#حكايات_منار
حكاية "صغيرى وصغيرتى"
السلام عليكم صباح الخير واهلا بيكم في فيديو جديد من صغيرى وصغيرتى كلامى النهاردة هيكون عن صغيرى عن ولادنا اللى عندهم نزعة قيادية عن طفلنا اللي بيحب يبقي الريس على الكل سواء اخواته او اصحابه او قرايبه لازم يكون هو القائد والكلمة الاولى والاخيرة ليه طبعا دى حاجة حلوة تفرحنا بيا بس حب القيادة ده ليه وجه اخر وهو الانانية والاستئثار بالرأى وعدم مراعاة الاخرين بمعنى ابسط طفلنا القائد ده هيبقي انانى وعنده حب لفرض السيطرة دايما حتى لو كان مش من حقه فرض السيطرة دى
ثقته بنفسه هتتحول لغرور واللي حواليه هيتحولو لمجرد تابعين ليه تابعين هو اذكى واقوى واحسن منهم من وجهة نظره
لازم نقوم ولادنا لازم نعودهم يسمعو اللي حواليهم ويشاركوهم ارائهم لازم نفهمهم انهم ممكن يكونو صح وممكن يكونو غلط وان اللى حواليهم برضه ممكن يكونو صح وممكن يكونو غلط لازم نراعى ولادنا علشان ميتحولوش لمتحكمين في اللي حواليهم او يبقو متنمرين عليهم علشان ميبقاش مصدر قوتهم هو ضعف اللي حواليهم وضعف صحابهم النهاردة
وبكرة يبقي ضعف زوجاتهم وولادهم وضعفكم انتم نفسكم اهاليهم اللي ربوهم
اطفال النهاردة هما رجالة بكرة وعلشان كده لازم نبنيهم صح لان اللي هيكبرو عليه هيعيشو ويموتو عليه واللي هنزرعه فيهم هيجنيه احنا واي حد ولادنا هيتعاملو معاه وعلشان كده لازم نزرع جواهم الخير
هدفى من الفيديوهات دى اننا نربي ولادنا صح وعلي قد ما نقدر نطلعهم اسويا نفسيا اتمنى اكون بقرب من هدفى وتكون فيديوهاتى بتساعدكم
خلو بالكم من نفسكم ومن ولادكم واشوفكم الفيديو الجاي مع تحياتى ليكم جميعا منى انا رهف عبدالرحمن والسلام عليكم
دى المرة العاشرة اللي اتفرج فيها على الفيديو كل مرة اعمل كده اسجل الفيديو واتفرج عليه وبعدين انزله على قناتى علي اليوتيوب وبعدين ارجع اتفرج عليه ولحد ما اسجل فيديو جديد بفضل اتفرج على اللي صورته
معرفتكمش بنفسي انا رهف عبدالرحمن يوتيوبر او بمعنى ابسط بنزل فيديوهات على اليوتيوب بقالى سنتين بعمل كده بقا عندى اكتر من نص مليون متابع اغلبهم ابهات وامهات اللي بيتفرجو عليا وسنهم صغير قليلين اوى انا كل فيديوهاتى بتكلم فيها عن الاطفال وكيفية التعامل معاهم بشكل سليم معتقدش ان المراهقين او حتى الشباب الصغير اللي متجوزوش لسه هيهتمو يتفرجو علي المحتوى اللى بقدمه
حاولت اعمل برنامج فى التلفزيون وعرضت فكرة برنامجى على اكتر من قناة وكلهم رفضو فى اللى رفض لانى لسه مش معروفة للناس ومش فاهمة منين الناس هتعرفنى وانا لسه معملتش البرنامج يعنى
وفى اللي كانو محتاجين واسطة كبيرة برضه مش عندى
وفى اللي مقتنعوش بالمحتوى اللي انا عايزه اقدمه
وفى اللي حجابي ولبسي كانو مرفوضين بالنسبالهم وانا طبعا معنديش نقاش فى جزء من هويتى ومبادئي اللي هو حجابي فمن غير تردد رفضت ومن غير ما اندم لحظة علي رفضى
بعد محاولات كتير فاشلة قررت انى مش محتاجاهم مش انا عايزة افيد الناس السوشيال ميديا مخلتش حاجة صعبة خلاص والوصول للناس مبقاش فيه اسهل منه وقررت اعمل قناة لنفسي على اليوتيوب وانزل فيها فيديوهاتى بعنوان صغيرى وصغيرتى وواحدة واحدة فيديوهاتى انتشرت وبقالي قاعدة جماهيرية قاعدة مش كبيرة اوى واغلبها ستات بس انا راضية جدا عن اللي وصلتله وفرحانة بيه كمان
الفيديوهات بتاعتى بتكون مش طويلة عشر دقايق ربع ساعة بالكتير
فضلت اشوف اعداد الناس اللى بتعمل اشتراك في قناتى والشير الكتير اللي جاى للفيديو
الفيديوهات دى هى اللى بتحسسنى ان حياتى ليها قيمة وانى مش عالة علي الدنيا ان وجودى بيفيد حد اسوء حاجة فى الدنيا انك تحس انك وجودك ملوش لازمة
قمت جهزت لانى فى عريس جايلي عن طريق جوز اختى او انا مفهمتش هو جوز اختى ميعرفوش بس واضح ان هو يعرفه لانه طلب منه رقم والدى وجوز اختى اداله الرقم واديه اهو منورنا النهاردة علشان يشوفنى واشوفه
انا لسه بتوتر وبتكسف من فكرة انى اقعد مع عريس دى مع انها المرة العشرين مثلا على مدى سنين عمرى اللى اقعد فيها مع عريس انا عندى تمنية وعشرين سنة
المهم خرجت وقعدت وشوفته وحسيت ان قلبى وقف من المفاجأة
ده هو عيسى كامل نورالدين
اعرفكم بيه انا معرفوش كل الحكاية انى من تلت شهور كل كام يوم يجيلي منه علي حسابي علي الفيسبوك طلب مراسلة كاتب فيه جملة واحدة بس ايه هى الجملة لو سمحتى ممكن تبعتيلي رقم والدك اول مرة شفت الجملة ضحكت جدا وقلت انها طريقة جديدة للشقط باعت كده علشان اقبل طلب المراسلة بكل سذاجة واساله ليه عايزه وافتح بنا كلام بقي
فمسحت طلب المراسلة فورا وبعدها بحوالي اسبوع جالي منه طلب مراسلة مكتوب فيه نفس الجملة لو سمحتى ممكن تبعتيلي رقم والدك وبرضه مسحته خلال تلت شهور بعتلي حوالي عشرة اتناشر طلب مراسلة مكتوب فيهم نفس الجملة مع ان اصراره خلانى عندى فضول فظيع اعرف هو مين بس طبعا مقبلتش ولا طلب مراسلة واحد فيهم بس دخلت صفحته هو مدير تسويق في شركة للاستيراد والتصدير صفحته معليهاش حاجات كتير اغلبها صور صحابه بيرفعوها وهو معموله منشن فيها قليل اوى لما بينزل بوست او بيعمل شير لحاجة هو مش عايش حياته علي الفيس او يمكن عنده حساب تانى غير اللي بيبعتلي منه ده خارب بيه الدنيا
المهم فقت من صدمتى لقيت بابا خرج من الصالون وسابنا علشان نتكلم لوحدنا
عيسى :شكلك فى الحقيقة نفس شكلك فى فيديوهات صغيرى وصغيرتى مفيش اختلاف خالص
رهف :انت كنت عايز رقم بابا بجد مش بتشقط...قصدى انت وصلت لجوز اختى ازاى
عيسى :بعد تلتاشر رسالة ليكى مبطلبش فيهم غير رقم والدك وانتى بتتجاهلى كل رسايلي كان لازم الاقي طريقة تانية اوصل بيها لرقم والدك غيرك دورت فى الاصدقاء اللي عندك لحد ما وصلت لدكتور امجد جوز اختك بعتله طلب مراسلة طلبت فيه رقم والدك لانى عايز اتقدملك والراجل كتر خيره بعتلى الرقم وكلمت والدك بقى طلبت منه ميعاد اجى فيه بس وادينى قاعد معاكى دلوقتى
