الكبيره بقلم / لولو_محمد ( كامله )

الحلقه ١٤

((((((( الكبيره )))))))
#لولو_محمد
الحلقه ١٤

مراد / قولتيله ايه
امايا / انى كويسه و مش ناقصنى حاجه
مراد / الراجل اللى انتى ريحاله ده واحد من اهم زبايني مش هوصيكي
امايا تهز راسها مراد يقوم يمشي امايا تعيط
البنت / انتى بتعملى ايه عاوزه عنيكي تورم
امايا / انا مش عاوزه اروح
البنت / اول مره يعني و لا ايه هو احنا هنفضل فى الهم ده لحد امتى اناديلك مستر مراد
امايا / خلاص خلاص عشان خاطرى خلاص
البنت / ايوه كدا اعقلى و بطلى الهبل ده و احمدى ربنا على اللى انتى فيه امال لو شوفتى البنات التانيه و نوعيه الزباين اللى بيروحولهم اعقلى كدا و بطلى هبل
امايا / طب انا جعانه
البنت / هتاكلى هناك هناك هتلاقى الاكل النضيف كله
امايا / ماشي
امايا تعانى انها توقف عياط البنت تنفخ و تروح تفتح شنطتها و تطلع باكو بسكوت باقى فيه واحده
البنت / كليها مش خساره فيكي
امايا تاخدها و تاكلها كانها ما شافتش الاكل فى حياتها
.........................
فى شركه كبيره
ياسمينا تدخل و منصور وراها تروح ناحيه الريسبشن
ياسمينا / لو سمحتى فى حجز باسم ياسمينا محمد الجمل
البنت تبص فى الكومبيوتر
البنت / ايوه الكورس هيبدا كمان عشر دقايق فى قاعه سى هناك
البنت تشاور على مكان منصور يبص عليه من بعيد البنت تطلع شنطه مايك اب
البنت / دى الأدوات اللى هتحتاجيها
ياسمينا / ميرسي ... ادخل دلوقت و لا استنى هنا و لا
البنت / لا طبعا اتفضلى
ياسمينا تبتسم و تمشي و منصور وراها ياسمينا تروح تشوف مكان فاضي و تقعد و منصور يبص على شباب و بنات ماليين المكان ياسمينا تشوفه تروحله
ياسمينا / هو انت هتفضل واقف كدا
منصور / انتى هتعاملى مع الناس دى
ياسمينا / مالهم يعني هنقى الناس اللى بتدرس معايا مثلا
منصور / عيال بسلاسل و حريم مايصه انتى غيرهم
ياسمينا / انا جايه لهدف اهلى عارفينه و الكبير موافق عليه مش جايه بارتى يعني
منصور / هستناكى بره
ياسمينا / براحتك
منصور يطلع بره يلف الشركه و يروح الريسبشن
منصور / من فضلك
البنت / افندم
منصور / هو الكورس اللى فى سى هيخلص الساعه كام
البنت / الساعه تلاته او تلاته و نص بالكتير
منصور / والله !! طب تمام انا اصلى جاى مع الانسه ياسمينا اللى لسه داخله ممكن استناها هنا
البنت / اكيد يا فندم اتفضل
منصور يبتسم و يروح يقعد فى جنب كاشف القاعه سى و سامع صوت الضحك اللى طالع منها و متابع الباب و اى حد بيتحرك
...............
