" အရိုးအက်သွားတာ ၊ သုံးလလောက်ကျောက်ပတ်တီးစည်းရင်ရတယ် "
" ခွင့်က တစ်လတည်းရတာလေ..!"
" မင်းဦးလေးကိုသွားပြောလေ။ လက်နာလို့နားချင်တာကနည်းနည်း ဟိုကောင်လေးနားကပ်ချင်ချင်တာကများများ.. ! "
Screen မှ Scan အားကြည့်ကာကျော်ဇေယံထွဋ်မဲ့နေသည့်ကြားက၊ဆရာဝန်၏စကားကြောင့်ပြုံးမိသွားသည်။ ဖြစ်ခဲ့သည့်မတော်တဆဖြစ်ရပ်တွင်အနည်းနှင့်အများထိခိုက်မှုတွေရှိခဲ့ကြ၏။
နံရံကပ်TVမှလာနေသောသတင်းတွေမှာထိုအကြောင်းအရာတွေသာဖြစ်ကာ၊ပျက်စီးကာ၊လက်တလောပြုပြင်နေကြောင်းကိုသာချန်နယ်မျိုးစုံမှသတင်းထောက်ပေါင်းများစွာကရေပတ်မဝင်အောင်ပြောဆိုနေကြကာ၊ဖြစ်ရပ်တွင်ပါဝင်သောဆရာဝန်တွေမှာလည်းတမနက်လုံးဖြေရှင်း၍မနိုင်။
" ဒေါက်တာ သတင်းထောက်ကဆရာ့ကိုမေးခွန်းလေးမေးချင်လို့တဲ့ "
" လက်အရိုးအက်သွားလို့စကားမပြောနိုင်ဘူးလို့ပြောလိုက်ပါ ဗျ "
" ဆရာထွဋ်ကတော့လုပ်ပြီ.. !"
ကျော်ဇေယံထွဋ်သက်သောင့်သက်သာရှိသောအပြုံးကိုပြုံးပြလိုက်ကာ၊ဆုံလည်ထိုင်ခုံအားအရိုးအကြောဆရာဝန်ဘက်ပြန်လှည့်လိုက်၏။
" ၁၅ရက်လောက်နေရင်ပတ်တီးလာပြန်လဲလိုက်လေ "
" အိုကေ "
" ကိုထွဋ် တမျိုးတော့မထင်နဲ့ကွာ ငါမေးစရာလေးရှိလို့ "
သူငယ်ချင်းဆရာဝန်သည်ဘေးဘီပတ်ဝန်ကျင်အားလူရှင်းကြောင်းအရင်အကဲခတ်လေသည်။ စာရေးစားပွဲပေါ်စုံတင်ထားသောလက်တွေအားပူးကပ်ကာစိတ်အနည်းငယ်လှုပ်ရှားနေဟန်။
ကျော်ဇေယံထွဋ်၏သတင်းမှာအတွင်းသတင်းဆိုပေမဲ့၊မသိတဲ့လူကတော့မရှိသလောက်ပင်။ သဘောကျတဲ့လူရှိသလို၊ကဲ့ရဲ့တဲ့လူလည်းရှိ၏။ ကိုထွဋ်ကြားတာဖြစ်နိုင်သလို၊မကြားတာလည်းဖြစ်နိုင်ပေမဲ့သူ့ပုံစံကတော့အေးအေးဆေးဆေးပင်ဖြစ်သည်။
ချီးမွမ်းခြင်းဆိုချန်လှပ်လို့၊ကဲ့ရဲ့ရှုပ်ချခြင်းကိုအာသီသဖြစ်သောလူမှုပတ်ဝန်းကျင်တွင်ပုံမှန်ကိုအာခံလို့လောကဓံအားဆန့်ကျင်ရဲရအောင်ကိုထွဋ်ကိုဘာတွေကများခွန်အားပေးသိချင်မိသည်။
