الكبيره بقلم / لولو_محمد ( كامله )

الحلقه ١٨١

(((((( الكبيره ))))))
#لولو_محمد
الحلقه ١٨١
رحمه / لو انت ما دافعتش عنى مين يدافع الكلمه توجع من اى حد منك انت تقتل
مسعد / و انا ما يهمنيش الا مصلحتك و سعادتك
شاكر / ما ينفعش حد يتقدم طول ما محمد متقدم
مختار يغل فى نفسه
شاكر / انتى اللى تقررى
رحمه / محمد زينه الرجاله كلها
شاكر / بس ؟؟ بس
رحمه / مفيش بس ... مفيش واحده فى الدنيا ممكن ترفض
شاكر / مش بالاحراج هو
مختار / خلاص يا شاكر
شاكر / من حقها
محمد / رحمه انا عارف انى صغير و انك تستاهلى احسن منى مليون مره بس انا شاريكي و هتقى ربنا فيكي و يعلم ربنا هحطك فى عنيا و قلبي ما توافقيش غصب بس لو وافقتى هبقي أسعد واحد فى الدنيا
هند / طب و الله حنين و قلبه ابيض و دمه خفيف و بعدين هو انتى هتلاقى حما زيي دا انا سكر
رحمه تضحك هند تحضنها
محمد / نقرا الفاتحه ؟
شاكر واقف يبص لابوه و يبص لرحمه و يبص لابوه و يبص لرحمه
عباده / السكوت علامه الرضا ؟ على بركه الله
الستات كلها تزغرط شاكر يسيب المكان و يجرى على اوضته و عباده بيحضن محمد و مختار واقف فى جنب حزين هند تروح تمسك ايده
هند / بنت حلال و هتصونه و يمكن ربنا يعدل المايل على ايديها
مختار يبتسم و يهز راسه
..........................
فى السيكشن عند ناصر
ناصر قاعد و جنبه على اليمين فاضي بيقرا فى كتاب نور تدخل تعدى من قدامه و تقف على يمينه و تشاورله على الكرسي 
نور / دا فاضي ؟
ناصر / لا محجوز
نور / تمام شكرا
نور تروح تقعد فى اللى بعده و ناصر عينه فى الكتاب شاب يدخل
الشاب / فاضي ده
ناصر / ايوه اقعد
نور تستغرب و يبان عليها الضيق و ناصر ما بيرفعش عينه من الكتاب نور تبص قدامها و تفضل تخبط بالقلب على الكرسي بعصبيه
.........................
فى اوضه شاكر
شاكر قاعد بيعيط على السرير مختار يفتح الباب شاكر يمسح دموعه مختار يدخل يروح يقعد جنبه
مختار / ليه ما قولتليش من بدرى ما كانش كل ده حصل
شاكر ساكت يبص الناحيه التانيه
مختار / لعله خير ... ما لكوش نصيب فى بعض ... ما لكش رزق فيها و لا ليها رزق فيك
شاكر / ما بيحبهاش و لا هى بتحبه
مختار / و لا بتحبك لو كانت بتحبك كانت رفضته
شاكر / يمكن فى ظروف تانيه لكن اللى حصل
مختار / اللى حصل حصل مش هنقدر نغيره و اى كلمه او تصرف مننا هتزيد الطين روبه
شاكر / طب انا اسف بس حضرتك جاى تقولى ايه يعني انا ايه المطلوب منى دلوقت
مختار / انت فى حد غيرك عارف بمشاعرك ناحيه مرات اخوك
شاكر ياخد نفس عميق و يكتم جواه و يقوم يفتح الشباك و يقف فيه 
مختار/ انا فى ابتلاء شديد اوى الاول ناصر و دلوقت انت و حتى محمد ... ما حدش بيتجوز جدعه يعني بس اللى حصل حصل و ما اقدرش اغيره دا قراره و قرارها و كل اللى اقدر عليه انى اساندهم و اوجههم امر واقع و اتفرض علينا كلنا اختبار ليك و لاخوك
شاكر / تمام
مختار/ اوعدنى انك هتعدى منه
شاكر يبص لمختار
شاكر / ايه هبص لمرات اخويا يعني !!! اكيد عمرى ما هعمل كدا يعني اكيد لو اخر واحده فى الدنيا لو هموت من غيرها مش هينفع يعني
مختار / مفيش اقوى من الشيطان يا ابنى
شاكر / مش ده كلامك لينا مش كنت على طول تقول الشيطان مفيش اضعف منه استعاذه تحرقه ايه هيجي عليا و يقوى ... ما تقلقش يا بابا انا عارف حدودى كويس