رهف :انت عرفت منين انى مش متجوزة يعنى انا مش كاتبة علي صفحتى اي معلومات عنى واكيد اصلا انت تعبت علي ما وصلت لصفحتى الشخصية لانى مش بعملها اي دعاية ومفيش عليها غير الناس اللي انا فعلا اعرفهم وزيها زى حساب اي حد الشخصى فمنين انت ضمنت ان كل تعبك ده هيبقاله نتيجة وعملت كل ده ليه اساسا
عيسى :انتى مش لابسة في ايدك دبلة
رهف :مش سبب كفاية عادى ممكن اكون بقلعها قبل ما اصور الفيديو او حتى اكون مرتبطة بس من غير خطوبة ولا جواز
عيسى :وربنا هيخلينى احلم بيكى وانتى مرتبطة ولا مخطوبة ولا متجوزة ليه
رهف :انت حلمت بيا...حلمت بيا انا ده بجد ولا ده اسلوب جديد للشقط
عيسى وهو بيضحك :شقط ايه بس وانا جايلك لحد بيت اهلك شقط دى لما اكون بقولك كده في رسايلي عالفيس مش وانا قاعد في صالون بيتكم ووالدتك عملالي عصير وكيك تحفة تسلم ايديها
رهف :صح انت جاى دوغرى وماشى في السليم يبقي بتتكلم جد انت فعلا حلمت بيا
عيسى :اه حلمت بيكى كتير بقالي حوالى اربع شهور بحلم بيكى بعد ما عدى شهر كنت حلمت بيكى فيه اكتر من مرة بعتلك اطلب رقم والدك طبعا كنت فضلت يومين بدور علي صفحتك عالفيس لانها فعلا مش مشهورة خالص وفضلت ببعت وانتى مبتروديش
رهف :وحلمت بايه
عيسى :هو حلم واحد بس على اجزاء
بحلم انى ببنى بيت انتى بتدينى طوب وانا ببنى بيه بيت كل يوم نبنى فيه جزء بقالنا اربع شهور بنبنى فيه
رهف :وخلص
عيسى :لا لسه لحد ما حلمت بيكى اخر مرة من يومين مكنش لسه خلص بيتهيألى هيخلص لما توافقى على جوازنا
رهف :انت ليه فسرت حلمك ان معناه انك تيجى تتقدملى
عيسى :اصلى هحلم ليه بواحدة بتابع فيديوهاتها على اليوتيوب اول مرة حلمت قولت عادى يمكن علشان كنت بتفرج علي فيديو من بتوعك بس الموضوع اتكرر والحلم كل مرة بيكمل من مكان ما وقف الحلم واضح بس عموما انا سألت شيخ قالى ان دى رؤية ومعناها واضح وضوح الشمس
رهف :وقالك معناها ده ايه
عيسى :اه قالى ان الرؤيا دى معناها انك سكنى وان انا كمان سكنك انتى اتكسفتى ليه بس والله هو قالى كده وحتى قالى اعجل بالموضوع لان خير البر عاجله وان التأخير مش هيكون فى صالحى
رهف :انت قولتله انت تعرفنى منين
عيسى :انا قولتله انى معرفكيش معرفة شخصية وهو قالي ان اكيد في طريقة اوصلك بيها وان ربنا مش هيخلينى اشوف رؤية زى دى الا لو كان فى ايدى حاجة اعملها بعد ما كلمته حلمت تانى بيكى واحنا برضه بنبنى جزء من البيت لما قمت من النوم قررت انى لازم اعمل حاجة اوصلك بيها
دورت على حسابك الشخصى لحد ما لقيته وبعتلك طلب المراسلة وكل ما احلم بيكى ابعتلك طلب عدى تلت شهور وانتى مبتروديش مش عارف مفكرانى بشتغلك ولا مبتفتحيش طلبات المراسلة اصلا فقررت بقي ادور علي حد عندك ينفع اخد منه رقم والدك لحد ما وصلت لدكتور امجد
رهف :لفة طويلة فعلا طيب انا معرفش عنك حاجة غير اسمك وانك بتشتغل مدير تسويق بتبصلي كده ليه اه كنت بفتح طلبات المراسلة بس كنت مفكراك بتشقط الصراحة وانا اي حد هيطلب منى رقم والدى هديهوله اللي عايزه بجد هيوصله ومش عن طريقي هيقدر يتصرف زى ما انت اتصرفت المهم كلمنى عنك
عيسى :انا عندى اربعة وتلاتين سنة كنت متجوز وعندى ابن عنده اربع سنين اسمه مروان وحيد مليش اخوات ابويا وامى ماتو درست ادارة اعمال فى الجامعة الامريكية اه وبتفرج على الفيدوهات بتاعتك من تمن شهور الجديد متابعه اول باول والقديم جبته اتفرجت عليه انا بيج فان ليكى
رهف :ده شرف ليا انك تكون متابع فيديوهاتى بس انا عندى سؤال انت قولت انك كنت متجوز هو ايه اللي حصل لمراتك
عيسى :قصدك طليقتى
رهف :اتطلقتو ليه
عيسى :
رهف :انا اسفة لو السؤال ضايقك بس انا لازم اعرف السبب ده حقى
عيسى :انا عارف انه حقك انا بس بفكر اجاوبك ازاى اقولك ايه هى طلبت الطلاق منى بعد جوازنا بخمس سنين وبعد ما مروان بقا عنده حوالى تلت سنين علشان هى حبت كلب كان المفروض انه اعز اصحابى بعد العدة مخلصت من سنة ونص اتجوزو على طول وغارو فى داهية راحو امريكا علشان الواطى ده بيشتغل هناك وانا معرفش عنهم حاجة من وقتها ولا فارق معايا اعرف عنهم اي حاجة اصلا لأن الاتنين زبالة مش اكتر من زبالة بالنسبالى زبالة الحمد لله انها خرجت من حياتى
تمام الصيغة دى ولا افكر في صيغة تانية اجاوب بيها سؤالك
رهف :لا الصيغة دى مناسبة انا فهمت اللي حصل خلاص بس انت ما شاء الله صريح لا صريح جدا
عيسى :الكدب ضعف وانا مش ضعيف كمان انتى كان مسيرك تعرفى لأن الهانم مبتسألش عن مروان خالص متعرفش عنه اي حاجة نهائى من يوم ما طلقتها فاكيد دى حاجة كانت هتخليكى تستغربي وتسألينى ايه السبب
رهف :هى سيباه معاك عادى ولا اتنازلتلك عن حضانته
عيسى :ده كان شرطى علشان اطلقها بسرعة انها تتنازلى عن حضانة الولد نهائي وحتى من غير التنازل هى متقدرش تاخده منى تفتكرى لو خيرو مروان بينى انا وبينها وهى مجرد واحدة هو ميعرفهاش اصلا كل اللي بيربطو بيها ان اسمها للاسف مكتوب فى خانة الام فى شيهادة ميلاده هيختار من فينا انا ولا هى
رهف :انت طبعا
عيسى :وعموما هى اصلا مش فارق معاها مروان دى محاولتش تشوفه ولو لمرة ولا حتى تكلمه في الموبايل وده بيأكدلى انى اسأت الاختيار انها لا تنفع زوجة ولا ام وانها مش اكتر من زبالة
رهف :معلش سؤال كمان هى عملت كده ليه او ازاي ايه اللى حصل يعنى
عيسى :احنا كنا نعرف بعض من واحنا فى الجامعة خلصناها واتخطبنا واتجوزنا وهى خلفت مروان وانا جبرتها تهتم بيه بنفسها ورفضت انها ترميه للدادة تربيه زى ما انا وهى اتربينا رفضت ان ابنى ميلقاش الاهتمام اللي يستحقه هى رفضت فى الاول بس بعد كده مع اصرارى وافقت وبما انه مكنش ينفع خروجاتها وشغلها مع الولد وتربيته اضطرت تسيب الشغل وتكتفي بخروجاتها مع اصحابها بعد ما مروان بقا عنده سنتين عمرو رجع من امريكا مكنش مقرر هيستقر ولا هيرجع بس خلال تسع شهور كان عاش اجمل قصة حب معاها قصة تستاهل انه يبيعنى بالرخيص كده قصة تستاهل ان الهانم اللي كنت متجوزها تطلق منى وتسيب ابنها علشانها
رهف :وانت كنت فين وده بيحصل
عيسى :افندم
