لو ماجيتكش بعد ماطلعتي من المصحه حتخلي بوك يشك"
كرمشت وجهها بإزدراء..
"هاه شن قلتي"
هي قالت؛باهي..لكن مانيش طالعه الفلوس تعطيهم لبابا وماتقولش فلوس المصحه..
"علاش!؟"
طوبى:وتبيه يعرف ان حضرتك مش دافع المصاريف!؟
"اها..صح مزبوط"
طوبى؛امتى بتجي؟
"بعد المغرب"
طوبى سكرت عليه وحطت التليفون قدامه وهي تشوفله بإشمئزاز..
🍃وهو ..
الجالي؛الو..طوبى..ايوه..ونزل التليفون وشبح للشاشه لقاها مسكره عليه..
عصب..بس بعدها قعد يضحك..
🍃🍃🍃🍃
في موعد انصراف الطلبه من المدارس..
بنات فايزة وهما مروحات كانت تلحق فيهم سيارة سودا..
صاحبها منزل المرش ويشبح لمروة..
ومرة يحدف كلمه..
"عيونك شغلوني..مهبلتيني..غير اشبحيلي شويه بس..
والله قصدي شريف"
صفاء:امشوا بسرعه..
مروة وهي متوترة؛نبي نجري..
تاله؛راهو يكلم فيك مروة..
صفاء؛يابلوة ياتاله معاش تشبحيله..
ووراهم محمد وصاحبه يشبحولهم..
محمد معاش قدر يشد روحه..
قدم للسيارة بسرعه..وصاحب السيارة شافه من المرايه..
طلع طول..
محمد بغضب؛الكلب..
والبنات وصلوا بفتحه الشارع وخشولها وهما مرتبكات وخايفات..
صفاء:من هو هدا؟
مروة بخوف:وين نندري ع مصيبته سحيقه تسحقه..
ووصلوا للحوش وخشوله وسكروا الباب وراهم..
ومحمد وقتها كان واصل لحوشهم وهو يشوف جهة حوشهم بعصبيه...
🍃🍃🍃🍃🍃
الساعه 8:00مساءا..
كان الجالي جاي وهو حامل ومحمل ماخلا حاجه ماجابها..
حتى من اللحم والدجاج والكبده..
مطيره؛الله يبارك راجل كريم ربي يحفظه لطوبى..
فردوس قعدت تشوف للحاجات وهي منقرفه بعدين قالت..بنخش نرتاح..
طلعت من الكوجينه وهي معصبه..
وقفها بوها لما ناداها..
التفتت وقالت:نعم بوي؟
مدلها الظرف وقال؛عطيه لأختك..
خداته فردوس وقعدت تشوف لبوها كان باين عليه مضايق هالمره..مشي طول من غير مايزيد كلمه..
فردوس استغربت بعدين مشت لاختها في دار المعيشه..
خشت ومشتلها ومدت الظرف..
خداته طوبى..
فردوس بصوت منخفض:هلبه هادم لشنو؟
طوبى بنفس الصوت؛بعدين نقولك
🍃🍃🍃🍃
ويجي حسين لحوش عمه..
وتطلعله طوبى وتمدله الفلوس..
حسين:خشي داخل مانبيش نهزبك..
طوبى؛مش ملزوم بيا..
قاطعها وقال..سكري فمك وخشي داخل..
طوبى بضيق؛ربي يهديك وخلاص..
ومشت خشت وخلاته وهو مضايق للغايه...
🍃🍃🍃🍃🍃🍃
ويوصل الليل لنصه...وتغمض العيون..والكل يريح في النوم..
ماعداها...
هديكا الليله ماقدرتش ترقد..
ولاقدرت تقعد في الدار..
طلعت منها وقعد دور في الحوش كله وهي تفكر...
واستقرت بنفسها في الجنان تحت شجره الياسمين..
وعقلها مابطلش تفكر لين وصلت لقرار مش حتنفذه قبل لتاخد فيه رأي خواتها..
