طوبى "جنة طوبى"

الجزء التاسع والخمسين القسم الأخير

 #طوبى "جنة طوبى"
#جمان_فريد
#الجزء_التاسع_والخمسين"اسرار 5"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
مقعمزين هي وامها في وسط الحوش..
فردوس كانت رابطه راسها وحطاته ع مسند المندار اللي مقعمزة عليه..تشبح في الفراغ..ودموعها ينزلوا..
وحداها اريج..
حاطه يدها ع خدها تجري عليها الدموع..وسرحانه ورجلها تهز بعصبيه..
فجأة رن تليفونها اللي كان محطوط ع الطاوله جنب شنطتها..
وهي ولا كأنها تسمع فيه..
امها شافتلها بعدين شبحت للتليفون..
شويه وناضت بشي من الصعوبه ومشت شافت المتصل..
شبحت لأريج وقالت:نضال يتصل..
غمضت عيونها بشده وقالت؛يااربي..جايبلي السيارة..
فردوس استغربت في الاول بعدين تفكرت ان نضال اللي روح بيها..
فتحت اريج عيونها وقالت بضيق:بالله عليك يام اطلعيله بالله عليك كان شافني هكي والله ماهو مسيبني لين يعرف خيرني..
هزت فردوس راسها وقالت؛باهي..تو نقوله راقده..
ومشت طول للحمام غسلت وجهها..بعدين مسحاته بالفوطه..
فكت الوشاح اللي ع راسها ولبساته..
بعدين مشت طلعتله وهي تسمع في تليفون اريج يرن..
🍃هو كان واقف ع السيارة ويتصل بيها..
وسلفها واقف فوق السطوح يشوف فيه..
هو نزل تليفونه لما شاف فردوس جاياته..
قدملها ومد يده وهو يقول؛شن حالك عمتي؟
صافحاته وقالت؛الحمد لله ولدي..شن حالك انت وشن حال العيله..
نضال:الحمد لله.
هي قالت بإبتسامه؛الحمد لله ع سلامتك حقه.
هو ابتسم وقال:الله يسلمك عمتي..اريج وين؟
هي بإبتسامه جاوبت؛روحت تاعبه رقدت طول..
هو قال:تمام...مدلها المفتاح وقال..هادي السيارة وجبتها ماتبوا شي..
خدت منه المفتاح وقالت؛سلامتك بس ولدي..تفضل خش تغدا معانا..
نضال بإبتسامه؛مرة تانيه عمتي..المهم ماتبوا شي ماناقصكم شي قولي عمتي كان تبي حاجه نسيبك اني معناها ولدك..
ابتسمت وقالت؛ولدي مالاشنو ومانبي كان سلامتك توا بس..
هو بإبتسامه قال؛ربي يحفظك ويطول في عمرك..معتز في المدرسه؟
هي قالت؛ايه..
هو قال؛تمام..السلام عليكم..
فردوس:سلم ع العيله..في امان الله وليدي..
نضال؛يوصل..ولف ومشي طلع برا السانيه..
وابتسامه فردوس تبدلت لملامح الكدر ومشت خشت لحوشها...
🍃وهو طالع..
من جهة حوش العيله جي طالع سلفها بيلحق ع نضال..
بس في من شده في أخر لحظه..
التفت وقال؛حاج!
بوه قاله بحده؛شن جيت ماشي بدير!؟
هو بعصبيه مكتومه:عارف..
:تعرف قسما بالله لو نسمع بيك كلمت واحد فيهم انت ولاخوتك قسما بالله نتبرا منكم بنت خوك غلطت غلطها داب العيله فوسطنا مايطلعش برا انت تبي تشهدر بيها!؟
:شن تشوف فيا يابوي معقوله نشهدر ببنت خوي!
:ايه لما تشد نساباتك وتقوللهم عرسوا بسرعه شن بيفهموها!
هو تنهد بغضب وقال؛باهي شن الحل لو سكتنا ع اللي داراته الفرحه الاء تتمادى يابوي..
:آلاء خليها عليا اني اطلعوا منها كلكم والزفت اللي اسمه ولدي اتصل بيه قوله جدك يبيك يسيب اللي في يده ويجيني ..
هو بعدم رضا قال؛حاضر..
؛خش داخل..
خش ولده وهو معصب ومش عاجبه تعامل بوه مع المشكله..
وبوه خش بعده وسكر الباب..
☘☘☘☘
طلعت من الحمام وهي تمسح في وجهها بالفوطه..
كانت داخل ترجع قريب طلعت احشائها من قوة الترجيع..
بعدين حطت الفوطه ع السرير..
ومشت للدولاب بطلع لبسه تانيه..
اغلب لبسها يجي عليها ضيق توا لأن وزنها زاد..
طوبى بضيق:استغفر الله العظيم..
وقعدت دور في لبسها لين لقت قفطان منظره حلو مالبستاش قبل لأنه كان يجي عليها واسع...
طلعاته...
وبدلت حوايجها..بعدين مشطت شعرها ورفعاته فوق..وحطت زينه...
وقبل ماتطلع من الجناح خدت نفس عميق..وطلعاته..
فتحت الباب ومشت طلعت وسكرت الباب وراها..
ع طلعة دنيا من دار عمر اللي كان تعدل فيها  فمكياجها..
وين شافت طوبى ابتسمت..
وطوبى بادتلها الابتسامه مجامله ومشت بتنزل..
بس دنيا وقفتها لما قالت؛معليشي طوبى نبيك شويه..
شبحتلها وهي تقول؛تفضلي..
بدي ع وجه دنيا الارتباك والتوتر برغم الابتسامه المرسومه عليه وهي تقوللها؛بنسألك سؤال وبالله جاوبيني عليه بصراحه..
طوبى وهي مستغربه؛شن هو؟
دنيا ودموعها في عيونها؛عمر طلق مرته برضاه ولاغصب عنه؟
السؤال خلا طوبى تفكر هلبه قبل لتجاوب عليه بعدين قالت؛معليشي مافهمتش..
خدت نفس وقالت؛حسيته قاعد يبي اميمه وماتسألنيش كيف حسيت بالله عليك..
وقعدت تقاوم في دموعها ماتبيهمش ينزلوا..
وطوبى طول فهمت وعرفت شن عاشت دنيا من أول ليله ليها مع عمر..
وجعها قلبها عليها ماعرفتش شن تقوللها وفي النهايه قررت تنصحها نصيحه مش عارفه اذا كانت حتنفعها او لا؛اسمعي دنيا الحب مش كل شي تمام..والبنادم مايحبش في حياته مرة وحده بس..عمر واميمه ماكانوش مرتاحين مع بعض هدا علاش انفصلوا..صدقيني عمر لو ارتاح حيحبك وينساها وكويس انك عارفه عنه كل شي وهدا يسهل عليك هلبه..حاولي تخليه يحبك وردي بالك تجيبله سيرة اميمه ولاتلمحي عنها ولاتقارني روحك بيها مهما تشوفي من عمر تحملي البدايه حتكون صعبه وفي صالحك انكم حتعيشوا برا البلاد يسهل عليك هلبه راهو..
دنيا بأمل؛يعني مش صعب ينساها ويبدا معاي حياة تانيه ولا؟
طوبى وهي تشوفلها بإبتسامه فيها مسحة شفقه؛لامش صعب بكل..
هزت دنيا  راسها وقالت؛ان شاء الله خير..
طوبى:ان شاء الله..ربي يهدي سرك..
دنيا؛ويفرحك بنوضة اختك يارب..
لمعوا عيون طوبى بالدموع وهي تقول؛ان شاء الله..
ابتسمت وهي تمسح في دموعها وتسأل في طوبى؛تلبز مكياجي؟
قدمتله وقالت؛هاتي الكلينكس شويه..
