Days of Counting Camellia (Hiatus)

[41] A drop of poison

Ash : " နေပါဦး စိတ်မလောနဲ့လေ ။ ကိုယ်တော် ပြောတာ မပြီးသေးဘူး "

လက်တစ်ချက်ဝှေ့ပြီး ပြောလိုက်သော ဧကရာဇ်၏ ခပ်အေးအေးစကားသံနောက် Bentley နဲ့ Kain မှာ ရုတ်ချည်း ကိုယ်ရံတော်တွေလက်ထဲ အချုပ်ခံလိုက်ရသည် ။ သူတို့နှစ်‌ယောက်အား လက်ပြန်ချုပ်ပြီး ကြမ်းပြင်မှာ ဖိကပ်ထားလိုက်ကြသည် ။

" ခများ ဘာလိုချင်သေးလို့လဲ ! ကျုပ်တစ်ယောက်နဲ့ မလုံလောက်သေးဘူးလား ? "

Ben သည် ဒီထပ်ပိုပြီး ဧကရာဇ် Ash ၏လက်ဖဝါးထဲ အကစားမခံချင်တော့ပေ ။

Ash ကတော့ တစ်မျိုးတွေးပုံရ၏ ။

Ash : " အပေးအယူလုပ်ရာမှာ မျှမျှတတဖြစ်ရမှာ သဘာဝပဲလေ ။ မင်းလို ပမွှားလေးတစ်ယောက်ကို ကွပ်မျက်ရုံနဲ့ ဒီဧကရာဇ်အပေါ်ပြုထားတဲ့ အပြစ်က ကျေရိုးလား ? "

Alexander ရော Kai ပါ အရှင်သခင်၏ ဆိုလိုရင်း၌ အတွေးပွားနေကြသည် ။ ဘယ်လိုပဲတွေးတွေး အနှီအပြစ်သားသုံးဦးတွင် Xavia Kain ကိုသာ သူတို့ 'အစီအစဉ်' အတွက် အလိုရှိတာဖြစ်သည်။ သူတစ်ယောက်တည်းကိုပဲ အသက်ချမ်းသာပေးရမှာက နှစ်ခါတွေးစရာမလိုပေ ။

သို့သော် သူတို့မသိလိုက်သည်က ဧကရာဇ်သည် အကြံပက်စက်သည် ။ သူ၏ရှေ့မှောက်၌ ဘယ်ရေယိုပေါက်ကလေးမှ မလွတ် ၊ ရန်သူရဲ့ အားနည်းချက်ဟာ မည်မျှသေးငယ်နေစေကာမူ နက်မှောင်သောမျက်ဝန်းတို့က ထိုးဖောက်မြင်လေသည် ။

Ash : " ဒါပေမယ့် ဒီဧကရာဇ်ဟာ ဂရုဏာတရားကို လက်ကိုင်ထားတာမို့ ရွေးချယ်စရာပေးမယ် "

Bentley မှာ အဆုံးအစမဲ့သည့် တွင်းနက်ကြီးများအား စောင့်ကြည့်နေရင်း တစ်စုံတစ်ခုမှားယွင်းနေပြီဖြစ်ကြောင်း သံသယဝင်လာ‌တော့သည် ။ သို့သော် ရိုးသားလှပါသော Kain ကတော့ သဘောမပေါက်‌သေး ... အချုပ်ခံထားရသည့်ကြားမှ မျက်ရည်ဝေ့သော မျက်ဝန်းများဖြင့် ဧကရာဇ်အား ဘယ်လိုအသားခံရမလဲ တွေးနေလေသည် ။

Ash : " ဒီအရည်က တစ်စက်ချင်းသောက်မှ အာနိသင် ပိုထူးသတဲ့ ။ ဒါပေမယ့် ဒီခန္ဓာအပေါ် သက်ရောက်မှု မရှိတာကြောင့် ဖြေဆေးကို ကိုယ်တော် မစမ်းရသေးဘူး ။ အာနိသင်ပြမပြ သိချင်လှတယ် "