☘☘☘☘☘
تاني يوم...
الثلاثاء...17 من شهر ابريل.. سنة2018..
في دار المعيشه مقعمزات التلاته مع بعض برواحهم..
عمتهم كانت طالعه..
طوبى؛اللي عندي يشروا مطحنه وحده بس..
غرفه؛اني مانقدرش نتصرف في فلوس المحلات كلهم..بس نقدر نبيع حاجة ذهب لانه ملكي..
طوبى:المطحنه الممتازة توصل ل2000..
غرفه؛عندي حديده بخاتمها يجيبوا اكثر..
فردوس؛باهي من بتبعتي يصرفهم؟
طوبى:ساهله وحده من البنات..
فردوس؛من غير ماتقولي شن تبي فيهم؟
غرفه؛ايه اساسا مش لازم يعرفوا..
فردوس؛باهي نبي نعرف كيف هانت المطحنه ع بوي وجدي بس!..
طوبى بحزن:ماهانتش عليهم يافردوس لكن الظروف تحكم..
سكتت فردوس وهي موجوعه ع بوها..
غرفه؛باهي ماتعرفيش امتى ناويين يديروا اللي قلتي عليه؟
طوبى؛مش عارفه بس مادام المطحن مسكر من امس لليوم معناها خلاص..
غرفه بألم:حسه قلبي وجعني..
نزلوا دموع فردوس ومسحتهم طول..
طوبى وهي شاده دموعها؛مش وقت بكي توا بكل..
غرفه وهي تمسح في دموعها؛صح..باهي قوليلي من بياخد المطاحن؟
طوبى؛اكيد حسين بس مازال ماخبرتاش لين نرسى ع حاجه مضمونه..
فردوس؛مادا بيك بسرعه طوبى..
تنهدت بعدين هزت راسها وقالت؛ان شاء الله..
🍃🍃🍃🍃
وتعدي الساعات...ويجي وقت مشي أريج لعملها..
لكن هالمرة بتوصل امها في طريقها لحوش جدها..
🍃في الطريق..
اريج وهي تتكلم بالتليفون؛مرات بنعطل شويه ماشيه لتاجوراء..
"مش مشكله تو نقول لإنصاف تشد عليك لين تجي"
اريج؛بارك الله فيك دكتورة...
"وفيك بارك الله"
سكرت اريج من الدكتورة منيه وامها سألتها..
فردوس:كويسه الدكتورة هادي..
اريج؛هلبه التعامل معاها سلس ومش رافعه خشمها زي اللي قبلها...
فردوس هزت راسها وهي ساكته...
🍃وبعد طول مسافه..
حطت اريج امها قدام سانية حوش جدها ومشت طول..
ووين خشت فردوس لحوش اهل راجلها..
استقبلتها حماتها من الباب..بعدين دخلتها داخل..
لقت عندهم حماتها الكبيره ووحده من سلفاتها مع عزوزتها اللي استقبلوها بترحاب وبعبارات الشوق..
قعمزت هدرزت عليهم مشوار..بعدين حماتها جابتلهم الضيافه..
بعد الضيافه خش معتز اللي كان يحضر في كورس انجليزي.
سلم ع امه وحناه قعمزاته حداها..
حماتها الصغيره؛دخله بشير كورس انجليزي..
فردوس بإبتسامه مجامله:ايه قالي لما جي اخر مرة..المهم شفتي اكياس الطعميه اللي جبتهم..
:ايه شفتهم وشميت الريحه الباين عليها طعميه صح..
فردوس بضحكه؛تعرفي الخلطه متاعي..
سلفتها؛الحق ديما حاجه بروحها ماشاء الله عليك..
فردوس:تسلمي..اني جايبه بالزايد اعطيهم كيسه كيسه يجربوها..