رهف :طليقتك غلطانة طبعا ومصانتكش ومحترمتش انها على ذمتك وانها شايلة اسمك والاسوء من كده انها اتخلت عن مروان بشكل كامل وعمرو لا صان صداقتكم ولا راعى حرمة بيتك والاتنين اسوء من بعض مش هناقشك فيها دى
سؤالى بقا اكيد حبهم ده متولدش بين يوم وليلة اكيد جه بكلامهم سوا بمواقف جمعتهم انت كنت فين وكل ده بيحصل ازاي اصلا سمحت ان ده يحصل
عيسى :ده كان اعز اصحابي ازاى اتوقع انه لو اتعامل مع مراتى هيحصل كده انا كنت واثق فيها وفيه
رهف :الحاجات دى مفيهاش بثق ومبثقش متحطش النار جمب البنزين وتتفاجئ لما تحصل حريقة هما غلطو بس انت كمان غلطت انت سيبتلهم فرصة يغلطو انت من غير ما تحس سهلتلهم غلطهم ده
عيسى :ولو حتى كلامك صح ده معناه انهم عادى يعملو اللي عملو
رهف :لا طبعا
انا مقولتش كده انا قصدى ان انت كمان غلطت ولازم تتعلم من غلطك انا بتكلم عنك مش عنهم
انما هما اكيد غلطانين واكيد خانو ثقتك فيهم واكيد مكانوش يستاهلو ثقتك دى
بس صدقنى احمد ربنا انت احسن من غيرك
عيسى :احسن من غيرى بتقولي كده بعد كل اللي حكيتهولك
رهف :واحدة صاحبتى قالتلي ان واحد جارهم شاف مراته بتخونه مع اخوه تخيل عمل ايه
عيسى :قتلهم
رهف :لأ قتل نفسه مستحملش الطعنة اللى جاتله من اقرب الناس ليه مراته واخوه
تفتكر انت احسن ولا هو
انت حياتك ماشية ابنك فى حضنك شغلك تمام واديك اهو بتكمل الناقص في حياتك وناوى تتجوز
وطلقتها من غير ما تشوفها بمنظر يجرح رجولتك بسكينة تلما جرحها مبيداويش عمره ونارها مبتبردش تبقي انت احسن من غيرك ولا لأ
عيسى :معاكى حق انا احسن من غيرى
طيب مش هتكلمينى عن نفسك بقى ولا ايه
رهف :انا عندى تمنية وعشرين سنة عندى اخت وحيدة اكبر منى دكتورة وجوزها دكتور مخلفين سليم ومريم ومرام البنتين تؤام خريجة كلية اعلام ومطلقة
عيسى بصدمة :مطلقة اول مرة اعرف
رهف :انت متعرفنيش غير من اليوتيوب والفيسبوك وانا حياتى الخاصة مبتكلمش عنها عليهم
قولى بقي فى كل الاحلام اللى شفتنى فيها بنبنى فيها بيت سوا كان فى اطفال فى البيت ده
عيسى :لا كنا انا وانتى بس
رهف :لو ربنا اراد واتجوزنا يبقي ده هيكون الوضع هنبقي انا وانت بس لأنى مبخلفش ومش ممكن اكون ام فى يوم من الايام ده على حسب كلام كل الدكاترة اللى روحتلهم
عيسى :ده السبب اللى جوزك طلقك علشانه
رهف :ده السبب اللى انا طلبت الطلاق علشانه
هو كان متحمل او على الاقل لحد ما انا طلبت الطلاق كان متحمل
عيسى :امال طلبتى الطلاق ليه
رهف :لان والدته مكنتش متحملة ولا والده واخواته مكانوش طايقنى كلهم كانو شايفين انى واقفه حاله ومنعاه ومنعاهم انهم يفرحو بولاده
ضغط كبير اوى كان عليا انى اصبر وارضى وسط كرههم ليا ووسط احساسي بالذنب ان هو نفسه بيجى علي نفسه علشانى ووسط خوفي من ان لحد امتى هيتحمل لحد امتى هيكمل معايا
الطلاق اوقات بيكون رحمة طلاقى منه كان رحمة ليا وليه ولاهله انما هو انسان كويس جدا ومحترم ويستاهل كل خير اتجوز دلوقتى وخلف
عيسى :انتو اتطلقتو بقالكم قد ايه
رهف :تلت سنين ونص
عيسى :بس انتى بتعملي البرنامج بقالك سنتين بس
رهف :انا اتجوزت اول ما اتخرجت من الجامعة اتجوزت لمدة سنتين انشغلت بالجواز وبعدها بموضوع الخلفة ده فمكنتش بشتغل بعد ما اتطلقت فضلت ست شهور مش حاسة انى عايزة اعمل اي حاجة في حياتى وبعدين فقت لنفسي وقررت انى لو خسرت حلمى انى اكون ام مش لازم كمان اخسر حلمى انى اعمل برنامج للاطفال فضلت سنة بحاول بس محاولاتى كلها فشلت فشل ذريع لحد ما قررت احقق حلمى لوحدى من غير مساعدة حد وبدءت حكاية فيديوهات صغيرى وصغيرتى
عيسى :انتى موهوبة فيديوهاتك على قد ما هى مفيدة ومهمة علي قد ما هى سهلة وبسيطة ومش معقدة
انا من بعد ما بقيت مسئول عن مروان لوحدى وانا محتاس مكنتش عارف اعمل ايه خصوصا انى معنديش حد اعتمد عليه ويساعدنى ومليش في القراءة فعشان كده مقدرتش اقرء كتب عن الاطفال ولما حاولت اتفرج علي برامج زهقت اسلوبهم صعب وكلامهم مكلكع وحلقاتهم طويلة مكنتش بستفاد منهم خالص وده كان مضايقنى من نفسي لانى مش قادر اتحملهم علشان مروان لحد ما شفت فيديو من فيديوهاتك كنت حاسس انى لقيت كنز فيدوهاتك قصيرة ومفيهاش رغى كتير كلامك بسيط انى افهمه وواضح ومباشر وكلامك فى محله لما بحاول انفذه مع مروان حاجات كتير منه بتكون صح وحاجات قليلة مبتظبطش معاه
رهف :ربنا يباركلك فيه
عيسى :اللهم امين
ها بقى انده عمى ونقرء الفاتحة ونحدد ميعاد كتب الكتاب
رهف بخضة :ايه كل ده قبل ما اوافق محتاجة وقت افكر واستخير ولو باذن الله وافقت هنتخطب الاول
عيسى :نتخطب
رهف :اه نتخطب علشان نعرف بعض انا معرفكش وانت كمان الفيديوهات مش كفاية علشان تعرفك عليا خصوصا وانا اساسا مبتكلمش فيها عن نفسي ولا عن حياتى الشخصية
عيسى :ولو اتخطبنا هتكون قد ايه مدة الخطوبة
رهف وهى بتفكر :امممم مش عارفة سنة كويس
عيسى :نععععم سنة لا كتير طبعا
رهف :تمن شهور طيب
عيسى :لا كتير برضه كمان لو علي المعرفة فالخطوبة وبس مش كفاية اننا تتعرف ولو اتخطبنا ست سنين حتى ومش هنعرف بعض غير لما نعيش مع بعض
بصى شهرين كويس
رهف :لا طبعا قليل جدا ست شهور مناسب
عيسى :لا كتير تلت شهور وده اخرى
رهف :اربع شهور ومستحيل تبقي اقل من كده
عيسى :مع انهم كتير بس ماشى موافق
رهف :موافق ايه انت مخلينى بفكر في ايه وانا لسه موافقتش اصلا عليك
عيسى بابتسامة :هتوافقى ما هو انا اكيد مش هفضل احلم بيكى اربع شهور واتشقلب واعمل اللالي علشان اوصل لرقم والدك وفى الاخر ترفضى ربنا مش هيعمل فيا كده لو ملناش نصيب فى بعض يبقي كان على ايه كل ده من الاول
رهف بانبهار :انت اكيد شاطر اوى فى شغلك كلامك سلس مترتب ومقنع فعلا
عيسى بابتسامة :يعنى اقتنعتى وموافقة
رهف بسرعة :لا طبعا لسه هفكر بهدوء علشان اقدر اخد قرار سليم مندمش عليه واستخير كمان
عيسى :امرى لله هستناكى قصدى يعنى هستنا اعرف ردك من والدك
طبعا مش محتاج اقولك ان مروان هيعيش معانا
رهف :لو حصل نصيب واتجوزنا اكيد انا مش هحرمك من ابنك ولا هحرمه منك خصوصا وانا مقدرش اجبلك غيره يا ريت تفكر في النقطة دى كويس لانها نقطة مهمة فعلا ان ميبقاش ليك اولاد غير مروان وان مروان نفسه ميكونلوش اخوات دى حاجة تستاهل انك تفكر فيها بدل المرة مية مرة
