South Boys #4: Troublemaker

Chapter 12

"Uy, 'wag naman ngayon." Nagbago ang timbre ng boses ni Dessy. "'Di pa nagpapadala mama namin e. Saka kulang din ang padala sa susunod dahil may mga order ako sa online na kailangan bayaran."

Tumingin sa akin si Hugo bago lumabas ng pinto. Kakausapin yata nang masinsinan si Dessy. Nang makalabas na ang lalaki ay bumangon ako sa kama.

Habang naghihintay ay nag-sign in muna ako sa WiFi nina Dessy. Tiningnan ko kung may message sa akin sina Mommy o si Kuya Jordan. Ang kuya ko lang ang may pm sa akin.

Kuya Jordan:
Jill, nagmeryenda ka na? Do you like donuts?

Siguro pauwi na si Kuya Jordan sa bahay ngayon. Ang akala niya siguro ay kasama ako nina Mommy dahil hindi ko siya hinintay kanina.

Dahil wala pa si Hugo ay nag-scroll muna ako sa newsfeed. Nahagip ng paningin ko ang sponsored post ng Pancake House na pino-promote ang paborito kong Golden Fried Pan Chicken. Bumalik sa alaala ko ang pagpunta ni Harry sa amin.

Dahil in-unfollow ko na ang lalaki nang nakaraan ay sinadya ko pa ang mismong wall niya. Ganoon pa rin naman ang status niya. Wala ring pinagbago ang profile at cover photo.

Maski ang bio ni Harry ay wala namang kakaiba. Kung ganoon ay hindi niya pa girlfriend ang pinaguusapan nila ni Kuya Jordan na babae nang nakaraan.

Hindi pa nga siguro niya girlfriend. But what exactly was I hoping for?

Nag-scroll down ang daliri ko sa timeline at natigilan nang makita ang isang tagged photo. Ang photo ay selfie ng isang babae na naka-uniform ng pang La Salle. Maganda, mukhang matalino, parang mabait. Kumabog ang dibdib ko sa kaba.

Ang kaba ko ay nauwi sa masamang pakiramdam nang makilala kung saang lugar kinuha ang selfie ng babae, sa passenger seat ng sasakyan ni Tito Harold na ginagamit ni Harry!

Ang caption: You make my heart smile *heart emoticon*

Nanginig ang mga daliri ko. Nag scroll up ako sa account ni Harry at namalayan na lang na tina-tap na ang 'unfriend button'.

Sa pagkahulog sa pagtitig sa screen ng phone ay hindi ko napansin na bumalik na sa kuwarto si Hugo. Naramdaman ko na lang na tumabi siya sa akin sa pagkakaupo sa kama. Nararamdaman ko rin ang mga tingin niya na may pagtataka.

Umusod siya at biglang bumulong sa tainga ko. "Herrera..."

Nangilabot ako sa init at bango ng hininga niya sa balat ko. Gigil na sinabunutan ko siya. "Ahg! Can you please not whisper in my ear like that?!"

Nawala na ang atensyon ko sa pag-iisip tungkol kay Harry dahil sa ka-abnormalan niya.

"Ang suplada mo ngayon, ah." Hinimas-himas niya ang buhok na nagulo dahil sa pananabunot ko.