حماتها الكبيره؛بتبيعي قصدك؟
فردوس:ايه رمضان قريب وهلبه الناس معاش ولت دير في الحاجات هادي في الحوش وحتى انتم تحبوا تشروها من برا..
عزوزتها:خلاص العام هادي ناخدوها حد ضامنينه..
سلفتها؛صدقتي عمتي..
فردوس وهي تمرر في نظرها عليهم:خلاص انتم جربوها كان عجبتكم كلموني ونتفاهموا بعدين..
وولدها يشوفلها وهو معصب ومحرج في نفس الوقت..
شويه وناض من حداهم لداره..
بدل حوايجه وقعد فيها ويحرق في أعصابه ويسحن ع أمه..
لعند ماسمع صوتها قريبه من داره..
"شويه نهدرز ع معتز ونجيكم"
ويدق باب الدار..
هو ناض وفتحه بعصبيه..
فردوس خشت وهي تقول؛خيرك دسيت روحك في الدار ماتبيش تشوفني!؟
سكر الباب بعدين شبحلها بغضب وقال..
انتي علاش ديري هكي علاش مرة طيبي في العراس وتوا بتبيعي طعميه ومرت عمي وعمتي تو بيروحوا ويقولوا لولادهم تبيهم يقولولي امك تبيع في الطعميه..تحشمي فيا انتي هكي راهو..
هي كانت مصدومه منه هلبه مازال في سادس ابتدائي ويعامل فيها هكي مالا لما يكبر شن يديرلها!؟
قالتله تعجبا وتساؤلا..
نحشم فيك!؟
هو بوقاحه :ايه..اني هارب منكم ومن العيشه متاعكم وانتم تلحقوا فيا لهني..
ابتسمت بألم وقالت؛سامحني..اني اسفه..كان مازال ريت وجهي مرة تانيه ادفل عليه.."ابصق عليه"..
ومشت طلعت وهو سكر الباب وراها..
☘هي مشت طول بتطلع من الحوش معاش متحمله تقعد فيه..
لاقتها حماتها وقالت؛وين ماشيه فردوس تعالي اشربي الشاهي!..
حركت راسها بالرفض وقالت؛صحيتي بنروح خلاص..
:جاتك اريج..
فردوس وهي ماشيه للباب:ايه ايه..بالسلامه..
وفتحاته وطلعت وسكراته وراها..
وخلت حماتها مستغربه في حالها اللي تغير..
🍃وهي مشت بسرعه طلعت من السانيه للطريق..
كانت تمشي وهي تمسح في دموعها اللي ينزلوا غصب عنها..
مش عارفه علاش وقتها خطروا عليها أيام زمان..
وتفكرت علاقة امها بخوها مختار..
كيف كان ساهل عليه يجرحها ويكسر قلبها وعمره ماراعى مشاعرها..
فكرة ان ولدها الوحيد يكون زي خاله فكرة مرعبه لفردوس
مرعبه هلبه...
وصلت في راس الشارع..
وقفت سيارة تاكسي وركبت..
بعد ماقالتله ع مكانها...قعدت طول الطريق وهي تبكي بصمت وكلام ولدها يتردد في عقلها..
🍃🍃🍃🍃🍃
ثلتين الولد للخال..
هكي يقولوا..صح مش قاعده..
بس في الاغلب الحالات كان هالمثل واقعي تماما..
وهالخال..
في هداكا اليوم زار الشارع حطه السواق متاعه في بدايته..
وهو كمل الطريق مشيا على الأقدام..
لين وصل في مطحن الزعيم اللي كان واقف قدامه المهدي مع نسيبه محي الدين..
مختار بنبرة منغمه؛السلام عليكم.
هما شبحوله وابتسموا وردوا عليه..
بعدين محي قال..يااهلا..
وسلموا ع بعض بالخد..
بعد السلام..
حط مختار ايديه في جيوبه وقال؛وين سنان؟
محي بضحكه؛يخطب..
مختار ضحك بإستغراب..
