مثلث الحب

البارت الاول

هاتسبنى طب ليه طب قولى عملت انا ايه؟

حازم بغضب: رايا على فكرة انا مبهزرش

رايا ببرود: طالما انا طلعت وحشة اوى كدا فى نظرك مكتشفتش دا ليه من بدرى؟ ليه دلوقتى؟ ليه عايز تسبنى قبل كتب الكتاب بشهر؟! ليه علقتنى بيك سنتين خطوبة وفى الاخر طلعت واطى اوى كدا

حازم بعصبية: ايه واطى دى ما تحترمى نفسك، وبعدين وفيها ايه يعنى انا حاسس انى معنتش مشدودلك زى زمان واحنا ولا اول ولا اخر اتنين يفركشوا مع بعض

ضحكت رايا ببرود وقالت بسخرية:

- لا فيها وفيها كتير اوى كمان، مش عشان الهانم اللى هتسيبنى وتخلع علشانها تطلعنى وحشة اوى كدا

وقربت منه ببرود وقالت:

- اصل دى مش من صفات الرجولة ابدا .. انت متعرفش انت نزلت من نظرى قد ايه يا حازم

حازم بتوتر: قصدك ايه

رايا بإشمئزاز وقرف منهم:

- انت فاهم قصدى كويس اوى انا مش غبية يا حازم عشان ملاحظش نظراتك انت واللى المفروض انها بنت عمى من ساعت لما هى رجعت من السفر

حازم فضل باصصلها بصمت وهى كملت:

- انا مش عارفه ازاى انت كنت بتدخل بيتنا وتاكل وسطنا ومبتصونش اهل البيت اللى عملت معاهم عشرة؟!

انت مصونتنيش يا حازم ولا حتى احترمت ابويا اللى فاتحلك بيته ومأمنلك عليا .. بس صدقتنى هتندم اوى انك سبتنى مش غرور منى لا .. لانى واثقة مليون فى الميه انك مش هتلاقى واحدة فى اخلاصى وطيبتى ولا هتلاقى واحدة تصونك زيى .. بس انت بكل غباء رميت النعمة من ايدك و عمرك ما هتعرف تستردها تانى

• روحت البيت وانا جوايا كسرة وقهرة، منكرش انى بحبه وقلبى اتعلق بيه بس هتخطاه و همحى كل حُبه من قلبى .. واللى انا متاكدة منه انى هتعافى من الجرح والالم اللى جوايا دا بسرعة لانى طول عمرى معودة نفسى ان الغدر والخيانة ممكن يجى من اقرب شخص ليا .. ودا اللى حصل عشان كدا مانهرتش قدامه بس للاسف اجى صعب لانه اجى من اكتر شخصين عُزاز عليا من بعد ابويا

امانى .. امانى دى اللى متخيلتش انها ممكن تعمل فيا كدا .. دا غير انها بنت عمى كانت صديقة طفولتى

بس من حسن حظى انى بلاحظ اى حاجة حواليا وبركز فيها جدا ودا اللى خلانى مستوعبة ومستنية اليوم اللى هيتخلى عنى فيها عشانها

علطول كنت بلاحظ نظراتهم من تحت لتحت ومفكرين ان محدش كان بياخد باله منهم بس انا كنت بلاحظ وكنت بتوجع اوى

كنت بتوجع لان مفيش اى مبرر لخيانتهم وكسرتهم ليا و خصوصا هى لان انا كنت دايما مؤمنة ان الراجل ممكن فى اى وقت يخون ويرجع يندم بس بعد فوات الاوان بس صاحبة عمرى وبنت عمى

هو دا العهد اللى اتعهدناه اننا هنفضل طول عمرنا فى ضهر بعض وسند لبعض!

فعلا زى ما بيقولوا ( الخيانة مبتجيش غير من اقرب الناس اليك )

يتبع

بقلم_أية_الموافي