فى سرايا الزنايته
هند تدخل شايله صينيه شاى تحطها وسط فاطمه و فاتن و انتصار و خديجه تدخل وراها شايله صينيه عليها بسكوت و قراقيش
هند / بس صدقتيني لما قولتلك و لا هتتصل و لا هتعبر
خديجه / ما نجاه قالتلك كانت نايمه
هند / نايمه ايه لحد دلوقت ما تنقطنيش بقي يا خديجه انتى كمان
انتصار / وحدوا الله فى ايه يمكن صحيت متاخر ما لحقتش تكلمك المهم انها بخير و خلاص
هند / هو انا يعني مش عارفه اختى اقطع دراعى من هنا ان ما كانتش عملتلها مصيبتين تلاته لحد دلوقت ومختار طبعا هيغطى عليها
فاطمه / ههههههههههههههههه اهدى و اشربى الشاى و ما تقدريش البلا قبل وقوعه
نوسه تدخل و وراها رحمه
فاطمه / اهلا
نوسه / ست الكل ازيك ... ازيكوا يا قمرات اما جيتلكوا معايا شويه موديلات قسما بالله ما تلاقوها الا عندى
فاتن / اقعدى و فرجينا
انتصار / هى رحمه ما راحتش المدرسه النهرده ليه
نوسه / هى دى وش علام بلا هم دا انا محمياها و مسرحالها بالعافيه
فاطمه / بجد الكلام ده يا رحمه
رحمه تبص لنوسه و تسكت
فاطمه / انا بكلمك يا رحمه
نوسه / عشان تصدقيني لما اقولك ما بتكبرش لحد
فاطمه / هو انتى يا حبيبتي مش عاوزه تروحى المدرسه 
رحمه تبص لفاطمه و تبص لنوسه نوسه تضربها
نوسه / ما تردي على ستك يا بت
رحمه / لا مش عاوزه
فاطمه و انتصار يبصوا لبعض
انتصار / بقولك يا نوسه
نوسه / اؤمرى يا ست الكل يا وش السعد
انتصار / لو رحمه مش عاوزه تتعلم ما تخليها معانا هنا تساعدنا اديكي شايفه الكل يا فى المدرسه يا فى الجامعه
نوسه / يا لهوى دا انا اخدمكوا بعنيا
فاطمه / يا اختى كفايا عليكي شغلك هى رحمه كفايا
نوسه / اقول لابوها
فاطمه / طب اقعدى فرجينا جبتلنا ايه و انا هطلع اجبلك الفلوس من فوق تعالى سنديني يا رحمه
نوسه / يا ستى بلاها خالص مش مستاهله تتعبى روحك
فاطمه / لا انا كدا كدا ليا دوا فوق هطلع اخده
نوسه / بالشفا
نوسه تقعد تفتح الشنطه و فاطمه و رحمه يطلعوا فوق
فاطمه توطى على رحمه
فاطمه / انتى مش عاوزه تروحى المدرسه ليه يا رحمه ما نفسكيش تبقي دكتوره زى عمتك مريم و لا مهندسه زى عمتك هند
رحمه / نفسي بس ابويا بيقول مفيش فلوس و نوسه بتقول انها محتاجانى فى الشغل
فاطمه / يعني اخواتك كمان ما بيروحوش المدرسه
رحمه / اخواتى بيروحوا بس انا لا
فاطمه تفتح باب الاوضه و تدخل
فاطمه / انا وعدتك لو جيتي مستحميه و متسرحه هديكي حاجه حلوه
رحمه تبتسم فاطمه تفتح الدولاب و تطلع شكمجيه و تطلع منها خاتم
فاطمه / خدى يا رحمه
رحمه / دا عشانى !!!
فاطمه / مش انا وعدتك
رحمه تاخد الخاتم و تلبسه و بعدين تقلعه و تديه لفاطمه
فاطمه / مش عاجبك و لا ايه
رحمه / لا عاجبنى بس لو اخدته اخواتى هياخدوه منى زى ما اخدوا الفستان اللى اديتهونى المره اللى فاتت
فاطمه / مين فى اخواتك اللى خدته
رحمه / وفاء
فاطمه / امال ده فستان مين
رحمه / وفاء بس سابتنى اللبسه عشان انتى حلفتى لو جيت بهدوم وحشه تانى لا هتدخليني و لا هتدخلى مرات ابويا
فاطمه / خدى الخاتم و لو حد خده منك هيبقي ليا كلام تانى معاهم
رحمه تاخد الخاتم
فاطمه / تعالى ننزل تحت بقي نشوف مرات ابوكى جابتلنا ايه المرادى
رحمه تبتسم و تنزل مع فاطمه
.......................