المهدي؛بيولي هو ومحي عدايل..
مختار:اها...ربي يكمل ع خير..
المهدي:ان شاء الله..انت شن اخبارك شن امورك..
مختار:حال الجري واللهيد زي مايقول..
محي الدين؛باهي اللي شفتك اليوم نبي نهدرز عليك هدرزة طويله..
ابتسم ع جنب وقال؛حاليا فاضيه هدرز لين يعيا لسانك..
محي الدين ضحك بعدين قال؛نعزمك ع قهوة..
مختار؛ياريت والله..
محي؛تفضل..عن اذنك بونسيب..
ومختار رفع يده للمهدي..
المهدي:خودوا راحتكم..
ومشي محي بمختار للقهوة وقعمزوا مع بعض ع وحده من الطاولات..
تحت انظار الجميع من بينهم نضال...
🍃ويطلع عبد القيوم من حوش المهدي وين يشوفه واقف قدام المطحن يمشيله طول...
بعد السلام ع بعض..
سأل عبد القيوم المهدي:مسكر حتى اليوم؟
المهدي وهو يشوف لمطحن حوش الواعر بضيق:اي..ان شاء الله يصينوا فيه مش حاجه تانيه..
شبح عبد القيوم للمطحن بأسف وقال..
إن شاء الله...
☘وفي حوش لطفي الواعر..
كانوا كلهم ملتمين حوالين عالة مطيره..
ومعاهم..فايزة وبناويتها..وسدرة المهدي اللي جت تشوف طوبى..
مطيره؛وامتى العرس!؟
فايزة؛مااظنيش يديروا عرس هكي فهمت من نسرين..
صفيه؛تي باهي ان شاء الله ربي يكملها ع خير..
فايزة؛ان شاء الله..وشبحت لطوبى لقتها لاهيه مع سدرة وتاله...
وفي جهة تانيه من الصاله..
اميمه؛شن جو القرايه؟
صفاء:الحمد لله..ماشيه..
اميمه بإبتسامه؛مافيش جديد ع صعيد الخطط المستقبليه..وضحكت..
صفاء ضحكت بعدين قالت؛لافي جديد..
اميمه؛شنو؟
صفاء:عادي نمشوا للكوجينه نهدرزوا..
اميمه؛شويه بس..وشبحت لسفرة العاله لقتها معبيه طواسي يبوا الغسل..ناضت ومشت خدتها..
مطيره:زيدوا حتى الحاجات..خبيزة وكعيكات..
اميمه؛تنوضي معاي صفاء..
صفاء:باهي..وناضت ومشت خدت السفره..ولحقت اميمه..
🍃في الكوجينه..
صفاء:نبي نتزوج بعد الشهاده الثانويه..
اميمه وهي متفاجئه:كيف!؟
صفاء تنهدت وقالت:مش لأني نبي الزواج لا والله بكل..بس لازم نتزوج..
اميمه وهي مستغربه؛علاش لازم؟
صفاء:نبوا معانا راجل ياأميمه..راجل يندارله الف حساب ومايفكر حد يتعدا حدوده معانا في وجوده..امي تبي معاها راجل يكون معاها في وقت شده..تقدر تسافر وهو معاها دير اللي في خاطرها كله..حني ماعندناش في هالدنيا..لاعم لاخال لاخو...بالك ربي يعوضنا خير بالنسيب..
اميمه تأثرت هلبه بكلامها لكن قالتلها؛شن يضمنك ان الراجل اللي بتاخديه يكون معاكم زي ماتتمني ياصفاء؟!
صفاء؛ضامناته...
استغربت وهي تقول؛كيف صفاء قصدك انتي!؟
صفاء؛لاماعنديش فيه الجو هدا تعرفيني بس في حد صارحني انه.يبيني ويراجي فيا نكمل المدرسه بعدين يخطبني..
اميمه:نعرفوه؟
صفاء:ايه من الشارع بس مانقدرش نقول من هو...