حابب تسألنى عن حاجة تانية
عيسى :لا انا كده خلصت اللى عندى وانتى
رهف :انا كده تمام فرصة سعيدة يا عيسى بعد اذنك
عيسى بابتسامة :اتفضلى
كنت فرحانة باللى هو قاله انا حتى في احلامى مكنتش اتخيل ان يجى حد يقولى اللى هو قاله ده اربع شهور بيحلم بيا غير كل اللى عمله علشان يوصل لرقم بابا علشان يوصلى
كنت عايزة اسأل بابا او ماما علشان اتأكد انه قالى كده فعلا بس المشكلة ان محدش سمعه غيرى سواء وافقت او لأ وايا كان اللي هيحصل بعدين بس دى احلى مرة قعدت فيها مع عريس في حياتى
بس طبعا فكرة اللى حصله مع طليقته حاجة مهمة جدا اكيد اللى حصل ده سايب اثر عليه يا ترى بقي شكاك بسبب اللى هى عملته معتقدش محستش كده من كلامه
بس اكيد ساب اثر عليه وعلى مروان وده كمان حاجة لازم افكر فيها انا هقدر اكونله ام هو نفسه هيحب انى اكونله ام هيتقبلنى ولا هيرفضنى
والاهم من ده كله انى مبخلفش عيسى هيتقبل ده لو قبله دلوقتى يا ترى هيفضل قابله في المستقبل بابا بيقول ان الولاد الكتير عزوة يا ترى عيسى مش فارق معاه يكونله عزوة مش فارق معاه ان ابنه يتربي لوحده من غير اخوات زى ما هو نفسه اتربي لوحده
اسئلة كتيرة اوى معرفش اجاباتها
بين احساس بالفرحة والاطراء بسبب كلامه واصراره انه يوصلى وبين احساس بالخوف من الجاى الخوف من وضع مضمنش اكون قده
كنت بتمرجح احساس الفرحة يطلعنى سابع سما وبعدها احساس الخوف ينزلنى سابع ارض
استخرت حسيت براحة كررت الاستخارة كتير علشان اتأكد من احساسى وعلشان اقدر اخد قرار احساسي بالراحة كان بيزيد وبقيت كده بتمرجح بين تلت احاسيس الفرحة والخوف والراحة بابا سأل على عيسى هو وابيه امجد جوز اختى وقالو انه انسان محترم وعيلته معروفة وانه ماديا واجتماعيا كمان اعلى مننا بس دى حاجة عادية طبيعى ان الراجل يكون اعلى من مراته مش مشكلة
بعد تلت ايام قولت لبابا يبلغ عيسى انى موافقة يوميها كان عندنا فى البيت هو واتنين اعمامه وخاله بيطلبو ايدى بشكل رسمى معملناش خطوبة جبنا الشبكة ولبستها فى البيت مع اهلي واعمامه وخاله وخالته وبس
مروان جه معاه بس كان ساكت قاعد فى مكانه هادى وخلاص مكنش بيلعب مع سليم ابن ليلى اختى مع انهم من سن بعض كان قاعد بيتفرج عليا مستغربنا ومستغرب اللى بيحصل
كنت عايزة اتكلم معاه بس الوقت مكنش هيكفى خصوصا فى وجود كل الناس دى فقررت ان تانى يوم هطلب من عيسى يجيبه ويجى يتغدى معانا
عيسى :خلاص هجيبه معايا مش فاهم اصرارك ده ليه
رهف :هو لازم ياخد علينا يا عيسى لازم يوافق عليا ولازم يقبل ان انا واهلي نبقي جزء من حياته لازم يكون برضاه مينفعش يحس انه اتجبر واتحط قدام الامر الواقع كده هيكرهنى فهمه الوضع لانه مش صغير والاطفال في السن ده بيكونو اذكيا جدا ومش ساذجين زى ما احنا بنكون فاكرين
فهمه انك خطبتنى واننا هنتجوز وانى هعيش معاكم بس كمان عرفه ان ده مستحيل يحصل الا لو هو عاوزنى وانه لو رفض انت من غير تردد هتلغى خطوبتنا دى خالص هو لازم يعرف ان مفيش حد عندك اهم منه ولا اغلي منه مهما كان مين لازم ميحسش انى هخدك منه ولا يحس بالتهديد من ناحيتى ويبقي متأكد انك لو اختارت هتختاره هو طبعا
عيسى :وانتى عايزانى اجيبه علشان يتعود عليكى
رهف :يتعود عليا وعلى اهلى علشان يعرفنا علشان على ما يجى وقت الفرح يكون حبنى وبقى عايزنى معاكم
هو مروان عنده صحاب
عيسى :لا هو دايما فى البيت وانا زى ما قلتلك مليش اخوات
رهف :طيب واصحابك معندهمش ولاد
عيسى :فى منهم عندهم
رهف :ومخلتش مروان يتعرف عليهم ليه
عيسى :مش عارف مفكرتش ان دى حاجة مهمة قلت انه لما يدخل المدرسة هيبقاله صحاب هناك
رهف :وهيتعرف عليهم ازاى وهو كان دايما لوحده ومبيلعبش ولا بيتكلم مع حد مش هيعرف يا عيسى هيبقي صعب عليه
انا بعد كده هخليك تجيبه فى اليوم اللي ليلى اختى بتيجى بولادها سليم ابنها من سنه ومرام ومريم اصغر بسنة ونص وهطلب من سليم يبدء معاه بالكلام واللعب
عيسى :مش عايز اتعبك معايا كمان ده اليوم اللى اختك وجوزها بيجولكم فيه بلاش اجى فيه خليهم على راحتهم
رهف :مفيش تعب ولا حاجة كمان انا مقترحتش كده علشان مروان بس انا عايزاك انت كمان تتعرف على اهلي وعلى اختى وجوزها كمان انت خلاص كلها كام شهر وتبقي زيك زيه بالظبط انت خطيبي يعنى بيت اهلى بيتك وتيجى فى الوقت اللى يعجبك
عيسى :معلش عيدى كلامك تانى
رهف :انت مسمعتوش
عيسى :لا طبعا سمعته وعجبنى جدا وعلشان كده بقولك عيديه تانى
رهف وهى بتضحك :انت بتهزر يا عيسى
عيسى :والله بتكلم جد طب بصى قولى خطيبي وبيت اهلى بيتك تسع مرات طيب لو مش عايزة تعيدى كلامك تانى
رهف :ارجع لشغلك اللي عطلتك عنده ده ومتنساش تجلنا النهاردة وتجيب معاك مروان مش هدخلك من غيره
عيسى :مش لازم اقفل دلوقتى هيجراله ايه الشغل يعنى هيطير
رهف :انا كمان لازم اقفل علشان اسجل الفيديو
عيسى :اه صح ده النهاردة ميعاد الفيديو بتاعك اول فيديو صغيرى وصغيرتى تعمليه بعد ما اتخطبنا عايز الدبلة تنور في الفيديو وحركى ايدك اليمين كتير علشان الدبلة تبان انا عايز كل اللى يشوف الحلقة يعرف انك اتخطبتى
رهف :تمام حاضر
عيسى :خلى بالك من نفسك
رهف :وانت كمان
السلام عليكم صباح الخير واهلا بيكم فى فيديو جديد من فيديوهات صغيرى وصغيرتى كلامى النهاردة هيكون عن الاتنين عن صغيرى وصغيرتى عن حاجة الاتنين بيعملوها وهى كلمة لأ اللى مبتفارقش لسانهم طبعا دى حاجة بتضايقنا كلنا وممكن تخلينا نتعصب عليهم ونضربهم كمان
فى الغالب احنا بنقول عليهم متربوش بيعندو معانا وخلاص المشكلة ان الضرب فعلا مش هيحل المشكلة بالعكس هيكبرها خصوصا لو كان اصلا هما بيقولو لأ نتيجة لاحساسهم بالاضطهاد واننا مستضعفينهم وجايين عليهم
فتكون كلمة لأ اللى بيقولوها باستمرار هى محاولتهم للتخلص من احساسهم بالاضطهاد تكون هى مقاومتهم لاحساسهم بالضعف فلما احنا نعاقبهم سواء بالضرب او التهزيق المستمر والتقليل منهم او حتى حرمانهم من حاجات بيحبوها كعقاب ليهم هيزود احساسهم ده وبالتالى هيكبر المشكلة مش هيحلها خالص
