المهم في اليوم البعدو لمن مشيت الشركه ما صادفتو خالص لحد ما الدوام إنتهى ، قلت كدا أحسن ان شاء الله ما اشوفو تاني خالص ، فعلاً مر أسبوع كامل و هو ما جا فيهو الشركه ، في الأسبوع دا و بسبب الفيديوهات الكنت بنزلها عن المنتج جاتني كميه من الطلبات ، مشيت لـ مستر هشام و حكيت ليهو ، قال لي إنتِ عارفه اننا ما بنتعامل مع أفراد! يعني دي شركه ما بوتك عشان نبيع للناس واحد واحد! !.....كلامو زعلني والله ، قلت ليهو يعني المنتج دا ما حـ يتباع إلا لشركات أو اماكن تجاريه كبيرهـ! ؟ قال لي بالظبط كدا! قلت ليهو اوكي اعتبرني انا محل تجاري كبير و عايزا اشتري المنتج دا بالجمله ، يعني حـ اشيل كميه من المنتج دا! قال لي ما فاهم قصدك شنو ! قلت ليهو حـ تبيع لي ولا لا؟
اتنهد و بعد مسافه قال لي تقريباً فهمت انتِ عايزا تصلي لشنو بس ما ظنيت الطريقه دي تنجح ، قلت ليهو الشركه ما خسرانه حاجه ، قروش و حـ أدفعها ليكم ، خلونا نجرب ، قال لي تمام احصري لي عدد الطلبات عشان أجهز ليك الطلبيه ، قلت ليهو تمام ، المهم بعد ما طلعت من مكتبو عملت فيديو تاني و طلبت من اي شخص قال عايز المنتج يأكد لي الطلبيه و فعلاً لحد الساعه 12 بليل كان في كميه كويسه من الطلبات ، يعني ما كانت كتيره شديد بس كـ بدايه الطلبات تمام ، المهم رفعتهم لـ هشام و طلبت منو يخليني استخدم عربات التوصيل تبع الشركه عشان اوصل للناس ، قال لي ما عندي مانع ، المهم في خلال 3 أيام طلعت 50 طلبيه ، طبعاً أرجوان كانت بتضحك ساي و قالت لـ هشام عليك الله شركه طول و عرض تطلع ليها 50 طلبيه! شينه في حقنا والله!......نصيحه مني ما تتابع البت دي يا هشام عشان ما تبقي لينا الشركه دي بقاله أو بوتيك! ....قلت ليها انتِ شوفي شغلك و خليني انا أشوف شغلي ، على الأقل انا فكرت و قدرت اطلع طلبيات حتى ولو ما كانت على المستوى المطلوب بس كـ بدايه تمام شديد ، قولي لي بس إنتِ عملتي شنو إن شاء الله؟ عاينت لي بغيظ كدا و مشت ....المهم عملت ملف فيهو عدد الطلبيات الطلعت من الشركه و تاريخها و زمن الإستلام و الأسعار و العائد المالي شلت الملف و مشيت بيهو لـ مستر هشام لأنو هو الطلب مني كدا ، أول ما جيت داخله كدا لقيت الكلب الحيوان داك معاهو ، قلت السلام عليكم ، عدنان عاين لي بطرف عينو بس و هشام هو الرد علي السلام ، كان جايب معاهو بتو ، مشيت ليهو و مديت ليهو الملف ، قال لي تمام بس خليك ثواني اراجعو ، قلت ليهو طيب ، طبعاً بتو مشاغبه و ما خلتو يقرا الملف ، قال لي لو ما فيها تعب يا مها ممكن تشيلي مني لمى دي شويه؟! قلت ليهو لا عادي ماف تعب والله ، شلتها منو و مشيت قعدت بيها على الكرسي طوالي بدت تبكي فـ بقيت بحاول أسكت فيها ، طبعاً هي طفله مزعجه و مشاغبه و صوتها عالي بعمل صداع! فـ عشان تسكت مديت ليها تلفوني ، مسكتو و رمتو لي على الأرض لمن الإستيكر اتكسر 😭
رفعتو و قلت ليها لا كدا عيب ، بقت تجرجر لي في الطرحه و انا الأسوي ليها غلبني ، امسكها من اليد دي تشاغب باليد التانيه ، أمسك ليها يدينها الإتنين تصرخ بصوت عالي ، ياخ تعبتني تعب! و مستر هشام دا بس شغال ليها ثواني ثواني يا لمو ..... دوشتني دوشه ، تاني اديتها التلفون و المرهـ دي كنت حريصه إنو ما يقع ، فتحت ليها لعبه و خليتها تتبظ في التلفون حتاً سكتت ، في سري قلت أخيراً ياخ! اتنهدت و أول ما رفعت راسي لقيت عدنان سرحان فيني! ....حركاتو دي انا بعرفها كويس و هبالة و عوارة البدايات دي انا بطني طمت منها و بعدين أنا عارفه إنو بعمل كدا قصداً عشان يخدعني للمره التانيه! عايز يرجع يلعب بي تاني بعد ما كلنا عرفنا انو مازن ما هو الضرب أم عدنان و انو صاحب مازن هو الضربها و عملها في مازن لمن لقاهو شبه سكران و ما واعي لـ نفسو ، فأول ما ضربها و جرى بالعربيه وقفها على جنب كدا و استغل حتة إنو مازن ما واعي و بدل أماكنهم بحيث انو يكون مازن هو السايق العربيه و يمكن لحسن حظو و سوء حظ مازن الشارع داك ما كان شارع رئيسي كان داخل حي و ما فيهو كاميرات مراقبه ، المهم خدع مازن و بيجاي بيجاي قال ليهو خلي العربيه معاك كم يوم كدا و ياهو حصل الحصل ، الغايظني شديد انو بعد دا كلو جا شهد ضد مازن و قال إنو بريئ و مازن هو الضرب أم عدنان و أكد ليهم الكلام دا و مع إفادة كم شخص كدا من الكانوا في الحي ثبتت التهمه على مازن ، طبعاً الحقيقه دي ما ظهرت إلا بعد ما سافرنا بـ سنتين ، يعني اكتشفناها السنه الفاتت بعدها بابا سك الموضوع دا و رفع قضيه ضد عدنان و خيلانو عشان يرجعوا ليهو الشالوا منو تحت مسمى الفديه بعد ما كلنا عرفنا إنو مازن بريئ بس عدنان و خيلانو لسه كانوا مصرين انو مازن هو الضرب أم عدنان ....بعدها وضعنا المادي إتدهور شديد و بقينا ما قادرين ندفع حق المحامين و مع انو نحنا اصحاب الحق بس برضو قعدوا يتجرجروا معانا و ما رضوا يرجعوا لينا حقنا و القانون للمره التانيه ظلمنا ، المهم نحنا لحد اللحظه دي بنحاول نرجع حقنا ، الواجعني شديد انو بعد دا كلو لسه الكلب الإسمو عدنان دا بعمل لي حركات! ما عارفه شنو المخليهو يفكر اني ممكن اتأثر بكلماتو و حركاتو دي! الحرب بينا و بينهم لسه قائمه و إن هِدت حيكون في خراب! و المحيرني أكتر هو عايز مني شنو تاني؟! ليه التمثيل دا كلو؟!!!
المهم هشام قال لي جيبيها بعد دا و معليش على البهدله ، قلت ليهو عادي ولا يهمك ، مشيت أديتها ليهو ، شالها مني و وقف على حيلو و قال لي بتكون جاعت حـ أمشي الكافتيريا و انتِ خليك مع عدنان لأنو في كم نقطه كدا حـ يتناقش معاك فيها ....طبعاً قربت اقول ليهو لا بصوت عالي لكن مسكت نفسي ، اول ما طلع عدنان مسك الملف و عاين ليهو مسافه بعدها بقى يتكلم معاي و انا متعمده إني ما أعاين ليهو ، حسستو كأنو بتكلم مع حيطه ، في الآخر قال لي معاي إنتِ؟
ما رديت عليهو ، واصل عادي و في ختام كلامو قال لي ما عارف اذا فكرتك دي حـ تنجح ولا لا بس دامك مصرهـ فـ الشركه حـ تدعمك ، سكت و بعدها بقى يعاين لي بنظرهـ كدا ما قدرت أفسرها ، طوالي شلت شنطتي و أول ما وقفت على حيلي قال لي ما تمشي محتاجك أنا!
اتعصبت و إتلفت عليهو و قلت ليهو عليك الله بطل تمثيل و شيلنا من الكلام الفارغ دا كلو ، مصنوع من شنو انت ياخ! ! ما بتفتر من الكذب و التمثيل؟ الجابرك على الكلام دا كلو شنو؟ ياخ ناسي انو مازن هو الكتل أمك؟ ليه بتقول كلام زي دا لأخت الكتل أمك فهمني! !
قال لي إنتِ عارفه انو مازن ماهو الكتل أمي ، قلت ليهو اهاااا عشان كدا جاي تكمل البديتو! قايل الموضوع بالبساطه دي ولا شايفني هبله قدامك! !! عايز تستغبيني مرهـ تانيه صح؟ ...ما تتعب نفسك انا ما عندي ليك أي حاجه غير الكراهيه ، عمري ما حـ أنسى الطريقه الإتعاملت بيها معاي و كيف انك خذلتني و من دون ما تتردد كنت مستعد انك ترمي مازن أخوي في السجن حتى من غير ما تفكر فيني و تراعي لمشاعري و الكان بينا! انت ببساطه طلعت خاتم الخطبه و رميتو لي ....الخذلان الجاني من صحباتي كسرني بس خذلانك إنت موتني بالجد و هسي انا ما فيني حيل و ما عندي طاقه عشان استحمل بيها هبالتك و تمثيلك البتعملو دا كلو ، عشان كدا رجاءً خليك بعيد عني ......حسيت دموعو دي شويه كدا و حتنزل بس قلت في نفسي أوعك تنخدعي يا مها حتى لو دموعو دي صبت مطرهـ عديل ، وقف على حيلو و جا قصادي و قال لي بصوت مبحوح إنتِ بس اسمعيني يا مها و أديني فرصه تانيه عشان اصلح الإنكسر و.....قاطعتو و قلت ليهو الإنكسر عمرو ما بتصلح حتى لو رجعت كل حته مكسورهـ لمكانها الصحيح اثار الكسر حـتكون واضحه و زي ما قلت ليك انا ماف شي جواي ليك غير الكراهيه ، عاين لي جوه عيوني و قال لي انا ما لاقي نفسك ، حياتي باهته من دونك ، ما قادر أكون مرتاح ما قادر اعيش بصورهـ طبيعيه ، ما عارف اشرح ليك كيف بس تفكيري كلو كان مشغول بيك طول الـ 3 سنوات دي كلها ، انا كنت عايش في جحيم و بموت ألف موته في كل مرهـ بتذكر اني ضيعتك و خليتك تبعدي عني ، بقيت اشوفك في كل مكان بقيتي لي زي السراب بلمحك بس ما بقدر ألمسك و كل ما اقرب اكتشف انو دا خيال ما حقيقه ، افهمي يا مها اني ما بقدر بدونك ، حبي ليك حتى الـ 3 سنوات دي ما قدرت تمحيهو و بعدك عني ما زادني إلا سوء و خلاني لافي في نفس النقطه المشيتي و خليتيني فيها ، قلت ليهو افففف ياخ ما بتفهم انت؟ دا كلو ما بهمني ، تلقى نفسك أو لا انا ما عندي شغله بيك و بعدين دا حب شنو البتتكلم عنو دا؟ ....بتعرف الحب انت ولا بتتكلم ساي؟....
المهم ما عايزا اصرف عربي كتير معاك ، إحترم نفسك و خليك بعيد عني انا لا هبله لا فاضيه للفارغه و الهباله دي كلها و حركاتك دي شوفي ليك وحده بليده أعملها ليها .....قلت ليهو كدا و طوالي مشيت خليتو و انا شبه ارتحت من جواي لأني سمعتو الكلام دا ، من يومها بقى تاني ما بتكلم معاي و وين ما أكون متواجدهـ هو طوالي بمشي ، عدت فتره بتاعة 3 أسابيع هو للمرهـ التانيه إختفى فيها ، طبعاً في آخر أسبوع مزن جاتنا لـ ولادتها ، المهم يوم و انا جايه داخله الشركه سمعت بنتين بتكلمو عنو و بسألوا ليه غيابو كتر و انو الحاصل معاهو شنو و و و ، التانيه قالت ليها إلا نسأل أرجوان بتكون عارفه ، حيييا انا الشركه من دونو مسيخه ، تاني نقشر عشان منو!! المهم هم طوالي مشوا لأرجوان و انا مشيت قعدت في مكتبي و فتحت الكمبيوتر و باشرت شغلي ، طبعاً بقى في كميه كويسه من الطلبات بتجيني عن المنتج و بقيت بشحن ليهم من الشركه و التوصيل بعربات الشركه و الشغل بقى ماشي تمام ودا الخلى مستر هشام يتكيف مني ، المهم في زمن الإستراحه كـ عادتي عملت فيديو بس المرهـ دي ما عن المنتج ، ما عارفه بس حسيت اني عايزا افضفض بطريقه غير مباشرهـ في الفيديو دا ، اتكلمت فيهو عن الخذلان و الغدر و و و...... بعدها مشيت فطرت و جيت راجعه ، أول ما قعدت كدا جوني تلات بنات و هم مبسوطات! قالوا لي دي إنتِ البتعملي الفيديوهات ديك صح؟