اميمه هزت راسها بعدين قالت؛تمام..لكن زيدي فكري صفاء وردي بالك ديري حاجه تزعل امك منك..
صفاء؛مستحيل مانديرهاش..صدقيني مافيش بيني وبينه شي وهو كويس هلبه والله..
اميمه بإبتسامه؛باهي..ان شاء الله خير..هيا بسرعه كملي اللي في يدك والحقيني..
ومشت اميمه طلعت بسفرة الطواسي..
وشويه ولحقتها صفاء اللي حست براحه بعد ماحكت سرها لحد كبير عندها فيه ثقه..
🍃🍃🍃🍃🍃🍃
"خشي نسرين"
نسرين وهي متحشمه ردت ع اخت ربيع بهزة راس..وخشت للمربوعه..وهي خشت بعدها..
ربيع اللي كان مقعمز بكل أناقته وهو يراجي فيها ابتسم من قلبه لما شافها خاشه..
ناض وقف يحسابها بتجيه تسلم عليه..
لكن هي مشت قعمزت مقابلاته..
رفع حواجبه ونزلهم وهو مبتسم بعدين قعمز وقال..
كيف حالك نسرين..
نسرين وهي تساوي في وشاحها بعبث:الحمد لله..
اخته:نطلع ونخليكم تتفاهموا..
وناضت ومشت طلعت من حداهم..
ربيع بإبتسامه؛نسرين..
شبحتله وهي مبتسمه..
ربيع:الله يبارك..مش عارف علاش زمان كنت نشوف بشكل وتوا بشكل..
نسرين؛كان تبيني نتفكر ايام زمان معناها بنغير رايي..
ضحك ضحكته المميزة وقال..لالا فوتي زمان وايامه..خلينا في اليوم حني ولاد اليوم..
نسرين هزت راسها وهي مبتسمه..
ربيع بإبتسامه جاده:نسرين..اني اكثر واحد عارف اللي مريتي بيه تمام..هدا علاش نبي منك حاجه وحده ردي بالك في يوم تفكري اني ممكن نجرحك ولانوجعك مهما صار بيناتنا..اني تزوجت قبل والمراة الأولى خديتها عن حب بس بعد الزواج عرفنا بعضنا اكثر وطلعت فينا عيوب ماتخليناش نكملوا مع بعض العيب اللي خلانا ننفصلوا مش اني عقيم لا...لأني حسيتها معاش تبي تكمل معاي وتبي الانفصال واني عطيتها حريتها..
نسرين؛مافهمتش علاش تقولي في الكلام هدا تبي تخوفني منك!؟ وضحكت بإستغراب..
هو بإبتسامه قال؛حكيتلك التجربه اللي مريت بيها لأنك لازم تعرفيها زي مااني عارف كل شي عن تجربتك الاولى..
هي سكتت شويه وكانت تفكر في كلامه وشبه فهمت المغزى منه..ابتسمت وقالت؛فهمت عليك..
ربيع بضحكه؛لا كان فهمتيني هكي من البدايه معناها بعدين مش حنتعبوا مع بعض..نسرين شن شروطك..
نسرين؛شرطين..نقعد في شارع القهوة وولدي معاي من اول اليوم..
ضحك وقال:والله هدا اللي نبيه..
نسرين بإبتسامه؛طبعا بنقعد نخدم ونسوق..
هو قال؛مش ضد..
نسرين؛لما بتسافر نسافر معاك..
هو قال؛اكيده هادي مافيهاش كلام..وغيره؟
نسرين بإبتسامه؛هدا هو..وانت شن شروطك..
تنهد وقال..حياتنا تكون بسيطه ومافيهاش تعقيدات..مافيش حشم مافيش حساسيات..خليك عفويه معاي وماتحسبيش حساب الكلمه قبل لتقوليها لما نكونوا مع بعض نبوا نكونوا ع السجيه مافيش بينا حواجز..لكن قدام الناس الاحترام محفوظ..
