Love Between Serpent Beastman & Cuttie Hamster

🐍💫တပည့်သာလျှင် အထူးခြားဆုံးဖြစ်၏💫🐍/🐍💫တပည့္သာလွ်င္ အထူးျခားဆုံးျဖစ္၏💫🐍

အက်ဂါက သူ့အရှေ့မှသားရဲတစ်ပိုင်းလူသားအား လေ့လာနေ၏။ တော်ဝင်ကြင်ယာတော်ဖေဖေနှင့် ဒေါက်တာဂျွန်း၏ ဆက်ဆံရေးမှာ အလွန်ကောင်းမွန်လှ၏။ လွန်ခဲ့သည့်နှစ်အတွင်း ကြယ်မြို့တော်သို့ ဒေါက်တာဂျွန်းရောက်လာခဲ့၍ အက်ဂါက ထိုသူနှင့်တစ်ခါတွေ့ဆုံဖူးခဲ့၏။ ထို့အပြင် တော်ဝင်ကြင်ယာတော်ဖေဖေ၏တောင်းဆိုမှုအရ အက်ဂါကသူ၏သားရဲပုံစံအား ဂျွန်းကိုပြသကာစစ်ဆေးမှတ်တမ်းယူစေခဲ့၏။

 ထို့နောက်တွင်တော့ ဒေါက်တာဂျွန်းမှာ မြို့တော်နှင့်အလွန်ဝေးကွာသော ဂြိုဟ်တစ်ခုတွင် သားရဲများနှင့်ပတ်သက်သော ဆေးပညာများကိုလေ့လာရန် သွားခဲ့သည်ဟု ဆိုကြ၏။ ထိုသတင်းမှာ မှန်ကန်ကြောင်းအက်ဂါကိုယ်တွေ့သိလိုက်ရ၏။

"အရှင့်သား...အရှင့်သားအိမ်ရှေ့စံမင်းသားဟုတ်တယ်မလား" ဂျွန်းက သေချာအောင် ထပ်၍မေးလိုက်၏။ သားရဲတစ်ပိုင်းလူသားအများစုက သားရဲလူသားများစွာ၏ သားရဲပုံစံများကို ခွဲခြားနိုင်စွမ်းမရှိကြသော်လည်း ဂျွန်းက တပ်ထဲတွင်နှစ်သုံးဆယ်နီးပါး သားရဲလူသားများနှင့် ရောနှောနေထိုင်ခဲ့ရ၍ ခွဲခြားမှတ်သားနိုင်ရန် နည်းတစ်ခုကိုယ်တိုင်တီထွင်ထားခဲ့၏။ ထို့ကြောင့် သူ၏အမြင်အပေါ် လုံးဝယုံကြည်မှုရှိလေသည်။ အိမ်ရှေ့စံမင်းသား၏ သားရဲပုံစံအား သေသေချာချာ လေ့လာခဲ့ဖူး၍ သူမှားနိုင်စရာအကြောင်းမရှိပေ။
 
ဂျွန်းက တည်ငြိမ်နေဟန်ဖြစ်နေသော်လည်း သူ၏စိတ်ထဲတွင်မုန်တိုင်းထန်နေလေသည်။ အိမ်ရှေ့စံမင်းသားက အဆင့်ကျသားရဲဖြစ်သွားပြီ!!!!!

လွန်ခဲ့သောနှစ်ဝက်က အက်ဂါဒဏ်ရာအပြင်းအထန်နှင့်ပျောက်ဆုံးသွားကြောင်းသတင်းကို ဂျွန်းလည်းသိရှိခဲ့၏။ ထို့ကြောင့် မြွေအကြီးမျိုးနွယ် အဆင့်ကျသားရဲတစ်ကောင်တွေ့ပြီ ဟုသတင်းကြားတိုင်း ဂျွန်းကသွားရောက်ကာ စစ်ဆေးကြည့်တတ်ပြီး ယခုအကြိမ် မထင်မှတ်ပဲ​​အက်ဂါနှင့် တွေ့လိုက်ရခြင်းဖြစ်လေသည်။

ဂျွန်းက တုန်ယင်နေသောလက်ကို မထိန်းချုပ်နိုင်တော့ပေ။ အက်ဂါကိုကြည့်ကာ အကြီးအကျယ်ရှော့ခ်ရနေပုံက ရှုရှုအားဇဝေဇဝါဖြစ်သွားစေလေသည်။ မြွေကြီးအား ဂျွန်းကစိုက်ကြည့်နေ၍ ရှုရှုကမနေနိုင်တော့ပဲ အသံပိစိလေးဖြင့် မေးလိုက်တော့၏။ "မြွေကြီးက တစ်ခုခုဖြစ်နေလို့လားဟင်"