فصلية اظفرها مكسور

هاريشااا

اي ياماما🧓🏻 ماتكليلي شبيدي عليج هذا ابوج متعرفي.. وافقي والله كريم بلكي يطلع خوش ولد..

الاب. چراخ چريخ مو بكيفج لج... لازم توافقين..

اهي اهو اهي اهو..😭

اي بابا موافقه بس بعد لاانت ابوي ولااعرفك انت ظالم ظالم ظالم..🙄

واجو اهل العريس وأم العريس👵🏻 كيوت وفقيره واخواته يحبون العروس كلهم بس هو مزعوج ومعنفص بكرسيه 😡

لان عرف هي رافضته ومجبوره ومو شرار ابن هرار الي ينرفض

اني اعلمج بسيطه جا الغرفه السوده والجاكوزي والبردات السود

والعطور والساعات واليشماغات والمحزمات المن اريدهن غير اغسل دماغج بيهن عن الدراسه بس اصبري..👀

اي المهم عريسنا متفق ويه الاب هو عقد هو عرس حتى امه خطيه ماقابله عليه ولاابو

بس هو بعد ميكدروله ابن شيخ العشيره وأمر

هاي شنو شجاب العشاير علينه طلعو طلعو من الموضوع طبينه بغير فرع..

هذا ضابط برتبة عقيد عميد ركن قائد قوات نائب👮🏻‍♂️

وعمره خمسه وعشرين مناسب للبطله حتى يكون.. معليكم بالتدرجات بالرتب ترهم ترهم غلسو ياما غلسنه 😂

اي راحت عروستنا 👰🏻اكيد للسالون وطلعت تجنن خلت مكياج ناعم اي هو ناعم وأوف وايت لازم ذني يندمجن سويه الجملتين..

ودموعها تنزل على خدودها.. من شافها شرار عيونه صار يطاير الشرار منهن منا ومنا حتى عباية امه مشتريتها هستوها بورقة انزرفت.. 😎😁

بس شتسوي المره ساكته ماتكدرله.. لايرجعلها سكران بتالي الليل ويفضحم..

اخذوا عروستهم.. وامه شافتلها خوش خياطة عبي اتفقت وياها تگلبلها العبايه خو ماتبقى العبايه مزروفه 😂😂😂😂

دخلت هروشه المحروسه للقصر المرعب وهي ترجف ولازمه ايده وهو يسحلها منا ويرجعها منا...

وحتى بدلتها خطيه لاحها طفار بس ميخالف بس كون تعدي على خير...

صعدوا بالطابق المخصص لشرار ومحد يتقرب منه كلها تخاف تتقرب من غرفة شرار وملابسه..

ولايتقربون من اكله تكش نفسه اصلو بيأرف أوووي.. 😡

اول مادخلو للغرفه انصدمت بشكلها هروشه وبقت صافه وعيونها تتوغل بكل ارجائها

رادت تروح قريب المرايه ونست نفسها ورادت تلزم ادواته... صرخ بيها ورج البيت رج...🗣

وجابها تكفخ يسحلها منا ويرجعها منا ردمها بالباب وسال الدم على وجهها وفشخها بعد بكل شي يجي كدامه..

واغمى عليها من كمية الضرب.كل هذا بس لان رفضته للمحروس..

النقيب العقيد المقدم الرائد كال اني زعطوطه ترفضني والف وحده تموت عليه وتتمناني

ياعيني منو جابرك روح عليهن.🙄

ماعلينا نامت الاميره النائمه 😴بسلام ياسلام هذا وهي الف فشخه براسها..

وتون من الالم شكد اكره هذا المصطلح بس مضطرين جاي بسياق الحديث.

كعدت الصبح ماشافته موجود بالغرفة كامت تركض تريد تبدل ملابسها..

تركض وهي امس مسحوله عادي المفروض نايمه مستشفى وفد خمس ست خياطات ماعلينا..🤗

وفجأه تراااا..... دخل عليها شروري وهو دينشف بكفشته..🧔🏻

سوووري اقصد بشعره اخذتلها صفنه عليه وانسحرت بجماله وجمال المي الي يقطر من شعره

على عضلات جسمه ونست ابو الكتله مالت امس..

ها لالا اشويه يمكن رجعت لوعيها وتذكرت هي سلعه باعوها.. واشتراها هو..

تقرب عليها وفززها بصوته الجهوري خو كولي خشن جا اكيد خشن غير رجال يا يمه...

وكللها ممنوع المحج نازله جوه فتهمتي 😡

هي خطيه رجعت خافت وتذكرت الصار امس لان يمكن لوهله ماشافت العناجير التارسه وجهه..

طلع وقفل الباب ورا وشغل التبريد ورش معطر مميز

راحت عروستنا من جديد بسابع نومه وماطفت عليها الكهرباء ولالعب بيهم طوبه ابو المولده..☺️

امه كلتله ماما خطيه خلي ندزلها اكل ماقبل وكللها رجاعاً رجاعاً

لحد يدخل بيني وبين حرمتي هلو هاي شكو شو تحولت اللهجه.. 😮

هنا بطلتنا كعدت قبل ربع ساعه من النوم وشافت الچاكوزي بوسط الحمام ويمه انواع الغسول المستورده من باغيس..

ماقاومت كل هذا وهم نست راسها المفشوخ وعناجيرها ودخلت تستحمس وتستمتع بفقاعيع الجاعوزي..

وتغني ليالي الانس في فينا... دخل شرشوري المعصب وشافها مستخدمه حمامه...

شو ماسوه شي وابتسم نص خد 🤭والنص الثاني بقى زعلان..

هي تفاجأت بوجوده لحظه ملاحظه ترى هروشه تسبح بملابسها لااا تفهموني غلط اني حبابه مااكتب وكاحه 😂

هي رفعت راسها المعنجر من ليلة امس وانسحرت بنص الخد الضاحك ومن هنا بدت شرارة الحب وفتيل الهيام يسري بينهم...بنص خد

نعوفهم بالچاكوزي وحدهم ونسد الباب على الدراسة الي راحت بالبيباي وعلى التفشخ والاستعباد والاهم ابتسم ابو عيون شرار...

وفي مستقبلهم الزاهر بالعشق والهيام

بقى بطلنا شرار اعصابه دائما جواها بريمز وبسرعة يتنرفز

يضربها الصبح على ابسط خطا وبليل يكللها عذريني هروشتي...

وهي تفرح وتكول فديته يحبني حبيبي الضابط العقيد العميد المقدم 👮🏻‍♂️

لهنا انتهت قصتنا ومابيها جزء ثاني انتوا من مخيلتكم ابتكروا اذا يعجبكم 😊

اكيد يتزوج عليها في يوم من الايام وهم تطلع نزوه ويرجع لان هي العزيزه الغاليه وهااا نسيت صاروا عدهم نص درزن ولد. 😒

القصة كتبت للضحك فقط لاتمس اي قصة اخرى تحياتي وتصبحون على ماتتمنون 😘