الباب يتفتح فجاه و محمد يدخل شايل بدله و جلبيه و عبايه
محمد  / انتوا هنا و سايبيني لوحدى انا مش عارف المفروض اللبس انهى فيهم و عمى عباده بيقول انزل اشترى جديد و انا مش هلاقى وقت الف يا دوب اروح احلق فهلبس من عندى و خلاص بس اللبس ايه من دول انا بحب العبايه دى اللبسها و لا البدله اشيك انهى احلى
شاكر و مختار يبصوا لبعض
محمد/ اعتقد الجلبيه و العبايه أفخم صح
مختار / تعرف ايه الافخم
محمد / ايه ؟
مختار / العبايه الحرير اللى ستك انتصار جابتهالى هديه من الحج بيتهيالى هتنطق عليك تعال اما اديهالك تقيسها
محمد / بجد!! دى كانت غاليه اوى 
مختار / ما انت هترجعها يا روح امك انت مش هتورثنى بالحيا
محمد يضحك مختار يبص لشاكر
شاكر / تحب اجى معاك عند الحلاق الاول و لما نرجع تلبس
محمد / ماشي يلا بينا
مختار يبتسم و شاكر يروح ياخد محمد تحت باطه و يمشوا
مختار / اللهم انى لا اسالك رد القضاء و لكنى اسالك اللطف فيه
..............................
فى شقه مسعد
نوسه / مين دى يا اختى اللى احضر فرحها دا انا هعدى على بيوت البلد بيت بيت اقولهم هيجوزوها قاصر عشان يستروا عليها و افضحها و افضحهم
ليلى / ايوه اعملى اياكش يقتلوكى و لا يحبسوكى و لا يولعوا فيكي و نخلص
نوسه / بقولك ايه يا تفكرى معايا يا تنقطيني بسكاتك
ليلى / و الله اللى اعرفه ان الريح لما تعدى طاطيلها يا اختى و بدل ما نعاديها نشوف هنستفيد منها ازاى كدا كدا مصلحه اسكندريه طارت
نوسه / انتى فاكره انك هتطلعى من ورا بنت المبقعه دى بجنيه يا اختى ما كانش انعزر دا غير اننا دلوقت مضطرين نرجع للراجل فلوسه و كدا مش هيبقي معانا فلوس نشارك المعلم امجد يعني موت و خراب ديار
هاجر / حد حاول يكلم حماده و عرف يوصله
نوسه / ادخلى اوضتك و ما تخلينيش اشوفك انا عارفه ان انتى اللى قولتيلها يمين بالله ان ما كنتى بنتى لكنت اكلت كبدك
هاجر / حقك تشكريني انى نجدتكوا بدل ما كنتوا هتودوا نفسكوا فى داهيه
نوسه تقوملها
نوسه / و حياه امك ما هيخيل عليا انتى عملتى ده عشان نفسك بعتى امك عشان تفضلى خدامه عند الزنايته
هاجر / اهون بكتير من حاجات تانيه مضطرين نعيشها فى البيت ده
ليلى / و الله مش عجباكى عيشتنا الباب يفوت جمل و بصراحه انا لو منك اعملها على الاقل انتى رحمه هتشفعلك هناك و دلوقت مش هتبقي مجرد خدامه دا انتى اخت واحده من حريم السرايا يعني اللى يفيض منها هيصب فى عبك و اكيد رحمه مش هتنسي جدعنتك معاها
نوسه / بقى انا شايله هم الراجل اللى هنروحله من غير العروسه و انتى بتفكرى فى مين هيلم فتافيت رحمه
ليلى / خليكي كلى فى نفسك كدا اياكش تخلصي و نخلص منك انا هقوم اللبس و اللبس البنات اياكش ربنا يعدل حالهم المايل و يعجبوا حد السرايا هتبقي مليانه عرسان
نوسه / يا اختى دا انتى و لا دكاتره التجميل يقدروا يعدلوا حال بناتك المايل بخلقهم اللى تقطع الخميره من البيت دى
ليلى / سبنا الجمال لبناتك يا اختى ما شوفناش من ورا جمال وش امهم حاجه يعني ... يلا يا بت منك ليها افتحولى الشنط دى و طلعوا احلى ما فيها عوزاكوا تكيدوا العوازل كدا و تلعلطوا
نوسه تعوج بقها هاجر تروح ناحيتها
نوسه / روحيلها
هاجر / بجد !!