هي من داخل كانت فرحانه هلبه ومرتاحه ع الآخر..
هو كمل يقول..عندي سؤال..انتي تبي ديري عرس؟
نسرين؛بصراحه لا..
هو قال؛ولا اني..في بالي عقد قران وعشي ونروح بيكم شن رايك؟
نسرين بإبتسامه:هكي احسن..
ربيع بإبتسامه؛طبعا في خاطري حاجه بنديرها النوبه بنخليها تقلب الشارع..
تلاشت ابتسامة نسرين وهي تقول؛لالا ردبالك ديرها مرت خوي مالهاش شهرين ميته وانت عارف مكانتها عندي هدا غير صغارها اللي قاعدين موجوعين عليها..
هو قال؛عندك حق راحت عن بالي والله..خلاص نخليها تقلب شارع حوش ماليا وخلاص..
ضحكت نسرين بعدين قالت..خلاص اتفقنا ع كل شي..
ربيع؛لاوين راجي..نسرين نبي يوم عقد القران قبل رمضان يعني نبيك معاي في رمضان..
هي ابتسمت بخجل وقالت:الحاجه هادي تفاهم فيها مع بوي والمهدي وشن مايقرروا اني معاهم..
وناضت وهي تقول..السلام عليكم..
ومشت طول طلعت من المربوعه..
وهو من فرحته قعد يضحك...ع خشة عمر..
بلع ضحكته وقال..اهلا وسهلا..
وعمر قعمز قدامه وهو شاد ضحكته قال..وبيك ياسي..
🍃🍃🍃🍃🍃
شويه وطلع ربيع..
لقي عبد القيوم والمهدي قدام المطحن يهدرزوا..
مشالهم وهو يقول؛بو نسيب..بوصاحب..
المهدي:هاه شن الامور تمام..
ابتسم عبد القيوم وهويشوف لربيع اللي قال..تمام الحمد لله..
المهدي:اهو قدام التارقي...ياويلك مني لو جت شكت منك..
التارقي ضحك وقال؛لاهذي عديها لأن الشكاوى حيكونن واجدات..
ربيع؛خير محضر خير عبدو ننغ..
عبد القيوم:وانا شن قلت قاعد نخفف فيها عليك ياهبل..
المهدي كيف جي بيتكلم..
شاف سيارة"كانتر" جايه..درست قدام مطحن عيلة الواعر..
مالفتتش نظره هو بس..
حتى هما...
حتى الجماعه المقعمزين في القهوة..
وصاحبها نضال...
لفتت انتباه فراس اللي طلع بيقعمز قدام محله بعد ماطلع منه الزبون..
كلهم..
شافوا لطفي وبوه علي وهما طالعين من حوش علي الواعر ومتوجهين للسيارة..
علي وقف قدام حوش ولده وهو متبكي ع عكوزه..وحاط يده اليسار ورا ظهره..ويشوف بنظرات تبان قويه زي ماكانوا ديما..
بس هالمره شابهم شي من الحزن..يشوف لولده..
كيف مشي فتح باب المطحن وخش..
وخشوا بعد تلاته رجاله...
🍃ربيع:شن في!؟
وماحد من اللي حواليه جاوبه..
الزوز..المهدي..وعبد القيوم كانوا يشوفوا في كل شي..
وواحد منهم كان حزين ومتأسف..
والتاني مصدوم ومش مستوعب...
ويطلعوا الرجاله وهما رافعين محتويات المطحن...
ويحطوا فيها في السياره من الخلف..
ويرجعوا يخشوا ويطلعوا غيرههم..وعيون علي تشوف فيهم..
تشوف في نهاية قصه حلوة عريقه عمرها فوق 40 سنه...
ع قد ماكان متألم..ع قد ماكان راضي ومسلم الأمر لله ومقتنع ان لكل شي نهايه زي ماليه بدايه...