فى الجامعه
نجاه قاعده فى جنب فى مدرج و حواليها بنت من كل ناحيه و باقى الدفعه بتخرج من الباب
بنت ١ / انا ما فهمتش حاجه من المحاضره دى هم يعني عاوزين ايه من الاخر
نجاه / يا لهوى ما الراجل بقاله ساعتين بيشرح توزيع الاقسام بيتم ازاى و كل قسم هتدرسي فيه ايه و توزيع الدرجات و التقديرات الراجل كتر خيره ما سابش تفصيله
بنت ١ / طب انا جايه اتعلم لغه ليه ادرس تاريخ و ادب بقي طب والله دى قله ادب
الكل يضحك
بنت ٢ / عشان تفهمى البلد اللى جايه اللغه دى منها ما انتى مش هتاخدى اللغه و تركنيها اكيد هتسافرى البلد دى و تتعاملى مع شعبها و لا ايه
بنت ١ / مين دى اللى تسافر؟ انا ! انتى ما تعرفيش الحج والحجه بقي انا جايه لحد هنا بالواسطه
بنت ٢ / الناس كلها طلعت ما تيجوا نروح نفطر فى الكافتريا
نجاه / مره تانيه انا لازم اروح
بنت ٢ / ايه الفصلان ده
نجاه / معلش والله اصل ابنى عمى موصلنى و ملطوع كل ده بره
بنت ١ / و سيباه لوحده بره يا قادره قومى قومى
بنت ٢ / استنى بس نسال فى التفاصيل المهمه ابن عمك ده نظامه ايه
نجاه / ازاى يعني
بنت ١ / تصدقى صح ازاى فاتتنى دى
نجاه / هى ايه دى
بنت ٢ / يعني يجيبك ماشي بس يمشي و تتصلى بيه يرجع و دا بما انك مغتربه و رجلك مكسوره انما يفضل يا كبدى مستنى لا دا الله يسهلوا بقي
بنت ١ / يا بت صفى النيه ما يمكن بيدرس هنا
نجاه / لا هو مخلص هندسه و زى ما قولتى مستنيني عشان انا غريبه و رجلى مكسوره
بنت ٢ / طب ما يمشي و يرجع يتلطع ليه
نجاه / هو يعرف انا هخلص امتى خلونى اطلعله بقي
بنت ١ / هو اكبر منك بقد ايه لانه اكيد بلطعته دى مش مرتبط
نجاه / وربنا ما قدرالكوا عدونى بقي
بنت ٢ / نعديكي ايه هو احنا قلالاه الزوق اوى كدا دا احنا هنوصلك لحد عنده بنفسنا
نجاه / فكره حلوه يلا سندونى
نجاه تقوم و البنتين يساعدوها
.......................
فى الشركه
منصور قاعد بره و كل شويه صوت ضحك يخرج من القاعه تليفونه يرن
منصور / و ليك عين تكلمنى
دياب / هههههههههههههه احنا مروحين
منصور / توصلها و تجيلى قسما بالله لولا انها حرمه كنت سدغتلها
دياب / حاضر عنيا
منصور / ما تتاخرش انا روحى فى مناخيرى
دياب / هههههههههه حاضر والله
منصور يقفل و يحط الموبايل فى جيبه باب القاعه يتفتح و ناس تطلع منصور يقوم يبص يلاقي ياسمينا قاعده مكانها و بتظبط حاجات فى الشنطه واحد يقوم و يروحلها و يوريها صور على موبايله ياسمينا تاخد الموبايل و تتفرج منصور يتعدل فى وقفته الشاب عمال يشاور على حاجات فى الصور و يضحك و يهزر و ياسمينا بتقلب فى الصور و تبص للشاب و تبتسم و بعدين تديله الموبايل و تقفل الشنطه و تقوم تلف تلاقى منصور واقف على الباب تروحله
منصور / مين الحلو
ياسمينا / انت واقف هنا بتعمل ايه
منصور/ هو انا جاى معاكى ليه
ياسمينا / تراقبنى مثلا
منصور / و انتى بتعملى حاجه غلط لا سمح الله
ياسمينا / ما لكش فيه و اتفضل استنى فى العربيه
منصور / انا مش السواق بتاعك عشان استنى جنابك فى العربيه انا هنا عشان اتاكد انك فى امان
ياسمينا / و الحلو اللى كنت بكلمه بالنسبالك بيمثل تهديد مثلا
منصور / و هو انتى فاكره ان اللى هياذيكي هياذيكى بسكينه و لا مسدس بس فى انواع كتير للاذى و الاشكال اللى حواليكي ما يجيش منها خير و يا ستى الحق عليا انى سالت اشبعى بيه
ياسمينا / شوفت بقي انك قليل الادب ايه اشبع بيه دى على فكره بقي هو كان
منصور / على فكره بقي ما يفرقش معايا ابقي قولى لاهلك انا ما يخصنيش
منصور يسيبها و يروح يقعد مكانه و كل شويه يبص عليها تدخل تقعد مكانها تانى يقوم يقف على الباب و كل شويه تلف تبص عليه اللى بره يدخلوا و يقفلوا الباب منصور يبص فى الساعه و ينفخ
......................
