رواية #نا_وضنوة_راجلي من تأليفي #هميلو
الحلقه (24) ,,
طبعا وصلنا لعند ليث مشا لحوش هل سناء وضيفه سليم في المربوعه وسناآ كانت راقده او زي ماتقولن هاربه من واقعها للنوم في عالم خاص بيها هي وبس ,, وبعد وقت طق باب الحوش وطلع سليم فتح والقيه الغندور محمود ,اااه راكن تهزبن ايواااه 😁
سليم باستغراب : محمود!!
محمود تنحنح وقال : اهلا ياسليم شخبارك.?
سليم بصدمة بسيطه : الحمدالله ,,انشاءلله خير في حاجه صايرة ?
محمود خط يده ورا راسه واليد الثاتيه في جيب سرواله وقال : لا شي مغير نبيك في موضوع هكي اذا تسمح ,#لهميلو
سليم سكت واحتار ايخششه ولا يوزعه وبصراحة استثقلها توزيعته وتحشم وقاله : تفضل خش ,,
وخش محمود وهو يسرع بخطواته وخش للمربوعه شاف ليث ولية كان سارح وخاط ايديه تحت احنكه وسارح وباين عليه مهموم ,ومحمود قرب نين فطنله ليث ,
محمود : السلام عليكم ,
ليث : وعليكم السلام ورحمه الله ,,
وخش سليم وعرف ليث بمحمود ومحمود عرف ان ليث راجل سناء وقرن حواجبه وزاد تأكد هو قبل عارف بس زاد تأكد وهضا اللي زاد الحقد والغيرة في قلبه ,, #لهميلو ,,
المهم ليث في عالم ثاني ويفكر في سناء وقلبه واجعه ,, وقال لسليم : ممكن انشوف هلي ياسليم ?
سليم اغتنمها فرصه وقال : اها هيا تعال جوا وخوذ راحتك ,
وشاف لمحمود وقاله : اسمحلي شوي بس ونجيك ,
وخش سليم ووراه ليث اللي قلبه بيبلط من السوق والخوف ان سناء اتسيبه ومشا ورا سليم ومنزل رلسه متحشم ,, وعمكن محمود ولعت في نار الغيرة وحس بروحه عاجز لانه مالهش حق يتكلم ولا بحرف ولا ? المهم خش سليم بليث للدار اللي فيها سناء وهمسله وقال : راهي راقده ,, مغير جيت جارنا لهتني انقولك اهي مراتك وواعيها وتفاهم معاها ,ونتمنى الموضوع مانعلمش بيه لان اختي عندي خط حمر ,هي حاليا مازالت ماحكتش شي ونامخليها علي راحتها لاني معودها تحكي بروحها ,,وربي يهديكم ,
ليث ماحكش ولااااا بكلمة مغير امنزل راسه وهو متضااايق وبعد عرف انها ماحكتش باللي صار كبرت في عينه وزاد حبها في قلبه ,,وطلع سليم وقرب من سناء اللي راقده وكان باين عليها الزهل وادموعها نازلات من عيونها ونزل علي ركبيه وقرب وجه من وجخها وهمسلها بحب : سنيوة ,, حبيبتي ,,حبيبة ليث ,
وباسها برقه وحنيه علي خدها نين تململت عمتكن سناء وفتحت اعيونها وتحساب روحها اتخيل وقالت : ااااه ياربي مانبيش نتخيله ولا يتهايالي فكني من صورته ياربي 😭
ليث بهمس : مش تخيل ياسنيوة انا معاك جديات ,
سناء فنصت وجت مقمعزه وقالتله : انت ? شن جيبك هنا ? عليش جيت ? 😔
ليث وقف وقمعز جنبها ومسك يدها بين ايديه وقاللها : انا عارف اني ظلمتك لما تجوزت وحده صغيرة وفرضت عليم عيالي وانتي تقبلتي الوضع وتعايشتي معانا لعند حبيناك ومعش نقدرو نستغنو عنك ,انا مرات انكون غلطت ومرات لا ,,بس اللي نعرفه اني سبب معاناة وحده نرات ادير في روحها حاجة لاسمح الله ,,ومانبيش انشيل ذنبها ,
سناء بدموع : انا بنعرف حاجه وحده بس ياليث ,
ليث : شنو ?
سناء : انت ليش ماسألت الجيران من شالك لمربوعه سالمين? وكيف انت مغما عليك واعتديت عليها ? كيف لواحد مغمى عليه وعلي قولتك مضروب يعتدي علي وحده هذي مش خاشه راسي راه ,😒
ليث : لكن لو شفتي شكلها ومنظرها وهي مخبشه وكدمات وقالن اني تخيلتها شروق ,
سناء : ليث وانت والمرحومه كنت تعامل فيها بقسوة وتخبيش وكدمااات ?
ليث : مستحيل ,,, كنت نعامل فيها برقه وحنيه وعمري ماغصبتها علي شي بقوة ,,كنا متفاهمين عالاخر ,😔
سناء بذكاء : وليش شمس اتقول انك اعتديت عليها وتخيلتها شروق وهي اتقول كانت تصارع في اندرتيكر ,😒
ليث : هاااه....لكن هي اتطوت علي روحها وكرهتني ..وحتي معش تحب اشوفني لاني درت فيها ال..