نوسه / مش رضيتي بالفتافيت و بعتينى روحيلها اياكش لما تتستت و تبقي ست السرايا ما تكونيش انتى اول واحده تطلع عقدها عليها روحى
هاجر تهز راسها و تمشي هدير تدخل
هدير / اروح انا كمان ؟
نوسه / انتى هبله يا بت ازاى يعني اطلعى استحمى و اعملى شعرك و اللبسي حاجه عدله خلينا نشوف هنروح و لا هنعمل ايه على ما ابوكى يرجع
هدير / و انا مالى انا ما انا سمعت كلامكوا
نوسه / صبرنى يا رب
نوسه تسيب هدير و تمشي
هدير / هو ايه ده يعني ؟
...........................
فى الكليه عند ناصر
ناصر خارج من السيكشن نور تنادى على ناصر
نور / دكتور ناصر بعد اذنك دكتور ناصر لحظه
ناصر يقف و نور تحصله
نور / ممكن اعرف ليه حضرتك كدبت عليا ان الكرسي محجوز
ناصر / كان محجوز و لما صاحبه جه قعد فيه
نور / ما حدش قال لحضرتك الكدب حرام
ناصر / تمام ... اسف مش هعمل كدا تانى
نور / احسن
نور تمشي ناصر يتنهد تليفونه يرن
ناصر / ست الكل وحشانى
هند / لا ما هو باين ... تقدر تيجي النهرده ؟
ناصر / انا لسه ما خلصتش الكليه حتى و الطريق اكيد مش هقدر بس خير فى حاجه و لا ايه؟
هند / مش عارفه اقولهالك ازاى ههههههههههههههههه النهرده فرح اخوك محمد
ناصر يضحك
ناصر / لا حلوه
هند / انا ما بهزرش حصل حوار كدا المهم ان النهرده فعلا دخله محمد و اكيد يوم زى ده مش هيكمل من غيرك
ناصر / ماما انتى بتتكلمى جد ؟ دخله ايه ؟ محمد مين
هند / و الله انا نفسي ما مصدقه بس و الله دا اللى حصل
ناصر/ و مين اللى امها دعت عليها بقي فى التدبيسه دى ؟
هند / رحمه
ناصر يتصدم
هند / المفروض كانت هتسافر مع اهلها و فجاه لقيناها راجعه بتصرخ اللحقونى هيجوزونى غصب من طليق اختى و اهلها جم و مسكنا فى خناق بعض و دول يرموها بالباطل و دول يتهموها بالكدب و اهل البلد اتلموا ما فضهاش غير محمد ما اعرفش ربنا اوحاله بالفكره دى ازاى و قال انا هتجوزها و اثبتلكوا كلكوا ان كل الكلام ده باطل و كدب و البت سالوها و وافقت و اهو بيجهزوها جوه اهو و اخواتك و ابوك راحوا يحلقوا قولت اكلمك يمكن تلحق تحضر اليوم كدا كدا مش مظبوط بس اكيد اخوك مش هيتجوز كل يوم يعني فلو تقدر حاول تحضر
ناصر / هو حضرتك بتتكلمى جد هو الكلام ده بجد ؟
هند / اقولك ايه بس و الله لولا ابوك حاشنى كنت لطشت للى اسمها نوسه دى و نزلت فيها عض
ناصر / و شاكر عمل ايه وسط كل ده
هند / و الله كلنا كنا على اخرنا بس عدى عدى الحمد لله نخلص النهرده و نروقلهم عيله السو دول
ناصر / و هو عامل ايه دلوقت
هند / مين ؟
ناصر / شاكر
هند / كويس راح مع اخواتك يحلقوا مش انا لسه قيلالك
ناصر / بقولك ايه انا هحاول اجى اقفلى معلش عشان اشوف هعمل ايه
هند / ماشي يا حبيبي فى انتظارك
ناصر / فى حفظ الله ... هو فى ايه
ناصر يحاول يتصل بشاكر يكنسل عليه
ناصر / هو فى ايه بجد
ناصر يمشي
..........................
