မူကြိုကျောင်းက ဗီလိန် [ မြန်မာဘာသာပြန် ] { Completed }

《 Chapter 17 》

ထိုလူက အမျိုးသားနဲ့ အမျိုးသမီးပိုက်ဆံအိတ်တွေအပါအဝင် ပိုက်ဆံအိတ်တွေ မြောက်များစွာရှိနေတဲ့ အံဆွဲတခုကို ဖွင့်လိုက်တယ်။

တချို့အိတ်တွေထဲမှာ ID ကဒ်တွေနဲ့ ပိုက်ဆံတွေရှိနေဆဲပင်။

ထိုလူက ပိုက်ဆံကိုယူပြီး ID ကဒ်တွေကိုတော့ သူ့ခုတင်အောက်ရှိ ကြမ်းခင်းကြွေပြားအောက်မှာ ဝှက်ထားလိုက်တယ်။

အလွန်ဟောင်းနွမ်းနေတဲ့ မိုဘိုင်းဖုန်းတလုံးကိုကိုင်ထားရင်း hot search ထဲမှာ ဖော်ပြထားတဲ့ လူငယ်လေးကို သူရှာဖွေလိုက်ပြီး ၎င်းရဲ့ပုံပန်းသွင်ပြင်နဲ့ မူကြိုကျောင်းလိပ်စာတို့ကို မှတ်သားလိုက်တယ်။

ဆဲလ်ဖုန်းအဟောင်းကို ရေထဲပစ်ချလိုက်တော့ ၎င်းရဲ့မျက်နှာပြင် မည်းကျမသွားခင် အကြိမ်အနည်းငယ်လောက် တဖျတ်ဖျတ်ဖြစ်နေကာ သက်တမ်းကုန်ဆုံးသွားတော့တယ်။

ထိုလူက စားပွဲပေါ်က CD တွေအားလုံးကို အိတ်တလုံးထဲထည့်ပြီးတဲ့နောက် တင်းကြပ်စွာ ထုတ်ပိုးထားတဲ့ ပစ္စည်းတခုကို ဗီရိုထဲကနေ ထုတ်လိုက်တယ်။

နောက်ပြီးရင် သူလုပ်ရမှာက ဇီကျင်းမြို့ကိုမောင်းသွားဖို့အတွက် ကားအနက်တစီးထွက်ရှာဖို့ပဲ။ [ T/N : ကားအနက်ဆိုတာက လိုင်စင်မဲ့၊ တရားမဝင် taxi ကိုပြောတာပါ။ ]

ရှန်မုအန်းတယောက် မူကြိုကျောင်းမှာ hot search ကြောင့် ပိုပြီးတော့တောင် ထင်သာမြင်သာဖြစ်လာရပြီး သူတို့ကလေးတွေကို ကျောင်းလာပို့ကြတဲ့ မိဘတွေတောင်မှ သူ့ကိုမစဘဲ မနေနိုင်ကြလေဘူး။

ဒီအဖြစ်အပျက်ရဲ့ဦးစီးဦးဆောင်သူတွေထဲက တယောက်ဖြစ်တဲ့ ကျီးကျီးက ရှက်ကိုးရှက်ကန်းဖြစ်မနေပေမဲ့ သူ့အဖေကတော့ ဒါကို ရှင်းရှင်းလင်းလင်းကြီး သိနေခဲ့တယ်။

ရှောင်းချီ ဗီဒီယိုကို ကြည့်လိုက်မိတဲ့အချိန်ကတည်းက ဒါကိုစတဲ့သူက သူ့သားဖြစ်မှန်း သူသိနေခဲ့တယ်။ ဒီကလေးက ဆရာရှန့်ကိုဖက်ထားပြီး လွှတ်မပေးချင်ဘူးလေ။ အဲ့ဒါကြောင့် ဒီလိုတွေဖြစ်ကုန်တာပဲ။

ရှောင်းချီ အတော်လေး ကူကယ်ရာမဲ့သလို ခံစားနေရပြီး၊ ရှန်မုအန်းကို တောင်းပန်ဖို့ ကျီးကျီးကို သူဖိအားပေးခဲ့ပေမဲ့ ရှန်မုအန်းကတော့ ဒီအတိုင်း ဘာမှမဟုတ်သလိုထား,ထားလိုက်တယ်။ ကျီးကျီးကိုယ်တိုင်က သူဘာအမှားမှမလုပ်ထားမိတာကြောင့် တောင်းပန်စရာမလိုဘူးလို့ ထင်နေတာဖြစ်တယ်။