جميلتى

الفصل السادس والعشرون

فى دوار العشرى

حنين: تفتكرى عاوزنا فى ايه حاجه بخصوص القضيه

جميله: أكيد ...مفيش غير كده

حنين: طيب المفروض نروح امتى وهنقول لخالد وشهد ولا ايه

جميله: مش عارفه والله بس خلينا نروح وخلاص من غير مايعرفوا مش يمكن يكون حاجه تانيه غير القضيه

حنين: زى ايه مثلا
جميله : زى ان عم القمور بتاعك عاوز يشوفك ولا حاجه وواخدنى محرم

حنين: تفتكرى...بس ليه مكلمنيش هو ...لا لا تخمينك مش فى محله

جميله: بقولك ايه احنا هنفضل نسأل نفسنا كده كتير انا هكلمه اقوله عاوزنا ليه

امسكت هاتفتها وطلبت رقمه وانتظرته حتى أجاب

جاسر: دى الشاشه نورت والله بتطلبينى بنفسك ياجميلتى

جميله: وبعدين بقااا...انت ايه حكايتك بالظبط ..بص هو انا اصلا بكلمك عشان عاوزه اعرف انت عاوزنا فى ايه..وبعدين انت مش قولت بلاش نخرج او نتحرك كتير

جاسر: ايوه فعلا ...لكن انا هبعت اتنين يبقوا موجودين وانتوا جايين

جميله: تاااانى
جاسر: ايوه ياجميلتى ..تااانى

نظرت نحو هاتفها بقلق انه يثير شكوكها ويوترها بطريقته الجديده فى التحدث إليها

جميله: طيب نيجى امتى
جاسر: ياريت دلوقتى على طول يعنى

جميله: تمام مسافه السكه هنكون عندكم
جاسر: فى انتظارك يا...
جميله: جميله ...اسمى جميله وانا مش جميله حد

واغلقت هاتفها على الفور

صدم من فعلتها تلك الا انه ابتسم فهو يعلم انها متفاجئه منه وهو يشعر بالمثل يبدو انها ستجعله يفعل أشياء لم يفكر بها من قبل

فى احدى الدول الاجنبيه
صافى: يعنى ايه مش هتنزلى وبعدين معاكى ياسميه انتى هترجعى لاوهامك دى تانى يلا قومى جهزى نفسك يلا

سميه: قولت مش هنزل خلاص انا اكتفيت من القرف اللى احنا فيه ده واللى عاوزين يعملوه يعملوه يقتلونى بقا اهو يبقى ارحم من حياتى دى

صافى: سميه ...بلاش كده انتى مش اد الناس دى افهمى بقا لو حد فيهم عرف اللى بتعمليه ده صدقينى مهما تتخيلى مش هيبقى حاجه من اللى هيعملوه فيكى

كادت ان تتحدث الا ان صافى قاطعتها قائله
متقوليش حاجه ياسميه..اسمعى نصيحتى اعملى اللى بقولك عليه  وبعدين كمان انا عارفه انتى بتعملى ايه كويس اوى

سميه بعدم فهم: يعنى ايه ...تقصدى ايه

صافى: اقصد الصور والفيديوهات اللى سرقتيها والفلاشه اللى معاكى

صدمت سميه وشعرت بالضياع وقالت بصوت مهزوز
انتى......قصدك ايه

صافى: متخافيش ياسميه...انا مش هقول حاجه بس عاوزاكى تفضلى زى ماانتى بلاش تتصرفى بطريقه مختلفه عن عادتك فات الكتير صدقينى