الحل هو اننا نتكلم معاهم نعرفهم لما بنقولهم علي حاجة لأ بنقولها ليه ولما بنقول على حاجة اه بنقولها ليه يفهمو نناقشهم على قد فهمهم طبعا بس مش تبقي اجابتنا الدايمة على اى سؤال بيسألوه هو كلمة كده علشان احنا عايزين كده علشان احنا قولنا كده
لان زى ما قلت ده هيزود احساسهم بالضعف والاضطهاد وبالتالي هيزود كلمة لأ اللى بيقولوها او هيحولهم لضعفا ملهمش شخصية وفى الحالتين نبقي دمرناهم لما نحولهم لمتمردين مبيقولوش غير كلمة لأ على كل حاجة حتى لو فى مصلحتهم نبقي دمرناهم
ولما نحولهم لمجرد تابعين لينا او للي حواليهم تابعين مبيقدروش يقولو غير كلمة اه على اي حاجة تطلب منهم تابعين متنازلين عن حقوقهم تابعين لا ليهم شخصية ولا كرامة نبقي برضه دمرناهم
تربية الولاد مش حاجة سهلة خالص وفعلا متعبة
خصوصا واى تصرف مننا معاهم حتى لو صغير ممكن يأثر فيهم وفى تكوين شخصيتهم بس هما يستاهلو
يستاهلو تعبنا علشانهم ويستاهلو نضحى علشانهم بأي حاجة لان مفيش فى الدنيا كلها حاجة اغلى منهم كل ما تتعبو من ولادكم كل ما تحسو ان طاقتكم استنفذت وانكم جبتو اخركم منهم افتكرو ان فى ناس غيركم بتعمل عمليات وبتاخد ادوية علشان بس يبقي عندهم ولو طفل واحد ان ولادكم اللي موجودين في حياتكم بشكل طبيعى دول احلام ناس تانين ربنا مأرادش ليهم الخلفة
وان اهم واحلي استثمار فى حياتكم هو ولادكم سواء استثمار وقتكم او طاقتكم او حتى فلوسكم
ولادكم هما استثماركم الصح هما تجارتكم اللى مش ممكن تخسر هما سهمكم اللي مش ممكن يخيب بس لو ربتوهم صح
وكده اكون خلصت فيديو النهاردة من صغيرى وصغيرتى اتمنى اكون فدتكم اليكم تحياتى جميعا منى انا رهف عبدالرحمن اشوفكم الفيديو الجاى والسلام عليكم
والساعة ستة جه عيسى ومعاه مروان كان ليلى وابيه امجد جم قبلهم بساعة ونص عيسى كان بيتكلم مع بابا وابيه امجد
وماما وليلى كانو بيحطو الاكل وانا كنت بحاول اتعرف على مروان واخليه يلعب مع سليم ابن اختى سليم طفل لطيف مش مؤذى ومش عنيف ليلى قافلة عليه وانا بالعافية اقنعتها تسيبه يتفاعل مع ولاد اخوات ابيه امجد ومع اطفال الجيران مينفعش تقغل عليه وتخاف عليه من كل حاجة كده هيطلع جبان وضعيف وملوش رأى ولا شخصية اقتنعت بكلامى بس مش بشكل كامل يعنى بالعافية بتسيبه يلعب مع اولاد اعمامه وعماته طبعا وواحد او اتنين بس من جيرانهم علشان عارفة امهاتهم وعارفة انهم كلهم من عينة سليم اطفال رقيقة ومسالمة المشكلة ان الرقة مش صفة حلوة في الاطفال بشكل عام وفى الولاد بشكل خاص ولد رقيق يكبر يبقي راجل خيخة معادلة وحشة جدا وللاسف الاهالي بيفرحو بولادهم لما يكونو كده علشان بيكونو هادين وملهمش فى المشاكل الحقيقة انهم مش بس ملهمش فى المشاكل هما كده ملهمش فى حاجة خالص ودى حاجة تأذى ومتفيدش الاطفال لازم تغلط علشان تتعلم لازم تقع وتتعور علشان عضمها ينشف غير كده هيبقو عيال طرية من الاخر
او لما يكبرو هيتحولو من اطفال رقيقة لشمحتجية كل اللى معملهوش وهما صغيرين هيعوضو لما يكبرو
ما هى اصلها طاقة لو مطلعتش وهما صغيرين فى الوقت الصح هتطلع لما يكبرو فى الوقت الغلط
المهم مروان واحدة واحدة بدء يفك ويلعب مع سليم ويلاعب مريم ومرام واضح انه يا حبيبي مصدق يلاقى حد يلعب معاه بس مروان شخصيته قيادية فى الاول كان بيلعب معاهم بحذر بس بعد شوية بقي هو اللي بيقول يلعبو ايه وبيوزع الادوار ولان سليم شخصية هادية وسهل جدا تنقاد كان بيسمع الكلام ومرام ومريم لسه صغيرين علي انهم يكونلهم راى
اتغدينا وهما رجعو يلعبو سوا بس عيسى اصر يمشو بعد الغدا بحوالى ساعة بابا وماما مسكو فيه وانا قولتله ان ابيه امجد وليلى بيطولو فى القعدة وان مروان اخيرا فك وبدء يلعب مع سليم ومرام ومريم هو قالى طبعا مش انتى حطيتى الموضوع فى دماغك كان لازم توصلي لنتيجة حلوة مدام الموضوع فيه اطفال فانتى استاذة ورئيسة قسم حسيت بسعادة وانا بسمعه وفخر بنفسي انا فى الغالب مبفرحش بالكلام الحلو بس كلام عيسى لانه طالع من قلبه ولانه مقتنع بيه دخل قلبى مجرد ما سمعته وفرحنى لانى صدقته بس برضه هو اصر يمشي تقريبا كده لسه مخدش علينا مع الوقت هياخد علينا ومش هيتصرف بالطريقة الرسمية دى
عدو الاربع شهور بسرعة جدا ما بين انى بحاول اتعرف علي عيسى اكتر واقرب من مروان وادخل عيسى فى عيلتنا
بين انتظار لحياة جديدة وبين خوف منها
ما بين كل ده الاربع شهور عدو
عيسى كلمنى فى اخر يوم منهم وقالى انه هيجى يحدد مع بابا ميعاد كتب الكتاب وقبل ما افتح بؤقى قالى ان دى المدة اللى انا حددتها ولو عليه كان زمانى فى بيته من شهور فسكت لان فعلا انا اللى حددت مدة الخطوبة بس كمان سكت لانى مكنش ينفع ارفض مع اصراره وتمسكه ده
واتكتب كتابنا فى حفلة صغيرة وسط اهلي وقرايبه احنا اتفقنا اننا مش هنعمل فرح هنكتب الكتاب وهروح معاه بيته او بيتنا بما انى بقيت مراته
عيسى كان جايب دادة علشان تهتم بمروان انا قولتله ان خلاص مبقاش ليها لزوم انا هاخد بالى منه وكان فيه شغالتين قولتله كفاية واحدة كان نفسي اتشملل واقوله يمشي الاتنين بس صعبة شقة عيسي فعلا كبيرة مش هقدر على شغلها لوحدى كمان انا مش ست بيت شاطرة اوى يعنى
كمان بصراحة اللى يلاقى الدلع وميدلعش يبقي اهبل وانا مش هبلة
بس علشان مأنتخش اوفر واتحول لكائن باندا طلبت منه يخلى شغالة فيهم بحيث نساعد بعض فى شغل البيت
مكنتش عايزة انسي اللي اتربيت عليه فى بيتنا اللى امى فيه هى حجر الاساس هى اللي بتاخد بالها وبتهتم بالصغيرة قبل الكبيرة
قررت اكون نسخة معدلة من امى نسخة منها معمولها تحديث عيسى رجع فى يوم لقانى انا ومروان بنلعب سوا
عيسى :انتو بتعملو ايه
رهف :بنلعب
عيسى :انتو غرقتو بعض وايه الالوان دى
رهف :كنا بنتفرج على فيلم هندى وجه مشهد فيه مهرجان الالوان بتاعهم ده وعجب مارو فقررت اعمله مهرجان الوان فى البيت
عيسى :وعلشان كده لابسين تيشرتات بيضا انتو الاتنين
وايه اللى في ايديكم ده