عطتهولها..خداته طوبى وقعدت تمسحلها في اللي خرب..بعدين بعدت عنها وهي تشوفلها كويس وقالت؛توا تمام..هي تعالي ننزلوا..
دنيا ؛هيا..ومشوا نزلوا مع بعض وهي تقول؛صحيتي طوبى..
طوبى بإبتسامه؛سلمك..
وصلوا لوطا..
طوبى؛بري للصاله اني نلوح الكنينكس ولحقاتك..
دنيا؛تمام..ومشت طول للصاله..
اما طوبى ساوت وشاحها كويس ومشت خشت للكوجينه..
لوحت الكلينكس..ومشت طول للثلاجه بش تاخد منها عوينه جت في خاطرها وماقدرتش تاخدها..
طلعتها من الثلاجه...وسكرتها...
ع خشة عمر للكوجينه..
لما شافاته انفجعت..
وهو اتفاجئ..
نزلت العوينه وهي تشوفله بنظرات باين فيهم الفزع..
هو قال؛اسف نحسابها فاضيه..
هي قالت بصوت فيه بحه:عادي..تنحنحت وقالت..مش مشكله..
حط يده ع الكرسي وقال؛اكيد ناقمه عليا ولا؟
عقدت حواجبها بإستغراب وقالت؛ننقم عليك! علاش!؟
عمر:واضح علاش ياطوبى ماتحاوليش تلقي ودوري..اكيد في بالك اني تزوجت بسرعه نكايه في بنت عمك..
ضحكت بخفه بعدين قالت؛كان اميمه مافكرتش فيها هكي اني بنفكر هكي!..
تبدلت ملامح واجهه اللي كانت كلها كبر للحده وهو يسمع فيها تقول..نصيبات..هي هكي تقول..وامس كانت هادي كلمتها ع فكره..ومافي حد ناقم عليك صدقني..
هو بوقاحه قال:طبعا هدا اللي تبيه من البدايه خلتلها الساحه توا دير ماتبي..
طوبى بحده؛عمر معليشي..ماتتجاوزش حدودك بش مانديرش زيك...
هو بإبتسامه متهكمه قال؛ع العموم الطيور ع اشكالها تقع وفي الاخير ربي عوضني باللي تناسبني وتليق بإسمي واسم العيله..
ابتسمت طوبى بأسف وقالت؛ربي يهنيكم...ومشت طلعت من حداه وخلاته وهي تغلي من الغضب اللي قعدت تكبت فيه غصب عنها بش ماتغلطش..
وين وصلت في باب الصاله تفكرت العوينه..
شافتلها..بعدين شبحت للدروج..ومشت طول خشت تحته وبدت تاكل في العوينه وفي تقول بهمس؛هاني كليتها ارتحت توا ماما!..ضحكت وكملت تقول..من قبل ماتجي مبهدلني..
كلتها كلها..بعدين مشت للحمام الموجود اخر الممر..
لوحت قلب العوينه من الروشن وغسلت ايديها..
ومسحتهم بالفوطه ومشت طلعت للصاله..
خشتلها..
🍃وعمر قاعد في الكوجينه مقعمز..
مع حسرته وندمه وقهرته ع اميمه اللي مش قادر يشوف ولايحب ولايميل لغيرها...
☘☘☘☘
وفي حوش جيرانهم..
في الصاله مقعمزين..
الام وبناتها..ومعاهم ولدهم..
البنات كانوا منسجمات مع البرنامج اللي فالتلفزيون..
وخوهم سرحان في عالم تاني..
وامهم تشبحلهم وتفكر بعدين قالت..
نجمه؛غدوة بترفعيني انتي للمركز يانجاح..
شبحولها الزوز وعواطف قالت؛ايه ارفعيها انتي بالله عليك..
نجاح وهي تشوف لأمها بتفكير قالت؛حاسه العلاج في المركز هدا مادارش نتيجه كان نغيره خير يام ولا؟
عواطف؛المركز هدا احسن مركز في طرابلس..
نجمه؛ايه وحتى اني عاجبني ومانبيش نغيره وبالعكس مدايرلي نتيجه اني اللي نحس مش انتي..
نجاح شافلتها شويه بعدين شافت للتلفزيون وقالت؛حاضر يام..حاضر..
شبحتلها عواطف بآستغراب بس ماددقتش هلبه وولت تتفرج ع التلفزيون..
وامها بعد ماكانت تشوفلها شافت لأشرف اللي مقعمز حداهم جثه بس وقالتله؛وانت امتى تنوى ان شاء الله!
ماردش عليها لأنه ماسمعهاش..
نجمه؛اشرف..نكلم فيك..
خواته شبحوله..
شافوه كيف سرحان ونظرة عيونه كانت غريبه..
علت نجمه صوتها وقالت؛اشرف!
استاقظت وشبحله وهو يعقد في حواجبه..
نجمه؛من بكري نكلم فيك طرشت ولاشني؟
حرك راسه بالنفي وقال؛لا غير كنت نفكر شويه..
نجمه؛ان شاء الله تفكر تخطب بس!
شبحلها بتعجب وخواته يشوفلها..
نجمه؛عمر ولد مغليه تزوج مرتين وهو اصغر منك وانت حتى الخطوبه مش خاطب..
ضحك وقال؛شن تبيني ناخد ونطلق! اني نبي نختار صح ياك نختار وحده تقعد معاي العمر كله..
نجمه؛باهي امتى تختارها هادي ان شاء الله!..
ابتسم وقال؛اصبري شويه بس..
نجاح بإبتسامه شقاوة؛شكله في وحيده..
نجمه؛زعمه!..
هو ساوا تقعميزته وقال؛خلاص غيروا الموضوع..
وشبح للتلفزيون..
امه قعدت تشبحله وهي مضيقه عيونها وتفكر..
ونجاح بعد ماكانت تشوفله بإبتسامه غيرت عيونها للتلفزيون..
عكس عواطف اللي كانت تشوفله بغيره وهي تقول في نفسها..
"اكيد وحده من جماعة الالفينات.."
تنفست بعصبيه وشافت للتلفزيون..
☘☘☘☘☘
بعد العصر..
كانوا كلهم يودعوا في عمر ومرته دنيا اللي بيسافروا بعد ساعتين وتوا بيتوجهوا للمطار..
الوداع كان مؤثر بين الأم وبنتها..
أثر في طوبى لدرجة انها قعدت تبكي معاهم...
☘اي شي يخص الأم يوجع فيها وجع كبير☘
وبعد السلام..
طلعت مع عمر ومن ملامح وجهها كانوا باينين الخوف والقلق..
ومافي حد لاحظ هالشي قد طوبى اللي عارفه خيرها..
🍃برا..
خشت اميمه بسيارتها للشارع...
درست قدام حوش جدها..
في الوقت اللي طلعوا فيه عمر ودنيا...
نزلت اميمه من السياره وعيونها جو عليهم..
عمر لما شافها غير عيونه عنها وقرب لمرته ووشوشلها في وذنها..
ضحكت وهو ضحك معاها..
اميمه كالعاده تصنعت التجاهل ومشت خشت للحوش..
اما هو بعد خشت..فات مرته ومشي ركب السيارة..
وهي مشت ركبت السياره...
الجالي:توصلوا بالسلامه...
نضال؛كان خليتني نمشي معاكم..
عمر وهو يشبح القدام؛مش لازم..هي سلام...
وشغل السيارة وتحرك بيها طول..
وهما رفعوا ايديهم وحيوه..
وقعدوا بعيونهم مع السيارة لين درقت عنهم..
نضال بضيق؛مش مرتاح..