فى بيت مسعد
نوسه قاعده مع مسعد على سرير فى اوضه تدى مسعد الخاتم يقلبه فى ايده
نوسه / بتقولك ما دام كدا كدا هتسيب التعليم تروح تساعدهم فى شغل البيت
مسعد / و اتفقتى معاهم على كام
نوسه / اتفق معاهم دا ايه مش اعزز البت عشان يدفعوا عدل
مسعد / غبيه زى اللى خلفوكى و اللى تدى لبت خاتم زى ده هديه هتتكلم مع اشكالك فى فلوس دا هتبقي مسمار جحا اللى يدخلنا البيت ده و اللى فيه
نوسه / و عشان كدا هاخد هدير مش رحمه
مسعد / مش فاهم
نوسه / البيت بيشغى شباب اشكال و الوان و كل واحد فيهم يحتكم على شئ و شويات و البت هدير حلوه و فى سن جواز
مسعد / هى مين دى اللى فى سن جواز طب قولى هتاخدى مها مثلا
نوسه / مها ايه السوده الكوده دى اللى اخدها انت عاوزنى اطفشهم البت هدير صغيره و عودها ملفوف و دحكتها
مسعد / دول صعايده يا نوسه الكلام ده
نوسه / صعايده مغاربه الراجل راجل ما يشوفش فى الست غير ضحكتها و مشيتها و انت سيد العارفين و بعدين هو البيت هنا فيه بت واحده احنا نرمى الصناره و السمك هيجيب بعضه و بعدين هو اللى البت رحمه تعرف تاكل عقله هتغلب فيه هدير
مسعد / و المدرسه
نوسه / خدنا ايه يا خويا من التعليم غير وجع القلب
مسعد / دلوقت خدنا ايه من التعليم الله يرحم النواح اللى عملتيه لما قولت اطلعها من التعليم
نوسه / عاوز تخدمها فى شقه عزاب يا ناقص
مسعد / كانوا خلايجه يا مره سو
نوسه / اه خلايجه اه ... ياخدوا البت لحم و يرموها عضم انت خسران حاجه انما دول ما لهمش فى الحرام و بيتاقلوا حريمهم بالدهب
مسعد / بقولك ايه انزلى من على نفوخى
مسعد يقوم
نوسه/ على فين يا راجل
مسعد / انتى قولتى عوزانى فى كلمتين و قولتيهم هتعوزى ايه تانى
نوسه / اخص عليك يا ميسو بقي كدا برده ... ايه خلصت حاجتى من عند جارتى
مسعد / النهرده مش يومك
نوسه / خلاص هات الخاتم و لما يبقي يومى تاخده
مسعد / حاجى على طيرك يا نوسه بدل ما يطيرك و يجيب غيرك
مسعد يسيب الاوضه و يطلع بره
نوسه / من جمال امك اوى انا كان ايه بس اللى رمانى على الهم ده
..............................
