زينب /وهو ابنه المقروض ده يعرف يراقب
حميده /الكانو!! طب دا معجون بميه عفاريت بيطلعلى فكل حته زى العمل الردى،،
لا وايه بيقول لابوه عالرزقه بالمظبوط عينه زى عين الصقر ابن الكلب تصورى عنده ٥ سنين وبيعمل كده مش عارفه لما يكبر هيعمل ايه؟
زينب /يعنى ابن العدوى هيطلع ايه؟
حميده /ربنا ياخده ويريحنا منه احنا نتعب ويطلع عنينا وهو يقسم معانا بالجاهز وقال ايه كبير المنطقه قال!
زينب /طيب متشوفى رزقك فى حته تانيه
حميده /كل خرابه يازينب وفيها عفريت وكل حته ليها كبيرها وادينا عايشين وخلاص وربنا علي كل ظالم مفترى
&&&&&&&&&&
عدى شهر وزينب بتدور وتلف على شغل ومش لاقيه ودخلت فى الشهر التاسع وكان باين عليها الضعف والتعب وحاسه ان الدنيا داقت بيها اووى..
اما في مكان تاني،، في حاره من حوارى اسكندريه كانت بتعيش عيله بسيطه جدا مكونه من أب وام وبنت وحيده اسمها شيماء عمرها سنه الاب بيشتغل كهربائى بيصلح اجهزه كهربائيه وعنده دكانه صغيره مأجرها تحت البيت اللى ساكن فيه
وفى الاوضه اللى على السطوح ساكنه ست غلبانه وطيبه جدا وعندها ولد عنده ٧ سنين اسمه يوسف، طفل مؤدب جدا ومتربى والكل بيحبه،،
ابوه سافر دوله عربيه وللاسف توفى هناك والست دى كانت بتبيع خضار عشان تقدر تعيش هى وابنها والكل بيشهد لها بالاخلاق ودي تبقي الست ام يوسف
اما في مكان تاني
فى بيت مصنوع من الصفيح بالكامل يشبه الكوخ فى احد مناطق القاهره النائيه بيعيش سيد العدوى،
شخصيه مستبده عايش على البلطجه ونظام فرض الاتاوه ومقاسمه رزق كل من حاول يكسب لقمة عيش فى منطقته،،
وله ولدين طفل ٧ سنين اسمه كريم واطلق عليه اهل المنطقه اسم الكانو،،
وطفل تاني عمره سنتيني اسمه بكر ويطلق عليه بيكا،، اختفت أمهم من حوالى سنه فى ظروف غامضه ومحدش لقاها،، وهناك اقاويل كتيره بأن جوزها هو اللي قتلها..
فى ليله من الليالى حميده صحيت على صوت زينب وهي بتصرخ وتتألم،، جريت علي اوضتها بسرعه ودخلت عليها وهي مخضوضه وزينب اول ماشافتها استنجدت بيها..
زينب /اه الحقينى ياحميده باينى بولد اااه
حميده /لا تولدى ايه دلوقت الساعه ٣ استنى للصبح الله لا يسيئك ولا فيه مواصلات ولا اعرف اوديكى حته نامى يازينب
زينب /ياحميده الحقينى بقولك ااااااااه
حميده /طب اعمل ايه دلوقت انا؟!!
استنى هندهلك وحده من الجيران تشوفك
حميده ندهت على وحده كانت ساكنه قصادهم كانت بتشتغل دايه
اتلمو الجيران والدايه جت وكشفت عليها وبصت لحميده وقالتلها،
حميده هاتى ميه سخنه دا القرن طش يلا بسرعه..
وحميده جريت بسرعه تسخن ميه عالوابور
YOU ARE READING
عزبة فكه النسخه المعدله
Mystery / Thrillerروايه من قلب الحياة تصف معاناة اطفال الشوارع ومايواجهونه من ظلم، وكيف لهم ان يتغيروا ماان تتغير الظروف المحيطه بهم،، ولكن هل سيتقبلهم المجتمع مهما طرأ عليهم من تغيير؟ هذا ماسوف نراه في قصتنا،، وسنكتشف ايضا ماذا بإمكان الحب ان يفعل بقلوب لم تعرف طوا...