الجالي؛تو يرتاح..
ومشي خش داخل..
تنهد نضال بضيق ومشي للقهوة..
☘وفي...شقة المهدي...
كان محمد مقعمز ع الصالون في النص بين يزن وسدره..
وهو شاد تليفونه يشوفله وهما معاه..
محمد؛ماقالش عمي نضال بتمشوا لألمانيا..
رد بوه وهو يقول..
"درتها مفاجأة لأمك"
يزن ؛ديرلنا مفاجأة حتى حني بوي..
ضحكت امه وقالت..
"في الصيف ان شاء الله"
سدرة؛نبوا المالديف بابا..
محمد؛بالله!
كلهم قعدوا يضحكوا..
وبوها قال..
"انتي جيبي الترتيب الاول ونرفعك للأحلى من المالديف"
سدرة؛وعد راهو..
"امتى عطيت كلمة ووليت فيها يابنت!"
سدرة؛مش قصدي بابا خيرك.!
امها وهي تقلد فيها..
"خيرك مش قصدها بنتي!"
ضحكت سدرة..
ومحمد وهو مبتسم قال؛هيجوا وعيشوا جوكم لكن ماطولوش علينا فاقدك في المباريات بوي..وفاقدك في كل شي يام..
المهدي وعائشه سكتوا للحظات بعدين هي قالت..
"تبي تبكيني ياولد"
ضحك وقال:نبيكم تروحوا بسرعه..
رد بوه وهو يقول..
"ان شاء الله قريب..رد بالك من خوتك وانتم ردوا بالكم من قرايتكم وماتعبوش عمامكم وحناكم"
محمد هز راسه بإيجاب..
ويزن وسدرة قالوا:حاضر..
"مع السلامه...مع السلامه ماما"
هما الثلاته بأصوات متقطعه قالوا؛مع السلامه..
🍃سكر المهدي مكالمة الفيديو وشبح لعائشه وقال؛تبكي!..
رفعت خمارها وقعدت تاخد في نفس ودموعها تنزل قالت؛نبي نروح مهدي..
المهدي؛وين؟
هي قالت؛قصدي للفندق..حاسه روحي تعبانه مش قادره نمشي..
هو هز راسه وقال بضيق؛حاضر..
حاوطها وقعد يمشي بيها للطريق..
وهي نزلت خمارها...
وقف تاكسي ...ركبها بعدين ركب هو..
وتحرك بيهم لوجهتهم بعد دله المهدي عليها..
☘☘☘☘☘
في كوجينة حوش شنيبه..
كانوا مقعمزات حوالين طاوله الاكل..
خديجه ونسرين وطوبى..ونجاة ومعاها ولدها معاذ...
وفي نصهم طاجين المبروشه واخدين كم طرف وياكلوا..
خديجه بتلذذ؛امم..فضيعه ياطوبى... تعرفي..بلعاني دسيتها بش ناكلوها برواحنا..
ضحكوا..
ونجاة توكل في ولدها منها وتسمع في دوة خديجه وملامح الازدراء باينه في وجهها..
"نسرين"
طوبى وهي تاكل من المبروشه وع وجهها ابتسامه لما سمعت صوت الجالي ينادي في نسرين قالت؛تعالى خش..
ونجاة تشوفلها..
هو خش وقال؛روحوا كلهم..
ومشي قعمز في الكرسي اللي جنب  طوبى..
شاف للمبروشه وقال بضحكه:والله واني في الخدمه نفكر فيها قلت اكيد ماقعد فيها شي..
خديجه؛لاعاد دارتها ع خاطرك..
طوبى بإبتسامه تعجب؛اني قلت دايرتها ع خاطره!؟
رفع حاجبه اليسار وهو يشوفلها..
نسرين بضحكه؛مالا ع خاطر منو ياحنه.
طوبى :ع خاطره..
ماعدا نجاه...كلهم ضحكوا..
وهي ابتسمت ورجعت تاكل منها..
وهو جبد الباقي وقال:معناها هدا كله ليا اني بس..نوضي طوبى ديريلي مق قهوة..
هي قالت؛اهو البكرج..
خديجه؛ليك كله ماشرب منه حد غيري..
نجاة؛غريبه طوبى قبل عيونك القهوة..
خديجه قعدت تشبح لنجاه..
والجالي ونسرين شافوا لطوبى..
طوبى:ايه صح ولاني نشرب فيها هلبه دارتلي مشكله في العده وسرعة في دقات القلب سيبتها..
الجالي غير عيونه عنها وخدي البكري ومق ع الطاوله وصب فيه قهوة وهو يقول؛نتمناك معاش توليله بكل ياريت نقدر نقطعها حتى اني..
شبحتله بإبتسامه؛ابدا معاي..سايرني وتو تتعود ع قلتها بعدين تسيبها..
شبحلها بنظرات حب وقال؛ع خاطرك نسيبوا الدنيا كلها ياحلو..
ابتسمت طوبى بخجل واحراج شديد ونزلت عيونها لوطا...
خديجه ؛تي مش قدامنا عاد!..
نسرين؛لاخليهم نبي نتفرج..
حدفها الجالي بفوطه حداه..
وهما يضحكوا..
وطبعا ماعدا نجاه اللي كانت حاسه بنار تاكل في كل جزء فيها..
لكن كانت تحاول بكل جهدها ماتبين شي..
ودارت روحها لاهيه بولدها اللي توكل فيه..
نسرين؛ولد خالي غير مكان الخدمه متاعه..
الجالي وهو ياكل؛امم..سيف غيرها..اني خشيتله في موضوعه..
خديجه:اها..بعدين شبحت لنسرين وقالت...انتي ركزتي بنت خالتي ردينه متغير وضعها هلبه..
نسرين؛ايه..
طوبى؛في سؤال في بالي من فترة..عمتي عندها خوت مش اشقاء ولا؟!
خديجه؛- ايه جدي واخد زوز نساوين..ودار صغار من الزوز واللي شفتيهم اليوم كلهم صغار النساوين الزوز حناي وضرتها..
طوبى:عمتي اكبرهم..
خديجه؛ايه امي الكبيره وبعد ماتوفوا جدي وحناي هي ولت كبيرة العيله..
طوبى:ضرتها قاعده حيه؟
نسرين؛توفت قبل حناي..حناي وضرتها كانوا متفاهمات هلبه تقول خوات الزوز ربوا صغارهم مع بعض..
بضحكه الجالي قال؛مسيطر جدي كان..
شبحتله خديجه ع جنب وقالت؛هلبه..
نجاه ابتسمت برفعة حاجب وقالت؛سموك عليه ولا؟
غير خديجه عيونها لنجاه..
ونسرين شافت للجالي..
الجالي ابتسم بتصنع بعدين بلع ريقه وقال؛ايه..سمتني امي ع بوها وبوي سمى المهدي ع بوه...
هزت راسها بعدين شافت لولدها وقالت؛خلاص ماما معاش تبي..
معاذ:ايه.
هي فكرت للحظات بسيطه وهي تشوف لولدها بعدين قالت:باهي..
وناضت من مكانها وهي تقول؛هي نغسلوا فمنا..
ورفعاته من ع الكرسي..
الجالي لما شافها تلقائيا حط الكاشيك وقال بشي من الهلع؛لالالا..
نسرين وخديجه شبحوله بصدمه..
وهو ناض ومشي خدي منها العيل ..
لما خداه استاقظ لروحه شن دار وحاول يرقع الموقف لما قال؛رفعتيه غلط قريب طاح منك ع راسه..
وخداه هو ومشي يغسله في وجهه..
هي قالت؛ماركزتش..
وولت قعمزت وشافت لطوبى..
اللي شبحولها نسرين وخديجه..