فى البلد
زحمه شديده فى المطبخ و ستات رايحه جايه هند تشد كرسي و تقعد على الباب خديجه تدخل شايله صينيه فاضيه و صوت مزمار و طبل و ضرب نار من بره
خديجه/ جرا ايه يا ام العريس نخيتي بدرى اوى هههههههههه
هند / موسوعه جينيس لاسرع جوازه فى التاريخ ما شوفتش كدا كل حاجه فى كام ساعه ازاى بس
خديجه / ايد على ايد تساعد
هند / كله كروته و البت يتيمه مش بتفتح بقها الله يعينها و يصبرها
خديجه / بكره نعملها احسن حاجه و ندلعها اكتر دلع طب لعلمك بقي النهرده عيد و بطه و البنات فوق ايه هاتك يا دلع و شخلعه
هند / تفتكرى يا خديجه تفتكرى هيعيشوا مع بعض عيشه طبيعيه اصلا
خديجه / هيعوضوا بعض البت ذكيه و هو راجل و هيطبعوا على بعض بسرعه
هند / ربنا يصلحلهم الحال
صمت خديجه تدخل المطبخ
خديجه / عقبال عيالكوا الهمه يا جماعه مش عاوزين الصوانى تفضي دا فرح الغالى
ست ١ / ربنا يتممله على خير
ست ٢ / لولولولولولولولولولى
...........................
فى الجنينه بره
الرجاله بترقص و فى ناس داخله خارجه من المضيفه بتاكل مغاورى و الجوارحه يدخلوا عباده يستقبلهم
عباده / هو انت على طول متاخر كدا فينك يا راجل من بدرى
مغاورى / و الله لو كنت حضرت العركه كنت دبحتهم و لا سميت عليهم انا لولا محمد ما كنتش جيت اصلا
عباده / فاهمك بس صدقنى غصب عن الكل
مغاورى / مره لابنه و التانيه لبنته اهل البلد هيقوموا علينا بعد كدا و مش هتعرف تقفلها
عباده / عشان خاطر رحمه
مغاورى / الرجاله قلبوا الدنيا على اسم النبى حارسه فص ملح و داب حتى تليفونه مش ظاهر على السيستم و لا عارفين يتتبعوه مع ان جربنا نرن عليه رن ما طلعش غير متاح و لا حاجه
عباده / انا مش فاهم اما الليله تخلص نجيب دياب و منصور يشوفولنا الحكايه دى بس عدى النهرده يا مغاورى خلى العيال تفرح
مغاورى / عشان خاطرك انت بس امال فين
محمد يدخل بيجرى يحضن مغاورى
مغاورى / عريسنا سيد الرجاله ايه الحلاوه دى الله اكبر الله اكبر ايوه بقي هههههههههههههه
محمد / انفع يعني
مغاورى / ابوك نفع يبقي اى حد ينفع
مختار يدخل
مختار/ قد البق ده يا مغاورى
مغاورى / الف مبروك يا ابو العريس الف مليون مبروك
مختار / عقبال شاهين يا رب
مغاورى/ انت بتقول فيها ما قرينا فاتحته على وفاء بنت الحج رضوان كبير السوالمه
عباده / جديده النداله دى يا مغاورى
مغاورى/ الحكايه كلها سكيتي لحد ما البت و الواد يخلصوا امتحانات حتى ما بيكلموش بعض و لا بيشوفوا بعض باذن الله فى الاجازه نعمل ليله و نفرح و نجيب الشبكه و كل حاجه تبقي رسمي
مختار / عين العقل
مسعد يدخل السرايا مع مراتاته و بناته
مغاورى / و له عين كمان و الله لانا
عباده / اهدى اهدى خلى الليله تعدى كدا كدا حسابنا ما خلصش ..  جاى علينا جاى اسكتوا
