حن الدنيا ♥

15 والاخيره

يوم الفـاتحـة ..
السـاعه 8 وعيت ع اتصال فراس يصبح عليا وغسلت ونزلت صبحت ع العيله كلهم وفطرت ولبست البودري ولفيت ع حوايجي وهدرزت ع خوتي وبابا ولبسو وطلعو للفاتحه وانا من هنا توترت مش عارفه ليش وقعمزت بجنب وداد واريج يهدرزو عليا ونور وحور ف حوش هلهن وبعد شويه وقت وصلتني رساله
فراس : صابت صابت ونحسابها بتخيب لكن صابت مبرووك علينا يامراتي ياحبيبتي
انا : عيطت وقفت وقعدت نحضن ف وداد واريج اتزغرت وبدو الزغاريت فالحوش ويباركولي ونا بجد بكيت بكيت دموع فرح قسملي الله اللي نريده وعارفه روحي بنعيش وانتريح معاه وبكيت لانه مرو قدامي دكرياتي من وانا صغيره واكبرت فهالحوش وكيف بابا يدلع فيا ويناشب فيا ويزعل فيا ويفرح فيا وكيف ماما تخاف عليا وكل يوم بـ هديه وخوتي كيف كانو معاي وكيف ولو وكيف يحبوني ويعزوني لنقني بكيت لكن حمدت ربي لانه اخترت الشخص الصح وعارفته مش حيرضى فيا حاجه ومش حيزعلني ..وحضنت ماما وبكيت نا وياها مش هاين عليا انسيبها بروحها فالحوش وفنفس الوقت نبيها تتهنا عليا وبستها ع راسها ويديها وكرعيها وتحضن فيا وتبكي وشويه اريج قالتلي يبوك باتك وخوتك وانا طلعتلهم نبكي وحضنت بابا
بابا : عيونه دمعو وفرحان : مبروك ياروح بابا
انا : بسته ع راسه ويديه : بطوله عمرك وزهاك ياحبيبي ربي مايغيبك يادنيتي
سيف سحب سلاحه وقعد يفرغ وانا نبكي ونضحك حضنته وحضنتهم كلهم وباركولي وخشيت داخل قعمزت شويه وصوت سيارات وزغاريت وسلاح والعاب ناريه عرفت انه فراس وعمتي وجو وخشت عمتي تبكي والفرحه واضحه عليها وحضنت ماما وقعدن يزغرتن ويبكن
وسلمت عليا وحضنتني ووو
بعد شي ساعه روحت عمتي امينه ودخلت للمربوعه لفراس
فراس : ضحك ونزلت دمعته : مبروك ياروحي
انا : حضنته ونبكي : مبروك علينا
فراس: مسحلي دموعي : اششش متخافيش مش حنزعلك ف عمري كله وكيف ماعاملوك باتك وخوتك حنعاملك وحنعيشك ومنحسسكش بالنقص في ولا حاجه ومش حنضربك ولا نخونك وعد راجل والدموع مش حينزلو من عيونك إلا في وقت الفرح
انا : ابتسمتله : ربي يديمك ليا ويقدرني نحبك وانصونك ونعيش معاك ع الحلوه والمره ومش حنقولك لا ولا حنرد عليك ولا نخونك ومانرفضلك ولا طلب واللي تبيه حاضر
فارس : عارفك بنت بيتيه وبنت اصل ومايوم درتي غلط ربي يخلينا البعض ويبعد عنا كل شر
انا : اللهم امين
فارس : ابتسم : يلا بري البسي الفراشيه باش نمشو للمصوره حاجزتلنا عندها حور
انا : تمام
وطلعت من عنده والعيله يباركوله وبعدها ماما لبستني فراشيتي وركبت معاه و صورنا وضحكنا ودار بيا دوره فالبلاد وهدالي باقة ورد وروحنا ومشي اليوم كله حلو واللي بعده واللي بعده وجـي يوم المرواح اللي هو الحفله
اليوم الخميس .....
وعيت من الـ7 دوشت وفطرت وطلعت للمزينه انا ووداد واريج ونور وحور ف مزين تاني ..ومكلمتش فراس بكل وبدولي فالمكياج وطولنا وبعدها التسريحه طلبت شعري يكون مفتوح و فلو ولبسوني التاج الفخم هديه من ماما و الفيلو الفخم من فراس والكعب والشنطه الفخمه من وداد والطاقم الفخم من بابا وهدين ابسط هدايه قلتهم الباقي فالحوش تو تعرفو شني هما
لبست وراجيت وداد تلبس وطلعتلي
وداد : بسم الله ماشاءلله تهبلي
انا : ابتسمت : حت انتي مع بطنك وضحكت
وداد : ضحكت : الله غالب هي البسي سند وصل هوا وعمي