لقوها..واحده المبروشه وتقص منها وكأنه الموقف ماصارش قدامها بكل...
هو رد الولد لأمه وقال؛قريب درتيلنا رعشه على هالمغاريب..
خداته وهي مبتسمه ابتسامه خفيفه..
وخديجه تشوفلها بإمتعاض..
وهو قعمز جنب طوبى وخدي مق القهوة وشرب منه ورجع ياكل وكأنه ماصار شي..
لكن من داخل فرائسه كانت ترتعد..
خديجه غيرت عيونها ليه هو وشبحتله بنفس النظره بعدين قالت؛بتتعشوا هني؟!
الزوز مع بعض شبحولها وقالوا:لا..
نجاه تشوفلهم..
الجالي شبح لطوبى وقال:بنعشي مرتي برا قداش لينا ماطلعناش مع بعض..
شبحتله طوبى وابتسمت وهي تقول؛في بالي تقول مقعمز في قلبي..
الجالي بابتسامه مع غمزة؛مالا وين مقعمز غير في قلبك..
نسرين خبطت كفوفها ببعض وقالت:لالالا نوضوا روحوا مع بعض توا توا..
ضحكوا الزوز..
نجاة معاش قدرت تتحمل..
نزلت ولدها ومشت طلعت بيه من الكوجينه..
وعيون خديجه تلحق فيها...
☘☘☘☘☘
"ياحنة جايبتلها موضوع"
غرفه وفي يدها طاسة عصير فواكه؛موضوع شني!..
مطيره؛-عريس ياحنه موضوع عريس..
غرفه بحماس:قول والله!
مطيره؛والله العظيم..
غرفه:مامستعجل خالي!.
ع خشة نبيله وهي تقول؛آنستينا مطيره..
ومدتلها الضيافه..
مطيره؛لالا قهوة لا كيف شاربه..خل ناخد هالكعيكه المعسله..
وخدتها بطرف كلينكس..
حطت نبيله السفرة ع الطاوله بعدين قعمزت وهي تقول؛طوبى روحت؟.
مطيرة؛في حوش شيابينها اليوم بالك توا روحت..
نبيله؛امم..
وغرفه تمرر في نظرها عليهم وتراجي عمتها امتى تفتح الموضوع مع نبيله..
مطيره كلت من الكعك بعدين قالت؛امم..بلبله جايبتلك عريس..
قلب نبيله فر..وعيونها توسعوا ع الاخر وهي تقول؛عريس؟
مطيرة؛ايه ياحنه..عريس لئطه ع قولت المصاروة..تاجر وفلوس ياحنه لكن متزوج وعنده قبيله صغار واحفاد.
تعجبت غرفه..
ونبيله ضحكت بإستغراب وقالت:تبصري صح!..
مطيرة؛لا ورب الجلاله الا نحكي من جدي..
غرفه زادت تعجبت..
ونبيله قالت،قصدك من معرفتك بيا في بالك بنوافق..
مطيره:وباصمة بالعشره انك حترفضي اني جيت وقتلك بش نضحكوا ونغيروا جو..
غرفه؛معاش فهمت شي عمتي انتي تحكي جد ولاتبصري!؟
مطيره:تي والله ندوي جديات..محمد شنيبه يبي يخطب نبيله..
غرفه شهقت بصدمه..
ونبيله قالت بإمتعاض؛خايب عايب..
ضيقت عيونها وقالت؛-ماانصدمتيش!..فاتح معاك الموضوع قبل!
نبيله:لا بس جاني مرة المكتب تلميحاته ونظراته فهمتهم..
مطيره؛عطيه رزيه وكان تندري عليه مغليه..
غرفه؛تحطه ع القرمه وتذبحه ضحيه..
قعدت تضحك نبيله وهي تقول:يعطيهالكم..
مطيره:مش قتلك نضحكوا نغيروا جو!
غرفه؛نكته الموسم..
ونبيله تسمع فيهم وتشوف فيهم كيف يتكلموا وهي تضحك...
☘☘☘☘☘
واميمه طلعت من دارها بعد ماوقفت بكي..
خدت نفس عميق وطلعاته ومشت لدار بوها بتشوفه..
وين وصلت فيها...طلت عليه لقاته راقد..
بعدين مشت لدار جدها..
وصلت فيها ووقفت قدامها..
قعدت تشوف فيه كيف فاتح صندوق كبير قديم عنده ومطلع منه حوايج نسائيه ويعطر فيها...
وفي جنبه ع السرير كاترو صورة..
دمعوا عيونه وهي تشوفله...
كان خاطرها تعرف من جدها قصة حبه هو وحناها..
هالحب اللي خلاه وفي لذكراها عقود من الزمن..
ومحتفط بلبسها وحاجتها وراد باله منهم زي عيونه..
"خشي بنتي خشي"
اميمه:اسفه جدي..
علي وهي يحط في الدبش المطبق ع بعضه؛قتلك خشي..
خشت اميمه وين وصلت في السرير شافت صورة حناها..
قالت بإبتسامه؛قداش كانت جميله زي الممثلات المصريات ايام الابيض والاسود..
هو قال؛حناك كانت هانم..بنت مدينه قاريه في السكولات الطليانيه وماليها من اعيان طرابلس..
قعمزت اميمه ع السرير وقالت؛عادي نسألك كيف عرفتوا بعض؟
تنهد وقال؛جدك كان يخدم في المحطه متاع القطار هديكا الايام..الوحيد من عيلتي اللي جيت لطرابلس وسيبت ترهونه..
حبيتها مابيتش نعيش غير فيها هي..ايام طرابلس كانت كيف مايقولوا مدينه احلام يابنتي اللي يشوفها يتخوخم عليها..
ابتسمت بأسف ودموعها في عيونها..
وهو كمل يقول؛شفتها غادي..شكلها كان زي الهوانم..بنيه راقيه ومؤدبه..
اميمه في نفسها"واكيد حلوة"؛وبعدين..
علي:بعدين قعدت وراها لين عرفت عليها كل شي..وكانت عندي ثقة بنفسي لدرجه اني كنت متأكد لما نمشي مش حيردوني..
اميمه؛وخطبتها؟
علي؛مالا شنو جبت بوي وعمامي وجاهه من ترهونه ومشينا خطبناها..
هي قالت بحماس؛يارب مايكونوا ردوكم!
علي شبحلها شويه وقال:كيف وليتي دكتورة انتي!؟
اميمه بإستغراب شافتله..
علي:كان ردونا يادماغ القنبالي انتي لمن طلعتي!..
ضحكت اميمه بخجل ومن قلبها ضحكه ماضحكتش زيها في حياتها لين عيونها دمعوا...
وهو يسمع في ضحكتها ويشوف لصورة حناها وع وجهه ابتسامه خفيفه..
هدت ضحك وقالت؛باهي وبعدين شن صار؟
تنهد بضيق وقالت؛الله يرحمها امي تعبتها هلبه وهي تحملت هلبه ع خاطري..وصلت بيها تاخد منها اول عيل بعد ماتجيبه ع طول وتاخده هي تربيه نكراته عليها وخلاته يفضلها ع امه..شبحلها وقال..بوك...
وملامح الضحكه تبدلت لملامح الأسف والحزن...
هو هز راسه وقال؛الله يرحمهم الزوز...هي نوضي ردي الدبش والصورة للصندوق..
هي شدت دموعها وقالت؛حاضر..
وناضت وخدت دبش حناها ورداته للصندوق..
وجدها علي سرح بتفكيره اللي رده لماضي بعيد...
🍃🍃🍃🍃🍃
طلع من الحوش وهو يتكلم بالتليفون...