مسعد يدخل
مسعد / السلام عليكم مساء الخير ازيك يا عريسنا ايه الاخبار
محمد / الحمد لله ... عن اذنكوا اسلم على صحابى
مختار / خد راحتك
مسعد / بعد اذنك يا باشمهندس مختار كنت عاوزك فى كلمتين
مختار / اتفضل دا محدش غريب
مسعد / كنا عاوزين نورى الجماعه بس شبكه رحمه
عباده / ما تقلقش البلد كلها بتتفرج عليها جوه
مسعد / طب احنا مسافرين الفجر و كنت بفكر يعنى
مغاورى / ما تفكرش تاخد جماعتك و ما ترجعوش هنا تانى و ما افتكرش بنتك نفسها هيبقي ليها نفس تسمع حسك تانى
مختار / مغاورى ما يصحش
مغاورى يبص الناحيه التانيه و ينفخ
مسعد / بخصوص الشبكه
مختار / احنا هنعدى النهرده فى اوضه العريس عادى و خلينا اخوه يلم حاجته منها و ينقلها اوضه شاكر و اهو ناصر كدا كدا مسافر و من بكره هنجهزلهم جناح من بتوع العرسان نبيضه و نفرشه و ننقل فيها العرسان ياخدوا راحتهم الاوضه بيبقى فيها خزنه العروسه تحط فيها دهبها و فلوس جوزها مش عاوزك تقلق خالص على دهب رحمه احنا صعايده و الدهب عندنا زيه زى الارض ما بنفرطش فى جرام فيه
مسعد / و المهر احنا ما اتفقناش عليه
مختار / مهر ايه ما احنا هنجهز كل حاجه انت عاوز مهر فى ايدك ؟
مسعد / مش دى الاصول والشرع
عباده يحط ايده على كتف مسعد
عباده / و انت ابنك كان دفع مهر كام لسحر الله يرحمها يا مسعد بيه
مسعد / هم ما طلبوش
عباده/ هو ابنك فين مش كان اولى يجي يحضر فرح اخته
مسعد / ما اعرفش و اتمنى ما يكونش عندكم الواد اتهرى
مغاورى / و انت يعني فارق معاك داخل تسال عن الفلوس و الدهب الا ما افتكرت ابنك برنه حتى
مسعد/ و هو انا لحقت
مختار / روح يا مسعد كلك لقمه عشان تلحق تروح ترتاح قبل ما تسافر روح
مسعد / بس دى مش اصول دى
مختار / انا لامم الجماعه عنك لحد الليله ما تعدى هنصبح على العرسان و نفوقلك فانا لو منك اقصر الشر و اللحق نفسي
مسعد / ما انا ممكن افركشلكوا ام الجوازه دى و اخد بنتى
مغاورى يشد مسعد عليه و عباده و مختار يحوشوا الكل يبص و ينتبه
مغاورى/ دكر اعملها
مغاورى يزق مسعد فى الارض و يبص للناس يكملوا رقص مسعد يبص حواليه الكل عامل ما شافش حاجه يقوم ينفض هدومه و يجي يمشي شاكر يكعبله يتكفى على وشه تاني شاكر يروح يقومه
شاكر / الله مالك بس يا عم مسعد قوم كدا لا حول و لا قوه الا بالله قوم بس كدا قوم
مسعد يقوم متعصب يجي يسيب السرايا و يمشي جابر يمنعه
جابر / على فين يا عمى الماذون بياكل جوه تعال اعرفك عليه و اعشيك تعال تعال خلينا نخلص امشي
مسعد يبص لجابر مكشر و الغضب باين عليه يلم نفسه و يمشي على المضيفه شاكر يبص لمختار مختار متابعه و مبتسم شاكر يروح المضيفه يخدم على الناس مختار الابتسامه تروح من وشه و يتنهد
..............................
