" بعترف اني هويتك و انت اللي مليت عينيا، ظلمت روحي و حبيتك و كنت الدنيا ديا "
كان اول كوبلية اسمعه من لايف بيتعمل كل يوم بليل على بيدج ل"عمرو دياب"
اكتشفته بالصدفة لكن بقيت استناه ، لانه بيونسني بليل في نفس المعاد اللي كنا متعودين نتكلم فيه بليل و كان حقيقي كل الدنيا ديا على رأي عمرو، بس انا فعلا ظلمت روحي و حبيته ؟
انا مش ندمانة على اي حاجه عملتها معاه لاني عملتها و انا مش مستنية مقابل، بس اكيد كنت عايزه تقدير
مكنتش طالبة اي حاجه غير انه ميكنش قاسي عليا بالشكل ده
هونت عليه ؟ هان عليه قلبي !
_ قاعدة ليه ؟
_ عادي يا هدير، سرحت شوية بس
_ مجاش ؟
_ هو مين ؟
_ استعبطي استعبطي، اقصد علي
_ و مش هيجي، و مش مستنياه
_ يالهوي على الكدب يا ريم، بعرفك من مناخيرك لما تكدبي أو تزعلي مناخيرك بتكبر
_ هونت عليه يا هدير ! كل ده غياب ! هو ليه اختفى ؟ يعني انا دلوقتي مطلوب مني اني مفكرش و في نفس الوقت اجاوب على كل الأسئلة اللي في دماغي لانه مش موجود يجاوب عنها
ليه سايبني لوحدي مع دماغي
_ معلش اعذري غيابه
_ اعذر غيابه ! ده على اساس ان دي اول مره فا المفروض اعذره علشان أول مره يعملها
انا بطلت اعد دي المره الكام اصلا، و كل مره يرجع يقول معلش اصلي مشغول، معلش اصلي مضايق، معلش اصل مش عارف مش برد ليه، كل مره بيمشي و يسيب قلبي وراه و كل مره انا بعذر
و كل مره هو يوعد و يخلف واعده
اسئليني بقى بحبه ولا لا، يلا اسئليني
_ براحه بس يا ريم، طيب بتحبيه ؟
بصتلها و نزلت دمعة من عيني:
_ بتزفت بحبه و بتزفت مستنياه
خدتني في حضنها و انا فعلًا كنت مستنيه الحضن ده، بكرهه اشوفني ضعيفة و انا مش ضعيفة انا بجد عديت بحاجات أصعب من كده بكتير و دي مشكلة تافهه بالنسبة ليا، بس الحب بيخلي الشخص ضعيف اوي كده!
...........