عبد القيوم؛ _اجوضييغ اخمادغ مسينغ "اموري تمام الحمد لله"........مافول وتيسيمد غورنغ؟ "خيركم ماتجوا ديروا علينا طله"................شاغت اطافن دون هولان اراان اتاسيمد ابدده..."والله الجماعه هنا شادين يبوكم تجوا"...........سيولتييد انيمير وتقليمد..وضحك..."عطوني علم قبل مش ديروا طبه"..........ابتسم وقال... تهولدين الجماغه امدان"سلم ع الجميع".....السلام عليكم..
سكر ونزل التليفون وهو يشوف قدامه بإبتسامه..
وقدام محل الحلاق كان فراس مقعمز يشوف في بنات فايزة كيف جاياته وفي ايديهم كارتوني..
وصلوا فيه وقالوا؛السلام عليكم..
هو بإبتسامه رد؛وعليكم السلام..
مدتله تاله الكارتوني وقالت:بنجيبه امس بس ماما نست تشريه..
ضحك وخداه منها..
تاله؛قبل الخميس نبيه باهي؟
عبد القيوم؛الاربعاء العشيه إن شاء الله تعالي خوديه..
مروة؛وهدا متاعي..
هو شبح لكارتوني وابتسامته خفت..وقلبه يدق بوجع..
مش عارف كيف بيشده بيده..
مروة؛حتى اني نبيه يكون واتي قبل الخميس .
مدتهوله..
هو تنهد وخداه منها وابتسم مجامله وقال:حاضر...
🍃وفي هاللحظه..
انفتح باب حوش شنيبه وطلعت منه طوبى...
كانت لابسه بالطو اسود طويل ورابطه حزامه وشاربه سودا فيها علامه الماركه متاعه..ولابسه شنطه لنفس الماركه..
وفي رجليها بوت حاطي باين من تحت بس..
ملامح وجهها كانت متجهمه بعض شي..
وقفت في باب حوش شيابينها تراجي في راجلها..
وهي واقفه..
عيونها جو ع مروة وتاله وهما واقفات ع التارقي.
شافاته وهو شاد الكارتونيات الزوز ويكلم في البنات...
من وراها...
طلع محي الدين وهو يتكلم بتليفون..
وعيون التونسي عليه..بعدين غيرهم لطوبى..ومن طوبى لعبد القيوم اللي قال؛خلاص نهار الاربعا كيف هالوقت تعالوا خدوهن..
مروة؛تمام...
تاله؛شكرا عمو..
عبد القيوم؛العفو..
خدت مروة يد تاله وقالت؛شكرا..
ومشوا الزوز وعبد القيوم يشوفلهم..
وهما ماشيات شافوا طوبى حيوها بحركة اليد..
هو طول شاف من حيوا..
ويجوا عيونها عليها...
شافها وهي تحي فيهم ومبتسمه مجامله..
بعدين حطت ايديها في جيوب البالطو وغيرت عيونها عنهم جو عليه..
هو طول غير عيونه وشبح لمطعم ربيع..
ويجوا عيونه ع ربيع اللي كان واقف قدام المطعم يراقب فيه..
نظره عيون ربيع وتراته..
خلاته يهرب عنه بنظره ويردهم لباب حوش شنيبه..
ويشوف الجالي طالع وحتى هو لابس اسود في اسود زيها..
حط يده ع ظهرها ومشي بيها لباب السياره..
فتحه..وهي ركبت..
بعد ركبت سكره ومشي ركب هو..
وعيونه قاعده عليهم..
🍃طوبى؛ايه حقه جبت القطوسه لجوري؟.
ابتسم وقال؛ايه خدتها وطارت بيها هي وسدره لللجنان الوراني..
ضحكت ضحكه خفيفه..
هو شبح للطريق وشغل السياره..
بعدين شغل المسجل وطلع منها صوت مغني الجالي المفضل وهو يغني...
زيديني عشقا...
ابتسمت طوبى...
والجالي وهو يغني معاه تحرك بالسياره وفات من جنب التارقي...
اللي كان حاس روحه..
زي الجندي الاعزل في ساحة حرب..
يرمى بالسهام من كل حدب وصوب وهو يتلقى فيها بدون مايحاول يحمي نفسه حتى بالهروب..
كل السهام استقرت في قلبه وخلاته ينزف وينزف..
والالم كان فضيع...
فراس كان يشوفله بعدين شبح لمحي اللي شبح للطريق اللي مشت منه السيارة..
ومشي ركب سيارته حتى هو وتحرك...
ومجرد مامشي محي..
ناض وخش لمحله...
🍃"تارقي"
استاقظ عبد القيوم وشاف لربيع..
ربيع بنظره فيها مسحة حزن؛تسايرني للقهوة!
شبحله شويه بعدين قال بصوت هادي؛نرقي هذينا للشقه وجايك..
هز ربيع راسه وقال؛سابقك..
ومشي للقهوة...
وهو عقد حواجبه بملامح باين فيهم الغضب..
ومشي للحوش..
ومن داخل كان موجوع وجع لايوصف..
وكانه وجع مادي وحسي..مش بش معنوي...
وجع المه افضع واعمق...
☘☘☘☘☘
"اهو قدامك بنت عمك ياولدي قول الحق تبيها ولالا..كان تبيها ماتكون الا ليك"
الاء ودموعها ينزلوا قالت بإعتراض:كيف هكي جدي معقوله نسيت اني مخطوبه!؟
هو قال؛لا مانسيتش انتي اللي نسيتي...
انحرجت ومعاش عرفت شن ترد..
ووليد اللي مش عارف وين يحط فرحته انتهز الفرصه وقال:نبيها ياجدي ومانبيش غيرها..
جدها؛خلاص تم..
هي شبحتله بصدمه وقالت؛لالا..مش من جدك..لا..ناضت وهي تقول..والله تقتلوني مانسيب خطيبي وناخد هدا..
نهرها جدها وقال؛تكلمي كويس ياقليلة الربايه..
وليد؛آلاء خلاص قعمزي..
هي بإنفعال قالت؛سكر فمك انت ..
جدها؛لالا انتي كثرتي ع ماوصوك عندهم حق عمامك ربايتك ماتنفعش..بري انتلفي..اطلعي..
هي لفت ومشت بعصبيه وهي تقول؛والله لو تقتلوني ماناخده..
طلعت من المربوعه ومنها برا...
ووليد لحقها وهو ينادي فيها؛آلاء غير راجي شويه بس..
وشدها من ذراعها بش يوقفها هي جبدتها بقوة وقالت؛والله لو نموت.مانبدل.مهند بواحد زيك انت!
رفع حاجبه وقال:جديده الدوة هادي!
شبحتله بكره بعدين مشت وخلاته..
وهو واقف يشوفلها وهي ماشيه بنظرات انفعال وقال؛ماواخدك غيري ياآلاء...
☘وهي خشت لحوشهم..
تلقتها امها وهي تقول بقلق؛شن صار..
الاء وهي تبكي قالت بصدمه؛يبيني ناخد وليد يام..
اريج وهي واقفه فم الدار قالت بإبتسامه متهكمه؛الطيور ع اشكالها تقع..
الاء بغضب؛اريج سكري فمك مش ناقصتك..
خبطت اريج الباب بيدها وقدمتلها وهي تقول:ليك عين تعيطي وتعلي صوتك انتي!
جت فردوس قدام الاء وقالت:اريج بري خشي للدار..تربحي..
حاولت اريج تضبط اعصابها بعدين قالت..حاضر يام حاضر..
ومشت ولت للدار..
التفتت فردوس وقالت بعصبيه؛هادي اخرة فعايلك اخرة طيشك واستهتارك جبتي لروحك دوة وجبتيلي الدوة وحشمتيني وقطعتي وجهي..اني من اللحظه معاش دخلي فيك هادم ماليك يديروا فيك اللي يبوه..