عند رحمه فى اوضه فاطمه
فاطمه / قولتلهم ياخدوا اوضتى البت دى اللى رفضت
رحمه / ما عاش و لا كان اللى يطلعك من اوضتك يا بطه
فاطمه / قلبي انا اسم الله عليكي و على حلاوتك تسلم ايدك يا ياسمينا حقيقي شغل سيما
ياسمينا / و انا كنت عملت ايه دا انا حتى جيت متاخر
فاطمه / كفايا مجيتك و انتى تعبانه
مريم تدخل و معاها هاجر هاجر تشوف اختها تحضنها
رحمه / جميلك مش هنساهولك العمر كله
هاجر / هيسافروا الفجر انا مش هروح معاهم عرفوا ان انا اللى قولتلك و ما حدش طايقنى و شكلهم واقعين فى حوار كبير بسبب فلوس الراجل ده
رحمه تعيط
فاطمه / جرا ايه يا هاجر دا احنا ما صدقنا
ياسمينا / على فكره يا ست رحمه المكياج مش هيبوظ فاحنا مش قلقانين عنيكي انتى بس اللى هتورم و تقفل و شكلك يبقي عره فى الصور و دى صور بتتاخد مره واحده فى العمر
هاجر / انا استاذنت ام شاكر اخليني معاكوا و وافقت انا هفضل جنبك و اساعدك و اعملك اى حاجه تحتاجيها انا مش هسيبك
فاطمه / انتى تنورى يا هاجر و كل حاجه بس صدقيني كدا كدا ما حدش فينا كان هيسيبها دى الغاليه مرات الغالى
هند تدخل
هند / الماذون تحت هتكتبوا و بعدين تروحوا الجنينه الورانيه تتصوروا و شوفى انتى و عريسك بقي تحبى تقعدى مع الحريم شويه تفرفشى كدا و لا تطلعوا اوضتكوا على طول
رحمه ساكته هند تحضنها و تنزلها الطرحه على وشها
هند / مهما حصل و مهما هيحصل انتى بنتى زيك زى البت اللى ورايا دى اللى يضايقك اكل قلبه حتى لو ابنى
فاطمه / و هو محمد عمره ضايق نمله دا حنيه الدنيا كلها طب دا قلبي محمد دا هوت دون عن كل رجاله الزنايته محمد اقسم بالله حاجه تانيه خالص
هند / قومى يا قلبي معايا قومى
رحمه تقوم و تنزل مع هند و الستات كلهم وراها
............................
فى الهول تحت
الستات قاعده بتسقف و ترقص و الاغانى شغاله و نوسه و ليلى و ست كمان قاعدين و حواليهم بناتهم محدش من اهل البلد بيكلمهم و لا بيتعامل معاهم امل تروح تقعد جنب سماح
امل / الصحه جت دلوقت و قادره تزوق العروسه و تطلع و تنزل سلالم
سماح / و انا مالى بتقوليلى الكلام ده ليه
امل / و هو فى حد بيسمع
سماح / عنهم ما سمعوا اللى ياكل على درسه ينفع نفسه
امل / العيب مش عليها العيب على عمتى ماجده اللى مقوياها
سماح / طب اسكتى بقي عشان عينها علينا و مركزه
امل تتعدل فى قعدتها و تسقف هند تنزل و معاها رحمه الستات كلها تزرغط
ليلى / شايفه الدهب و الصيغه
نوسه / تدعيلنا بقي ما لولانا ما كانتش اتجوزت الجوازه دى
ليلى / لما دى شبكه الصغير امال الكبار ايه
نوسه / صحيح البخت المعدول للمأمله ام بربور
ليلى / بنتك شكلها سستمت نفسها جنبها جدعه مش زينا اختارت صح يا ريتني عملت زيها
نوسه / و ماله
ليلى / هنعمل ايه فى اسكندريه هنرجع للراجل فلوسه ؟
نوسه / ما اعرفش الفلوس كلها مع مسعد و حماده و حماده مش لاقينه خلينا نغور من هنا و بعدين نشوف قومى قومى نسلم على العروسه
ليلى / بلاش خلينا قاعدين ام العريس لو قربتى منها هتجيبك من شعرك
نوسه / و لا هى و لا الاطخن منها دا انا اجيبها تحت رجلى و اقل منها قدام الخلق كلهم
ليلى / بكيفك
عيل يدخل
العيل / الرجاله بتستاذن تدخل عشان يمضوا رحمه على القسيمه
خديجه / خليهم يتفضلوا ... اعدلوا نفسكوا يا بنات الرجاله جايه اتعدلوا
الكل يتعدل و اللى رابطه حزام تفكه يدخل محمد و عباده و مختار و مسعد و مغاورى
...........................