فى الشركه
دياب يدخل منصور يقوم يقف
منصور / اتاخرت كدا ليه
دياب / هو انا جايلك من اخر الشارع
منصور / انا هروح اللم حاجتى و ارجع البلد الكائن اللى جوه ده ما ليش دعوه بيه و لعلمك الكورس بتاعها فاضله خمس دقايق و يخلص بس الهانم بتكدب و تقول انه هيخلص تمانيه مش تلاته و نص
دياب / طب اهدى بس و كل حاجه
باب القاعه يتفتح و الناس تبدا تخرج
منصور / شايف الاشكال السو
دياب / منصور
ياسمينا تطلع
ياسمينا / دياب ازيك الحمد لله انك جيت
منصور / الساعه معاك كام يا دياب جت تمانيه و لا لسه
ياسمينا / معاك عربيه يا دياب توديني مشوار
منصور/ معاهوش
ياسمينا / حد قالك قبل كدا انك بارد اوى
منصور / لا ما حدش قالولى بس انى قليل الادب
ياسمينا / اديني قولتلك
منصور / ما سمعتش
دياب / ما توحدوا الله يا جدعان انتوا جايبيني تصغرونى
منصور / الله يعينك عليها انا ماشي
منصور يمشي
ياسمينا / سم ... اخوك ازاى ده
دياب / انتى قولتيله ان معادك يخلص تمانيه
ياسمينا / قولتله يجي ياخدنى تمانيه عشان انا عاوزه اشترى شويه حاجات محتاجاها قبل ما اروح
دياب / لسه واصله امبارح و لحقتى تحتاجى حاجات على العموم يا ستى مفيش مشكله قوليلى ايه الحاجات دى و احنا نجبهالك
ياسمينا / لازم اختارها بنفسي
دياب / مفيش مشكله برده كنتى قولتيله كان هيروح معاكى
ياسمينا / انت اصلك ما شوفتش اسلوبه
دياب / حقك عليا انا اتفضلى شوفى تحبى تروحى فين و انا هاجى معاكى
ياسمينا / على فكره انا عارفه ان السلسله فيها جى بى اس يعني اكيد كلكلوا كنتوا هتعرفوا انا كنت فين و انى سبت الشركه و نزلت بس انا
دياب / بس انتى قررتى تعملى مشكله مع منصور
ياسمينا / انا ما كنتش اعرف انه هيستنانى و كمان مفيش داعى انه يلف معايا اكيد حاجه زى دى كانت هتضايقه يعني هو مش طايقني خلقه
دياب / معلش اصله بارد
ياسمينا / و قليل الادب كمان
دياب / و ماله يلا يلا عشان تلحقى تجيبي حاجتك
ياسمينا تمشي و دياب وراها بيضرب كف على كف
........................
فى شقه نجاه
منصور قاعد بياكل هو و نجاه و بنتين كمان الست بتخدم عليهم
نجاه / كفايا اقعدى كلى بقي
الست / هستنى فاروق اكل معاه
نجاه / طب احكيلى بقي ايه اللى حصل
منصور / بقولك ايه يا نجاه متسميمينيش على اللقمه انا طلعت بس عشان ما نزلش يمينك غير كدا كنت كلت فى رواقه مع الرجاله تحت انا مش جايلى حاجه من الهم ده
نجاه / كل ده ؟؟ طب ليه ايه اللى حصل
منصور / لما تبقي تروح تبقي تحكيلك و هى ما شاء الله عليها لا هتكدب و لا هتقص الكلام
نجاه / طب ما تحكيلى انت
منصور / ما بحكيش و ما تفتحيش السيره عشان ما تحرقيش دمى اكتر ما هو محروق
نجاه / بص انا عارفه ان ياسمينا ليها دماغ مختلفه كدا
منصور يسيب اللقمه بخنقه
نجاه / بس والله طيبه و قلبها أبيض
منصور / طيبه لنفسها قلبها ابيض لروحها انما انا لا راضي عن عمايلها و لا عن المكان اللى بتروحوا و مش فاهم اصلا الكبير ازاى يوافق حرمه تبعه تروح مكان زى ده
نجاه / ليه دول سالين عن المكان كويس هو انت شوفت ايه هناك
منصور / عيال مايله و حريم مايصه دا انا قاعد بره و هم جوه كل ضحكه ترقع فى ودانى و هى جوه وسطيهم بيبقي هاين عليا اقوم اكسر المخروبه دى على دماغهم
نجاه / ياسمينا متربيه كويس و ما يتخافش عليها ما تقلقش
منصور / شوفى بقول ايه تقولى ايه اقولك انا مالى ما تخصينيش اصلا تعمل اللى تعمله انا مالى
نجاه / طب كل كل روق دمك كل
منصور / استغفر الله العظيم يا رب شبعت عن اذنكوا
منصور يسيب الاكل و ينزل و يقفل الباب وراه
الست / شكلهم قفشوا جامد مع بعض
نجاه / ما هو ما بيحكيش حاجه
الست / ما احنا موجودين برده لا هيرتاح فى اكل و لا كلام
نجاه / لا لو على الاكل منصور ياكلنا و يحلى بالبنات
البنات تضحك
نجاه / هى مستفزة مش هنكر بس هو كمان طبعه حامى اوى برده دياب هادى عنه كتير
الست / كلى كلى ما تشغليش بالك دلوقت يتراضوا
نجاه / تسلم ايدك بصراحه الاكل يفتح النفس و يجرى الريق
الست / الف هنا مطرح ما يسرى يمرى
.......................
