ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

188 Extra

ထိုအကြောင်းတွေးရင် ရွှယ်ယို့ရှန်းမှာ ရင်းဆုယဲ့ကို စူးစူးဝါးဝါး လှည့်မကြည့်ဘဲ မနေနိုင်ခဲ့ဘူး။

ရင်းဆုယဲ့ကို အခမ်းအနားအတွက် တာဝန်ပေးလိုက်တာက သူ့မိသားစုဝင်လေး ရှောင်ယဲ့ယဲ့ဆိုရင် သူ့အကြိုက်သိမှာပဲ၊ ကောင်းကောင်း ကိုင်တွယ်နိုင်မှာပဲလို့ ထင်လိုက်မိလို့လေ။ ဒါပေမဲ့ ရှောင်ယဲ့ယဲ့ကိုလည်း တစ်ခါတလေ ယုံကြည်လို့မရဘူးပဲ။ ရန်ယူရာက အခမ်းအနားကို ကြီးကြီးကျယ်ကျယ် ဖြစ်စေချင်နေတယ်ဆိုတာ သူနားလည်ပေးနိုင်ပါတယ်။ ဒါပေမဲ့ ရင်းဆုယဲ့ကရော ဘာလို့သဘောတူလိုက်တာလဲ။ နားလည်ပေးလို့ကို မရဘူး။  ရင်းဆုယဲ့သာ သဘောမတူဘူးဆိုရင် <<ရာဇဝင်ထဲက အင်အားအကြီးဆုံးအရှင်>> ဝတ္ထုရဲ့ အမျိုးသမီးဇာတ်လိုက် ရန်ယူရာလည်း ဗီလိန်ဘော့စ်ကြီး ရင်းဆုယဲ့ကို လွန်ဆန်နိုင်မှာမဟုတ်ဘူး။ အထူးသဖြင့် ပြန်မွေးဖွားလာတဲ့ ဗီလိန်ဘော့စ်ကြီးဆိုတော့ ပိုတောင်မဖြစ်နိုင်သေးတယ်..! အဲ့တော့ လက်ရှိပြင်ဆင်ထားသမျှ ရှုပ်ထွေးပွေလီတဲ့ အစီအစဉ်တွေအားလုံးက ရင်းဆုယဲ့ရဲ့လက်ချက်ဆိုတာ သေချာပေါက်ပဲ။ အဲ့တော့ မေးခွန်းကို ပြန်ဆက်ရမယ်ဆိုရင် ရင်းဆုယဲ့က ဒီနန်းတက်ပွဲအခမ်းအနားကို တစ်လောကလုံးသိအောင် ဘာလို့ကြေညာနေရတာလဲ..?

ရင်းဆုယဲ့က ရွှယ်ယို့ရှန်းရဲ့မေးခွန်းကို မသိချင်တာ စိတ်မကောင်းစရာပါပဲ။ ရင်းဆုယဲ့က သူ့ကို စူးစူးရဲရဲ စိုက်ကြည့်နေတဲ့ ကောင်လေးရဲ့အကြည့်ကို သတိမထားမိသလို မသိမသာလေး အကြည့်လွှဲသွားခဲ့လေတယ်။

ရွှယ်ယို့ရှန်းလည်း ပိစိလေး စိတ်ဆိုးလာတာကြောင့် ဘယ်သူမှမသိအောင် ရင်းဆုယဲ့ရဲ့ ခြေထောက်ကို ဆောင့်နင်းပစ်လိုက်တယ်။ ပြီးနောက် သူ ဘာမှမလုပ်ထားသလို မြင့်မြတ်မော်ကြွားတဲ့ ဟန်ပန်မျိုးနဲ့ ဆက်လျှောက်သွားလေတယ်။ သူ့မိသားစုဝင်လေး ရှောင်ယဲ့ယဲ့ရဲ့ အမူအရာက လောလောဆယ် ဘာမှမရှင်းပြနိုင်သေးဘူးလို့ ရည်ညွှန်းနေတယ်။ မေးလို့မရနိုင်မှတော့ ရွှယ်ယို့ရှန်းလည်း လေကုန်မခံတော့ဘူး။ အချိန်တန်ရင် သိရလိမ့်မယ်။ လက်ရှိအရေးကြီးတာက အခမ်းအနားကို အောင်အောင်မြင်မြင် အဆုံးသတ်နိုင်ဖို့ပဲ။