تكملة الفصل 26 والاخير
ماهر طول الوقت مبتسم وقافل بوقه بس باين عليه انه مبتسم وقاسم لو كان متنرفز قراط شاف ابتسامة ماهر وفرحته المكتومه وشاط ...اضحك اضحك متخافش منتا اكيد الفرحه مش سايعاك وانتا شايف عمايل بنت ابنك فأبنى ...
ماهر :بقولك ايه حل عنى انا بالزات انا كلمتك ولا جيت جمبك انتا وابنك ؟ هو سبحان الله يسلط ابدان على ابدان وكل قوى ربنا بيوقفله الاقوى منه ...
وبعدين للصراحه بقا نجمه بنت ابنى مش بتضرب ابنك غير لما يكون عامل حاجه غلط ...اسأله كده عمل ايه وهتلاقى اسباب نجمه قويه ...
قاسم :قولهم يبنى ...قولهم انها مفتريه وانك معملتلهاش حاجه وبتضربك ظلما وعدواناً ...
اركان :انا معملتش حاجه هى بصت لعمو غريب وقالت بابا احسن اب فالدنيا ...قمت انا قلتلها لأ بابا انا احسن اب فالدنيا ...هى صممت ان باباها احسن اب وانا صممت ان بابايا احسن قامت ضربانى ...
قاسم زعق ورفع اديه بانتصار ..اهو ..اهو ..شفتو ظلم اكتر من كده ...الواد شايف بباه احسن اب تضربه على وجهة نظره ليه هى ...
بأى حق ...بأى عين ...
غريب بص لنجمه اللى قاعده تبنى فالبيت اللى هدته مره تانيه واول مابصتله رمالها بوسه فالهوا وهو بيبتسملها بحب وهى جاتله جرى اول ماشاورلها واترمت فحضنه وهو حضنها وضحك بفرحه على حبها ليه ودفاعها عنه...
ليل :نجمه ياحبيبتى متوضروبيش اركان واد عمك قاسم تانى عشان هو كبر وبقا راجل ومينفعشى راجل تضربه بت ...وكمانى انتى كبرتى ولازمن تبطلى العمايل بتاعتك دى وتهدى هبابه عشان انتى بنيه والبنيه مينفعش تسترجل كيف منتى عامله اكده ....
نجمه دفنت دماغها فحضن باباها وعملت نفسها مش سامعه وغريب وشوشها بحاجه وضحكو هما الاتنين سوا وبعدها طلعت من حضن باباها وشاورت لاركان اللى راحلها علطول وراحو عشان يلعبو مع بعض مره تانيه ولا كأنها لسه ضارباه تحت انظار قاسم اللى بيضرب كف بكف ...
ماهر :على فكره بقا بنت ابنى عندها حق وغريب ابنى فعلا احسن اب واحسن واحد فالدنيا ...
قاسم :مهو لازم هتقول كده مش ابنك ...مهو كل واحد لازم يشهد لابنه ...طب حتى شوف ...
ايه ياعبسلام ياحبيبي ابنك حبيبك احسن واحد فالدنيا ولا غريب ...
عبد السلام :غريب طبعا ...انتا عيل مجنون ...
الكل ضحك وقاسم حس بخيبة امل ودفن دماغه فحضن جواهر جمبه ..
سيليا :لأ بجد غريب يستحق ياخد لقب احسن اب فالدنيا ويتعمله تمثال كمان ...وللصراحه حتى نجمه بنته تستاهل يتعملها تمثال اجمل بنت فالدنيا ...
قاسم بقا ينقل عنيه بينهم كلهم وهو مديق عنيه وضامم بوقه ونادر شده عليه وحط دماغ قاسم تحت دراعه وسأله وهو بيهزله دماغه وبيضحك ...
قولى بقا لو اتعمل لغريب ونجمه تماثيل فميدان عام هيكون شعورك ايه وانتا معدى عليهم بعربيتك كل يوم وشايفهم قدامك ....