فى اوضه هند
هند بتكلم ياسمينا فى التليفون
هند / حاجات ايه اللى بتشتريها دا انتى واخده حاجات من هنا تكفيكي سنين مع انها حوار اسبوع يعني و ترجعى و لا الهانم مش ناويه ترجع
ياسمينا / انا اصلا ما كنتش اعرف انهم هيلزقولى كدا انا
هند / انتى ايه انتى فاكره نفسك فى البلد هتتحركى وسط ناس كلهم عارفينك هنا يا قلبي لو حد كلمك و لا بصلك الف واحد هيرده و يوقفه عند حده انما عندك
ياسمينا / المحل ده انا متبعاه من سنين و ياما طلبت منه اونلاين و بدفع شحن قد كدا و كان نفسي اخشه جدا فاكيد يعني اول ما انزل مصر هروحه يعني
هند / و احنا كنا هنمنعك بس نعرف خط سيرك عشان نامنه
ياسمينا / هتقتل و انا بشترى شويه مكياجات يعني ما تبطلوا افوره بقي
هند / ياسمينا حبيبتي احنا بنخاف عليكي
ياسمينا / و انا مش شايفه اى تهديد عليا على فكره
هند / طب كلتى كويس
ياسمينا / كلت الحمد لله
هند/ طب روحى ارتاحى و ياريت يعنى تراضي منصور
ياسمينا/ نعم
هند / ما هو مش هيشيط منك بالشكل ده من غير سبب يا ياسمين
ياسمينا / لا فى سبب طبعا فى انه قليل الادب و بارد و مستفز
هند / برده بتغلطى برده
ياسمينا / انتى لا شوفتى بيكلمنى ازاى و لا بيتعامل معايا ازاى دا الكبير اللى هو الكبير ما بيكلمنيش كدا
هند / الكبير مربيكي على ايده انما ده غريب عنك
ياسمينا / يا ستى انا مش عاوزه غريب يوصلنى شوفولى حد من الزنايته ايه العيله خلصت
هند / لا ما خلصتش ربنا يزيد و يبارك و فعلا الاسبوع الجاى اللى هيبقوا معاكوا كلهم زنايته بس هم مقسمين الايام بينهم عشان اشغال كل واحد و كمان عشان ما يترصدوش كلام كبير كدا هم فاهمينه
ياسمينا / وربنا اوفر
هند / طبعا و انتى بتخرجى من اوضتك عشان تعيشي معانا اللى عايشينه
ياسمينا / لا بخرج و بقعد وسطيكوا بس حضرتك اللى ما بتشوفينيش
هند / بتخرجى تقلبي الجد هزار و القاعده ضحك
ياسمينا / ايوه بنشر البهجه و بعم الفرح المكان
هند / هههههههههههههه ماشي يا ياسو المهم تاخدى بالك من نفسي
ياسمينا / تمام سلامى لكل اللى عندك بقي
هند / سلام
هند تقفل و تفرد ضهرها على السرير مختار يدخل هند تقوم تقعد
مختار / زى ما انتى انا جاى اغير و نازل تانى
هند / خير فى حاجه و لا ايه
مختار / حصلت خناقه فى الصاغه بس اتحلت الحمد لله كان سوء تفاهم و خلص
هند / ليه خير فى ايه
مختار / مسعد الترزى اتمسك بخاتم الحجه فاطمه بيبيعه اتارى عمتى ادته هديه لبنته النهرده طبعا هو يحلف و الرجاله تنزل فيه ضرب فالكبير هيجيبه تحت يراضيه و يعتزرله
هند / يعتزرله ايه دا راجل واطى بطه لسه مديه الخاتم للبت النهرده يقوم يقلعهولها و ياخده يبيعه