آلاء ببكي؛لا يام لا..بالله عليك لا ماتقوليش هكي بالله عليك!..
فردوس مشت وخلتها وقلبها قاعد يتقطع..
وهي تبكي بقوة وتقول؛لو يقتلوني مانبدل مهند بهداكا الحقير لو يقتلوني...
🍃ومهند يتصل بيها ويعاود...وتليفونها في دار امه مدسوس..
انجبر يتصل بيها عن طريق رقم اريج..واريج كانت تشوف لتليفونها وهو يرن..وتبكي بصمت..
في الاذاعه...
نزلت التليفون وهو يقول:ان شاء الله خير...
"استاذ مهند"..
هو شبج للمذيعه اللي بتقدم البرنامج اللي بيخرجه..
هز راسه واشرلها تبدا...
☘☘☘☘☘
الساعه 12:30ليلا...
خش لمكتبه..وسكر عليه الباب...
جي للصندق اللي كان محطوط ع الطاوله..
مشي بيه للدولاب..
فتحه...وحط الصندوق فيه..
بعدين سكره بالمفتاح..والمفتاح حطه في درج طاولة المكتب..
ومشي بعدها طلع من المكتب وسكره وتوجه لدار النوم...
خشلها..
لقاها بأبهى طله..جذابه..جميله..سلبت عقله...
ونساته الدنيا ومافيها...
☘ونومة غرفه في حضن زوجها اللي كان محتويها بكل حنان نساها تعب الحمل..وتعب الدنيا وآلامها...
كان عبد الرؤوف لغرفه..العوض الحقيقي عن كل شي انحرمت منه في حياتها...
وممكن اكثر شي مخلي غرفه تحبه هلبه هو تقبله ليها بكل عيوبها..
🍃زي مادار مهند..
حتى ان مهند تفوق ع عبد الرؤوف في حبه لآلاء..
مش بس تقبل عيوبها..حبهم....
وخلاها تحب نفسها بزياده وترضى بهلبه حاجات في الدنيا زمان لايمكن ترضى بيهم..
وشن يجيب النوم لعيونها وهي طول الليل تبكي لدرجة انها تمنت ربي ياخدها ويريحها ولاتعيش عذاب خسارة مهند..
اللي حباته من قلبها..
وحتى اختها ماجاهاش النوم..
بس همها كان اكبر..مقهورة من اللي جي لأمها في جرة طيش اختها..
مقهورة من اهلها اللي مستوطيين حيطهم ودايرين فيهم مايبوا..
بين ايديها تليفونها كان حاطه ع صورة بوها وهي تشوفله وتبكي بكتمان والم..
وتقول في نفسها..
"لو كنت معانا يابابا ماصارش فينا هدا كله"
كان يشبه كلام فردوس في نفسها...
"شن دار فينا غيابك يامصطفى..حاسه روحي قاعده في حوش من غير سقف..مش قادره نحمي صغارنا مهما ندير يامصطفى...ااه بس لو يرجع بيا الوقت"
🍃من غير اب...
الحياة صعبه وناقصه هلبه..
بالموت ولابالحياة..
فقدان اميمه لوجود بوها في حياتها خلاها ناقصه هلبه..
وهدا اكثر شي طير النوم من عيون بنت عمها...
اللي كانت مقعمزة قدام المرايه وهي تشوفلها بنظرات كلها تعاسه وخوف...
حولت المنشف من ع راسها وحطاته ع الزيانه..
وقعدت تساوي في شعرها وهي تفكر...
وتفكر..في ألف حاجه وحاجه..
وتتصارع الافكار في داخلها..لدرجه ان دموع عيونها نزلوا...
حطت يدها ع بطنها وهي تتخيل..وتتخيل...
وكل اللي تتخيل فيه يخوف..يرعب..
 واكثر شي خايفه عليه...مستقبل عيلها اللي ساكن احشائها توا..لما يطلع للدنيا..كيف حيكون شكل حياته لو اللي قاعده تفكر فيه يتحول من تخيلات سودا..لواقع أسود..!
وبهكي حيكون في سبب جديد يخليها تخفي خبر حملها حاليا..
ألتفتت وشافتله...كان غارق في النوم...
راقد بعمق وواضح انه مرتاح في نومته..
نظرات عيونها كانت كلها قلق ورجاء وهي تقول في نفسها..
"يارب مايخيب ظني فيك يارب"
تنفست بخوف..بعدين شافت للزيانه..
خدت المشط وبدت تمشط في شعرها..ورجعت سرحت بتفكيرها..
عقلها مش قادر يبطل تفكير...
بس هالتفكير انقطع..لما سمعت نغمة رسالة جايه لتليفون الجالي...
التفتت طول شافاته..
كان موجود ع الكامدينو قريب عليه..
غيرت نظرها ليه هو...لقاته مازال غارق في النوم ومش حاس بشي...
حطت المشط ع الزيانه..
وناضت...
كانت خايفه..قلبها يدق بقوة من الخوف..
تمشي بإتجاه التليفون..بخطوات مترددة..
خطوة تجر التانيه..
لين وصلت فيه...
مدت يدها ولمست شاشة التليفون..
بانت عليها الرساله من الستار..
كانت من ..."احمد حميدا"
المكتوب فيها..
"فايق!؟"
احمد حميدا مرة تانيه...وباعتله رساله في وقت مش مناسب..
حتى حكيم اقرب صحابه ليها مادارهاش قبل..
فجأة..
رن التليفون..
هي انفجعت..
وقعدت تشوف للشاشه..
احمد حميدا..يتصل بك..
حركت عيونها للجالي..قاعد ع نفس حاله..
راقد زي الميت...
غيرت عيونها عنه وشافت للتليفون..
مدت يده..بتاخده وبترد...
هالفكره المتهوره جتها في هديكا اللحظه وكانت حتنفدها..
لولا ان عقلها جابلها نتيجه متوقعه لفعل زي هدا..
لو يطلع فعلا صاحبه وهي ردت عليه شن حيكون موقفها قدامه لما يعرف..كيف حيفكر فيها.!؟
خافت..
بس اصرارها تعرف هوية المتصل الحقيقيه كان اقوى..
وين شدت التليفون وجت بتفتح المكالمه..وقف الاتصال..
بلعت ريقها..
وردت التليفون مكانه وهي تقول في نفسها..
"فكك طوبى فوتي..اللي جايه بديريه بيولي عليك انتي بس..معاش تسمعي للوسواس ياسر معاش تسلميه عقلك وتخربي ع روحك.."
مشت بسرعه وهي مقتنعه باللي قالاته لنفسها ومعاش تبي تعطي فرصه للوسواس ع حد زعمها يسيطر ع عقلها..
لمت شعرها بسرعه..
ولبست مصليتها وخدت الصلايه ..
استقبلت القبله..
وهربت من المخاوف والهواجس..
للأمان الأوحد...
وبدت الصلاه..وبدت معاها المناجاة في كل سجده..
"ياربي اني مانعرف شي وانت تعرف كل شي..
لو اني فيه من الشيطان نتعوذ بيك منه اصرفه عني..
ولو في شي اني مانعرفاش اكفيني شره بما شئت وكيفما شئت واعطيني القوة بش نواجهه لما نعرفه يارب يارب...
وافوض امري إلى الله إن الله بصير بالعباد"
وكررت الدعاء بهالآيه لين دموعها نزلوا من عيونها وبللوا السجادة...
🍃لما كملت صلاة ارتاحت..حست بالسكينه نزلت ع قلبها..
معاش فكرت في شي بعدها..
حولت الملايه وقامت السجاده..