طلعوا كل شي من المطحن..واخر من طلع كان لطفي اللي كان باين في وجهه الضيق الشديد...
سكر بواب المطحن وقلبه موجوع كان في لحظتها حاس ان حياته فعلا انتهت كل شي كان عايش بيه ومعاه راح وانتهي...
الأصعب في اللي قاعد يصير..
هو لما جابوا الرجال سلوم"سلم" طويل..
وحطوه في مكان معين قدام المطحن..
بعدين ركبت واحد منهم..وفي جنبه واحد تاني يعطي فيها العده...
خدي اللي يلزمه..وبدي يفك في اليافطه..
هني المهدي حس بنخصة في قلبه...
ويمر قدام عيونه شريط 22سنه فاتت..
يشوف في سدرة...اول يوم وقفت فيه في المطحن وهي تعاون في بوها وخوتها..كان عمرها وقتها 16سنه..
ويمروا قدام عيون مهدي السنين..
وسدرة تكبر وهالمطحن يكبر معاها لين وصل لمواصيل لابوها ولاجدها قبله وصلوها...
انتهي بيه هالشريط لأخر يوم اجتمع فيه بسدره قدام هالمطحن لما شري منها القهوة وهو يباركلها ع خطوبتها من إياد..
رجليه رفعوه غادي..رفعوه لبوها يش يسأله..
كيف قدر يفرط بجنة..جنة سدرة اللي كرستلها سنين من عمرها ...
كلهم كانوا يشوفوله..
كلهم..حتى محمود العامل اللي يخدم عندهم من سنين وكان شاهد ع كل شي مر فيهم وعاشه معاهم...
🍃وقف المهدي ع لطفي وهو يتسائل بتعجب اقرب للصدمه..
شن في عمي لطفي شن يديروا هادم!؟
لطفي وهو يشوف فيهم كيف يفكوا في اليافطه قال..
زي ماتشوف..نزل نظره ليه وقاله بإبتسامه اسف..
الشارع معاش يبي غير مطحن واحد..
المهدي معاش قدر يتكلم..رفع عيونه وشافهم كيف فكوا اول جزء..
🍃زي ماشافاته فردوس وهي جايه ع رجليها..
حتى هي كانت مصدومه ومش مصدقه..
مررت نظرها ع السيارة.واللي فيها بعدين اليافطه..
وحاسه ضلوعها طبقوا ع بعض..
ثبتت نظرها ع بوها..ملامح وجهها برغم الابتسامه المرسومه كانت تقطع القلب..بعدين غيرتهم لجدها..
ملامح القوة الملازمه وجهه ماقدرتش تنتصر ع مسحة الحزن اللي بانت عليه..
كملت طريقها للباب الحوش وهي موجوعه وعندها رغبه شديده في البكاء...
وصلت.في البكاء فتحاته بإيديها اللي يرجفوا وخشت للحوش وسكراته وراها...
🍃ونزلوا اليافطه..
وحطوها ع الباب..
والمهدي عيونه عليها وهو يتفكر في اليوم اللي ركبوها فيه بحضورها...
:خلاص حاج لطفي معاش تبي منا شي..
قدمله لطفي وعطاه حق تعبهم وقال؛-بارك الله فيك..
خدي الراجل الفلوس وقال:فيك بارك الله..السلام عليكم..
ومشوا ركبوا السياره..
بعدين تحركت من قدامه..وعيونه معاها لين درقت..
وين جي بيغيرهم..بنظره عابرة جو ع شخص انصدم لما شافه..
ثبت نظره وهو يشوفله..
🍃وهو كان باين ع وجهه الاستمتاع وهو يتفرج..
حس روحه انتقم من المطحن نفسه..وكأن كان ليه معاه ثار..
غير مختار عيونه عن المطحن لبوه لقاه يشوفله..
نزله نظاراته من ع راسه ولبسهم طول...
كان يبي يخفي نظرة الرهبه..
