Days of Counting Camellia (Hiatus)

[33]' All paths to hell are paved with good intentions '

လူတိုင်းက အနှီဟိတ်ဟန်ကြီးလွန်းသော နဂါးနက်ကြီးသည် ဧကရာဇ်မင်းနှင့် ဆင်တူလွန်းလှပါသည်ဟု ချီးမြှောက်ခဲ့ကြပေမယ့် Alexander ကတော့ ထိုသို့မထင် ။ သခင်ဟာ အစစ်အမှန်မှာ ထိုကဲ့သို့အမျက်ဒေါသကြီးကာ စိတ်ကြီးဝင်နေသော နဂါးတစ်ကောင်မဟုတ်ပါဘူး ။ ဒါကို ဘယ်သူမှမသိတာက ဝမ်းနည်းဖို့ကောင်းပါသည် ။

Alexander မှာ အတွေးတွေကို အချိန်မပေးအား ၊ ဘေးကပ်ရပ်အခန်းမှနေ၍ သူ့အား လှမ်းကြည့်နေသော သခင်ထံသို့ လျှောက်သွားလိုက်တော့သည် ။

ထိုအခန်းမှာ တံခါးချပ်ဖြင့် မကာထားပဲ စာကြည့်ခန်းနှင့် တစ်ဆက်ထဲ ဆောက်လုပ်ထားသော သီးသန့်ခန်းတစ်ခုပင် ။ အခန်းအလယ်တွင် အစည်းအဝေးများအတွက် ကျွန်းစားပွဲဝိုင်းကြီးတစ်ခု ထားရှိလေသည် ။

အရှင်သခင်က သူ့အနားတိုးကပ်လာသော Alexander အား ကြည့်ကာ ခေါင်းခါရင်း ဆိုလိုက်၏ ။

Ash : " နံနက်စောစော သံချပ်ဝတ်တွေပါ မလိုပါဘူးကွာ "

Alexander မှာ မိန့်ဆိုလာသောစကားလုံးတွေကြောင့် အလိုလျောက် သူ၏ ဗိုက်စမ်းလိုက်မိသည် ။ အေးစက်စက် ပြောင်လက်လက် သံချပ်ဝတ်ကြီး ။

ဟုတ်သားပဲ ... အရှင်ခေါ်တော်မူတယ်ဆိုတာနဲ့ သူ အကျင့်ပါပြီး စစ်ဖိနပ်တွေပါ ကောက်စွတ်ခဲ့တာ ။

Alexander : " ဒါက ... အရှင့် ... "

Kai : " ဒါက အရှင့်ကို ကာကွယ်ဖို့ ကျွန်တော် သေချာပေါက်လုပ်ရမယ့် အလုပ်ပါ ဘလာ ဘလာ ဘလာ ... "

ပြောင်စက်စက်အသံတစ်ခုက Alexander အား ပိုမို အရှက်ရသွားစေ၏ ။ တည်ကြည်သောမျက်နှာ၌ နှဖူးကြောတွေထောင်ကာ နားရွက်များရဲသွားတော့သည် ။

Kai : " ဟက်ဟက် မင်းရဲ့စကားတွေ အလွတ်ရနေပြီ "

ငွေရောင်နှင့်အနက်စပ်သော ဝတ်စုံကို ဝတ်ဆင်ကာ သန့်ပြန့်ကြည့်ကောင်းသော အမျိုးသားသည် တောက်ပသောအပြုံးတို့ကို အမြဲပန်ဆင်ထားသည့် အကြံပေးအမတ် Ren Kai ဆိုတာ သိသာပါသည် ။ အသံဆာဆာနှင့်အတူ Kai တစ်ယောက် အခန်းထဲဝင်လာပြီ ။

သူ၏ မီးခိုးရောင်ဖျော့ဖျော့ မျက်ဝန်းတို့သည် ရွှန်းလဲ့ကာ ချောမောသောရုပ်ရည်သန့်သန့်ဖြင့် မမများကြား ရေပန်းစားမည့် ပုံစံဖြစ်၏ ။ သို့သော် ကျီစကားတတ်သော သူ၏ ပါးစပ်ကတော့ သူ၏ ပြစ်ချက် ။