انا لبست وطلعتني وداد لسياره بابا لانه شرطت انه بابا يوصلني ويدخلني للصاله وفعلا وصلت ونزلت وبابا خششني للصاله وصورنا وطلع وانا فرحانه وبنبكي ومخلطه عليا ..جو يباركولي إلا ماما عارفتني بنبكي مكلمتنيش وصورت ورقصت وضحكت وجي وقت بيدخل فراس ..انا وقفت وغطوني ونشوف فيه نازل من الدروج ويشوفلي انا وبس لين وصل فيا رفع الطرحه من على وجهي وانبهر ضحك
فراس : محلاك حبيبي وباسني ع راسي بعدها خدي
انا : طالع تهبل بالتحليقه اهيا
فراس : مبروك علينا ياعمري
انا : يبارك فيك وقعمزنا وخدينا لقطات مع عماتي وماما ونساوين خوتي ورقصنا وقصينا التورته وقعمزنا شويه وطلعنا لدار بنصورو وصورتنا المصوره لقطات واجده ووقت بنروحو خشولي خوتي وماما وبابا انا هنا مقدرتش نمسكهم دموعي
ماما : تبكي : مبروك ياحبيبتي ياعمري بهناك يارب
انا : نبكي : يبارك فيك ياماما ولله مش هاين عليا انسيبلك الحوش بروحك
ماما : حتجيني قريبه مني مش بعيده يمي ..انوصيك حبيبتي كان شن صار بينك وبينه تعاليلي وكان شن صار ف حوش عمتك ماطلعيش الدوه لحد واعرفي شن تحكي وراك اتزعلي عمتك ولا تخلطي فيها ونبيك ف مجمع نساء تسمعي اكتر من تحكي وكتره الدوه مش باهيه واسمعي كلام راجلك وماتخالفيه خليك زي امك ياعيون امك انتي
انا : ان شاءلله ومشيت لبابا
انا : ياعيوني وحضنته
بابا : مقدرش يمسك دموعه : يابنتي الغاليه ماتبكيش قريبه مش برا لبلاد وانا عطيتك لراجل ومتخافيش وكان شن صار راهو عندك اب حي ماماتش وانت يافراس عطيتك بنتي راك اتزعلها ولا تغلط فيها مانسامحك كل شي الا زعلها وانا نعرفك بس انقولك الكلام هدا كيفي كيف اي اب يوصي ع بنته وجيبها ليا انشوفها بين مره ومره متقطعهاش عن بيت هلها امتا ماتبي اتجيبها وانحدرك ياولدي الا الضرب راك تمد يدك عليها راه ولله انا مش حنمسك اولادي عنك ونعرفهم وانشالله ربي ينور طريقكم ويهنيكم
فراس : ابتسم : ان شاءلله خالي بنتك فالحفظ والصون
انا سلمت ع خوتي وحضنتهم وقعدو يتأسفولي وبكو وبكيت معاهم ووصلت ف سراج
انا : ضحكت ف وسط دموعي : سيرجوو
سراج : حضني بالقوه : حن الدنيا قسمآبالله سامحيني ياوخيتي ع كل شي درته لك ولله لتوا نتفكر كيف كنت معاك ونحاسب ف روحي
انا : ياحبيبي مسامح دنيا واخره راك كبيدتي وصاحبي مش بس خويا انا ننسا ونسيت الايام هادو والحياة تغيرت وربي فالاخير وعاكم ع الصح وعرفتو غلطكم وانا مش زعلانه بالعكس نحبكم ربي يديمكم ليا ياعزوتي وتاج راسي انتم السند والظهر والقدر كله ربي يفرحكم في هالدنيا وشانكم ديما عالي
سراج : عارفك ياوخيتي ربي يخليك ويهنيك يارب وراك اتخبي شي مازلنا عايشين اللي يغلط فيك ارفعي التلفون بسس واحني مادام عايشين ماحدش يفكر يهينك او يقلل من شانك وهاا يافراس رد بالك عليها كل شي الا زعلها وانت عارف
فراس : ابتسم : ان شاء الله متخافش
انا : ان شاء الله ياعيوني ربي يطول في عمركم
بابا : هيا توكلو على الله
فراس : مسك يدي : هيا
انا : هزيت راسي : هيا
ونزلت الطرحه وركبنا فالسيارات موكب وعدلت مكياجي وطلعنا وكان الموكب مشش عااديي وخشيت لحوش انا وفراس وحكينا وكدا ❤️✨

وتمت حياتنا بـ فرح وسعادة
وبعد كم شهـر ولدو نساوين خوتي كل وحده بينها اسبوع او شهر ويومين
نور جابت ولد سموه عز الله
وحور جابت بنت سموها ريان
واريج جابت بنت سموها سحر
ووداد جابت ولد سموه عبد الله
وبعد سنـه ربي رزقني بـ بنت سميتها روح ومدلعها فراس مش متحمل فيها حاجه وفرحانين بيها هلي وعمتي
وهكـي كانت قصتـي وعشت احلا ايـامي معا فراس وبجـد راجل مافيش كيفه

....❤️❤️❤️❤️❤️❤️