راح عليا اللايف المرة دي كمان في اني افتكر حاجة ملهاش لازمة، معرفش هي ملهاش لازمة فعلا ولا انا بضحك على نفسي و بقول كده علشان ابطل استنى
النهاردة هشوفه، بدأت اجهز نفسي كأني هشوفه لأول مرة و للأسف قلبي فرحان انه هيشوفه بعد كل ده، أكن الروح هترجعله
"بديت القصة تحت الشتي "
رفع سواق التاكسي صوت الراديو على اغنية فيروز اللي بدأت بالجملة دي، و على الكنبة الخلفية كنت قاعدة لابسة قميص باللون النبيتي و بنطلون ب لون التلج زي الليالي التلجية دي و كوفية باللون الكحلي كل ده مختلط بريحة مميزة جدًا لليوم المميز ده.
قطع سرحاني صوت السواق اللي بيقولي اننا وصلنا المكان.
نزلت من التاكسي و نزل معايا المطر اكنه مستنيني انزل، حاولت اسرع اكتر في أكتر علشان احافظ على اللبس اطول فترة ممكنة لحد ما وقفت اول ما شوفت عينه، حسيت ان الزمن وقف و المطر كمان .. فقدت الإحساس بالبرودة و فقدت احساس قطرات المطر على وشي، اكني بشوفه لاول مره في حياتي لكن حسيت بسخونة، مصدرها جسمي و عينه.
كان لابس بنطلون اسود و جاكت من الجينزو بوت اسود، حط ايده في شعره المبلول و وقفنا للحظات، طلّعنا من الشعور ده صوت الرعد اللي خلاني ارتجف فاجأة، و مشينا تحت البيوت لحد ما وصلنا في مكان يحمينا من المطر
بصيتله:
_ اتكلم
بص في عيني :
_ وحشتيني
ملقاش مني رد فا كمل :
_ انا مش عارف اقولك ايه، و عارف إن كل كلمة هقولها مش هيبقى ليها لازمه ولا هتكفي حقك فاللي بتعمليه معايا
_ ده كلام كل مرة
_ عارف انه نفس الكلام، بس المره دي لازم تكون مختلفة أكتر، أنا بحبك يا ريم
_ انت مش بتحبني، انت بتحب اهتمامي و بتحب انك شايف حد بيحبك و فاهمك
_ لا بحبك انتِ، و عايز اتجوزك و قريب، مش هبعد تاني ولا اختفي تاني
_ فعلًا ؟ و انا المفروض افرح و اطير اقول لأهلي انه حن عليا و هيتجوزني ! بطل تبقى اناني
_ انتِ فعلا شيفاني كده ! انتِ اكتر واحده عارفه اني مش كده
_ لا انا غلطانة و هبطل افهمك؛ لأنك أنت مش فاهمني
_ فاهمك و عارف احساسك و مقدره، لكن مش قادر اعرف إيه اللي ممكن يعوضك عن ده
_ لا انت عمرك ما هتحس كل مره انا بحس ب ايه لما اصحى من النوم و الاقيك اختفيت، مش عارف احساس القهر و انا بسأل نفسي انتِ عملتي ايه غلط، مش يمكن انتِ اللي ضايقتيه ؟
مش عارف احساس ان كان بينا وعود و انا بفتكرها و اقول ليه وعدني بيها من الأول مادام مش هينفذها
مش انت اللي بتعيط كل يوم على الايام اللي انت عبرت فيها عن مشاعرك و بتقولي ياريتني ما عبرت
مش انت اللي بتفتكر كل حاجه عملت ذكريات بينا و تقول ياريت!
انت عارف ان رغم احساسي بكل ده بقولك لا اكيد هو مش قاسي للدرجة دي ؟ اكيد كل اللي بينا مش كدب . . لحد دلوقتي بديلك مبررات !
فا لا يا علي، عمرك ما تحس باللي انا فيه ولا تفهمه لاني عمري ما خليتك تجربه ولا قلبي هيقدر يخليك تحس وجعه
_ انا اسف بجد، بجد انا مش عارف اقول ايه، مكنش قصدي تحسي بكل ده
_ فعلًا ؟ لا يا عم و لايهمك، باي
_ باي ؟
_ اه مش كلامك خلص، هروح بقى
_ استني يا ريم، أنا مش عارف اقول ايه بس عايزك تستني
_ مع السلامة يا علي