نظرات بوه كانت تخوف فيه...
لطفي غيرهم عنه لما حس بيده لفت ع ذراعه وصاحبها قال..
علي؛تعالى..
ومشي الابن مع بوه..
وكأنه طفل صغير عمره ماتعداش العشر سنوات ..
كان في اضعف حالاته وقتها وبوه حس بيه وماكانش يبي حد يشوف هالضعف..
خداه ومشي بيه للحوش..وخشوله الزوز والباب تسكر وراهم..
المهدي استاقظ..وصدق اللي صار قدامه كله..
بس قاعد صادمه..لف بش بيمشي وهو يفتح في يده اليسار ويسكر فيها..
وين قص الطريق مكانش مركز فيها..
لما سمع اصوات تعلى وهي تنادي..
"مهدي..السيارة"
وقف في مكانه وشبح يمينه..
صوت فرين السيارة هو اللي خلاه يشوف يمينه..
صاحبه كان واحد من الجيران..
طلع راسه من الروشن وقال؛مهدي لاباس!..
غير عيونه عنه بسرعه..ومشي طول للحوش..
وانظار الكل عليه..لين خش للحوش...
ربيع بأسف؛لاحول ولاقوة الابالله..
محمود بحزن؛والله حتى اني وجعني مطحن عيت الواعر حاس سنين من عمري راحوا معاه..
شبح عبد القيوم لمحمود بعد ماسمعه شن قال..
بعدين غير نظره للمطحن المسكر..واليافطه المحطوطه قدامه..
🍃في القهوة..
مختار:اييه..متوقع مافيش امكانيات.
محي الدين بأسف؛ماليش فيه شي..لكن مش عارف كيف توا حسيت كأنه يخصني..
مختار ابتسم بتهكم بعدين ناض وهو يقول؛خلاص خدينا ارقام لينا لقاءات تانيه..
محي بإيتسامه:ان شاء الله..
مختار:السلام عليكم..
محي: وعليكم السلام..
ومشي طلع من القهوة...
وقف وهو يشوف لربيع قال؛مبارك ياعريس..
شبحله ربيع وابتسم مجامله وهو يقول:الله يبارك فيك..
مختار:اعزمني ع الفاتحه راك تنسى..
ربيع؛اكيد..
رفع مختار يده وحياه ومشي...
وعبد القيوم معاه بعيونه وهو يشوفله بنظرات استنكار...
🍃في هالوقت..
في حوش لطفي الواعر..
خشت فردوس وهي تمشي بخطوات متثاقله..
هي كانت مكسورة من ولدها واللي شافاته قبل لتخش هدها هد..
تسمع فيهم في اصوات هدرزتهم ودموعها ينزلوا..
وصلت في فتحة الصاله...
مررت نظرها عليهم..وهما مازال ماانتبهوش لوجودها..
لين شافتها عمتها وقالت..
"روحتي!؟"
كلهم شبحولها..
لاحظتوا دموعها..
الاء بخوف قالت..ماما خيرك تبكي!؟ اريج وين !؟
فردوس؛روحت بروحي..
كلهم استغربوا وزادوا خافوا..
مطيره بقلق؛شن في يامراة تكلمي!؟
فردوس بألم ودموعها زي السيل قالت:خلاص المطحن تسكر بابه واليافطه نزلوها..
كلهم تفاجئوا ماعدا مطيره اللي كانت عارفه ومابتش تقوللهم..
وهما في حالة عدم تصديق للي سمعوه..
توجهت انظار غرفه وفردوس لطوبى اللي شافوها تشبح في الفراغ وملامح الصدمه باديه ع وجهها..
بس في عيونها اللي كانوا غارقات بالدموع نظرة غضب واضحه...

...يتبع...

#مقاومه
#طوبى

[نتأسف منكم تعبوني الجيوب الانفيه هلبه مع الصقع نكتب ونخلي نكتب ونخلي وهدا وين كملت]