مختار / و هى بطه سهله برده ما هى عارفه انه هيبيعه و بعتاله التشريفه بذات نفسها بس لازم حد يلم و لا ايه
هند / بقي هى الحكايه كدا بس تصدق يستاهل انا اصلا بعشق بطتى دى تسلم ايدها
مختار / هههههههه طب عن اذنك بقي عشان اللحق الرجاله تحت
هند / ادخل انت بس الحمام و انا هجبلك الغيار بنفسي
مختار / يا بت بقولك الرجاله مستنيني تحت
هند / دماغك دى ما فيش فايده فيها ايه ما بتكبرش ابدا
مختار / و اشمعن انا بكبر و انتى عماله تحلوى و تصغرى كدا
هند / لا دا احنا اتطورنا كتير ما شاء الله انطق قول سارقها من مين
مختار / برئ يا بيه حتى فتشنى
هند / هههههههههههههه والله شكلك مش ناوى تنزل للرجاله
مختار / الرجاله
مختار يجرى على الحمام و هند واقفه بتضحك
.....................
فى المضيفه
مسعد / انا والله كنت هفك بيه زنقه هرهنه بس دخله مدارس و المصاريف تقطم الضهر و انا فى رقبتى كوم لحم
عباده / حقك عليا و يا سيدي ان كان على دخله المدارس فليك عندى تعليم رحمه لحد ما تتخرج من الجامعه عليا و هروح بنفسي ادفعلها المصاريف و اتابع مستواها مع المدرسه بنفسي
مسعد / رحمه !!!
عباده / رحمه دى روح الست ام عباده دى لو عليها تاخدها عنك خالص
مسعد / و احنا نطول يا سي عباده بس انت عارف السرايا هنا مليانه رجاله و شباب و غفر اللهم بارك يعني و احنا حريمنا ما تباتش بره انت صعيدي و عارف
عباده / ما هى عشان كدا ما اتكلمتش بس ما تقلقش امين هيظبطلها كل حاجه لبس المدرسه و المصاريف و مش بس كدا عربيه توديها و ترجعها لحد عندك
مسعد / دا كتير اوى يا سي عباده بس ما تاخذنيش انت و الحجه يعني كدا العيال عندى هيبصوا لبعض
امين / و هى رحمه ما بصتش لاخواتها لما راحوا المدرسه و هى لا
مسعد / هى اللى ما لهاش فى العلام و كانت بتزوغ من المدرسه قولتلها خلاص خليكي اتعلمى شغل البيت و اهى فى الاول و الاخر بنت اخرتها ايه يعني غير بيت جوزها
عباده / انا ما حبش الجهل كل الناس لازم تتعلم و يا سيدي ليك عليا اشدهالك بنفسي و اى تقصير منها انا المسؤل عنه و ان كان على اخواتها اللى معاها فى نفس المدرسه العربيه هتاخدهم معاها
مسعد / والله دا كرم كبير منك يا كبير مش عارف اقولك ايه
عباده يطلع المحفظه و يعد فلوس و مسعد متابعه عباده يدى الفلوس لامين مسعد يتلم
عباده / تروح مع مسعد تجيبوا رحمه من البيت و تنزلوا تشترولها حاجه المدرسه كامله و تروح بنفسك بكره توصلها و تخلصلها كل حاجه
امين/ عنيا
عباده / على بركه الله ... الاكل فين يا جماعه
غفير / حالا يا كبير
الغفير يجرى
عباده / منور يا مسعد
مسعد / دا نورك يا كبير
مسعد يبص الناحيه التانيه و يعوج بقه
.....................