رهف :دى مسدسات مياه ملايناها مياه بالالوان ايه رايك فكرة حلوة صح
مروان :فكرة جامدة يا بابى انا كسحت مامى
عيسى :عملت ايه فى مامى يا حبيبى
مروان :كسحتها يا بابى او شلوحتها صح كده يا مامى
رهف :صح يا قلب مامى بس انت بتخم اللى انا مكسحاك بص على التيشرت بتاعك مفيش فيه حتة بيضا خالص انما انا يجى نص التيشرت بتاعى ابيض وناصع البياض كمان
عيسى :ما شاء الله على مصطلحاتكم مارو حبيبى هات المسدسات اللى فى ايدك دى
مروان :اتفضل يا بابى
عيسى وهو بيرش على رهف بالمسدسات :كده التيشرت بتاعك مبقاش ناصع البياض
رهف بصدمة :انت ..انت غفلتنى بتاخدنى على خوانة يا عيسى
عيسى وهو بيضحك :الحرب خدعة يا روفى حتى لو كانت حرب بالالوان
خدى دوش وغيرى طيب وانت يا مروان خلى سميحة تحميك يا حبيبى
رهف :كام مرة قولتلك ان اى حاجة تخص مارو حبيب مامى تبقي من اختصاصى انا هديله شاور وبعدين هبقي اخد انا وهقول لسميحة تجهز السفرة
عيسى بابتسامة :تمام شكلك حلو بالوان طبق السلطة دى
بعد شهر
عيسى :رهف..رهف ..يا رهههف ايه ده انتى بتعيطى ليه
رهف وهى بتعيط :بتسأل يا عيسى بتقتل القتيل وجاى تمشى فى جنازته
عيسى :قتيل ايه وجنازة مين رهف بطلى عياط وقوليلي في ايه
رهف وهى بترمى موبايلها عنده :اتفضل شوف
عيسى وهو بيبص فى الموبايل :ايه ده ايه علاقته بكلامك
رهف وهى بتعيط :ده دليل خيانتك
عيسى :خيانتى ..صورة مرفوعة علي صفحتى فيها انا وما لا يقل عن ستاشر سبعتاشر شخص دليل خيانتى ده انا كنت عامل حفلة علشان اخونك بقي
رهف بغضب :انت هتاخدنى بالصوت لاغلبك اتكلم جد يا استاذ ومتتريقش
عيسى :انتى اللي بتهزرى وعموما ماشي خلينى اجيب اخرك معلش يا رهف ممكن تتعبي وتفهمينى فين خيانتى ليكى فى الصورة
رهف وهى بتعيط :البت المسلوعة الصفرا اللى اسمها ماهيتاب اللى واقفة جنبك دى وهى اللي رافعة الصورة وعملالك منشن وكاتبة فيلينج لافد حبها برص تشعر بالمحبة معاك ليه بامارة ايه فهمنى يا استاذ
عيسي بيكلم نفسه :متقتلهاش انت بتحبها متقتلهاش انت بتحبها انت وابنك بتحبوها اهدى يا عيسى اهدى
رهف بصوت عالي :انت بتكلم نفسك بصوت واطى ليه على صوتك وكلمنى زي ما بكلمك
عيسى :مروان حبيبي انا جبتلك الحواوشى اللى انت طلبته اخرج كله يا حبيبي وانا ومامى هنحصلك
مروان بفرحة :حاضر يا بابى
عيسى :المناحة اللى انت عملاها دى كلها علشان السبب ده
رهف :انت مش شايف انه يستاهل
عيسى :انا مش شايف انه سبب اصلا ماهيتاب عاملة منشن لكل اللي فى الصورة مش ليا لوحدى وواقفة جنبي فى الصورة لانها طويلة زيى ولو وقفت قدام هتدارى على اللى هيقف وراها
رهف وهى بتعيط :ايوه طويلة زيك وانا اوزعة يبقي هتحبها وتسبنى يا عيسى
عيسى :يا مثبت العقل والدين يا حبيبتى وانا لو عايزها ولا هى فى تفكيرى اتجوزتك ليه ما هى ملقحة قدامى بقالها خمس سنين من يوم ما جت تشتغل معانا فى الشركة
رهف وهى بتعيط :انت كمان مركز هى جات الشركة من امتى والهانم مركزة معاك وعملالك منشن وفيلينج لافد وحركات
عيسى :فين موبايلي وادى ماهيتاب عملتلها بلوك ولا تزعلى نفسك علشان لا تعملي منشن وهى فيلينج لافد ولا فيلينج هانجرى حتى ها ياستى مبسوطة كده صلحت غلطتى وبرءت نفسي من تهمة الخيانة
رهف وهى بتمسح دموعها :انا ولا فى دماغى اصلا ماهيتاب مين دى اللى اقارن نفسي بيها وهى نخلة كده
عيسى وهو بيضحك :يا واد انت يا واثق مش هامك يعنى افك البلوك اللي عملته للبنية الغلبانة دى
رهف بسرعة :لا طبعا متفكوش عيب يا ويسو يا حبيبي انت راجل والرجالة مترجعش فى حاجة عملتها ابدا
عيسى وهو بيضحك :تصدقى اقنعتينى بصى هو انا فرحان بغيرتك دى حتى لو كانت غيرة مجنونة زيك بس صدقينى انتى مش محتاجة تغيرى من ماهيتاب ولا من اي واحدة غيرها لأنى مستغناش عنك لا انا ولا اللى بيحش فى الحواوشى بره لوحده ده
رهف :معاك حق يا ويسو يلا معلش كانت نوبة غيرة وراحت لحالها المهم قولى جبت حواوشى لينا كلنا ولا جبت لمروان بس
عيسى:متقلقيش جبتلنا كلنا انا عارف انك بتحبى الرمرمة يا عمرى
رهف :الله وهو يعنى انا هاكل لوحدى ما انت هتاكل معايا
عيسى :مانا كمان بحب الرمرمة يلا بسرعة بس علشان مروان ممكن يكون خلصهم وبلع بالاكياس بتاعتهم عادى
السلام عليكم صباح الخير اهلا بيكم فى فيديو جديد من فيديوهات صغيرى وصغيرتى الفيديو النهاردة هيكون عن صغيرتى بنوتاتنا القمرات حاجة غلط بنعملها كلنا اننا دايما بنخلى بناتنا عندهم قناعة انهم لو معهمش ولد يبقي لازم يخافو
بمعنى ان لو ليها اخ مينفعش تتحرك خطوة واحدة من غيره لازم تكون تحت سيطرته بنزرع جواها احساس بالنقص والخوف الدايم من وجودها لوحدها
وده غلط هى مش كائن ناقص اه اكيد وجود اخوها معاها حاجة كويسة ومعناها انها فى امان ده لو اخوها راجل بجد يؤتمن عليها
بس هى لازم تعرف تتصرف لوحدها لازم تعتمد على نفسها لازم نزرع جواها احساس بأنها قوية ولو اتحطت فى موقف صعب هتقدر تتصرف مش هتقف لايصة ومحتاسة الله اعلم ايه اللى ممكن يقابلها في حياتها ويمكن تكون جيش نفسها الوحيد فى وقت من الاوقات
يمكن الظروف تخليها مسئولة عن ناس تانين لازم هى اللي تخطط وتنفذ علشانهم
تفتكرو هتقدر تعمل ده ازاى واحنا بنربيها على انها كائن ناقص وضعيف على انها تابع لازم يكونله قائد تابع مش ممكن فى يوم يكون قائد وصاحب قرارات هى عاطفية اه هى ممكن تكون متسرعة اه هى ناقصة لأ هى ضعيفة لأ هى متقدرش تعتمد على نفسها طبعا لأ هى قوية وتقدر تعدى اي موقف تتحط فيه طبعا اه
للمرة المليون بقولها اللى هنزرعو فى ولادنا احنا اللى هنجنيه احنا واللى ولادنا هيتعاملو معاهم وعلشان كده لازم ناخد بالنا اوى احنا بنزرع جواهم ايه
وبكده يكون خلص فيديو النهاردة من صغيرى وصغيرتى اليكم جميعا تحياتى انا رهف عبدالرحمن اشوفكم الفيديو الجاى والسلام عليكم
بعد شهرين
مروان وهو بيعيط :بابى مامى زعلانة منى وفى اوضتكم بتعيط انا مكنش قصدى ازعلها والله
عيسى :هو انت عملتلها ايه يا حبيبي
