ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

188 Extra

“ကောင်းပြီ..”

ရင်းဆုယဲ့လည်း သူနဲ့ပုံစံတူဝတ်မယ်ဆိုတာ ရွှယ်ယို့ရှန်းက ကြိုသိနေပြီးသားဖြစ်တာကြောင့် အလွန်တည်ငြိမ်နေခဲ့တယ်။ ရင်းဆုယဲ့က အမြဲတမ်း သူနဲ့ဆင်တူ ဝတ်စားရတာကို အရမ်းသဘောကျတယ်။ ဟန်ရေးပြရုံမကလို့ တခြားဘာပဲလုပ်လုပ်၊ ရင်းဆုယဲ့ရဲ့ ‘သင်ခန်းစာ’ကလွဲရင် တခြားသူတွေရဲ့ မနာလိုမှု၊ သဝန်တိုမှုအားလုံးကို မျက်နှာတစ်ချက်မပျက်ဘဲ ခံယူနိုင်တယ်။ ထို့ကြောင့် Couple ဝတ်ဆင်တာကို စိတ်ထဲမထားတော့ဘူး။ ရွှယ်ယို့ရှန်းလည်း သူ့ရဲ့ဘယ်လက်ကို ရင်းဆုယဲ့ရဲ့လက်ထဲ ပေါ့ပေါ့ပါးပါး ထည့်ပေးလိုက်တယ်။ ပြီးနောက် မိစ္ဆာဘုရင်တစ်ပါးရဲ့ သင်္ကေတဖြစ်တဲ့ ခရမ်းရောင်ကျိုင်းကို ညာဘက်လက်နဲ့ ကောက်ယူကာ အခမ်းအနားရှိရာသို့ ဦးတည်လိုက်တော့တယ်။

အခန်းရဲ့အပြင်ဘက် လမ်းမကြီးထက်မှာ အဖိုးထိုက်တန်တဲ့ ကော်ဇောနီတွေ ခင်းကျင်းထားသလို သေသပ်စွာဝတ်စားထားတဲ့ အစေခံတွေကလည်း လမ်းတစ်ဖက်တစ်ချက်စီမှာ တညီတညာတည်း မတ်တပ်ရပ်နေကြလေတယ်။ ရွှယ်ယို့ရှန်း ထွက်ပေါ်လာတာနဲ့ အစစ်မှန်ဆုံးသော စိတ်ရင်းတွေကို ဖော်ကျူးလျက် သူတို့ရဲ့ဘုရင်အသစ်ကို ဦးညွှတ်လိုက်ကြတယ်။ ရွှယ်ယို့ရှန်းက အခြွေအရံတွေကို ညင်သာစွာ ခေါင်းညိတ်ပြလိုက်တယ်။ ပြီးနောက် ခေါင်းမော့ရင်ကော့လျက် ဆက်လျှောက်သွားလိုက်တယ်။ သူ့ရဲ့ခြေလှမ်းတိုင်းက ညင်သာအနုစိတ်စွာ၊ လေပြည်လေညင်းတွေ တိုက်ခတ်နေပြီး သူ့ရဲ့ဟန်ပန်က ကြယ်ရောင်စုံတောက်ပနေတဲ့ ကောင်းကင်ယံထက်က ကြယ်ပွင့်လေးတွေ ခြံရံထားတဲ့ ဧကရာဇ်တစ်ပါးနှယ် ထင်မှတ်ရပေတယ်။

တကယ့်ကို ခန့်ညားထည်ဝါလှပေတယ်။

သူရဲ့ဘေးမှာရပ်နေတဲ့ ရင်းဆုယဲ့က ရွှယ်ယို့ရှန်းရဲ့လက်ကို ဆုပ်ကိုင်ထားရင်း သူ့ရဲ့ဖြစ်တည်မှုကို တမင်တကာ နှိမ်ချဖုံးကွယ်ထားခဲ့တယ်။ ဧည့်ပရိသတ်အားလုံး ကောင်လေးအပေါ် အာရုံပိုစိုက်နိုင်ဖို့ ရည်ရွယ်ခဲ့တယ်။ ထို့ကြောင့် မိစ္ဆာပရိသတ်တွေက နောက်ခံမြင်ကွင်းကို ဘေးဖယ်ထားပြီး တော်ဝင်ဆန်စွာ တစ်လှမ်းချင်း လျှောက်လှမ်းလာတဲ့ သူတို့ရဲ့ဘုရင်အသစ်ကိုသာ မြင်နိုင်ခဲ့လေတယ်။