روحت بسرعة و المره دي عملت شاي بالنعناع و قعدت استنى اللايف بحماس اكتر، علشان اشوف الولد ده عمل ايه في موضوعه و بدأ اللايف بأغنية " وعدتك "
و عمرو بيقول : و عدتك اني ابقالك و اقدم عمري من قلبي و روحي تملي ويالك و بطمن علشان جنبي،
كفاية تكون في احضاني
_ مساء الخير يا شباب، بمناسبة ان اللايف بدأ بأغنية وعدتك فا اسمحولي اصيح على اللي أنا هببته
واحده ردت عليه : عملت ايه فيها تاني
رد : لا مفيش انا وعدتها اني ابقالها فعلا زي ما عموره قال بس انا اختفيت
حد رد عليه : اختفيت ! الحركات دي مش كبرنا عليها
رد : اقسم بالله ما عارف انا بعمل كده ليه
واحد رد عليه : مش مبرر بجد، لو مش قد العلاقات متدخلهاش
رد : انا هروح اقابلها بكره، مش عارف هي ازاي لسه باقيه عليا حقيقي و مش عارف هقولها ايه حتى
حد قاله : اعتذرلها و مع الاعتذار اثبتلها انك مش هتعمل كده تاني
المره دي انا رديت : يعتذر ! على أساس إنه اكيد معتذرش قبل كده الف مره ! الاعتذار مش هيبقى ليه اي طعم لانه فقد معناه و مبقاش ليه قيمة
رد عليا : طب شايفه اعمل ايه ؟
رديت : شايفه إننا نسمع عمرو في هدوء احسن
" _ هو انت ممكن تكون شايف إن اهتمامي بيك دلقه؟
_ ايه! ايه الهبل ده اكيد لا، ليه بتفكري كده !
_ علشان انت مبتدنيش الأجابة، انا بضطر على الأجابة لوحدي و دماغي بتسألني
_ انا اسف يا ريم، متزعليش مني
_ مش زعلانة
_ لا زعلانة و حقك تزعلي و تضايقي كمان و انا فعلا مش عارف مالي، أنا عايز اتعالج
_ انت كويس يا علي
_ لا انا مش كويس، انا مش عارف انا بعمل معاكي كده ليه
انتِ لو واحده تانيه و بني آدم طبيعي تاني، مكنتيش هتستحملي ده، أنا مبقتش عارف استوعب انتِ ازاي بتعملي كده، كل حاجه منك بتبقى غريبة، اللي هو متثقش في حد بسرعه .. انتِ الوحيدة اللي اثق فيها، متحكيش لحد حاجه .. انتِ الوحيدة اللي احكيلها كل حاجه، انتِ بتعملي حاجات و المفروض انا اعمل رد فعل معين و مش بعمله فا زيك زي اي حد طبيعي يعملي بلوك، مش هيكلمني تاني، هيقولي انت هتذلني زي الناس العادية إنما أنتِ مبتعمليش كده، فاهمة ؟
_ فاهمة
_ بس عمرك ما قليتي عندي والله
_ بس انت بتحسسني كده للحظات
_ مهو ده لازم، باللي انا بعمله ده لازم تفكري كده
_ انا بفكر نفسي بالوعد اللي وعدتهولك فالأول، اني مش هسيبك
_ انتِ فعلا فيكي الحته دي عني ياما، و بتلتزمي بوعودك عني
_ بس ده مش هينفع ! هتعمل كده كل مره و ترجع تختفي و تعتذر و هكذا ! مش هتعرف توعدني صح
_ اوعدك ب ايه
_ توعدني ان الايام الجايه مش هيحصل فيها نفس اللي حصل المره اللي فاتت
_ ان شاءالله بإذن الله "