فى الجنينه بره
شاكر واقف فى جنب ناصر يدخل شاكر مش شايفه
ناصر / شاكر ... ايه اللى حصل
شاكر / ناصر !! جيت امتى حمد الله على السلامه كويس انك جيت محمد اكيد هيفرح لما يشوفك
ناصر / هو فى ايه يا شاكر ازاى ده حصل
شاكر / قدر الله و ما شاء فعل طمنى عليك اكلت الاكل كتير جوه تعال كلك لقمه
ناصر / اكل ايه بس استنى فهمنى
شاكر / افهمك ايه بس خلاص بقي ما عادش فيه فايده اللى سبق اكل النبق
ناصر / بالبساطه دى
شاكر / هو اجدع منى حلال عليه يتهنوا ببعض
ناصر / و انت عامل ايه
شاكر / هعمل ايه يعني ... بقولك ايه دا فرح اخوك و هو مش هيتجوز كل يوم ... كتبوا خلاص اهم روح باركله يلا دا هيفرح اوى لما يشوفك
ناصر يبص وراه يلاقي محمد خارج من السرايا و مانج رحمه و فرقه المزمار بتزفهم للجنينه الورانيه
شاكر / يا عم انت هتنح روح باركله اقولك تعال انا جاى معاك اتحرك
شاكر يشد ناصر و يعدوا وسط الناس اللى عماله تحضن و تسلم على ناصر لحد ما يوصل للعريس و العروسه بيتصوروا
محمد / ناصر !!! حمد الله على السلامه انا مش مصدق انك قدرت تيجي
شاكر / و هو يقدر يفوت يوم زى ده دا انت الغالى يا جدع
محمد / بس ايه رايك فيا بقي انفع ؟
شاكر / امال سيد العرسان كمان بس روح يلا لعروستك بقي مستنياك يلا
محمد ينتبه و يضحك و يجرى يقف جنب رحمه و يمسك ايدها و يتصوروا
شاكر / ايه مالك واكل سد الحنك و لا ايه حكايتك
ناصر / انت اللى ايه حكايتك
شاكر / بص كدا ... خلصت يا ناصر ... خلصت
شاكر يسيب المكان و يمشي و ناصر واقف متابع محمد و رحمه و هم بيتصوروا
........................
فى جنب فى الهول
منصور / خير بترنى
ياسمينا / كفايا كدا عاوزه امشي
منصور / فى حاجه حصلت و لا ايه
ياسمينا / مش مرتاحه للى بيحصل و خايفه كلمه تفلت منى ابوظ الليله كلها ... انا فاهمه ان الظروف فرضت الوضع ده بس احنا بنمثل على مين ؟ الكل بيضحك و يرقص و يسقف و يغنى بس ما حدش فيهم مبسوط رحمه ما بتفصلش عياط... دا منظر عروسه دى ؟ دى ضحكه عروسه؟
منصور / سالوها و قالت موافقه
ياسمينا / انا بجد مخنوقه اوى يا منصور و بجد بجد عاوزه امشي ... بجد
منصور / تمام اهدى هنروح نسلم و نقول انك تعبتى شويه و نمشي على طول تمام ؟
ياسمينا تهز راسها تروح مع منصور يسلموا
........................