سناء : انا واثقه ومتأكده انهن يكذبن,,لو تصبر نين نجيبلك الدليل بس ,
ليث سكت وقال : لكن حاولت تنتحر وشمس اكثر شي اتحبه حياتها ,,!! معقوله يكذبن ? باهي عليش شنو السبب ,?
سناء تنهدت وقالت : ريت ياغالي نش بننفخك ,,بس انت خلم اي بنوته او مرا ,,واميده مهحبه بيك وخصوصا ان اختها ماتت واتقول ان هي اولا ببك مني نش عاوفه بس نا نش مطمنتلها لا عي ولا امها ولا العرسه اللي اسمها هند ,😒
ليث قرب منها وقال : يعني شنو توا ? اتروحي معايا ? والله مانحمل بلاك راه انتي ملكتيني ومعش نقدر انتنفس الا بيك راه ,, ملكتي قلبي واحساسي وشهد من مشيتك وهي تبكي وتعيط تبيك والله الله ,اتصلي وتأكدي ,,
سناء شافتلا وفكرت وخطرت علي خطه انما ايه كد👍 #لهميلو ,,, الهميل الشارد هميلو ,,
المهم لية علي اعصابه وقريب يبكي وسناء قارنه حواجبها وتفكر وبعدها قالت : لاهي نا عندي لكي عرض ,,او خطه زي ماتقول ,
ليث باستغراب : شنو هي ?
وحكتلا سناء علي خطتها وليث ايشوفلها باعجاب وفي نفس الوقت عحباته ان الغيرة هي اللي طلعتلها بالخطه وباس جبينها وهمسلها : ونا معاك نادام بترضي عليا وتروحي معاي ,
سناء : انشاءلله خير ,,اطلع احكي مع سليم لاني مازلت ماحكيتلاش ,, ولازم نقوله اني بنروح معاك ,
وليث حضنها وهي داخت من ريحة عطره ووقف طلع فتح الباب وناده سليم,, رواية نا وضنوة راجلي لهميلو ,,,وجا سليم علي صوت ليث وحكاله ان تبيه سناء وهو طامع بكرمهم ايروح بيها ,, وخش سلين عليها وحكتلا انها بتروح سليم لسناء قاللها : علي راحتك ياسنيوة ,,لكن لو ضايقك حد عنرك ماتقولي ماعنديش حد هضا خوشك ونا موجود وكرامتك .مصيونه ماتتردديش انك تجيني وتشكيلي انتي بنتي مش اختي را فاهمه ,
سناء حضناته وقالت بصوت مليان دموع : ربي يخليك ليا ياغالي ومايخرمني منك ولا من سندك ويفرحك باللي تتمناه يارب ,
وباسها علي راسها وطلع خلاها اتجهز روحها وعايشه الكلام كله جا في وذنها وفرحت ان سناء بتروح وحضنتها وهمستلها : ماتسلميش بالساهل هضا رتجلك وحوسك وعيالك يالهبله فاهمه ,
سناء : انشاءلله خير ,
وليث كان في المربوعه يشرب في فنجان القهوة ويهدرز مع سليم ومحمود اللي يقصقص فيه بطريقة غير مباشره ,, واستأذن محمود من سليم اللي دار روحه يبي منه ورقه ايديرها له من مركز الشرطه عشان بطاقته رايحه ,,اطرووح عاد ,وهو طالع كانت سناء في الممر ولابسه عبايتها واتمر في شنطتها وطبعا نسيو ايقولولها ان محمود في المربوعه انذهبت شيرتهم زيي ,, وهي وصلت لباب المربوعه وتخبط في محمود اللي بعد شافها اعيونه دمعو ونظراته كلهن ندم وحزن وسناء انصدمت رسمي ووخرت وهي مش مستوعبه ان محمود قدامها وللحظه تحساب روحها تخيلاته ,,لكن بعد حاول إيقرب سناء نادت بصوت عالي : لييييث ,
محمود نزل راسه وطلع وليث طلع القيها حاطه يدها علي صدرها ونفسها عالي وباين عليها الصدمة او الوجع وقاللها : كنك سنيوة شن في ?
