وردتي الشائكة

٤٠- لحظة حاسمة

تنهدت ورد بضيق ثم بدأت في تناول الطعام! و ابتسمت مروة بانتصار! و بعد لحظات أنهت طعامها و نهضت من مكانها بتعب و أدخلت طبقها إلى المطبخ ثم خرجت منه و اتجهت إلى السلالم حتى تصعد إلى صابر و لكن اختل توازنها قليلاً لتقف مكانها و كانت مروة تتابعها و فجأة و بدون أي مقدمات وقعت ورد على الأرض بقوة..
مروة : مكنتش متوقعة أنه مفعوله هيشتغل بالسرعة دي ! أكيد عشان حطيت كميه كبيره
ثم خرجت من مكانها و اتجهت إلى ورد الواقعة على الأرض و حركتها قليلاً و لكن بدون فائدة ، نهضت مروة بفرحة كبيرة
مروة : مش مصدقة و أخيراً خطتي نجحت خلاص كده مفيش ورد
ثم التفتت و قالت لها : قولتلك بلاش تدخلي مع مروة في لعبة لأني أنا اللي بكسب كل مرة .. غبية .. اتحملي بقى نتيجة غباءك .. اديني قتلتك أهو من غير ما حد يعرف ولا هيعرفوا أصلا .. لأن الدواء اللي حطتهولك في الأكل بيعمل سكته قلبية و بتبان أكنها موته طبيعيه .. كفاية وقتي اللي ضيعته عليكي
التفتت و ظلت تنظر للبيت ثم تحركت و لكنها قبل أن تخرج من البيت
: لا بس خطة ذكية
تسمرت مروة مكانها و التفتت ببطيء لتجد ورد واقفة أمامها تطالعها بابتسامة ساخرة
مروة بصدمة : إزاي !! إنتِ اكلتي من الأكل ده قدامي !
ورد : حقيقي أنا مشوفتش في غباءك .. أنا أكلت من الأكل فعلاً .. بس مش اللي إنتِ حطيتي فيه الدواء ده
مروة : إزاي ده حصل !
تقدمت ورد نحوها و قالت : طب يا ستي .. هقولك
فلاش باك ..
ظل صابر ينطق بكلمات غير مفهومه فلم تفهم ورد ولا كلمة
ورد : مش فاهمه حاجه عايز تقولي إيه طيب 
ظل صابر يحرك يده بغضب و حاول أن يتكلم و لكن بدون فائدة ، نظرت ورد إلى يده التي تتحرك و خطرت في بالها فكرة فذهبت سريعاً و أحضرت ورقة و قلم ثم عادت إليه و قالت
ورد : حاول تكتبلي اللي عايز تقولهولي
حاول صابر أن يمسك القلم و لكنه لم يستطيع ليسقط منه و لكن ورد أمسكت يده مرة أخرى و جعلته يمسك القلم و امسكت يده هي أيضًا و بعد محاولات كثيرة كتب صابر
" متاكليش حاجه .. مروة " نظرت ورد إلى الورقة بتساؤل و عدم فهم و قالت
ورد : ماكلش حاجه ؟؟ يعني إيه مش فاهمه
نظر لها صابر بقلة حيله و بادلته ورد بنظرات عدم فهم ثم نزلت من غرفة صابر بعدم فهم و اتجهت إلى المطبخ لتحضر طعامها و عندما دلفت إلى المطبخ قد لاحظت أن الطبق قد تغير مكانه قليلاً ، نظرت إليه بتعجب و أقتربت منه لتمسكه بين يديها و قربته من أنفها لتجد رائحته غريبة نوعاً ما ، أبعدت عنها الطبق سريعاً و جاءت لتعيده مكانه مرة أخرى و هنا لاحظت سائل غريب على الارض جثت على ركبتيها و تحسسته بيدها لتشعر بقلق كبير في قلبها ، نهضت سريعاً و بدلت الطعام الذي يوجد في الطبق بطعام آخر من نفس النوع و خرجت به و جلست علي الطاولة و لكنها صُعِقت عندما نظرت أمامها لترى انعكاس مروة في الزجاج واقفة في إحدى الزوايا و في ثواني قد استوعبت كل ما يحدث حولها و قد فهمت كلمات صابر و استمرت حتى لا تشعر مروة بشيء و تناولت الطعام و بعد لحظات وقعت على الارض حتى خرجت مروة
باك ..
ورد : كل مرة بفتكر إنك ذكية بس لا .. بتصدميني بغباءك !
نظرت لها مروة بغيظ شديد و اتجهت إليها لتمسكها من ذراعها بعنف
مروة : إنتِ إيه!! ليه كل ما أعمل حاجه بتفشل ليه
ورد : أبعدي إيدك عني .. ربنا بيوقعك في شر أعمالك يا مروة .. و لسه إنتِ مشوفتيش حاجه ده أنا هوديكي في ستين داهيه .. و المرة دي محدش هيخرجك من السجن !
ثم دفعتها عنها و جاءت لتخرج من المنزل و لكنها قبل أن تقترب من الباب ضربتها مروة بشدة علي رأسها ! لتتوقف مكانها و قد اختل توازنها لتسقط على الأرض مغشياً عليها !
_______________________________________