ومشت خشت سريرها وتغطت وبدت تردد في تاج الذكر..
هالذكر اللي كانت تحس معاه بالراحه والقوة والأمان..
وغشيها النوم...ورقدت....
☘☘☘☘☘
واختها الكبيره..في بلاد بعيده...
ليها مايقارب الشهر...راقده...عايشه ومش عايشه..
وسط الفضاء الفاضي...قاعده تسبح سدره..
وهي تسمع في آيات القرآن بصوت امها صفيه...
ومن ورا شباك حجرتها..
كان واحد من اللي قلوبهم تعلقت بيها..
يتأمل في حالها وهو في قمة الألم عليها..
ومقهور..لأنه عاجز يديرلها اي شي..
🍃"يقولوا تحس بيكم لما تكونوا حداها ولما تتكلموا تسمع فيكم"
إياد وهو يشوف لسدرة؛مزبوط..شاف ليوسف وقال..الدراسات والابحاث في السنين الاخيرة بينت ان دماغ مريض الغيبويه يخدم بعض منه او كله..يسمع وحتى يستجيب غير مايقدرش يتحرك..حرك عيونه ع جنب شويه وهو يقول..وكأنه سدرة توا محبوسه في جسمها..يعني تسمع وتستجيب بس ماتقدرش تبين ولاتعبر..
يوسف؛معناها امي لما تقرالها في القرآن تسمع فيه..
اياد ابتسم وهز راسه بإيجاب..
يوسف وهو يبي يتأكد اكثر:يعني دكتور لو قعمزت حداها وقعدت نهدرز عليها عن اي شيء ذكرياتنا زمان او اخبارنا توا تسمعني!..
اياد:ايه..ونزيدك معلومه تانيه..هدرزتك عليها انت او اي حد تاني يخلي دماغها في حالة نشاط دائم وهالشي احتمال كبير يخليها تفيق من الغيبوبه بكري..بإستغراب قال..ماقالولكمش الكلام هدا هني!؟
يوسف؛مش زي ماانت شرحت توا ركزوا ع التوقعات الأسوأ..
رجع شاف لسدرة وقال؛خليك متفائل وفي نفس الوقت متوقع كل شي..تقعد كلها اجتهادات بشر والامر في الاول وفي الاخير لله وحده..
يوسف شاف لسدره بحزن وقال:ونعم بالله...
☘☘☘☘☘
ويقعد حال سدرة..
احسن بهلبه من حال عاشق وخيتها الصغيره..
اللي مش قادر يذوق طعم النوم من اللي فيه.
نار..نار ووالعه..تاكل فيه..في قلبه..في روحه..
في كل جزء فيه..
وهو يتفكر فيها كانت مع غيره..
غيره اللي يكذب عليها..ويغدر بيها...
شافها كيف تبتسمله...كيف تشوفله..كيف تبان فرحانه وهي معاه...
هو كان مكوي بنار الغيره اللي تحرق كل شي يجي قدامها لدرجة انه خدي منها موقف وكره عشقه ليها...
بس في نفس الوقت كان قلبه موجوع عليها مخدوعه..عايشه حالة من السعاده المغشوش..وفي قصة حب مزيف..ومشاعر مصطنعه مافي شي منها حقيقي...
والله اعلم كيف بتكشف زيفها..وامتى؟!
ضم ايديه لبعض..وغمض عيونه للحظات..
خدي نفس بعدين طلعه...فتح عيونه...
وطول خدي كارتوني مروة..
حول الاستيك...وفتحه...
ويشوف قدامه...صورة من صور جمالها..
وابداع عطايا الخالق ليها..
موهبه حباها الله بيها...
رسم متقن ودقيق....
مرسومه بقلب ورب زي مانقولوا....
ابتسم ابتسامه خفيفه كلها حب..
ونظره عيونه كان ليها نفس المعنى...
وقال بنبرة ليها نفس المعنى؛مش هاين عليها نخط عليها ونكتب...خدي نفس..
وقعد يتأمل فيها...وقلبها طاير بمشاعره الحب اللي توهجت بداخله...
بس سرعان ماانطفت هالمشاعر لما تفكر اللي صار اليوم..
اللي صار يفكره كويس انها ع ذمة رجل تاني...
مش حيمنع قلبه يحبها..لكن يقدر يمنع نفسه انه يعيش مشاعر هالحب المحرم...
بدت ع وجهه ملامح الكره وهو يتفكر في حالتها مع الجالي..
قعد يكره نفسه فيها..
وفعلا عاش هالشعور المؤقت..
اللي خلاه..
ياخد الخطاط...
ويفتحه
ويحط قدامه ورقة رسم القلب...
ويطبس ع الكارتوني..ويبدا يكتب في البيانات...
🍃وأشرف الناس اهل الحب منزلة
     وأشرف الحب ماعفت سرائره🍃
☘☘☘☘☘☘
تاني يوم...
الإثنين...19..فبراير...سنة 2018
الساعه 6:00صباحا...
فاق..
فتح عيونه...شاف سيل شعرها نازل ع وجهه...
ويتحرك...
عقد حواجبه بضحكه وقال بصوت ناعس:شن ديري..
طوبى وهي تمسح في مراية السرير:صباح الخيرات..هي نوض صلي الفجر توا كيف آذن..
شد شعرها وقال؛شن ديري..
طوبى؛نمسح في المرايه..
طلق شعرها وناض قعمز وهو يقول:غير امتى نضتي بس!..
طوبى؛بكري شويه..
وخرت وهي تشوف للمرايه تأكدت انها نظيفه...
وجت بتنزل..
هو شدها من يدها وقال بإبتسامه؛جديات مش مذكره روحك شن قلتي امس!؟
هي بضحكه قالت؛انت كان تقولي شن هي الكلمه اللي سمعتني قلتها نتفكرها..
شبحلها شويه وهو مبتسم بعدين قالت؛خلاص فوتي..
طلق يدهاومشي نزل من السرير وهو يقول؛وتيلي قهوة..
هي قالت:حاضر..
مشي خش للحمام..
وهي مشت طلعت من الدار..
زفرت بتوتر...وقعدت تمشي لين نزلت من الدروج...
☘وعطا الصباح عادي زي كل يوم..
صلوا..وشربوا قوتهم بعدين فطروا..
وجهزوا انفسهم..
هو طلع قبلها..وهي بعده بشويه طلعت من الحوش متوجهه للمدرسه..
🍃🍃🍃🍃
لما وصلت غادي..
كانت المدرسه من برا نظيفه تماما...
ومن داخل النظافه معاها روائح مطهرات ومعطرات...
وهالشي تعودوا عليه في المدرسه من اسبوع...
بعد مابدوا عاملات النظافه ينظفوا قبل مايجوا الطلبه واعضاء هيئة التدريس..
خشت لمكتبها..
دارت دورة ع جدول الاعمال في المدرسه..
بعدين طلعت من المكتب وسكراته..
ومشت لركن الروضه في المدرسه...
اطفال الروضه كانوا موجودين قبل الطلبه في المدرسه.
ويبدوا هما الاولين نشاطهم في المدرسه...
وهي تحب تتفرج عليهم كل صبح وتتأمل الوجوه البريئة الحلوة..
وكان يدور حديث بينها وبين جنينها وهي تتفرج عليهم..
"محلاهم كيف يرسموا يهبلوا الله يبارك...زعمه تطلع لماما حتى انت وتحب الرسم..هو حتى بابا عنده في الرسم..بس إن شاء الله تطلعلي اني"
ضحكت ضحكه خفيفه..بعدين انسجمت تماما مع الصغار وهي تتفرج عليهم...
☘☘☘☘☘.
