الفصل الخامس عشر
الخميس
اللهم صلّ على النبي ربنا يحميكِ ويسعدك دنيا واخرة يا رب ... هكذا انهت نعمة دعواتها وكلماتها بعد انتهاء نسمة من تزين كريمة برغم اعتراضها .
فبعد أن هاتفت ابتسام ونعمة وأبلغتهم بطلب حازم للزواج منها ورغبتها بوجود سلطان وفاندام كأهل لها ما كان منهما إلا الحضور رغم تعب ابتسام ومعهما نسمة لتولي الأمور ... نسمة خصصت نفسها لتزيين العروس ونعمة صنعت كعكة وبعض العصائر الطازجة واحضرت بعض الفاكهة .
أما ابتسام فأحضرت معها طبق من الحلويات الشرقية وقامت بدور ابلة الناظرة وجلست تأمر هذه وتتحكم بعمل هذه بينما قامت كريمة بتنظيف الشقة لاستقبال الضيوف .
بالخارج يجلس سلطان وفاندام مع حازم ووالديه واخته التي استأذنت للدخول لكريمة .
وبمجرد دخولها اطلقت زغرودة طويلة بينما كريمة تحمر خجلا وتطلب منها السكوت .
ضحكت نعمة وهي تهدهد ابنها وتقول : زغردي يا عاليا وخلينا نفرح وتعالي اقرصيها من ركبتها يمكن تحصليها انتِ كمان .
ضحكت عاليا وقالت : والله ودعوة امي استجابت يا واد يا حازم وهتتجوز القمر اللي قدامي ده .
اعترضت كريمة بخجل : بس يا عاليا بقى بلاش الكلام ده .
غمزتها وقالت : قوليلي بس عمل ايه الواد ده خلاكي توافقي كده ... أنا عرفاه خيبة لا له في التسبيل ولا كلام الأغاني .
قالت بحياء : يمكن عشان كده يا عاليا ... صدقته لأنه مش بيعرف يمثل ولا يقول كلام حلو لأي بنت معدية ... عارفة اني هاكون مطمنة على نفسي معاه وعارفة إن ربنا عوضني بعيلة جديدة بدل أهلي اللي راحو .
انهت جملتها باهتزاز ثم انفجرت باكيه ... اقتربت عاليا سريعا و احتضنتها وهي توبخها بينما ابتسام قالت : كلنا حواليكي يا حبيبتي اخواتك وأهل ليكي ... وهما اكيد حاسين بيكي ادعيلهم بالرحمة .
اقتربت نعمة تقول : وحدي الله يا كريمة واقريلهم الفاتحة وبعدين احنا روحنا فين بس ... بالك حازم لو زعلك ارفعي بس سماعة التليفون وأنا أخلي سيد المعلمين سلطان يجي يعرفه مقامه .
انفجرت نسمة ضاحكة وقالت : لازم سيد المعلمين سلطان يجي سيرته في أي مناسبة طبعا هو فيه في شهامته ورجولته قولي يا نعمة كمان يا حبيبتي واتغزلي في ابو السلاطين .
تأففت بغضب مصطنع وقالت : يوه انتو كده قاعدينلي على الواحدة ... حطين سلطان فوق دماغكو مش عارفة ليه .
ضحكت عاليا وقالت : شوفتوا يا بنات صوتها بيقلب حنين أزاي أول ما تقول اسم المعلم .
دافعت : مش جوزي وابو عيالي وحبيبي كمان .
قالت ابتسام وهي تحاول تعديل المكياج لكريمة : عرفنا يا نعنع ناقص تعملي يافطة وتعلقيها على صدرك .
قالت كريمة بابتسامة سعيدة : ما تسيبوها يا بنات ربنا يسعدهم و يهنيهم ببعض .
ازاحت نسمه ابتسام من مكانها لتتولى إكمال التعديلات وقالت بسخرية : اصلك محضرتيش قصة حبهم من الأول ... ولا قصة عبد الغفور البرعي و فاطمة كشري ... حاجة كده ولا الأفلام .
ضحكت ابتسام وقالت : على يدي حضراها من أول ما كانت نعمة هتفتح كرشه بسكينة الموز لحد ما عقدة لسانه اتفكت وقالها بحبك يا نعنع .
همت بالرد لولا اتصال حودة بالعسلية يستعجلهن الحضور بالخارج .
جلست برهبة من الموقف رغم محاولات نعمة وابتسام لدعمها .
تكلم حازم برغم تواجد والده لكنه أصر على شرح ظروفه واتفاقه الكامل مع كريمة .
تكلم سلطان بهيبته المعروفه بعد أن ترك له حودة الأمر : والله يا حازم انت طول عمرك متربي وسطنا أدب وأخلاق وتربية وكفاية أصلك الطيب وكريمة كمان بنتنا ... أي نعم متربتش وسطنا لكن الاستاذ عبد الغفور والدها مربينا كلنا ولولا اللي زرعه فينا وإحنا عيال مكناش وصلنا للي إحنا فيه ده دلوقتي .
ابتسمت كريمة بسعادة لسيرة والدها العطرة التي تتشرف بها في كل مكان .
نظر سلطان لكريمة وقال : موافقة على الاتفاق اللي قالوه يا كريمة ؟!!
أومأت كريمة وقالت : هو كان مصر يحمل نفسه بطلبات تانية بس أنا اللي اقترحت عليه الحل ده .
ابتسم لها باستحسان فهي تذكره بنعمة في عزة نفسها وطيبة قلبها لم تحمل حازم فوق طاقته لمعرفتها بظروفه فقال : على خيرة الله نقرى الفاتحة وتجيب دبلتين أول ما ظروفك تسمح ... عشان نعمل حفلة نفرح بيكو ... والفرح بإذن الله خلال ست شهور أول ما تخلص أوضة النوم وتجيب الشبكة اللي تختارها كريمة .
قال فاندام : يبقى نقرى الفاتحة ... وبنهاية الفاتحة انطلقت الزغاريد من نعمة وابتسام ونسمة وعاليا بالتناوب .
أما هو فكان ينظر لها نظرة بألف وعد ... وعد بالأمان ... وعد بالاحترام وأخر بالسكينة ورابع بالثقة وأول الوعود وأخرها ... الحب .
YOU ARE READING
مصابيح فى حنايا الروح الجزء الثانى من سلسلة طعم البيوت
Romanceقالوا في الشدائد لا يبقى الا الرجال قالوا في الفرصة لا يقتنصها الا الاذكياء قالوا في المواجهة لا يدخلها الا الواثقون قالوا في الحب لا يخضع الا العشاق قالوا في الرغبة لا يصمد الا الأتقياء قالوا في المحنة لا يستمر الا الاقوياء وقالوا في الروح لا تظلم...