قاسم بص لأركان ابنه وشاف نجمه بتناوله بالجاروف على دماغه وبتشاورله بصباعها بصيغة امر واتكلم بغضب وهو بينتر دراع نادر من على دماغه....
ندرن عليا لو دا حصل لآخد ابنى كل يوم ونروح نقف قدام التماثيل دى انا قدام تمثال غريب وابنى قدام تمثال نجمه وناخد نفس جاااامد ...ونقوم مطلعين كيسين كبار مليانين طوب ونفضل نزقل فيكم لغاية مانردمكم خالص ....وبعد مانخلص هنحط تحت التمثالين اكل عشان كلاب الشوارع تيجى تاكل الاكل وبعد ماتاكل وتشبع تتبول عليكم وتمشى ...
الكل ضحك لدرجة ان سيليا كانت بتشرب عصير شنقت فيه ووشها بقا احمر زى الدم ونادر احتار وهو مره يهزها ومره يضرب على ضهرها وهى منتهيه من الضحك والشنقه ....
بعد ماخلصت وصلة الضحك على غريب حان موعد اخد الصوره الثانويه لكل العيله والكل اتجمع فالكادر بشكل هرمى ورصو الكراسى للكبار قعدو عليهم والاطفال قعدو فأول صف والشباب غريب ونادر وقاسم ويمان ومحمود واحمد والشيخ كامل وعمرو كل واحد واقف ورا مراته وحاطط دماغه على كتفها وعشان الرجاله اطول الكل كان باين بوضوح فالكادر واخدو الصوره التذكاريه التالته للسنه التالته بعد ماظبطو الموبايل يصور لوحده بعد كل عشر عدات ......
واللى هنا نصل لختام جزئنا الثالث من روايتكم فرعون واتمنى ان تكون نالت اعجابكم ...
واتوجه بالشكر لأختى وصديقتى وناقدتى الجميله اللى كانت معايا خطوه بخطوه (رانيا العطار ) كما اتوجه بأفدنه من اجمل باقات الزهور لحبيبة قلبي رجاء ام خالد اللى تعبت معايا فالروايه دى واستحملت معايا وطول الوقت معايا وبتصبر على تعديلى وتصحيحى للروايه لآخر ثانيه ببال طويل وقلب كبير وكمان بشكرها على تعبها مع قراء الروايه وتعبها معاهم فتوفير اللينكات والارشاد للحلقات ...
كما اتوجه بالشكر لصديقتى ايمووو كمال على تعبها معايا وكمان الجميله صافى اللى صممتلى اجمل اغلفه رقيقه زيها ...
وفالنهايه بشكر كل اللى قرا الروايه وتفاعل وكتب كومنت جميل زيه اتحفر فقلبي قبل عقلى واتمنى ان اراكم على خير فى عمل جديد وكل عام وانتم بخير وعيد اضحى مبارك ....
وربما ..للحكايه بقيه ......
بقلم /ريناد يوسف رينوووو💖
لكم منى اجمل مشاعر الحب والتقدير وباقات الزهور 🌼🌻🌺🌹🌸💐😘😘
معلش ليا طلب صغير ...كل حد قرا الروايه ينزل رأيه فيها فرفيو منفرد ويقول عن الحجات اللى عجبته فالروايه والحجات اللى معجبتهوش وانا بتقبل النقد عادى ...اى تساؤل اى حاجه ملقتوش ليها تفسير او شفتوها غريبه ....كمان رأيكم بالحجات اللى عجبتكم واثرت فيكم ...الحجات اللى اتعلمتوها من الروايه او الدروس المستفاده ...هو ممكن يكون فنظر البعض طلب تافه لكن صدقونى فنظرى انا دا مكافئتى المعنويه بعد تعبى فالروايه ....
💖💖💖💖💖💖💖💖💖💖