"حامل واني اخر من يعلم..بطلي عبط"
نجاة وهي في سيارة الجالي شاده في يدها طاسة افوكادو وهي تقول؛مرات ماتبيش تقول خايف عليها مني..
تنهد وقال:انتي وحده مهبوله ومتخلفه هي هادي..
نجاة؛جالي ندوي من جدي.
وهو قال؛واني نقولك مش حامل..والله ماهي حامل..ولو كانت حامل نقول مش حنخاف منك لانك تعرفي كويس انك ماتقدريش تفوتي من ركنها بعدين.
هي قعدت تشبحله بحده..
وهو يشوف القدام ويشرب في القهوة..
نجاة؛تعرف جالي من هني لين نخش الشهر الرابع لو مادرتش حل..قسما بالله..قسما بالله..نمشي لبوك ونقوله اللي هناك..وعليا وعلى أعدائي..
شبحلها وقال؛وعلاش الشهر الرابع بالذات!؟
نجاه بتهكم؛بيبدا يبان عليا الحمل في الرابع ياغزيل!..
شبح القدام وقال؛نجاه ترضي تكوني مع ضرة ولا يعني القدام جو الضراير ودراه الكبد بتفكيني منه..
نجاه؛تي اني بديت راضيه بأي شي..المهم عندي تعلن زواجنا وثبته في المحكمه..
بضحكه قال:يعني كان خديت عليكم تنين تانيات عادي!..
قعدت تشبحله وهي مفنصه عيونها فيه..
وهو قعد يضحك..
نجاه بنرفزة؛ماتبي الا نصبها ع راسك بش تجمد مرة وحده..يابارد.
وهو يزيد يضحك..
نجاة:خلاص اسكت..
وهو يزيد يضحك..
نجاة؛مبرد دمك..يابارد..اسكت..مبردك ياربي..
هو بضحكه قال؛كان تشوفي وجهك كيف.....عيونك قريب طلعوا..!وقعد يضحك..
نجاه غلبتها الضحكه وقالت؛تافه اسخن ماعندي ابرد ماعندك..
هدا ضحك وقرص خدها بعدين قال؛والله والله كل شي حيمشي زي ماتبيه واحسن..وللمرة الألف يانجاه نقولك..اصبري عليا شويه اصبري..والله مانخليك ولانرخي بيك..تي نحبك يامراة افهمي نحبك..
وهي كالعاده تذوب في الكلمتين الحلوات اللي تسمعهم منه ويبدا وقتهاعندها استعداد تصدقه لو شن يقوللها...
☘☘☘☘☘
"سدرة..شن حالك اليوم"
هدا يوسف شاد يد سدرة وهو يكلم فيها؛امي اليوم بتروح..ماتخافيش اني قاعد حداك..توأمك مش مخليك..ضحك بعدين قال..مش عارف شن بنقولك ولا شن بنحكيلك..متوتر..ملخبط..مضايق..مضايق من روحي اللي زعلتك هلبه السنين الاخيره وبعدتك عني..تعرفي ضعت هلبه ياسدره وياما صار فيها..شد دموعه وضحك وهو يقول..مانبيش نكد عليك..نبي نقولك..كلنا نراجو فيك..كلنا ناقصنا هلبه من غيرك..كلنا في غيابك ولينا يتامى والله ياسدره ومانبالغ في كلمه..بالذات عمي..بوك...قداش فاقدك ياسدرة ويراجي فيك...وطوبى..طوبى قالولي تلبس في حوايجك وترقد ع سريرك..واسمعي هادي..شدت مكانك في المدرسه..قالت مانخليش تعب اختي في يد البراني...
🍃وطوبى فهالوقت..
كانت واقفه تسمع في زوز ابلات يكلموا فيها ع موضوع يخص الدراسه...
شويه جتها ابله وهي تقول؛استاذة طوبى..
شبحتلها وقالت؛نعم..
الابله؛في واحد يستنى فيك في مكتب الادارة....
عقدت حواجبها وقالت؛من هو هدا اللي دخلتوه لمكتب الادارة طول؟
الابله:قال انه قريبك استاذه..
هي استغربت وقعدت تفكر شويه..
بعدين غيرت عيونها عن الابله ومشت طول لمكتب الأدارة..
🍃يوسف:تعرفي ياسدرة لو كانت عندك بنت..مش حتشبهك اكثر ماتشبهك طوبى..نسخه منك في كل شي..سدرة صغيره...
🍃وصلت طوبى لمكتب الاداره..
ولما جت بتخش..
وقفت في الباب وهي تشوف للضيف..
حواجبها المعقوده ارتخت شويه..
وملامح وجهها بانت فيهم المفاجأة بس بخفه...
هو..
لما شافها ناض وقف...
ابتسم من قلبه..وفي عيونه نظره حلوة بالمرة وفيهم لمعة الدموع...
وقال بصوت باين فيه نبره الفرح...
"طوبى"
🍃وحس يوسف بضغطة خفيفه ع يده..
شبحلها طول...
شاف اصابعها ضاغطه ع يده..
انصدم..انفجع...فرح...
ناض وقف وهو يقول بدهشه:سدرة!..
طلق يدها..وطلع يجري من الحجره بش ينادي الدكاترة..
يدها اللي طلقها ع السرير..
كانت اصابعها السبابه والوسطي والبنصر مرتفعات شويه بصعوبه...
وعيونها..
عيونها انفتحوا شويه..فتحه بسيطه...
وفي نفسها كانت تقول...
"طوبى"
ولسانها مش قادر ينطقها....
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
             1...من شهر مارس....سنة 2018...
في مدرسة للبنين..
يقرا فيها حمزة ولد نجاة...
كانت ماشيه وقت الحصه الاخيرة في المدرسه تسأل عنه...
:الله يبارك باش مهندسه..اخلاق وادب..ومتفوق دوننا عن كل الطلاب اللي يقروا معاه...
نجاة بإبتسامه فخر:الحمد لله رب العالمين تعبنا معاهم مايريحش ع الفاضي..
؛بجد نهنيك ع التربيه باش مهندسه..
وهي مبتسمه قالت؛شكرا..بارك الله فيك..
☘وسمعت هالاطراءات والمديح من كل ابلاته واستاذته اللي درسوه وكانت فرحانه بيه ع الآخر..
بعد ماانتهي الدوام..
طلعت هي وياه بتروح بيه...
🍃ركبوا السيارة وهي تقول..
نجاة؛كلهم يشكروا فيك قالوا رفعلي راسي..
حمزة ابتسم بفرح واحراج..
نجاة؛بنقول الكلام اللي انقال عليك لجدك خليه يعرف ان عنده احفاد يرفعوا الراس غير ولاد عمك المهدي..
وشغلت السيارة وهي تقول؛توا نمشوا لمدرسة جوري ونشوفوهم شن يقولوا عليها..
حمزة؛اكيد نفختلهم روسهم بسيرة القطوسه..
قعدت تضحك..
بعدين تحركت بالسيارة..
وفي الطريق كملوا هدرزتهم...
وكان كل شي ماشي حلو لعند ما..
نجاة: شن جابه من هني هدا!..
ولما حطت رجلها ع المكابح مابتش تخدم..
هي بصدمه؛شن هدا ياربي!..
حمزة بخوف؛يما بتخش فينا..يما!..
نجاة وهي ترعش ومرعوبه؛لالا..ياربي...لا...
وصرخت بأعلى حسها..
حاولت تجتاز...لكن هربت منها السيارة....
وبعدين ماانسمعش الا صوت السياره وهي دور بروحها..
وقفت لما انخبطت في سيارة تانيه....

#اسرار
#طوبى

.....يتبع......
"الجزء الجديد بإذن الله ينزل يوم الجمعه"