سناء بصوت مخنوق : ن.نن.ن.نبي ه..ه.هه.هوااااء مخنووقه 😭
وليث قرب منها بيمسك الشنطه عليها وهي ارتخت وقبل طاحت عالسيراميك مغير تواجلها ليث في اخر لحظه ومسكها بين ايديه وهو منفجع عليها وقال : سنااااااء سنيووووه كنك حبيبي شن فيك ? 😳
سليم شاللهم الشنطه وقاله : حتي اول ماجبتها اغمى عليها خلينا انشيلوها للمستشفى ,,
ورفعها ليث بين ايديه وطلع بيها بسرعه وفتح باب سيارته وحطها في الكرسي الخلفي وركب في كرسي السواق وسليم ركب جنبه وطلعو عالمستشفى وطبعا شافهم محمود وركب في سيارته ولحقهم لانه شاف سناء وهي مغمى عليها وعلي قد ماكان مرايفلها بس بعد شافها حس بوجع في قلبه ,,,
انجو لفيلا ليث ,, شاهين غامتله وقارن حواجبه وخوته تنكدو وشهد عيطت نين رقدت وهي تبكي وشيماء غطتها ونوره حابتلهم عصريتهم في دار العيال اللي قاعدين فيها ,,, ونزلت وخلتهم ماخد عنده نيه في حاجه ,, وفارس قال : زعما عليش مشت ? غريبه شكلها كان حزين بكككل ,
شيماء : مش عارفه بس هي مستحيل تزعل بالساهل ,,اكيد في حاجه صارت نين طلعت ومشت لهلها ,
فراس : زعمك بابا ضربها ?
شادي خبط يده علي جبهته وقال : ياهمي بلاش غباء بابا ماعمرش مد يده علي ماما ولا نحن بيندها علي سناء ماعتقدش ,,
شاهين وقف وطلع من الدار ولحقاته شيماء ومسكاته وسألاته : شاهين لك فترة متغير شن فيك ?
شاهين : مافيش شي ,,لكن جية حني وخويلة شمس وهند نس مذمنتني لانهن جايبات شناطيهن ,
شيماء : عليش مستغرب ,,عادي ,
شاهين : لا مش عاديه ,,بعد ماتت ماما لا حني ولا خويله عمرهن جن زارنا وكانت خويله ديما تمشي لبابا في عمله او تزورنا وتروح لكن هالمرة بيقعدن ,,اكيده في حاجه ونا لازم نعرفها ,
ونزل والقي حنه وشني وهند ياكلن في مكسرات وشاهي وبيتزا وقدامهن فواكه ونوره ياعيني تخدم فيهن ومش ناجيه من هزايبهن ,,
شمس : خفي روحك يامرخيه وجيبياي عصير برتقال طبيعي بسرعه ,
نوره: حاضر ,
وخشت للمطبخ وهي تدعي عليهن وكان في يدها راهي طلعت عليهن قطعتهن بساطور اللحم ,, المهم ليث لاحظ فرحتهن وهن ماشافنش وعاود ركب لخوته خطير العيل هضا ايسير منه في الاستخبارات ولا 😂😁
وعند سنيوة ياحناتي وصلو بيها للمستشفى شالها ليث بين ايديه وينعليا من شكله وهو شايلها جنننننتل ياخياااتي 😍 احم ماعلينا وخش بيها عالاسعافات وخطها في غرفو الدكتور اللي مش قاعد طبعا ,,وبعد عركه وستين تهزيبه حا ايتراغش من بعيد وين كان ينسرف ماني عارفه ومسيبه مكانه تبيله فلقه نين يشعف ,,دكاتره اخر زمن 😒
المهم خش كشف علي سناء وطبعا قدام نظرات ليث اللي قريب يزقب عليه ومغطيها بالملليه وناقر عليها من الدكتور اللي قاس تبضها وجاب جهاز الضغط وقاسه لها ,,
الدكتور : شكله ضغطها هبط فجاءة لانه هابط واجد ,
سليم : ذمنا شن فيها ?
الدكتور : متجوزه ولا عازبه هي ?
ليث وهو ايصك علي سنونه : متجوووزه ,😬
الدكتور خربش بخطه اللي اتقول خط فقيه وقاللهم : لازم ادير التحاليل هذين وحنركبولها تغذيه لان شكله عندها سو تغذيه ,والتخاليل اديروهن بعد تكمل التغذيه ,
وشمروه وخشو علي سناء اللي الممرضه كملت ترميب التغذيه وطلعت وهي مازالت مافاقت ,,وقمعز ليث جنبها وسليم قال : ياليث ياريت اطمني في حاجه سايرة مضايقه سناء ?
ليث : صدقني نا عندي اختك بالدنيا ومافيها هو سو فهم وحينحل باذن الله ,
وطبعا مانن في عيون يقصقصن فيهم وشاف كل تحركاتهم بس فضل ايكون مش باين عليهم عشان مايشكوش فيه واكيده عرفتنه من ,😒 #لهميلو
المهم مر الوقت وفاقت سناء وطلعو بيها من المستشفى وسليم قبل بيمشي بروحه في تاكسي بس ليث اصر انه يوصله ,,وفعلا وصلوه وسناء رمبت من قدام بعد نزل خوها ومشا بيها ليث للفيلا واول ماوصلو قال لسناء : العيال اكيد حيفرحو برجوعك😊
سناء: ربي يسعدهم والله انحبهم واحد واحد خاصة شهودي , ,😙
ونزلت وهشو وهم ماسكيين في ايدين بعضهم وكان الوقت مغرب بس مازال ماأذن ,, واول ماخشو لقو سالمين ماسكه عصاة كناسه وتضرب ف...................
قراءة ممتعه 💋
#Hamelo ✒
