ထိုနေ့နေရောင်ခြည်ကတောက်ပ၏။
ရာသီဥတုကလည်းသာယာ၏။
ဖြူဖွေးသည့်တိမ်စိုင်အဆုပ်အထွေးကြီးများကကောင်းကောင်ပြာနောက်ခံတွင် တောက်တောက်ပပလွင့်မြောနေကြသည်။
" အဲ့လိုကြီးကြည့်နေရင် မျက်စိတွေပြာပြီးခေါင်းကိုက်လိမ့်မယ် "
ကောင်းကင်ကိုတစိုက်မတ်မတ်စိုက်ကြည့်နေသောချမ်းမြေ့ကို လွန်းနောင်က ဖုန်းကြည့်နေရာကမော့မလာဘဲ လှမ်းသတိပေးသည်။
"အာ ဟုတ်ကဲ့ "
ချမ်းမြေ့လည်း မျက်တောင်အဖွင့်အပိတ်ခပ်ကြာကြာလုပ်လိုက်ရင်း လွန်းနောင်ကိုလှမ်းပြောသည်။
"အစ်ကိုလွန်းနောင်လည်း ဖုန်းဆက်ကြည့်နေရင်မျက်စိညောင်းမှာပေါ့ "
ထိုအခါ လွန်းနောင်က ပျားရည်ပါသောနို့လက်ဖက်ရည်အေးကိုစုပ်သောက်နေခြင်းအား ခေတ္တရပ်လိုက်ပြီး ဖုန်းကိုမပိတ်ချင်ပိတ်ချင်ပိတ်ကာ ဘောင်းဘီအိတ်ကပ်ထဲထိုးထည့်လိုက်ချေသည်။
လက်ရှိတွင် သူတို့နှစ်ဦးသားက ရေကန်ကျယ်တစ်ခုနံဘေးမှ လျှောက်လမ်းပေါ်ရှိခုံတန်းလျားပေါ်ထိုင်နေကြခြင်းဖြစ်သည်။
ယနေ့မနက် ရုပ်ရှင်ရုံက sci-fi အမျိုးအစားရုပ်ရှင်ပြသမည်ဆို၍ ချမ်းမြေ့က လွန်းနောင်များကြိုက်လေမလားဟူသည့်မျှော်လင့်ချက်ဖြင့် အတူကြည့်ဖို့ဖိတ်လိုက်ရာ တိုက်တိုက်ဆိုင်ဆိုင်လွန်းနောင်ကလည်းဤရုပ်ရှင်အတွက်လက်မှတ်ဖြတ်ထားတာဖြစ်၍ အတူကြည့်ဖြစ်သွားကြ၏။
ဤတစ်ကြိမ်နှင့် ဆိုပိတ်ရက်များတွင်သူတို့ရုပ်ရှင်အတူကြည့်ဖြစ်သည်မှာ လေး ငါး ကြိမ်ပင်ရှိပြီဖြစ်သည်။
အမြဲလိုလို ရုပ်ရှင်ရုံကအပြန်တွင် ဦးတည်ချက်မရှိဟိုဟိုဒီဒီလျှောက်သွားနေတတ်ကြပြီး မည်သူကမှအိမ်ပြန်ရန်အရင်စကားမစဘဲ ယောင်လည်လည်ဖြင့်တစ်နေကုန်သွားကြရသည်ကများသည်။
ကန်နံဘေးတွင် လူအတန်သင့်စည်ကားလျက်ရှိသည်။
ကလေးသူငယ်များက ဆော့ကစားပြေးလွှားသွားလိုက်
သက်ကြီးရွယ်အိုများက စကားတပြောပြောဖြတ်လျှောက်သွားလိုက်
လူငယ်စုံတွဲများက ဖြတ်သွားကြလိုက်နှင့်ရှိနေသော်လည်း
ချမ်းမြေ့နှင့်လွန်းနောင်တို့နှစ်ဦးက ခုံတန်းပေါ်တွင်တိတ်တဆိတ်သာ ထိုင်ရင်းရှိနေကြ၏။
YOU ARE READING
လျော့ရဲရစ်နှောင်
Randomခေါင်းမာသူနှစ်ယောက်ရဲ့ဇာတ်လမ်း။ pic crd to pinterest_ published date_17.2.2022 enjoy ur reading
