سفرت 3 سنين بعد فرحي مُباشرةً، مكنتش بحب مراتي واتجوزتها غصب عشان ولدي عرف اني بحب واحدة تانية وكمان عشان خايف على الورث، جوزني بنت عمي اللي مات، مش عارف هقدر اتقبل مراتي ولا لاء بس اضطريت ارجع عشان اعمل مشروع في مصر واستقر في بلدي، المهم وصلت البيت وانا معتقد ان مراتي هتكون عند أهلها والبيت كله تراب بس اتفجئت لما دخلت البيت لقيته نضيف وفيه روح ، وكأني مشتاق بظبط ارجع عشان اشوف مراتي واعيش معاها، فوقت من كل دا على شكلها وهي خارجة من الاوضة ومتفاجأ بوجود بس بسرعة لقيتها بتبتسم بهدوء وتقولي :
_ حمدلله على السلامة يا أحمد.
بصت ليها شويا وانا مستغرب هي ازاي هادية كده وعايشة في البيت، اي واحدة غيرها كانت سابت البيت ومشيت منه بعد ما سبتها المدة دي من غير كلام، رديت عليها :
الله يسلمك .
دخلت غيرت وهي ماشاء الله حضرت الغدا بسرعة كبيرة، اتغديت وكان اكلها جميل اوي لدرجة اني قاعد باكل ومش عايز اقوم ، الحمدلله خلصت غدا ودخلت نمت وسبتها كانت بتنضف مكان الغدا.
تاني يوم صحيت وادركت اني مصحتش من ساعة الغدا بسبب تعب السفر، قومت استحميت وخرجت لقيتها محضرة الفطار وجنبيه كوباية الشاي بحليب اللي بحبها، الصراحة عجبني اوي انها عارفة انا بحب ايه ومش بحب ايه واهتمامها بيا، وكمان عدم عتابها على غلطة يمكن غيرها ميقدرش يغفرها ليا، فطرت وقلت ليها متدخلش الاوضة بتاعتي عشان مشغول في بحث والمشروع بتاعي، وهي نفذ اللي بقوله ومسمعتش ليها صوت.
فضل حالنا كده حتى بعد زيارات ولدي ليا والعيلة اني رجعت، المهم في يوم خرجت من الاوضة لاني حسيت بزهق من الشغل بتاعي، ولما خرجت لقيت هند قاعدة بتتفرج على برنامج باهتمام كبير، فضولي خدني اشوف هي بتتفرج على ايه ولقيته برنامج للاطفال والمواهب اللي عندهم، واول لما قعدت جنبها بدأت تحس بيا فهي اتخضت وانا حاولت اهديها وبقول:
_ اهدي دا أنا.
كانت لسه هتقوم بس مسكت ايديها ويمكن دي اول مرة من ساعة الفرح بقولها :
متحضريش حاجة انا بس زهقت شويا وخارج اقعد على التلفزيون وداخل تاني.
هي بصت ليا شويا وبعدها ابتسمت بهدوء وحركت راسها وقاعدة تتفرج على البرنامج بتاعها، معرفش ايه اللي خلاني اسألها :
- هو البرنامج دا ايه الاستفادة منه؟
صوتها كان هادي اوي ومليان فرحة وهي بتتكلم وكأنها طفلة وبترسم مستقبلها :
_ البرنامج دا بيظهر مواهب الاطفال وبيشجعهم يكملوا في الحاجة اللي بيحبوها.. ممكن اللي بيعرف يرسم اللي بيلعب كرتيه.. اللي عنده قدر يحسب كتير او اللي ذكاءه عالي.. المهم انه يظهر المواهب دي وممكن منهم يدخل مدارس كبيرة ويستثمر موهبته.