مروان :قولتلها انى عايز يكون عندى اخوات زى سليم علشان انا زهقت من اللعب لوحدى وبعدين لقيتها فضلت تعيط ومبتردش عليا خلاص يا بابى انا مش عايزهم بس خليها متعيطش ومتزعلش منى
عيسى :لا يا حبيبي هى مش زعلانة منك بس عارف يا مارو مش كل الناس بيكون عندها اخوات زى سليم انا مثلا معنديش اخوات خالص واتربيت لوحدى
مروان :يعنى انا هبقى زيك يا بابى
عيسى :انت احسن منى مش انت وسليم صحاب ومريم ومرام بيحبوك وبتحبهم
مروان :اه
عيسى :تبقي مش لوحدك يا حبيبي وهما اخواتك ماشي
مروان :ماشى يا بابى
عيسى :ماشى يا حبيبي انا هروح اشوف مامى زعلانة من ايه
رهف ...رهف بطلى عياط ...رهف مروان طفل هتزعلى من كلام طفل
رهف وهى بتعيط اكتر :انا مش بعيط من كلام طفل يا عيسى انا بعيط لان طلب بسيط زى اللى هو طلبه ده انا مقدرش احققهوله انا بعيط لان حقك فى ان يكونلك ولاد كتير يكونو سندك وعزوتك فى الدنيا انا حرماك منه انا عاجزة انى اكون ام بعيط على عجزى يا عيسى بعيط على حلمى اللى مستحيل يتحقق انا تعبت والله العظيم تعبت ومش فاهمة بيحصلى كده ليه كان هيجرا ايه لو كنت بخلف ما هى ليلى خلفت بدل المرة اتنين كان هيجرا ايه لو خلفت طفلين وخلفت انا طفل
عيسى :استغفرى ربنا يا رهف اللي بتقوليه ده مينفعش هو ربنا سبحانه والعياذ بالله عاجز انه يرزقك بعشر عيال ويرزق ليلى بعشرين اكيد لأ بس ربنا رايد يختبرك يا حبيبتى مفيش حد عنده كل حاجة
رهف :اختبار صعب اوى كمان كان ممكن اتحمل حرمانى من اى حاجة تانية الا الاطفال دول شغفى يا عيسى انا قرءت كتب عنهم بعدد شعر راسى ده انا روحى فى مروان وسليم ومريم ومرام كتير عليا يكونلى ابن منك ابن بتاعى انا افضل براقبه وهو بيكبر واشوف بياخد من كل واحد فينا ايه صدقنى حاجات كتير اوى كان ممكن اتحمل اتحرم منهم بس الولاد لأ مش متحملة والله ما متحملة
عيسى :محدش بيختار ربنا يرزقه ايه ويمنع عنه ايه دى حاجات ربنا وبس اللى يحددها محدش بيختار ربنا يختبره فى ايه يا رهف تفتكرى هتتحملى لو ربنا رزقك بطفل واخد منك عمى عبدالرحمن او طنط سمية تفتكرى هتتحملى ربنا يرزقك بطفل وياخد منك نعمة الصحة وتبقي عاجزة ومش قادرة تعملى لنفسك اي حاجة
انتى عندك اهل بيحبوكى وزوج روحه فيكى وابن ميقدرش يستغنى عنك مروان كان مفلوق من العياط علشانك فكر انك زعلتى منه وقالى انه خلاص مش عايز اخوات بس متزعليش منه عندك متابعين بيحبو كلامك وبيستفادو منه عندك صحتك وجمالك وروحك الحلوة عندك حاجات كتير اوى يا رهف تستاهل تحمدى ربنا عليها تستاهل ترضى علشانها
احمدى ربنا انتى احسن من غيرك فى ناس حالهم اصعب من حالك مش ده كلامك
رهف وهى بتمسح دموعها :الحمد لله حمدا كثيرا انا صابرة يا عيسى بس مش عارفة ارضى صعب والله صعب انا مهما وصفتلك مش هقدر اوصفلك انا بحب الاطفال قد ايه
عيسى :ويمكن علشان كده ربنا بيختبرك الاختبار ده بيختبرك بأكتر حاجة بتحبيها علشان تاخدى اجر اكبر على صبرك
رهف :اللهم قوة اللهم رضا وسكينة
بعد ست شهور
عيسى :وادينا سبنا مروان عند اهلك مع سليم ومريم ومرام وخرجنا لوحدنا زى المخطوبين زى ما طلبتى
رهف :الحق عليا انى بغير روتين حياتنا علشان متحسش بملل
عيسى :ملل..يا شيخة قولى كلام غير ده هو اللي يتجوزك يعرف فى عمره الملل
رهف :امال يعرف ايه
عيسى :ورقة وقلم واكتبى ورايا يا ست الكل يعرف الضحك يعرف الراحة يعرف الامان والثقة يعرف الحب يعرف الجنان يعرف الغيرة القاتلة بتاعتك يعرف العياط الكتير ويعرف ويتأكد ويبصم بالعشرة انك تستاهلى اى تعب تعبه علشان يوصلك
رهف :اللهم صلى على النبى ده ايه كل الكلام الحلو ده شفت خروجة المخطوبين وجو الكورنيش جاب نتيجة ازاى اديك بقيت بتقول كلام حلو اهو
عيسى :انا مبعرفش اقول كلام حلو يا رهف او بمعنى اوضح مبعرفش اعبر عن مشاعرى او حتى افكارى بحس انى عامل زى اللى بيزق فى حيطة مش هتتحرك من مكانها سنتى واحد مهما عمل وانا بحاول افهم حد انى بحبه او اشرحله رأيى او اعبرله عن حاجة جوايا انتى عارفة اكتر حاجة بحبها فيكى ايه
رهف :ايه
عيسى :انك بتشوفى اللى جوايا مش عارف ازاى بس بتفهمينى من غير ما اشرح او ابرر
رهف :انا بقرء حبك من افعالك مش كل الناس بتقدر تعبر عن حبها بكلام بس اللي بيحب بجد بيبان فى افعاله الحب
فى ناس بيبان فى كلامهم وافعالهم وناس فى افعالهم بس وانت من الناس دى ولأنى بحبك اتعلمت علشانك اقرء حبك من افعالك اتعلمت اقدرها واقدرك
عيسى :ودى حاجة سهلة حكاية انك تقرى حبى من افعالى يعنى
رهف :لا هى متعبة شوية بس انت تستاهل التعب يا عيسى تقدر تقول كده انى مرتاحة وانا بتعب علشانك وانى كنت هتعب لو كنت فى راحة مع حد غيرك
عيسى :انتى زى ما الشيخ قالى سكنى انتى عارفة انا حلمت بيكى اخر مرة يوم كتب كتابنا حلمت اننا بيتنا كمل واننا بنحط اخر طوبة فيه
ابويا وامى مكانوش سكن لبعض مع انهم كانو شبه بعض جدا شبه بعض لدرجة تخوف وتوجع هما الاتنين كانو دكاترة فى الجامعة هما الاتنين كانو شركا فى مركز طبى كبير هما الاتنين كانو عمليين وميعرفوش حاجة اسمها مشاعر مش فاهم اتجوزو ليه كانو محتاجين الجواز فى ايه طيب اتجوزو يخلفونى ليه عارفة انا اللى ربونى كانو الدادات اللى امى كانت بتغيرهم واحدة جديدة كل كام شهر علشان متعلقش بيهم لان في واحدة منهم انا حبيتها اوى هى كانت حنينة عليا جدا وعلشان كده كنت بقولها يا ماما امى لما عرفت طردتها وعلشان تضمن ان ده ميحصلش تانى كانت بتغيرلى الدادات كل تلت اربع شهور تجيب دادة جديدة لما كبرت شوية جدى لابويا خدنى اعيش معاه لان فعلا ابويا وامى مكانوش يعرفو عنى اي حاجة لولاه كنت بقيت زيهم ترس فى ماكنة مش انسان من لحم ودم فضلت عايش مع جدى لحد ما اتخرجت بعدها هو مات الله يرحمه وبعده ابويا مات وبعده بسنة امى انا بعت المركز بتاعهم مش بس لانى مبفهمش فى الطب لانى كمان بكرهه وهما كسبو ايه ولا اي حاجة مبنوش معايا اى ذكريات علشان يبنو مركز كبير سابوه وماتو وانا بعته صفقة خسرانة ميه فى الميه عملوها هما الاتنين
انتى عارفة انا اخترت نور طليقتى ليه
رهف :ليه