فى شقه نجاه
ياسمينا / مش خارجه بكره اصلا عشان كدا قولت اخلص اللى ورايا النهرده
نجاه / طب ما تيجي معايا و ما تقلقيش عندى الساعه اتناشر يعني مش هنقلق منام جنابك
ياسمينا / ماشي قشطه اجى و اهو بالمره اتفرج على الجامعه فى مصر عامله ازاى زى ما بنشوفها فى الافلام كدا و لا
نجاه / اديكي قولتيها افلام
ياسمينا / بمناسبه الافلام معايا فى الكورس ناس اشتغلوا فى السينما و ورونى صور لشغلهم بجد انا مش عارفه جايين يعملوا ايه فى الكورس و هم بالمهاره دى
نجاه / اشطر منك
ياسمينا / ايوه انا اتعلمت من النت الاساسيات و عشان كدا محستش انى استفدت اوى بالسيشن بتاع النهرده بس مستر ياسر اكدلى ان الوضع كل مره هيبقي غير اللى قبلها و ان فى مستويات كمان اعلى بعد ده
نجاه / هتطلعى ايه بقي بعد كدا
ياسمينا / هطلع مصممه اسبيشيال ايفكت الحاجات دى مهمه جدا دا فى واحده بالمكياج بس تقدر تخليكي حد تانى قالتلى انها خدت دوره فى مكان كدا مع خبير تجميل لبنانى فى مصر بصراحه بفكر اقدم بس لما ارستق نفسي الاول فى الكورس اللى انا فيه
نجاه / ايوه يعني فى الاخر هتعملى ايه بكل ده
ياسمينا / بصي اللى اتكلمت فيه مع ابيه انى ابقي خبيره فى التنكر يعني بعد ما اخلص ممكن اخلى مثلا ابيه شبه الكبير مثلا او اخلى عبد الله شبه ابيه او هند تبقي شبه ديجا كدا يعني
نجاه / ايوه هنستفيد ايه بحاجه زى دى
ياسمينا / بصي خليكي انتى فى اللغات بتاعتك و سبيني انا مع مكياجاتى حبايبي انا بقي بفكر اقعد اتمرن على رسمه عين جديده مش هقولك
نجاه / انا بقول تصبحى على خير
ياسمينا / و انتى من اهله يا قلبي
ياسمينا تقعد قدام المرايه و نجاه تقوم تطلع بره
...................
فى اوضه منصور
دياب يدخل و فى ايده ساندوتش فول يلاقي منصور قاعد على اللاب
دياب / هتفوت العشا و لا ايه مش بعاده يعني
منصور / لما اخلص هبقي اكل
دياب / بتعمل ايه
منصور / بحاول ادخل السيرفر بتاع السنتر
دياب / سنتر ايه
منصور / لازم من هناك شكله مش عارف مش ماشيه معايا ليه المرادى
دياب / ممكن بس افهم انت بتعمل ايه يمكن اساعدك
منصور / بتفهم فى النت و الكومبيوترات قدى يعنى
دياب / طب ما تكلم عمك فتوح ما دام انا مش عاجبك
منصور / انا هروح بكره احاول من هناك نفعت نفعت ما نفعتش ابقي اكلمه
دياب / هناك فين ما انا مش فاهم
منصور / السنتر الشركه اللى ياسمينا هانم بتاخد فيها الزفت ده عاوز ادخل السيستم بتاعهم و احمل الداتا بتاعه المجموعه بتاعتها
دياب / انت شاغل روحك ليه ما اكيد سالوا كويس على المكان
منصور/ سالوا على المكان و اللى بيشتغلوا فيه انما سالوا عن العيال التوتو اللى معاها جوه الفصل و مقفول عليهم باب واحد
دياب / ااااااه طب قولهم يسالوا
منصور / لا وربنا ما حد سال غيرى
دياب / يا عم انت كلها يومين و ترجع البلد شاغل بالك ليه
..................