تاني يوم طلعت بإستعجال و مشيت الشركه لأنو كان في اجتماع مهم شديد بس عشان كان في زحمه في الطريق اتأخرت شديد و لمن وصلت قاعة الإجتماعات لقيت الباب مقفول ، قلت ما هقدر ادخل لأنو مستر هشام ما بتساهل في التأخير ، اول ما إتلفت عشان ارجع لمحت مستر هشام من بعيد شايل بتو و بتكلم بالتلفون ، قلت معناها لسه ما بدوا الإجتماع أو بدوا و هو طلع من نصو ، معناها ممكن ادخل عادي و احضر باقي الإجتماع لأنو مهم شديد ، المهم فتحت الباب طوالي و دخلت و طوالي عين وقعت في عدنان الكان واقف و بتكلم معاهم! ياخ كنت مفتكره إنو الإجتماع هيكون مع مستر هشام بس! ....بتردد إتحركت و كنت هدخل لسه لـ جوه بس وقفت لمن هو قال لي بنبره حاده ماشه وين إنتِ؟
حسيت بإحراج والله لأنو نبرتو كانت قاسيه شديد و هناك أرجوان تتبسم ساي! ....ما عرفت اقول ليهو شنو! واصل كلامو و قال لي دي ما زريبه عشان تجي متى ما حابه ، قلت ليهو ما قصدي اتأخر بس.....قاطعني و قال لي ما تحكي لي قصة حياتك ، جيتي متأخره معناها تطلعي برا......طبعاً ما قدرت اصدق انو عدنان بتكلم معاي بالطريقه دي كأنو ما بعرفني! .....بخاطر مكسور طلعت برا القاعه و انا عايزا أطق من الزعل ، مستر هشام كان جاي علي لمن وصلني سلم
علي و قال لي وين انتِ من قبيل بسأل عنك ، قلت ليهو جيت متأخره ، قال لي عدنان ما خلاك تدخلي صح؟ ...معليش بس لازم نتعامل كدا و ما نتساهل في قصة التأخير دي ، المهم يا زوله عايز اتكلم معاك ممكن تجي المكتب!.....قلت ليهو طيب و فعلاً مشينا مكتبو ، أول ما قعدنا كدا قال لي إنتِ بتعرفي روان؟ ....اتنهدت و قلت ليهو آي و آسفه يا مستر بس ما حابه اتكلم في الموضوع دا! قال لي طيب و انا افهم الحاصل من وين؟ امبارح سألتها بس ما قالت لي حاجه! انتوا بتعرفوا بعض من وين و شنو الخلاك تتصرفي كدا امبارح و تمشي بالطريقه ديك! حتى عدنان طلع من دون ما يفهمني حاجه!
قلت ليهو بصوت مبحوح ماف شي ....قال لي ما معقوله يعني اكون في وسطكم و انا ما فاهم شي! ....مسح دموعي قبل ما تنزل و قلت ليهو كل القصه اننا في يوم كنا صحبات مقربات شديد أو خليني اقول اني الكنت مفتكره كدا ، المهم في الآخر اكتشفنا اننا ما بننفع مع بعض و كل وحده شاف حياتها .....قال لي ما تتكلمي بالألغاز يا مها ....قولي لي عديل حصل كذا و كذا! من حقي أعرف ، هنا دموعي نزلت ، قلت ليهو ما تذكرني انا السنوات دي كلها بحاول أنساهم بس القدر ختاهم في طريقي تاني ، قال لي انتِ و روان و عدنان بتعرفوا بعض من متين يعني؟
طبعاً انا معروفه لو دموعي دي نزلت و اتأزمت طوالي بحكي فـ من دون ما أحس لقيت نفسي بحكي ليهو من اول مره اتعرفت فيها على ناس سماهر و روان و ميامن و سامي لحد آخر حاجه عملوها و خطبتي أنا و عدنان و الحصل معانا بعدها لحد ما طلعنا برا السودان ....يعني حكيتو ليهو الحصل كلو و هو بس ساكت بسمعني ، لمن خلصت حسيت براحه ما عاديه حتى دموعي براها وقفت ، ياداب كدا إرتحت شويه ، طبعاً مستر هشام كان ساكت ساي بس أثار الحيره و الصدمه كانت باينه عليهو ، قال لي ايوه كنت حاسي انو في مشاكل بينك و بين عدنان بس ما اتوقعتها للدرجه دي! أما بالنسبه لـ صحباتك فـ دي حاجات طبيعيه بتحصل بين الصحبات لمن ما يقدروا يفهموا بعض ، قلت ليهو حتى العملتو سماهر قبل ما تعرس اخوي و بعد ما عرستو عادي؟ بالجد شايف الموضوع عادي! ......قال لي طيب هو ما عادي بس انتِ كمان ما تخليهو يأثر على حياتك للدرجه دي! ملاحظ ليك أنا و قادر أشوف كمية الحزن و الإكتئاب الفيك ، الحياة دي قصيره و بسيطه بس نحنا البنعقدها ، لو نظرتي للموضوع من ناحيه تانيه هتشوفيهو بسيط و ما بستاهل ....اقول ليك كيف ....يعني انتِ انسانه حصلت مشاكل بينها و بين صحباتها و اخوها وقع في مشكله و المشكله دي كانت سبب في فركشة خطبتها و في الآخر طلعوا برا السودان و جوا راجعين تاني و بدوا من الصفر ، دا من الناحيه السلبيه ، لو جينا للناحيه الإجابيه هتلقى انو ربنا كشف ليك خبايا صحباتك و عيوبك الما كنتِ قادره تشوفيها و أخوك ما اتسجن و لحد اللحظه معاكم و عدنان الفركش خطبتكم هسي معاك و كل يوم بتشوفيهو و قروشكم رجعت ليكم و هسي بيتكم ملك و هسي انتوا تامين و لامين و دي حاجه تستاهل انها تحمدي ربنا عليها ، دي كانت تجربه لفت و رجعتك تاني لنفس الأشخاص بعد بعد ما الحقايق انكشفت و كلو اختبار ليك و اهم حاجه انو الإختبار دا نور بصيرتك و زي ما شايفك ما بتثقي في الناس بالساهل ، اعتبريها تجربيه كويسه فادتك شديد و غيرت شخصيتك و خلتك تكوني انسانه بتحكم فيها عقلها ما قلبها ، ما عارفك اذا لسه بتحبي عدنان أو لا بس في الحالتين و مهما كان قرارك اتخذيهو عن قناعه و تاني خالص ما تتراجعي عنو و ما تعايني وراك لأنو الماضي هو البجوط ليك مستقبلك ، هسي اقعدي مع نفسك و صارحيها و أنهي الصراع الجواك دا ، شوفي نفسك عايزا شنو ، عايزا عدنان ولا لا و ياريت قرارك دا ما تدخلي فيهو لا أهلك لا أهل عدنان على الأقل خليك صريحه مع نفسك ، قلت ليهو ما مهم انا عايزا شنو المهم اني ما عايزا اخرب على زول و ما عايزا اعمل شي يضايق أهلي ، قال لي أكيد أهلك هـ ينبسطوا لمن يشوفك مبسوطه ما متأكد لكن حالياً عايزك تكوني صريحه مع نفسك حتى لو ما واجهتي أهلك بالصراحه دي ، أما بالنسبه لجملة ما عايزا اخرب على زول عارفك قاصده رزان لا شايف و سامع بالحاصل و أرجوان حكت لي ، هو الحاجه دي لا على كيفك لا على كيف رزان ، عدنان ما صغير و هو عارف نفسو عايز شنو و لو اختارك و انتِ قبلتي دا ما معناهو انك خربتي حياة رزان لأنو عدنان ما وعدها بشي و زي ما فيها كتار مكسرات فيهو على قولكم انتوا البنات فهي كمان مكسره فيهو زيهم و دا ما معناها انك تنسحبي طوالي ، و ما عشان هي معجبه بيهو او بتحبو معناها لازم يعرسها أو يوعدها! معجبات عدنان كتار و قدر سبيبات شعرو فـ هل لازم يعرسهم كلهم؟ ....انتِ مش هسي في معنى كلامك قلتي انك اتغيرتي و بقى ماف زول بهمك؟ فـ ليه هسي شايله هم رزان و خايفه عليها! ....انتِ ما اتغيرتي يا مها انتِ بس خايفه و عامله حسابك و بعدين ما بتقدري تقولي ما عايزا اخرب على زول لأنو الزول دا أساساً ما عندو حق على عدنان مفروض هي تخجل على نفسها و تنسحب لعلمها انو كان خاطبك ......قلت
الجزء الثاني 12
Start from the beginning