عيسى :علشان هى كمان تربية الدادات والدها ساب والدتها وسافر بره واتجوز وخلف ونسيها ووالدتها انشغلت بشركتها والاعمال الخيرية عن بنتها هى اصلها كانت سيدة مجتمع قلت انها زيى داقت من نفس الكاس مع اب وام وجودهم زى عدمه الفرق ان والدها فعلا مكنش موجود فى حياتها خالص
وانها هتفهم انى مش عايز ولادنا يبقو زينا قلت ان فاقد الشئ اكتر واحد بيعطيه لانه اكتر واحد عارف مرارة فقدانه
رهف :مش دايما ده بيكون صح فى ناس بتربي ولادها على نفس اللي هى اتربت عليه بيخلوهم يعانو من نفس اللى هما عانو منه مع اهاليهم تقدر تقول كده بينتقمو لنفسهم فى ولادهم
عيسى :هى كانت رافضة بالعافية سابت الشغل واكتفت بخروجاتها مع اصحابها علشان تهتم بمروان شوية كان فى دادة ليه بس انا كنت مصر انها تكون موجودة فى حياته علشان ميقولش زيى للدادة يا ماما
اللي صدمنى ان نور مش بس دوقت مروان من نفس كاس الاهمال اللى دوقنا منه انا وهيا مع اهالينا لأ هى كمان دوقته من كاس الهجران اللى ابوها دوقهالها لما نسيها هى وامها كأنهم مكانوش موجودين فى حياته فى يوم من الايام
هى عملت كده معاه بالمللي
اكتشفت انى حسبتها غلط وانى لا اخترت الزوجة المناسبة ليا ولا الام المناسبة لابنى
وعلشان كده كان صعب عليا اوى انى اكرر تجربة الزواج تانى لانى خايف اختار لابنى ام مش مناسبة للمرة التانية
لحد ما ربنا بعتك ليا انتى تقريبا كنتى بتربى مروان معايا من خلال فيديوهاتك بتربيه معايا من غير ما تعرفى
لحد ما الحمد لله بقيتى بتربيه معايا فعلا
رهف :وتفتكر ده كفاية عن انى عمرى مهقدر اجبلك طفل
عيسى :ده اكتر من كفاية يا رهف
انا معرفتش يعنى ايه بيت دافى من بعد موت جدى غير لما عرفت بيت اهلك وبعدها حسيت بالدفا فى شقتى لما سكنتيها معايا قبلك انا كنت عايش فى برد
برد كان نفسي ابنى ميعرفوش وعلي ايدك وبسببك ده حصل انتى مش فى موقف ضعف يا رهف انتى فى موقف قوة لا انا ولا مروان نقدر نستغنى عنك او عن اهلك اللى هو بيقولهم جدو ونانا والدك اللى مبيقوليش غير يا عيسى يا ابنى ووالدتك اللى بتحضنى كل ما تشوفنى انتى عارفة ان امى مكنتش بتحضنى خالص مش فاكر انها حضنتنى ولو لمرة واحدة في حياتها..انتى بتعيطى ليه
رهف :علشانك بنزل دموع عارفة انك مش هتنزلها بنزلهم انا علشان ترتاح ها ارتحت ولا اعيطلك شوية كمان
عيسى وهو بيضحك :مش عارف ازاى بتضحكى وتضحكينى وسط دموعك كده اقولك على سر يا رهف
رهف وهى بتمسح دموعها :قول
عيسى بابتسامة :انتى احلى حاجة حصلتلى فى حياتى
رهف بابتسامة :وانت فرحه عمرى كله وامانه انا مش ممكن اخاف وانت جنبى انت سكنى وامانى وقرة عينى وحب حياتى يا عيسى
عيسى :يعنى انا بحاول اعبرلك عن مشاعرى واقولك كلام حلو تقومى انتى تعلى عليا وتقولى كلام احلى منه بكتير ينفع كده برضه انتى راضية عن نفسك يعنى باللى عملتيه ده
رهف :انت كلامك اغلى لانه نادر زيه زى الاحجار الكريمة النادرة والثمينة
عيسى وهو بيضحك :شوفى حتى وانتى بتحاولى تراضينى ومتخليش شكلى وحش برضه كلامك احلى انا يئست يبنتى انتى ملكيش منافس
رهف وهى بتبص في الساعة :يا خبر ابيض بقالنا ست ساعات مخطوبين قصدى اتاخرنا اوى عليهم زمان ابيه امجد جه واخد ليلى وولادهم ومشيو وزمان مروان نام
عيسى :مش مشكلة هنروح نصحيه وناخده ونمشي
رهف :انا عندى فكرة
عيسى :انا عارفها النظرة دى دى نظرة افكارك المجنونة قولى واشجينى
رهف :ما بجملت الاختلاف اللى بيحصل النهاردة فى يومنا اللى زى العسل ده نبات عند اهلى واهو تبقي اول خطيب يبات مع خطيبته فى بيت اهلها اظن مفيش انحراف اكتر من كده عاملة الواجب معاك وزيادة
عيسى وهو بيضحك :والله ما جصرتى قشطا موافق بس هنقول لاهلك ايه لأ انا هتحرج
رهف :احنا مش هنحتاج نقول هما هيمسكو فينا انت اعمل محروج فى الاول وبعدين روح ظارفهم واحدة بس لو مكنتش تحلف يا عمى وبس كده الموضوع هيخلص
عيسى :ايه الدماغ دى لا ده انتى تيجى تشتغلى مكانى بقي
رهف وهى بتضحك :شفت دماغ مراتك اللى مفيش منها علشان تعرف انى بس مش عايزة اقطع عليكم وسيباكم تاكلو عيش
انا وعيسى عمرنا مخلفنا مع انى كان نفسي فعلا كان نفسي مش بس علشان حبى للاطفال لأ علشان حبى لعيسى نفسه كان نفسي في طفل منه يكون مزيج مننا احنا الاتنين وكان نفسي اجيب اخ او اخت لمروان علشان ميبقاش لوحده بس ربنا مأرادش وانا صبرت واوقات كده كنت بحس بالرضا وطبعا الرضا اعلي من الصبر كنت بتمرجح بين الصبر والرضا بس الحمد لله مكنتش بعترض على قضاء ربنا خالص
الصبر ليه اجر عظيم خصوصا لما نجاهد نفسنا فى الصبر على ابتلاء عظيم
محدش بيختار ابتلاءاته ومحدش بيختار مميزاته ولا عيوبه محدش بيختار اهله ولا حد بيختار ولاده الحاجات دى كلها رزق ومحدش بيختار ربنا يرزقه بايه ويمنع عنه ايه ربنا سبحانه وتعالى هو اللى بيختار لانه هو اللى بين ايديه امورنا كلها انما احنا اللى بنختار نرضى برزق ربنا ولا نعترض ونقنط ونسخط ده بقي اللى فى ايدينا احنا
اللى بيرضى بيرتاح بيكسب دنيته واخرته لانه بيكسب رضا ربنا وحبه
انما اللى بيعترض بيكون دايما تعبان وشقيان بيخسر دنيته واخرته لانه بيخسر رضا ربنا وحبه
احنا اللى بنختار نرضى ولا نعترض احنا اللى بنختار نسعد ولا نشقى تعالو كلنا نختار صح نتعب ونتحمل ونصبر ونحاول نرضى منعترضش منقولش ليه يا رب ليه بعد عننا حاجات ليه خسرنا ناس كانو اقربلنا من نفسنا ليه فقدنا ناس بنحبهم ليه اتوجعنا واتخدعنا من ناس بنحبهم ليه مدخلناش الكلية اللى احنا عايزينها ليه مشتغلناش فى المكان اللى كان نفسنا نشتغل فيه ليه وليه وليه ربنا اكيد ليه حكمة من اى حاجة بتحصلنا تعالو نثق فيه وفى حكمته وكرمه ورحمته ونرضى
عارفة ان الفيديو المرة دى مختلف عن فيديوهات صغيرى وصغيرتى بس الكلام ده شاغلنى جدا بقالى مدة وحبيت اشارككم فيه اتمنى تكونو استفدتو منه اليكم جميعا تحياتى منى انا رهف عبدالرحمن خلو بالك من نفسكم ومن ولادكم ومن اهاليكم ومن كل اللى بتحبوهم اشوفكم الفيديو الجاى والسلام عليكم 💖
#حكايات_منار فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر
