ABOစာအုပ်ထဲကူးပြောင်းပြီး ဗီလိန်အိုမီဂါလေးဖြစ်လာ [ Rebirth; System ] Volume I

အခန်း ၂၂ ရင်တုန်ခြင်း

လူးရှပ်စ်သည် မျက်ခုံးတစ်ဖက်ပင့်တင်မိသွား၏။ အိုမီဂါလေးတွင် သူနှင့်ပတ်သက်ပြီး ခက်ခဲသော အခြေအနေတစ်ရပ်ရှိလိမ့်မည်ဟု မထင်ထားမိခဲ့ပေ။ တွေ့မြင်နေရသော ကောင်ငယ်လေး၏ထိတ်လန့်မှုသည် သူမျှော်လင့်မိခဲ့သည်ထက် အဆများစွာပိုမိုများပြားနေသည်။ ဤကဲ့သို့ အထိတ်တလန့်ဖြင့် သူ့အားရှောင်ရှားချင်နေမှုသည် လူးရှပ်စ်အား မပျော်ရွှင်စေခဲ့ချေ။

လူးရှပ်စ်သည် ဖော်ဖော်ရွေရွေဖြင့် ပြုံးပြလိုက်ပြီး သူ၏ မျက်လုံးများထဲတွင်လည်း လေးနက်သည့်အရိပ်များ ပြည့်နှက်လာသည်။
"ကိုယ်နဲ့မင်းမှာပြောစရာတစ်ခုခုရှိသေးတယ်ထင်တာပဲ"

ဂျူလီယန်သည် မနေ့ညကကိစ္စများကို ပြန်သတိရသွား၏။မခံမရပ်နိုင်စိတ်တိုနေသည့်မျက်နှာလေးပြောင်းသွားပြီး သူ၏ အမူအရာများမှတစ်ဆင့် ရှက်ရွံ့နေသည်ကိုလည်း သိရှိနိုင်ပေသည်။ သူသည် အတော်လေးကို ရှုပ်ထွေးနေသည်ဟုလည်း ခံစားမိလိုက်သည်။

ဂျူလီယန်သည် နှစ်‌ခါလောက် ချောင်းဟန့်လိုက်သည်။
"ဘာကိစ္စမလို့လဲ"

လူးရှပ်စ်၏အကြည့်များသည် အနည်းငယ်နီရဲနေသော အိုမီဂါလေး၏နားရွက်ဖျားများဆီသို့ ရောက်ရှိသွားသည်။ ထို့နောက်သူသည် ဆိတ်ငြိမ်စွာပဲ ပြန်ပြောလိုက်၏။
"ကောင်းပြီ..မနေ့ညကဘာမှမဖြစ်ခဲ့ဘူးလို့ပဲထားလိုက်ပါတော့"

သူ၏အသံ သို့မဟုတ် အပြောအဆိုများတွင် မကျေမနပ်ဖြစ်နေသည်မျိုး လုံးဝမရှိပေ။ ဂျူလီယန်ဆီသို့ ငုံ့ကြည့်လာသည့်အခါတွင် သူ၏မျက်လုံးများထဲ၌ နွေးထွေးမှုများပင် အနည်းငယ်ပါရှိနေသေးသည်။

ဂျူလီယန်သည် အနည်းငယ် မူးနောက်သွားသည်။ လူးရှပ်စ်၏အကြည့်များအောက်တွင် သူ့ခြေထောက်နှစ်ချောင်းလုံး ပျော့ခွေသွား၏။ သူ့စိတ်သည် ကြည်ကြည်လင်လင်ရှိနေဆဲဖြစ်သဖြင့် သူ့ခန္ဓာကိုယ်၏ အပြောင်းအလဲကို ပိုမိုထင်ရှားစွာပင် ခံစားသိလိုက်ရသည်။

ဒုတ်၊ ဒုတ်၊ ဒုတ် -

သူ၏နှလုံးခုန်နှုန်းများ မြင့်တက်လာပြီး အင်္ကျီအိတ်ကပ်ထဲရှိ ဆေးများကို ထုတ်ယူလိုက်သည်။