قلت ليهم فيديوهات شنو! وحده منهم قالت لي فيديوهاتك البتنزليها في التيك توك و اليوتيوب ياخ انا من زمان متابعاك و معجبه بيك و ما كنت متخيله انك معانا هنا في الشركه لأني ما مليت عيني فيك و انتِ ذاتك ما بتقعدي مع الناس ، كنت مشبهاك بس هسي ياداب اتأكدت انو فعلاً دي انتِ بعد الفيديو النزلتيهو قبل شويه دا ، طبعاً البنات ديل معاي في نفس الشركه و القسم و في نفس المكان بس ما بعرف أساميهم و اساساً انا ما مركزهـ مع أي شخص في الشركه دي ، المهم كانوا مصرين إنو يتصوروا معاي و فعلاً دا الحصل بعدها مشوا و نشروا الخبر فـ تاني جوني كم بت كدا و نفس الأسئله و و و لمن زهجت قلت ليهم معليش عندي شغل أنا ، قلتها ليهم بزهج كدا بعدها جاني صوت أرجوان و هي بتضحك جات قالت ليهم بتحبوا تصغروا نفسكم و تهبلوها بصورهـ حقيرهـ شديد ، العاجبكم شنو فيها عشان تتذلوا ليها كدا و تخلوها تتكلم معاكم بالطريقه دي؟ يعني شنو لو طلعت زوله مشهورهـ و بتنزل فيديوهات!؟ غيتو هكلم هشام يستعجل في رواتبكم عشان تمشوا تشتروا ليكم كرامه و عزة نفس.....ما رديت عليها ، شلت كذا ملف كدا و مشيت بيهم على مكتب مستر هشام لأنو طلب مني انا و كم موظف كدا نجهز ليهو الملفات ديل لأننا نحنا الشغالين عليهم ، المهم لمن وصلت مكتبو ضربت الباب و دخلت ، كان معاهو واحد كدا مديني ضهرو افتكرت انهم بتناقشوا في حاجه مهمه فـ طوالي رجعت ورا و كنت حـ اطلع و اقفل الباب وراي بس هشام قال لي تعالي تعالي من قبيل منتظر الملفات دي ، المعاك كلهم جابوا لي الطلبتو منهم إلا انتِ ، قلت ليهو و انا ماشه عليهو معليش على التأخير بس......سكته طوالي لمن الشخص القاعد معاهو دا إتلفت علي! !!!
أول ما شفت الراجل القاعد معاهو اتخشبت في مكاني و ما قدرت اقول حاجه ، هو طوالي وقف على حيلو و قال لي بلهفه مها!! طوالي مد يدو و سلم علي سلام بحرارهـ كدا و عيونو كانت مليانه دموع ، أما انا كنت عكسو تماماً و رغم اني اتلخبطت لمن شفتو و اتذكرت مواقفو معاي بس الحصل لي حقيقة خلاني باهته و خلى مشاعري باردهـ بحيث إني ما بقدر اتفاعل مع أي زول رغم انو دا ما أي زول ،، دا سامي الكان من أقرب الناس لي....لسه كان بتكلم معاي بلهفه كدا و كلامو كان بسرعه يعني كأنو بحاول يسبق الزمن و يستغل كل ثانيه عشان يتكلم فيها معاي ، قال لي أبداً ما اتخيلت انو ممكن الدنيا تلف و تلف و تخلينا نتقابل تاني ، أختفيتي وين إنتِ! ....مستر هشام قال ليهو دي هي يا سامي ؟ ؟ قال ليهو آي ياها و رجع إتلفت علي تاني و هو عيونو مرقرقه ، قال لي والله ما قادر أصدق إنك واقفه قدامي ، لمن عرفت من عدنان انو لقاك بعد السنوات دي كلها ما صدقتو لأنو دايماً كان بجيب سيرتك و بقول إنو شافك بس لمن كلامو عنك كتر جيت عشان اتأكد بنفسي و الحمدلله أخيراً شفتك ، اخبارك شنو ياخ و الحاصل عليك شنو وين مشيتوا و الحصل معاك شنو طول الـ 3 سنوات دي كلها؟ .....ولا اقول ليك تعالي معاي الكافتيريا التحت ، كلامنا محتاج قعده طويله......
في ناس مهما عملوا و مهما اجتهدوا عشان يرجعوا لـ حياتنا حنرفضهم في كل مره ، أخطائهم المتكرره و أذيتهم المستمره كانت كفيله بإنها تخلينا ننسحب من حياتهم و نشيلهم من حياتنا و ننزعهم من ذكرياتنا ، ايوه صح في يوم كنتوا أقرب الأقربين لينا بس حالياً و بعد عمايلكم دي بقيتوا ما بتهمونا ، تفشلوا ، تنجحوا ، تضحكوا ، تبكوا ، تتغيروا أو لا كلو ما بقى بهمنا ، نحنا بسببكم خسرنا طيبتنا ، و سذاجتنا ، ضحكتنا ، بسببكم اتشوهنا من الداخل و فقدنا ثقتنا في كل الناس ، وصلتونا لدرجه حتى اساميكم لمن تنذكر قدامنا بنتضايق و بنحس بكتمة نفس ، رجعتكم بقت مستحيله و مرفوضه بالنسبه لينا 😴
#مها_حولي
يتبع....
الجزء الثاني 4
Start from the beginning