فى اوضه محمد
السريرين مضمومين و صينيه العشا محطوطه على مكتب فى جنب و متغطيه و هند قاعده جنب رحمه على السرير بيتوشوشوا و مختار واقف مع محمد على الباب
مختار / لو احتجت اى حاجه رنلى بس و ما تنساش اللى قولتهولك
محمد يهز راسه
مختار / يلا يا ام العريس
هند تطبطب على رحمه و تبوس راسها و تروح لمحمد
هند / خد بالك من عروستك
محمد يبتسم هند تمشي محمد يقفل الباب بالمفتاح
محمد / كان يوم عجيب ... بس الحمد لله خلص على خير ... تعرفى احلى حاجه فى الموضوع ايه ... مش هحضر درس الكيميا بكره دى ماده بنت كلب اقسم بالله ما بحبها و لا بطيئ الاستاذ بتاعها راجل بايخ ... لازم كل حصه يقعد يحكيلنا عن تاريخه و مغامراته فى المعمل ... لا و احنا لازم نضحك و نهاها كدا
مفيش رد فعل من رحمه محمد يروح يقعد جنبها يلاقيها بتعيط فى صمت يتنهد و يسكت
محمد / هو انا وحش اوى كدا ؟
رحمه تمسح دموعها
رحمه / انت سيد الناس كلها كفايا انك رضيت تستر على واحده زيي
رحمه تعيط تانى
رحمه / طب انا عملت ايه لكل ده بس
محمد ياخدها فى حضنه ويطبطب عليها
محمد / انا متاكد انك ما عملتيش اى حاجه وحشه تستاهلى عليها كل ده بس اللى متاكد منه اكتر انى اكيد عملت حاجه حلوه اوى استاهل عليها واحده زيك
رحمه تهدا شويه
محمد / يعني ممكن فى ظروف تانيه ما كنتيش قبلتى بيا ... انا ما بقولش انى وحش بس مقارنه بكل اللى حواليا دلوقت ممكن ما اكونش احسن حاجه
رحمه تمسح دموعها و تتعدل
رحمه / هو انت فاكر انك لما تحاول تقلل من نفسك انى كدا هحس انى احسن مثلا
محمد / انا ما بقللش من نفسي انا لسه ما اخدتش فرصتى لسه ما اتحططتش فى اختبار حقيقي اثبت فيه نفسي زى الاكبر منى
رحمه / و انت عاوز اختبار اكتر من النهرده ايه ... انت فاكر ان فى ظروف تانيه ما كانش ممكن تتجوز حاجه احسن من كدا واحده من عيله تشرف بجد
محمد / امبرطور الصين فى فيلم مولان قالك ايه الزهره اللى بتنبت فى الصخر هى اجمل و اندر الزهور
محمد يعدى ايده من على خد رحمه يمسح دموعها تبصله يهز كتفه رحمه تبص فى الارض محمد يتنهد و يمسك ايد رحمه تبصله 
محمد / احنا لسه صغيرين و قدامنا طريق طويل نمشيه سوا كل واحد فينا جواه حته ناقصه كان بيسعى يكملها لوحده تعالى نثبت للكل اننا مش صغيرين اوى زى ما هم شايفينا و اننا نقدر نكمل بعض انا عن نفسي بعاهدك قدام ربنا انى هتقى ربنا فيكي و هعمل كل اللى اقدر عليه عشان اكون زوج صالح و اب صالح باذن الله انا هعمل كل اللى اقدر عليه عشان ما يجيش يوم و تندمى انك ادبستى فيا
رحمه تبص لمحمد و تبتسم يبتسم
محمد / تعرفى ... انا كنت موصى امى بهزار زمان ان صينيه العشا بتاعه فرحى يبقي فيها حواوشي
رحمه تضحك
محمد/ انا دلوقت هموت و اروح افتح الصينيه و اشوف ايه اللى تحت الغطا
محمد يقوم بيضحك و رحمه متبعاه و بتضحك يروح يشيل الغطا يلاقي حمام و رز معمر و فاكهه و حافظه مقفوله يفتحها يلاقى فيها حواوشي ملفوف فى ورق فويل يوريه لرحمه تضحك
محمد / كدا بدايتها عسل ان شاء الله انا كدا متفائل مش عاوز حاجه من دنيتي تانى خلاص
رحمه تضحك و تروح تقف جنب محمد 
رحمه / انا بعمل حواوشي حلو اوى على فكره لما هتدوقه هتنسي بتاع بره ده خالص
محمد يقفل الحافظه و يبصلها بطرف عينه
محمد / انتى كدا بتدخليلى من ثغراتى
رحمه تضحك
رحمه / انت رهيب انا عمر ما حد ضحكنى اوى كدا
محمد يبتسم و ياخدها فى حضنه تحضنه يبوس راسها تبتسم و تحضنه اكتر
............................